1925—Den a ntoo mimbu ntet

BEBO BISAÉ BE ZAMBE BE NGA YIANE KE ÔSU A YANGE

Abui beyé’é Kalate Zambe é mbe é yange’e na si ja zu bo paradis mbu 1925. Amu jé? Mojañ Albert Schroeder, nnye ate a nga su’ulane bo ébu’a jia ya Tin ékôan, a nga jô na: “Bi mbe bi taté’é buni na miñwo’one bekristene mise mia ye ke yôp a jôé Éjôé Zambe, a na bezôsô be bôte be nga wulu ba’aba’a a Zambe ane Abraham, David a abui afe, ba ye wômô si va a jôé ngabe ya Éjôé Zambe é ne si va.” Bia kôme wôk amu jé aval ane mbu ô mbe ô kele’e memane teke yen ane jam éte da tôéban, abui beyé’é Kalate Zambe é nga bili atek.—Mink. 13:12.

Akusa bo jam éte é nji tôéban avale be mbe be yange’e, abui beyé’é Kalate Zambe é nga ke ôsu a kañete mbamba foé a ayôñ ése, a be nga yemelane na a ne ésaé Yéhôva a yi na be bo. Bi tame yen ésaé be nga bo asu na abui bôt é wô’ô benya mejôô.

BENGAA BE NGA LÔÑ ABUI MENDA ME ÉLÔMÔ MINKOBÔ

Mbôle abui bôt é nga wô’ô mbamba foé a zene ya nda élômô minkobô be mbe be loone na WBBR, beyé’é Kalate Zambe be nga nyoñe ntyi’ane ya lôñe nda élomô minkobô éfe ja dañ anen, fefele Chicago, e Illinois. Be nga yôlé nda élomô minkobô éte na WORD. Ralph Leffler, môte wua ya ba be nga lôñe nda élômô minkobô éte a beta simesan a jô’ô na: “Melu méziñ, ngul avep été bôte be mbe be vô’ôlô’ô nda élômô minkobô éte abui mefôla a vôm a dañ ôyap.” Éve’an é ne na, nda bôt éziñ é mbe é nyiñi’i e tisone ba loone na, Pilot Station, e Alaska, é mbe ve lôte bekilimita 5 000 a nda élômô minkobô, be nga vô’ôlô mefoé me ôsu WORD a nga lôm. Éyoñe be maneya vô’ôlô mefoé mete, nda bôt éte é nga tili bôte ba saé wôé kalate be va’a be akiba amu miñye’elane ya Kalate Zambe mite mi nga ve be ngule nyul.

Nkume mmombô a bete ya Ngon awôm a baa, é too alu da ya mbu 1925, a nga timin amu jé abui bôt é nga kui na é vô’ôlô mbamba foé a jô’ô na: “WORD a ne nda élômô minkobô jia ya États Unis ya Amérique ja dañ anen, ja belane bewatt 5 000. Bôte ba vô’ôlô je akekui nsa’a mañe ya Atlantique a wu ya Pacifique, ataté vôm a dañ ôyap Alaska akekui Cuba. Abui bôt é mbe é ngenane teke wô’ô benya mejôô, é nga nye’e é vô’ôlô me a zene ya nda élômô minkobô éte.”

E zia biyoñ éte, Beyé’é Kalate Zambe be nga jeñ a mezene mese na be kañete mbamba foé a zene ya menda me élômô minkobô si ya Canada. Mbu 1924, be nga lôñe nda élômô minkobô ba loone na CHUC e Saskatoon, Saskatchewan. A mbe nda élômô minkobô ôsu ja kobô ajô Zambe e Canada. Mbu 1925, be nga vaa nda élômô minkobô wôé a kee je vôm a mbe a dañ anen. Société Watch Tower a nga kuse nnôme nda be mbe be bo’o théatre Saskatoon a mane je kôme asu na é bo mfefé nda élômô minkobô.

