Yésus a belan élé figuier na a ve ñye’elan a lat a mbunan

Môse mondé, éyoñe zañ môs é lôteya, Yésus a siliki Nkôle Beolivier na a bulane Béthanie. Éko éziñe na a te lôt alu e be bemvôé bé Lazare, Marie, a Marthe.

Tyé ya Ngone Nisan é too melu 11 é lendéya. Yésus a beyé’é bé ba beta bulane Jérusalem, vôm a ye kandane ke e temple. Môs ôte ñwô a kandane bo ésaé nkañete jé e bôt été ôsusua na a bo abô’ô Pâque, a telé Mesimesa’ane ya awu dé, a mvuse ya valé, be tyi’i nye mejô a wôé nye.

Nté be ne zen be so’o Béthanie, Nkôle Beolivier be kele’e Jérusalem, Pierre a yen élé Yésus a nga yo’é tyé ya angô’é; nde a jô na: “A Rabbi, tame yen, élé ya figuier ô nga yo’é é vieleya.”​—Marc 11:21.

Ve amu jé Yésus a nga bo na élé été é mane kôt? A liti amu jé éyalan a ve be a jô’ô na: “Ma jô mia bebela na: Nge mi bili mbunan ô ne te bisô, mia ye bo saa ve jam da fombô figuier, ve mia ye jô ja’ane nkôle na: Kôlô’ô va a kele ku e mañ été, nalé ve boban; a jam ese mia ye sili meye’elan été a mbunan mia ye nyoñe de.” (Matthieu 21:21, 22, Mfefé Nkôñelan) A bifia bite, a beta ba’alane be jam a jôya be a lat a mbunan ô ne ngule ya bete minkôl.​—Matthieu 17:20.

Nde éyoñ a bo na élé é mane kôt, Yésus a liti amu jé é ne mfi ya bi ngule mbunan e be Zambe. A jô na: “E jam ese mi ne ja’é a meye’elan, buna’ane fo’o na mi mbili de, da ye fo’o veban ane mia sili.” (Marc 11:24, Mfefé Nkôñelan) Angôndô ya mbamba ñye’elan asu beyé’é be Yésus bese! Wo dañe yian asu minlôman amu mi mbeme tôbane beta étibela’a. Ve nkañ ôfe ô ne zañ élé figuier a mbunan.

Aval ane élé figuier, ayoñ Israël fe da yené ve ane é bili bibuma. Amu bôte ya ayoñ ete be bili ngum élat a Zambe, a be ne liti ve atane na ba semé Atiñe dé. Ve da, ngum ayoñ ôse wo te fo’o liti na ô nji bi mbunan. Ba te kui kui na be bene Mona Zambe! Jôm ete nje, éyoñ a bo na élé figuier é mane kôt amu é nji ve bibuma, Yésus a liti jam da ye yange ayoñ ete amu é nji bi mbunan, teke wume bibuma.

Mvuse ya valé, Yésus a beyé’é bé ba nyiine Jérusalem. Aval a wô’ô zu a bo, Yésus a ke Temple a taté fe na a ye’ele. Bemie beprêtre a bivete ya menda me Zambe, be ngenan be simesa’ane jam Yésus a nga bo angô’é asu bôte ba folane moné, nde ba zu nye soñ a jô nye na: “Ngule fé, e nje wo boo je mame ma? Nge na: Za a nga ve wo ngule ya bo mam mete?”​—Marc 11:28, Mfefé Nkôñelan.

Yésus nye na: “Ma fe ma zu sili mia ve nsili wua, mi yala’ane ñhe ma, nde ma fe me kate mia, ngule fé ma boo je mame ma. E nduan Jean a nga du bôt, ô nga so vé, ye yôb, ye be bôt? Yala’ane ma.” Éyoñe ji, besiñe bé bebien be biliya ôlame wop. Beprêtre a betebe ôsu ba ke ba fase be be, be yem avale be ne yalan, be jô’ô na: “Nge bia jô na: Ô nga so yôp, ke a ye sili na: V’amu jé mi nji buni nye? Nge bia jô ke na: Ô nga so be bôt, be nga viane ko ékôane bôte woñ.” Ba fase nalé amu ba ko ékôane bôte woñ, “amu bôte bese be nga buni na Jean a ne fo’o totyi nkulu mejô.”​—Marc 11:29-32, Mfefé Nkôñelan.

E bôte ba tebe Yésus ngame yat, be vo’o kui na be ve mbamba éyalan. Nde ba jô Yésus na: “Bi te yem.” Ane Yésus a jô be na: “Nalé fe me te kate mia ngule me abo je mam ma.”​—Marc 11:33.