Nda bôte jôé é ne nyiñe meva’a été

1, 2. Jé Yéhôva a yi asu menda me bôt?

YÉHÔVA Zambe nnye a nga lat alu’u ôsu. Kalate Zambe a jô na, a nga kôme minga ôsu a “zu nye be fam.” Adam a mbe a wô’ô mbia mevak, ane a nga jô na: “jôme ji é nto évese ya bivese biam, a nsône ya minsône miam.” (Metata’a 2:22, 23) Nalé a liti bia na, Yéhôva a yi na beluk be nyiñe meva’a été.

² Éngôngole jam é ne na, abui bôt é nji yeme jé é ne na, e nyiñe nda bôt é ne meva’a été. Ve Kalate Zambe a bili abui melep, me aye volô bibu’a bise ya nda bôte na, bi nyiñe meva’a été a na bi nye’e bi too nsamba.​—Luc 11:28.

JÉ ZAMBE A YI NA BEYÔME BE BO?

3, 4. (a) Aval avé nnôm a ye liti na, a nyoñe minga wé ngap? (b) Amu jé é ne mfi na nnôm a jamé ngal, ngale fe a bo avale da?

³ Kalate Zambe a jô na, mbamba nnôm a yiane liti minga wé nye’an a ésemé. Lañe Beéphésien 5:25-29. Nnôm a ye liti minga wé nye’an éyoñ ése. A ye fe ba’ale nye, a nyoñe ngap a nye. A nji yiane bo jôme je aye bo minga wé nleme mintaé.

⁴ Ve jé nnôm a yiane bo éyoñe minga wé a bo bikop? Beyôme ba yiane bo avale Kalate Zambe a jô na: ‘[Kelan ôsu, MN] a nye’e benyo beyal, a te mia wô’ô be ôlun.’ (Becolossien 3:19, Mfefé Nkôñelan) A beyôm, simesa’ané na, mia fe mia bo bikop. A nge wo yi na Zambe a jamé wo, wo yiane jamé nyo ngal. (Matthieu 6:12, 14, 15) Éyoñe nnôm a jamé ngal, ngale fe a bo’o avale da, jame te da ye volô na be bi nda aluk é ne meva’a été.

5. Amu jé nnôm a yiane yene minga wé anen?

⁵ Yéhôva a yi na nnôm a yene minga wé anen. Nnôm a yiane jalé miñyiane mi minga wé. Jame te é ne beta mbe’e. Nge nnôm a nji kôme nyoñe ngap a ngal, Yéhôva a ne bene wô’ô meye’elane mé. (1 Pierre 3:7) Jame da dañe mfi e mise me Yéhôva é ne na, nnôme ba ngal be nye’e nye. A nji dañe nye’e befam a lôte binga.

6. Jé ja tinane na, e bo “nsône wua” asu nnôm ba ngal?

⁶ Yésus a nga timine na, nnôm ba ngal “be aye fe bo bôte bebaé, ve nsône wua.” (Matthieu 19:6) Ba ye ba’ale alu’u dap mfuban. (Minkana 5:15-21; Behébreu 13:4) Mfa’a ya nkeane binoñ, e zañe beyôm a beyal, môt ase a yiane jalé miñyiane mi nyô mbok, teke sôñe jôm. (1 Becorinthien 7:3-5) Nnôm a yiane simesane na, “teke môse môt a nga vini minsône mié émien; ve a voñôlô a ba’ale mie.” Nde a yiane nye’e minga wé a nlem ôse. Minga a yi na nnôm a liti nye mvam a nye’an a lôte jôm éfe.​—Beéphésien 5:29.

JÉ ZAMBE A YI NA BEYALE BE BO?

7. Amu jé nda bôte ja yiane bi nlô?

⁷ Nda bôt ése ja yiane bi nlô, môt a liti nda bôt zen asu na, be saé fufulu. Kalate Zambe a jô e kalate 1 Becorinthien 11:3 na: “Nlô ya fam ése ô ne Krist; a nlô ya minga ô ne fam; a nlô ya Krist ô ne Zambe.”