Abui bôt é mbe é nyiñi’i minlame ya Saskatchewan é nga wô’ô mbamba foé éyoñ ôsu a zene ya nda élômô minkobô éte. Éve’an é ne na, e mone tison éziñ, minga be mbe be loone ne na Graham a nga tili na a yi bekalate ba timine Kalate Zambe éyoñ a maneya wô’ô radio. Mojane George Naish a beta simesan a jô’ô na: “Bifia bié: ‘Ye’elané bia!’ Bi mbe bi kôme’e liti na a mbe ôjeja’a ya yeme benya mejôô. Ane bi nga lôme nye abui bekalate asu ayé’é Kalate Zambe.” Mvuse mone éyoñ, Graham a nga taté na a miase mbamba foé vôm a mbe a too. A nga ke ôsu a kañete mbamba foé ya Éjôé akekui vôm a mbe a dañ ôyap.

MIMFEFÉ MIÑYE’ELAN

Nkume mmombô a bete ya Ngone lale, é too alu da ya mbu 1925, a mbe a bili beta nlô ajô a too na “Abialé ya ayoñ.” Amu jé nlô ajô ôte ô mbe angôndô ya mfi? Beyé’é Kalate Zambe be mbe be yeme’e na Satan a bili ékôan é ne ngap ébaé, ngap ôsu é ne mimbia minsisime mi ne yôp a nye, ngabe baa é ne évuse ñyebe, befulu akum a bôte bepôlitik e si va. A zene ya nlô ajô te, “ôlo ô ne mewôk a fek,” ô nga volô bobejañe ya nsisime na be yeme na Yéhôva fe a bili ékôane ja selan a wosane ji Satan. (Matt. 24:45) Nlô ajô ôte wo ke ôsu ô jô’ô na, Éjôé Zambe é nga tebe mbu 1914 a nalé a nga bo na bita bi bôlé yôp été, ane Satan a mimbia minsisime mié mi nga wuabane si.—Nlitan 12:7-9.

É nji be tyi’ibi asu Beyé’é Kalate Zambe béziñe na be kañese mfefé ñye’elan ôte. Ajô te, nlô ajô ôte ô nga jô na: “Nge bôte béziñe ba lañe nkume mmombô a bete nyu ba kate kañese mame me ne ntilan été, é ne mfi na be tabe ne mieññ a ke ôsu a yange Tate émien a minleme mi ne mfuban.”

Colporteur éziñ (bia loone dene na nkpwa’a mefan) a too jôé na Tom Eyre a mbe môte ya Grande Bretagne, a nga kate ôsimesan abui Beyé’é Kalate Zambe é mbe é bili a lat a nlô ajô ôte, a jô’ô na: “Bobejañe be nga nye’e avale be nga timine kalate Nlitan 12. Éyoñe bi nga yeme na Éjôé Zambe é tebe ya yôp, bi mbe ôjeja’a ya kate bôte bevo’o mbamba foé ate. Jam éte é nga tindi bia na bi nene ésaé nkañete jangan a jam éte é nga volô fe bia na bi yen aval avé Yéhôva a volô ayoñe dé na é bo beta be mam.”

BEYÉ’É KALATE ZAMBE BE NGA YÉ’É NA BA YIANE BO BENGAA BE YÉHÔVA

Den, Bengaa be Yéhôva ba kôme yeme mejô me ne ntilan Ésaïe 43:10 ma jô na: “‘Mi ne bengaa bam,’ nalé Yéhôva a jô, ‘a mbo ésaé wom me maneya top.’” É ne été na, ôsusua na mbu 1925 wo kui, bi nji be bi dañe’e kobô ajô éfus éte bekalate bangan. Ve jam éte é mbe é nga zu tyendé. Mbu 1925, benkume mmombô a bete 11 be nga kui be kobô’ô ajô éfus Ésaïe 43:10 a12!

Memane ya Ngone mwomô ya mbu 1925, Beyé’é Kalate Zambe be nga sulan a tabe beta étôkan a nga boban Indianapolis, Indiana. Bifia bi mbamba nsôane mojañe Joseph F.Rutherford a nga tili afebe nta’ane mam asu étôkan éte bi be bi jô’ô na: “Bia te zu tabe beta étôkane nyi asu na Tate a ve bia .. . ngule ya bulan a ke kañete mbamba foé a éva’ak ése ane bengaa bé.” Beta étôkan a nga bo melu mwomô nyi, a nga ve bôte bese be nga tabe été ngule ya kañete mbamba foé ya Éjôé Yéhôva éyoñ ése be bili fane ya bo de.

