Ñye’elane 8

Enyiñe ya nda bôt Zambe a nye’e

Za étoo fam é bili nda bôt été? (1)

Fam j’ayiane belan minga wé aya? (2)

Mimbe’e mivé ésa bon a bili nda bôt jé été? (3)

Etô évé minga a bili nda bôt été? (4)

Mam mevé Zambe ayi na bebiaé a bon be bo? (5)

Kalate Zambe ajô aya mfa’a ya nkandan nge ntyaman aluk?  (6,7)

1. Kalate Zambe ajô na fam éne nlô ya nda bôt. (1 Becorinthien 11:3) Fam j’ayiane bi ve minga wua. B’ayiane bo nlu’ane avale metiñ me ngovina m’ajô.—1 Timothée 3:2; Tite 3:1.

2. Fam j’ayiane nye’e minga wé aval a nye’e émien. A yiane belan nye avale Yésus a nga belan beyé’é bé. (Beéphésien 5:25, 28, 29) A nji yiane bôm nye, nge tibili nye a zen éziñ. Fam j’ayiane ve nye ôlu’u a ésemé.—Becolossien 3:19; 1 Pierre 3:7.

3. Esa bon a yiane saé abui na a toñ nda bôt jé. A yiane ve minga wé a bone bé bidi, biyé ya jaé a nda ya tabe. Esa bon a yiane fe liti nda bôt jé na é yaé mfa’a ya nsisim. (1 Timothée 5:8) A yiane tebe ôsu mfa’a ya volô nda bôt jé na é ye’é ajô Zambe a nkômbane wé.—Deutéronome 6:4-9; Beéphésien 6:4.

4. Minga a yiane bo mvolô ayiane be nnôm. (Metata’a 2:18) A yiane volô nnôm wé mfa’a ya nye’elan a nyalane bone bap. (Minkana 1:18) Yéhova a yi na minga a ba’ale nda bôt jé, nye’ane été. (Minkana 31:10, 15, 26, 27; Tite 2:4, 5) A yiane semé nnôm wé abui.—Beéphésien 5:22, 23, 33.

5. Zambe a yi na bongô be bo bebiaé bap mewôk. (Beéphésien 6:1-3) A yi na bebiaé be ye’ele a sôane bone bap. Bebiaé b’ayiane laane a ye’é Kalate Zambe a bone bap. B’ayiane jalé minyiane ya minsisim miap. B’ayiane vôé a bone bap. (Deutéronome 11:18, 19; Minkana 22:6, 15) Bebiaé be nji yiane sôane bone bap a ayok nge mbia ébôm.—Becolossien 3:21.

6. Eyoñ ngal ba nnôm be nji tu’a wô’an, b’ayiane bo avale Kalate Zambe alep. Kalate Zambe a tu’a ye’ele bia na bi liti môt mbok nye’an, a bo njiban. (Becolossien 3:12-14) Kalate Zambe a nji liti na nkandan aluk ône mbamba zen y’akôme bone mejô. Ve minga ane tyi’i na a kandan nnôm wé nge (1) ake ôsu a bene toñ nda bôt jé (2) nge nnôm a nye’e bibôm aval ya na mvo’oé a ényiñ nga bi ne bebé ya ndaman (3) nge ngule mewosan nnôm é nto avale ya na minga wé a vo’o ke fe kañe Yéhova.—1 Becorinthien 7:12, 13.

7. Beluk b’ayiane ba’ale bebien ve asu dap étam. Mejian mene nsem mise me Zambe a mise me nlu’u mbok. (Behébreu 13:4) Mbia nkeane binoñ nwô étam w’atyam aluk, a ve nlu’u mbok fili y’abeta ke aluk, nge jeñ aluk afe. (Matthieu 19:6-9; Beromain 7:2, 3) Yéhova avini ntyaman aluk ô nji tôñ mintilane ya Kalate wé a beta ke lu’u môt mfe.—Malachie 2:14-16.

[Eve’ela ya afep 17]

Zambe a yi na bebiaé be ye’ele a sôane bone bap

[Eve’ela ya afep 17]

Môt a nye’e nda bôt jé ayiane jalé minyiane ya minsisim a mi ya misôn miap