Mefoé ya éjôé No. 37

Foé ya si ése

Asu ’Ul An Ya Évus Nyebe É Ntoo Bebé!

▪ Jé éne évus nyebe?

▪ Aval avé asu’ulan dé de aye kui?

▪ Aval avé jam éte de aye nambe wo?

Jé éne évus nyebe?

Ye wo wô’ô nlem mintaé éyoñ bôt be asep bitom amu nyebe? Éyoñ bôt be ajô na be akañe Zambe, ve be bo’o bita nge wôé bizu’u bi bôt, teke étom, na bôt be tyelé minlem yôp a ko be woñ, nge ke ndaman bôt bevok a diane be, ye ékotekot éte je abo wo nlem mintaé? Amu jé é wô’ô yené na nyebe ñwô w’até abui minju’u bi bili?

Sa ke nyebe ôse ñwô ô ne mekua, fo’o ve évus nyebe. Beta môt a Zambe si ése ja semen, Yésus Krist, émien a nga kôme liti na évus nyebe je abo bôt na be bo mbia be mam fo’o ve aval ane “élé éne ébol je awum bibuma bine teke mfi.” (Matthieu 7:15-17) Évus nyebe je awum bibuma bivé?

Évus Nyebe . . .

◼ ÉVUS NYEBE JE ABUAN A MAM BITA, A PÔLITIK: Kalate mefoé be aloene na Asiaweek a jô na: “Si ya Asie, a mesi mefe, betebe ôsu bene ôzañ éjôé bene teke wôk bôte bevok mintaé, be abelane ñye’an ya nyebe bôt be bili, amu mfi wop.” Nde kalate mefoé ate a bemen na “émo éne beta zametan a dañ éyoñ ji.” Beta môt ya menda me Zambe Amerka a nga jô fe na: “Nge mi akômbô na mewôé mete me man, mi ayiane mane wôé bôt be awôé bizu’u bi bôt, na bôt be ko be woñ.” Ye mi ayem melep a nga ve? “Wôéane bôt bete éwôé wôé, amu jôé Zambe.” Ve Kalate Zambe ke a jô na: “Nge môt a jô anyu dé na:‘Ma nye’e Zambe’, a vini’i ke monyañ, môt ate a bo ya nlaa minsos.” (1 Jean 4:20) Yésus ke a nga jô na: “Kelane ôsu a nye’e be siñ benan.” (Matthieu 5:44) Ye ô ne lañ tañ minyebe mia kañese na bebuni bap be ke bita?

◼ ÉVUS NYEBE JE AMIAS ÉVUS DO’OTEN: Bebé minyebe mise mi aye’ele na, éyoñ y’awu, jôm éziñ éne te yené be aloene nsisim, je ali’i évee. Amu avale nye’elan te, abui minyebe mi adiane bebuni bap. Betebe ôsu be asili moné na be ye’elane Zambe ndemben minsisim bewu mi aye ke yôp. Veda, nye’elane ya Kalate Zambe wo selan. “Nyô [nsisim] a bo abé—nye aye wu.” (Ezekiel 18:4) “Bevevee be ayeme na be aye wu; ve bewu be nji yeme jôm éziñ.” (Ecclesiaste 9:5) Yésus a nga ye’ele na bewu b’aye wômô minwuan-nde nwômôlan wo beta volô be jé, nge be mbili nsisim ô ne teke wu? (Jean 11:11-25) Nde nsili ô ne na: ye nyebe wôé wo ye’ele na jôm éziñ je ali’i évee éyoñ môt awu ya?

◼ ÉVUS NYEBE JE AJU MBIA NKEANE BINOÑ: Mañ yat, befam befam a binga binga be alu’ane. Da kui fe na, be atelé avale bôt éte betebe ôsu ya menda me Zambe. Menda me Zambe mete, me atindi fe ngovina na a kañese avale meluk te. To’o menda me Zambe me ajô na, mbia nkeane biñon ane abé me ayebe na betebe ôsu ya été be ke binoñ a bon be bongo. Ve jé Kalate Zambe a ye’ele? A kobô bôsa na: “Te du’uban. Nge bebo bijabô, nge bekañe bengunemelan, nge bebo mejian, nge môt be abelan nye zen é nji yian, nge fam je ake binoñ a fame fok,. . . be aye bo te tabe Éjôé Zambe si.” (1 Becorinthien 6:9, 10) Ye wo yem minyebe miziñ mi aju mbia nkeane binoñ?

Jé je ayange minyebe mi awum bibol bibuma melu me azu? Yésus a nga bemen na: “Élé ése éne teke wum mbamba bibuma, be aye ba’é je a wua je nduan.” (Matthieu 7:19) Ya, évus nyebe je azu tyamban a jañ ne meñ! Ve aval avé, a éyoñ évé jamete de aye boban? Nkulane ajô Jean a nga yen, ô ne kalate Nlitan, kabetôlô 17 a 18, w’ave bia éyalan.

Aval avé évus nyebe je aye man?

Tame yen. Minga bijabô a too mvus beta tit éto éko woñ. Tit éte é bili minlô zañegbwal a minla’a awôm. (Nlitan 17:1-4) Minga bijabô nyi a tinane jé? A bili ngul be “bejôô ya émo”, ngômesane jé éne pourpre, a belane encens, a bili étua ya abui akum, a belane fe mimbia minsisim na ‘meyoñ mese me du’uban.’ (Nlitan 17:18; 18:12, 13, 23) Kalate Zambe a volô liti bia na minga bijabô nyi ane ba minyebe ya si ése mekuk menyin. Minga nyi a nji tinane nyebe wua éziñ, veda ane minyebe mise mi awume bibol bibuma.