Môs éwônga ya Ngone mwomô é too melu 29, mojañe Rutherford a nga bo nkañete, ô too nlô ajô na “Kañetané ane Bengaa be Yéhôva.” Nkañete ôte, mojañ a nga liti mfi ya kañete a jô’ô na: “Yéhôva a nga jô ayoñe dé na...: ‘mi ne bengaa bam... A ma me ne Zambe.’” Éyoñ éte a nga ve be abendé a jô’ô na: “‘beta’ané nlinga mfa’a ya meyoñe me bôt.’ Teke ayoñe bôt afe é ne bo na bôte be yeme Yéhôva ane ô vaa ve bôte ya [ayoñe dé] be ne bengaa bé.”—Ésa. 43:12; 62:10.

Éyoñe mojañe Rutherford a maneya nkañete wé, bôte bese be nga vô’ôlô nkañete ôte be nga kañese ntyi’an ô mbe nlô ajô na, “Foé ya ndi nlem,” ntyi’an ôte ô mbe ô liti’i na Éjôé Zambe étame nje é ne soo bôte “mvo’é, mebu’uban, mvo’é ya minsôñ, fili, a mbamba ényiñe nnôm éto.” Be nga kôñelane ntyi’an ôte abui minkobô a tili wô betract. Be nga kabe betract bete a lôte bemillion 40.

Abui mimbu é nga lôt, Beyé’é Kalate Zambe mbe nji ke tyendé éyôlé a loobane na Bengaa be Yéhôva. Ve be mbe be nga yeme na beta ésaé wop a ne na be ne bengaa.

BEYÉ’É KALATE ZAMBE BE NGA BETA KE JOME BÔTE BE NGA KAÑESE BENYA MEJÔÔ

Aval ane tañe Beyé’é Kalate Zambe ya si ése é mbe é kele’e ôsu a bet, be nga jô be na be bulane ke jome bôte be nga kañese benya mejôô amu nkômbane wop ya wô’ô benya mejôô ô nga yaé. Mvus ôbane nkañete ya tract a mbe nlô a jô na: Foé ya ndi nlem. Bulletin pour les Témoins de Jéhôvaa a nga jô na: “Jeñané na mi beta ke yene bôte be nga bi tract ve be ngenane teke bi bekalate bangan.”

Bulletin pour les Témoins de Jéhôvah ya Ngon ôsu ya mbu 1925 a mbe a kobô’ô ajô ñyé’é Kalate Zambe a mbe a nyiñe’e tisone ya Plano, Texas a jô’ô na: “Bi wô’ô kam éyoñe bia yen ane bôte ba nyoñe bia abeñ afôla bi nga taté kañete a lôte mfefé afôla. Mimbu awôme mi nga lôt, bi nga kañete mone tison a mbe abôta nkañete dangane biyoñe bitane. ... sita Hendrix ba nyia wome be nga beta ke kañete wôé a li’i bekalate abime bi nji ke kui na bi lik, biyoñe bise bi mbe kele’e wôé.”

Si ya Panama, colporteur éziñ a nga tili na: “Abui bôt é nga titane ma menda map éyoñ ôsu me nga kañete be, é nga tyendé été nsisime jap éyoñe me nga beta ke éyoñe baa nge ji lale. Nsôñane wome ya mbu wu ô ne na me beta ke jome bôte me nga taté kañete, nalé a ye bo na bia be be bi bi mbamba minlañ.”

FOMBÔ’Ô VE ÔSU

Memane ya mbu 1925, mojañe Rutherford a nga tili bekpwa’a mefane kalate a kate’e be aval ésaé nkañete é nga bobane mbu ô nga lôt, a liti avale ja ye bobane melu ma zu. A nga jô na: “Mbu ya mvus, mi nga bi mvome ya volô bôte minleme mi mbe ntya’an. Ésaé éte é nga soo mia abui meva’a minleme mienan été ... Mbu wo zu, mia ye bi fane ya liti bôte na mi ne bengaa be Zambe a volô be na be yem éjôé jé. Mia ye kôme liti be na mi ne bebo bisaé bé. ... Nkelané ôsu a bete metyiñe mangane yôp a yia Zambe wongan a Njôô wongane bia ya ékaña’a.”

Memane ya mbu 1925, Bobejañe be nga bo nta’ane mame asu na be nene Béthel ya Brooklyn. Mbu 1926 ô nga bo atata’a ya beta ésaé melôñ ékôane Yéhôva é ngenane teke tame boban.