Mbamba foé a miaseban

ÉYOÑE Paul a nga veñesane kristen, nde a nga kate mbamba foé ya Éjôé Zambe. A nto na nyô a nga dañe kpwe’ele beyé’é be Yésus émien a nga zu tôbane ékpwe’ele j’adañe ngul abui. Nlômane Paul a nga wulu angôndô ya abui na a miase mbamba foé ya Éjôé Zambe. Nje j’aye bo na nsôñane Zambe ya atata’a asu émo bôt ô jaléban.

Étisone ya Lystre, Paul a nga saé môt a nga bialé éyem. Beta nsamba bôt a nga bete tyiñe yôp a jô na Paul ba Barnabas be ne bezambe. Bôte bete bebaé be nga kamane nsamba bôt ôte na ô bo te ve be metuna’a amu be nji be bezambe. Ve jame da, mvuse ya été, besiñe be Paul be nga tindi nsamba bôt ôte na be lume nye mekok a li’i nye bebé ane mbim. Éyoñe Paul a nga mane bo mvo’é, nde a nga beta bulane étisone te, a ke yemete mbunane bekristene ya wé, a ve be ngule nyôl.

Bekristene bevo’o be mbe Bejuif be nga yemete na, bekristen be nji bo Bejuif b’ayiane ke ôsu a ba’ale Metiñe me Moïse. Ane Paul a nga ke ajô te be minlôman a bemvendé be nga to Jérusalem. Éyoñe be tu’a ya nyoñ éyoñ a fas ajô te édo’été, betuka’a fombô avale Mintilane mi a jô; mbamba nsisim Zambe a to fe be be, ane be nga lôme bekalate mekônda. Be nga tili be na be sa’ale bengulemelan, be sa’ale fe ndiane metyi, a betit be awu abuk, a mejian. Mame mete “mme be nga yiane bo”, be nji be ntindane na be semé Metiñe me Moïse.​—Mam minlôman 15:28, 29.

Éyoñe Paul a nga ke dulu baa na a ke kañete, a nga jome Bérée b’aloene dene na Grece. Bejuif ya étisone te be nga kañese mbamba foé a nlem ôse. Be mbe be tuka’a fas a bindi miñye’elane mi Paul môs ôse nge mia tôban a Mintilan. Vôm ate besiñe bé be nga beta titane nye, ane a nga ke Athène. Vom ate a nga ve angôndô ya atyeñe ñye’elan ézezañe beyeme mam été. Mesikôt ate a ne a zu kui den, jôme ya bia yiane vu nge bia kômbô ve ñye’elan a atyeñ a fek.

Ane Paul a nga mane dulu lale, nde a nga ke Jérusalem. Éyoñ a mbe temple, ane Bejuif béziñe be nga kolé mone ôlame na be wôé nye. Nde bezimbi be mbe be Romain be nga kamane nye a va nye vôm ate; ane be nga ke sili nye minsili. Mise me ngovina Félix mone Romain, Paul a nga kaman émien amu a mbe mone Romain. Asu na be bo te ke nye be ngovina mfe, Festus, Paul a nga ji’a jô na: “Me ake ajô dam be César.” Ane Festus a nga yalan a jô na: “Wo aye fo’o ke be César.”​—Mam minlôman 25:11, 12.

Nde be nga ke Paul si ya Italie sitima été na be ke kobô ajô dé. Mbôle sitima a nga nyu mendim, nde a nga ke tabe ékôte si ya Malte. Éyoñ a nga su’ulane zu kui Rome, a nga tabe valé mimbu mibaé. Ja’a na mone bezimbi a mbe a ba’ale nye, nlômane Paul a nga ke ôsu a kañete mbamba foé ya Éjôé Zambe a ayôñ ése be bôte be mbe be za’a jôme nye.

​—Nkañete ôte wo so kalate Mam minlôman 11:22–28:31.