Tit minga bijabô a bete mvus je atinane bijôé bi pôlitik ya émo ji.a (Nlitan 17:10-13) Évus nyebe éngane mvus tit éne pôlitik. Nalé a tinane na, évus nyebe je ajeñ na, bijôé bi pôlitik bi wulu a nyoñ mintyi’an aval a kômbô.

Veda, ana’ana étua jam éziñ je azu boban. “Minla’a awôm w’ate yen, a tit afan, mbie bite bi aye vini minga bijabô, a be aye li’i nye teke jôm, a toé nye sesoé, a di minsôn mié, a mane di’i nye a nduan.” (Nlitan 17:16) A temetem, bijôé bi pôlitik ya émo ji, bi aye ku évus nyebe yôp a mane tyame je ne meñ! Jé je aye tindi be na be bo nalé? Kalate Nlitan a ve éyalan: “Zambe a te futi be de nlem wop été, na be tôé ôsimesane wé.” (Nlitan 17:17) Ya, Zambe aye tyi’i évus nyebe mejô amu mbia be mam a nga bo amu jôé dé. Be ta zôsô wé été, Zambe aye yaa a belan bibon bi pôlitik ya évus nyebe na be mane tyame je.

Jé wo yiane bo nge ô nji kômbô tôban njuk wo yange évus nyebe? Engele Zambe a yôtan na: “Kuian atan be nye, a bôt bam.” (Nlitan 18:4) Teke vaa nge beté, éyoñ ya tup évus nyebe é kpwane ya! Veda, w’aye tup na w’ake vé? Sa ke be bôt ba ye’ele na Zambe a nji bo, amu befe be aye tôban njuk. (2 Bethessalonicien 1:6-9) Nya asoé ane fo’o ve nya nyebe été. Aval avé ô ne yemelan nya nyebe?

Aval avé ô ne yemelane nya nyebe

Mbamba bibuma bivé nya nyebe a yiane wum?—Matthieu 7:17.

Nya Nyebe . . .

◼ NYE’AN WO YENÉ E NYA NYEBE ÉTÉ: Benya bekañe Zambe be ne “te nyoñ ngap a mam ya émo ji.” Nalé fe nkanda’ane mengam ane teke yené be be, to’o mfa’a ya nyôl ékôp nge mfa’a ya mefulu ma kandé meyoñ. Be aliti na ba ‘nye’esan.’ (Jean 13:35; 17:16; Mam minlôman 10:34, 35) Be nji wôéane be be; ba viane kañese wu señ bobenyañ bap.—1 Jean 3:16.

◼ NYA NYEBE A TOO KALATE ZAMBE MEBUN: Nya nyebe a nji ye’ele “fe’e be tate”, nge ye’ele “metiñ me bôt” ane do’oten. Ve minye’elan mié mise mi bili mbôka’a Kalate Zambe été. (Matthieu 15:6-9) Nalé ane amu jé? Amu na “Ntilan ôse wo so be Zambe a ô ne mvolan mfa’a ya ñye’elan, mfa’a ya nleban, mfa’a ya ntelan mam tetele, mfa’a ya nsôan bôte zôsô.”—2 Timothée 3:16.

◼ NYA NYEBE A YEMETE MENDA ME BÔT, A SÔÑ FE MBAMBA NTABAN A EJIJIN MFA’A YA ZAMBE: Nya nyebe a ye’ele beyôm na be ‘nye’e beyal bap ane menyôl map’, a volô fe beyal na be yé’é bi ‘beta ésemé be beyôm bap’, a ye’ele fe bongo na be bo bebiaé bap mewôk. (Beéphésien 5:28, 33; 6:1) Nde fe, betebe ôsu ya nya nyebe be ayiane liti éve’ela’a, mfa’a ya mbamba ntaban a éjijin.—1 Timothée 3:1-10.

Ye bi ayem nyebe éziñ, wo bo mam ma? Kalate be aloene na La Politique de l’Holocauste (angl.), a nga kui mbu 2001, a jô na: “Nge bôt abui be nga vu bengaa be Yéhova, avale be akañete, a avale be anyiñ, ve beta nwôéan be nga wôé beyude bita bi DeGaulle, a nji ye boban, a môt éziñ ya émo ji, a nji ye beta tat na be akômbô jaane ayoñ dé ése.”

Ya, ésaé bengaa be Yéhova be abo mesi tañ 235, é nji bo ve na be akañete bôt anyu fatan ényiñ Kalate Zambe a sili—bebien fe be anyiñ ényiñ te. Nde bi abendé wo na ô sili bengaa be Yéhova mvolan, na be ye’ele wo jé Zambe a yi na ô bo, ndemben w’aye bo ngul ya kañe nye aval émien a kañese. Awolo ya nyoñ ntyi’an é kpwane ya. Te beta jañelé éyoñ. Asu’ulan ya évus nyebe é ntoo bebé!—Sophonie 2:2, 3.

Nge wo kômbô yem mam abui mfa’a ya Kalate Zambe, tilii Bengaa be Yéhova aval éne afep si.

□ Me nji bi moné, ve ma kômbô bi nsoé kalate be aloene na Mombô’ô!

□ Ye mi ne zu bo ma ayé’é ya Kalate Zambe, zesé?

[Ôyôme ndem]

[Ôsimesane ya ba’ale ya afep 3]

“Kuian atan be nye a bôt bam”

[Ôsimesane ya ba’ale ya afep 3]

Évus nyeb é bili ngul “be bejôô ya émo”