8. Aval avé minga a ne liti nnôme wé beta ésemé?

⁸ Nnôm ase a bo bikop. Ve éyoñe ngal a su’u mintyi’ane mi nnôme wé, a saé a nye a nlem ôse, nda bôt ése ja nyoñe mfi ya mboane te. (1 Pierre 3:1-6) Kalate Zambe a jô na: “Nga a ba’ale’e na, a semé nnôme wé.” (Beéphésien 5:33) Jé a yiane bo éyoñe nnôm a nji bo mone Bengaa? A yiane ke ôsu a liti nye beta ésemé. Kalate Zambe a jô na: “A beyal, su’ane mia bebien e si e be benyo beyôme benan. Nalé ate ja’ane bevo’o ya été ba bene buni foé Zambe, ba ye buni, saa a nkatane foé, ve amu mbamba ntabane beyale bap, éyoñe ba yene mfuban éjijine ntaban wônan.” (1 Pierre 3:1, 2, Mfefé Nkôñelan) Mbamba éve’ela minga a bili, a ne volô nnôme wé na a kañese, a semé mbunane minga wé.

9. (a) Jé minga a yiane bo éyoñe ba nnôm be nji bo tyiñ? (b) Melebe mevé éfuse Tite 2:4, 5 ja ve binga?

⁹ Jé minga a ne bo éyoñe ba nnôm be nji bo tyiñ? A yiane ve asimesane dé a ésemé. Éve’an é ne na, Sara a nga jô jôm Abraham a nji be a kômbô bo, ve Yéhôva a nga jô Abraham na: “Vô’ôlô’ô tyiñe jé.” (Metata’a 21:9-12) É ne ayaé na, ntyi’ane Kristen a su’ulane nyoñ ô bo te ke lu’an a Kalate Zambe, jôme te nje minga wé a yiane su’u nye. (Mam Minlôman 5:29; Beéphésien 5:24) Mbamba minga a ye nyoñe ngap a nda bôt. (Lañe Tite 2:4, 5.) Éyoñe nnôme wé a bone bé ba yen aval a saane be a ngul ése, ba ye nye’e nye a semé nye abui.​—Minkana 31:10, 28.

10. Jé Kalate Zambe a jô mfa’a ya nkandan a ntyaman aluk?

¹⁰ É wô’ô kui na nnôm ba ngal be bo ôjeja’a ya kandan, nge tyam aluk. Ve Kalate Zambe a jô na, “ngal a bo’o te kandane nnôme wé” a “nnôm a bo’o te su’u minga wé.” (1 Becorinthien 7:10, 11, Mfefé Nkôñelan) Beangôndô be mame béziñe be ne bo na nnôm ba ngal be kandan, ve a ne beta ntyi’an. Mfa’a ya ntyaman alu’u ki? Kalate Zambe a liti na a ne fo’o ve éyoñe nnôm nge ngal a bo mejiane nje be ne tyam aluk.​—Matthieu 19:9.

JÉ ZAMBE A YI NA BEBIAÉ BE BO?

11. Jé ja dañe mfi asu bone benan?

¹¹ A bebiaé, lôta’ané abui éyoñ a bone benan. Bone benane ba yi mia, a jame da dañe mfi é ne na, mi nyoñ éyoñe ya ye’ele be mam me alat a Yéhôva.​— Deutéronome 6:4-9.

12. Jé bebiaé ba yiane bo asu na be ba’ale bone bap?

¹² Émo Satan é ne ve ke ôsu a bo éko woñ, a bôte béziñe be ne kômbô bo bone benane mbia be mam ane, e bômban a be. Bebiaé béziñe ba yen ayaé ya kobô mam mete a bone bap. Ve bebiaé ba yiane ve bone bap melep alat a avale bôte te, a ye’ele be avale ba yiane sa’ale be. A bebiaé, mia yiane ba’ale bone benan.a​—1 Pierre 5:8.

