Bo’o amvôé a avale bôt ase

Mam ma tindi bôte na be bo ôbangam

E tyetebe bôte bia yen aval étam, a ne bo na bi tu’a bo ôbangam. A nge bia yeñe ve a bôte bia be be bi ne avale da, bi ne taté na bia simesane na avale bia yene mam, avale bia wô’ôtan mam a avale bia bo mam nde étam da yian.

Jam Kalate Zambe a ye’ele

“Mia fe mi kui bia minleme mienane ne ngeññ!”—2 BECORINTHIEN 6:13, Mfefé Nkôñelan.

Jé éfuse ji ja ye’ele bia? ‘Nlem’ ba jô wô va ô ne avale bia wô’ôtane mam. Nge bia nye’e fo’o ve bôte be ne ane bia, bia ye fete bôte bevo’o mimbé ya minleme miangan. Asu na bi bo teke ku ôlam ôte, bia yiane late ngbwa a bôte ba selane bia.

Aval avé ô ne jeñe na ô bi avale bemvôé ese?

Éyoñe bia kôme yeme bôte bevok, nalé a volô bia na bi yem amu jé ba bo mam ane ôsi ane ôka. Nté bia tu’a subu be bebé, nde fe bia ye vuane na ba selane bia nalé. Bia ye taté na bia semé be, bia ye vak a be éyoñe ya mevak, a bia ye yôn a be éyoñe ya njuk.

Bi tame kobô ajô Nazaré. Atata’a, a mbe a bo’o beyeñ ôbangam. A kate bia jam e nga volô nye, a jô na: “Me nga lôt abui éyoñ a be ésaé. Me nga yene na be nji be avale bôte be mbe be jô’ô na be ne. Éyoñ wo bo mvôé a môt a so vôme mfe, wo yé’é na ô bo teke tyi’i nye ajô fo’o ve amu mam wo yen a mis, nge ke mam bôte ba jô a lat a bôte ya vôm a so, nalé a volô wo na ô nye’e nye a na, ô yeme na bôte bese ya vôm a so be nji bo mam avale da.”

Mam ô ne bo

Jeñe’e mezene ya laan a bôte ba so mesi mefe, meyoñe mefe nge ke bôte ba kobô nkobô ôfe. Ô ne:

Sili be na be kañete wo ényiñe jap.
Bañete be na be zu kabane mone jôme ya di a wo.
Tu’a vô’ôlô minlañe ya binyiñe biap.

Nge wo jeñe na ô yem avale mefulu bôte be bili me tii a mam me nga kui be ényiñ, nalé aye volô wo na ô dañe be nye’e.

Jam e nga kui afôla éziñ Kandasamy ba Sookammah / Canada

“Bi nga yaé Afrique du sud éyoñe ya apartheid. Be nga tindi mintangan a bimvindi na be nyiñe nkandan. Nalé a nga so fulu ôbangam. Bi nji bo mintangan, a bi nji be bi nye’e mie amu mintangan miziñ mi mbe mi tibili’i bia a biasé bia. Ve bi nji ve’ele simesane na biabebien bi ne ôbangam. Bi mbe bi jô’ô ve na, bôte bevo’o mbe ba bo bia ôbangam.

“Asu na bi tyendé, bi nga tyi’i na bia zu bi bemvôé be ne mintangan a ba ba so bevôme bevôm. Éyoñe bi nga taté na bia yeñ a mintangan, bi nga yene na, abui ya be be e nji be e sa’ale’ bia. Avale mam ete da kui abui bevôm, a bôte ba yene fe mezene ya dañe me.

“Bi nga kañese fe na bia ba’ale mintangan mibaé, nnôm ba ngal nda jangan ayap éyoñ. Bi nga tu’a be yem. Ye éyoñ é nga tame ke lôt, bi nto bemvôé, teke fe môt a yene na a dañe nyô mbok. Nalé a nga bo na, bi taté na bia nyoñe mintangan mise mvo’é.”