Liti’i Nye’an

Mam ma tindi bôte na be bo ôbangam

Fulu ôbangam é ne ayete bikôp. Avale bia nyoñ abui éyoñe ya saé ôkon ô ne bia nyul été, aval ete fe da sili na bi ve ngul, a nyoñ éyoñe ya té fulu ôbangam minleme miangan été. Jé ô ne bo asu na ô sô’ô mbia fulu ate nleme wôé été?

Jam Kalate Zambe a ye’ele

Mam bia yen befôtô: 1. Môte ya Asie a yoé évindi môt é be’e bilaé bi kofi mbé. 2. Évindi môt éte ja kabe bôte ba be be ba saé kofi to’o minga ya Inde bia te jô nye.

“A jaéane nye’ane mam mete mese yôp, ñwô ôte ô ne ntiñetane ya nya mvo’é.”—BECOLOSSIEN 3:14.

Jé éfuse ji ja ye’ele bia? Éyoñe bia bo bôte bevo’o mbamba be mam, nalé a bo na bôte be bo nlatan. Avale bia ke ôsu a liti bôte bevo’o nye’an, nde fe bia sô’ô fulu ôbangam nalé. Nge ô kele ôsu a nye’e bôte bevok, avale wo yene be da ye tyendé.

Mam ô ne bo

Simesa’ane bone be mam ô ne bo asu bôte be ne nsamba wo yen aval étam. E nji sili na ô dañe bo beta jam. Jeñe’e na ô bo mam ma tôñe le, ô ne tobe jôme jia nge ke abui ya été:

Mbamba mone jam ase ô ne bo môt, a ne volô wo na ô té fulu ôbangam nleme wôé été

Mam bia yen befôtô: 1. Évindi minga ya Inde ja volô nya minga a to ntangan na a bete nda jé. 2. Nya minga a to ntangan a ve môte ya Asie a to fefele nda jé bidi.

Bo’o ôsesa a avale bôt ete, ô ne dine nyili mbé nge a kômbô nyiine nda été, ô ne ve nye éto nge mi ne metua été.
Ô ne soñe nye minlañ, to’o a tu’a ke yeme kobô nkobô wôé.
Bo’o ôjibi nge a bo jam éziñ ô nji tu’a wôk.
Bo’o mbamba nlem nge a kate wo minju’u a tôbane mie.