13. Aval avé bebiaé ba yiane ye’ele bone bap?

¹³ Bebiaé be bili mbe’e ya ye’ele bone bap avale ba yiane nyiñ. Aval avé mi ne ye’ele bone benan? Da sili na mi yañele bone benan, ve mi nji yiane sôane be a njet, nge étibela’a. (Jérémie 30:11) Nde, mi nji yiane bôme bone benan éyoñe mia wô’ô ôlun. Mi nji yi na, bifia bienan bi bo ane “nkpwate mekôn” a bo be abé. (Minkana 12:18) Ye’elané bone benan asu na, be yem amu jé ba yiane bo mewôk.​—Beéphésien 6:4; Behébreu 12:9-11; fombô’ô Ayemé 30.

JÉ ZAMBE A YI NA BONGÔ BE BO?

14, 15. Amu jé bongô ba yiane bo bebiaé bap mewôk?

¹⁴ Yésus a mbe a bo’o Ésa wé mewôk éyoñ ése, ja’a éyoñ é nji be tyi’ibi ya bo de. (Luc 22:42; Jean 8:28, 29) Yéhôva fe a yi na bone be bo bebiaé bap mewôk.​—Beéphésien 6:1-3.

¹⁵ A bongô, ja’a mia simesane na, é ne ayaé ya bo bebiaé benane mewôk, ba’alané na Yéhôva a bebiaé benane ba wô’ô mia mvaé éyoñe mia bo mewôk.b​—Minkana 1:8; 6:20; 23:22-25.

16. (a) Aval avé Satan a jeñe na a tindi bisoé na bi bo mame me ne abé? (b) Amu jé da dañe mfi na ô tobe bemvôé ba nye’e Yéhôva?

¹⁶ Diable a ne belane bemvôé, a bisoé bife asu na, be tindi wo na ô bo mam me ne abé. A yeme na, da ye bo te bo tyi’ibi asu dôé. Éve’an é ne na, Dina ngone Jacob, é mbe é bili bemvôé be nji be be nye’e Yéhôva. Jame te é nga telé nye a nda bôte jé minju’u été. (Metata’a 34:1, 2) Nge bemvôé bôé be nji nye’e Yéhôva, be ne tindi wo na ô bo mame Yéhôva a vini. A mame mete me aye bo wo mintaé nlem, to’o nda bôte jôé, to’o Zambe. (Minkana 17:21, 25) Jôme te nje ja dañe mfi na, ô jeñe na ô bi bemvôé ba nye’e Yéhôva.​—1 Becorinthien 15:33.

NDA BÔTE JÔÉ É NE NYIÑE MEVA’A ÉTÉ

17. Mbe’e ôvé môt ase ya nda bôt a bili?

¹⁷ Éyoñe bibu’a ya nda bôte bia tôñe melebe me Zambe, bi asa’ale abui minjuk. Nde nge ô ne nnôm, nye’e minga wé a liti’i nye nye’ane te. Nge ô ne minga, semé’é nyo nnôm a bo’o nye mewôk, a vu éve’ela minga é ne kalate Minkana 31:10-31. Nge ô ne mbiaé, ye’ele mone wé na a nye’e Zambe. (Minkana 22:6) Nge ô ne ésa, “yeme jôé” nda bôte jôé. (1 Timothée 3:4, 5; 5:8, Mfefé Nkôñelan) A bongô, bo’ané bebiaé benane mewôk. (Becolossien 3:20) Ba’alané na, môt ase ya nda bôt a ne bo bikop, nde sila’ane mia bebiene si, a môt ase a sili nyo mbo’o njaman. Yaa, Kalate Zambe a bili melebe Yéhôva a ve môt ase ya nda bôt.