Te su’u ve mam wo yen

Mam ma tindi bôte na be bo ôbangam

Bôte be wô’ô bo ba bevo’o ôbangam amu be nga wô’ô minsose miziñ a lat a be. Tame yene bive’ane bi:

Bemasa béziñ be bili mbia évus ôsimesan, ba jô na binga be vo’o yeme bo bisaé bia sili abui atyeñ, ngul nge ke fek.
Be bialé bialé be wô’ô jô na miñtabe mi nga mane nyoñe mesu m’ésaé map.
Abui bôt da bu’u miñyeyem ajô éyoñ ba jô na, môt ase a ne ñyeyem a ne mbia nlem.

Bôte ba kañese aval asimesane bi ndeme mane yene le ba jeñe beamu ba suk asimesane dap. A ba jô na bôt be nji kañese asimesane dap be ne mindiman.

Jam Kalate Zambe a ye’ele

“Te ke môt a yene njembane ñyemane mam mvaé.”—MINKANA 19:2, Mfefé Nkôñelan.

Jé éfuse ji ja ye’ele bia? Éyoñe bi nji kôme yeme mam méziñ, bi ne nyoñe mbia mintyi’an. Nge bia bo na, bi li’i kañese mam me ne betotyi, bi nga viane kañese bijôjô, bi ne dimine tyi’i bôte mejô.

Amu jé e ne mfi na bi kôme yeme bôte bevok?

Nge bia nyoñ éyoñe ya yé’é yeme bôt, bia ye ke kañese minsose mise bia ye wôk a lat a be. Éyoñe ki bi yemeya benya mejô a lat a bôte béziñ, bia ye ke beta bo ôjeja’a ya buni mam mese bia ye wôk a lat a bôte befe. Bia ye taté nyoñ éyoñe ya fas.

Jam e nga kui afôla éziñ Jovica / Europe ya sud-est

Jovica a nga yaé avale vôm e mbe na, bôte be mbe be jô’ô mbia be mam a lat a mone nsamba bôt éziñ ya jale dé. A mbe fe a wô’ô mbia be mam a lat a be e télé a bekalate mefoé. A jô na: “Me nga taté na ma tyetebe bôte bete a vini be. Me mbe me simesa’ane na mboane wom ô ne mvo’é.

“Ve éyoñe me nga nyiine bezimbi, me mbe ntindane ya saé a bôte bete nsamba. Nalé a nga bo na me tu’a yeme be. Me nga tataté na ma yé’é nkobô wop a wô’ô bia biap. Me nga su’ulane nye’e me too a be, nalé a nga volô ma na me yene be aval afe. Ve ma yeme na, fulu ôbangam éte é ne bo é beta so biyoñe biziñ. Jôm éte nje ma vô’ôlô ki fe mbia be mam télé a bekalate mefoé ba jô a lat a nsamba bôt ôte. Me nga tyi’i fe na ma beta ke fe yene befilm ba kpwe’ele bôte bete a sili be si. Ma yeme na fulu ôbangam é ne tindi môt na a wô’ô bôte bevok abé a vini be.”

Mam ô ne bo

Bôte be ne jô na, ngume nsamba bôt éziñ ô bili mbia fulu si mbia fulu ka, ve yeme’e na abui bôte ya nsamba bôt ôte be nji bi fulu éte.
Te vuane na, ô ne bo teke mane yeme mam mese me tii a nsamba bôt éziñ.
Sili’i bôte be ne kôme yeme bôte bete minsili asu na ô yeme mam me ne été.