Paul a ke Rome

Paul a nga ke mane nkañete lale wôé ya mesi mesi e Jérusalem. E wôé, be nga bi nye, a futi nye mimbôk. Alu éziñ, Yésus a nga jô nye e ñyenane na: ‘wo ye ke kañete de Rome.’ Paul a nga kôlô mimbô’ô ya Jérusalem, a ke mi ya Césarée; a nga bo mimbu mibaé wôé. Éyoñ a mbe mimbôk éjôé Festus si, Paul a nga jô na: ‘Ma kee ajô dame be César, e Rome.’ Ane Festus a nga jô nye na: “Wo te jô na wo kee ajô dôé be César, wo ye fo’o kee de be nye.” Nde bezimbi be nga kee Paul e Rome, be bete e sitima; bobenyañe bé bebaé, Luc ba Aristarchus, be nga ke a nye.

Ane beta ôkôs a nga bo tañ abui melu. Môt ase a mbe a buni’i na a ye wu. Ve Paul a nga jô be na: ‘A bôt, ange a te kate ma biyeyeme na: “A Paul, te ko woñ. Wo ye kui Rome teke vaa nge beté, a môt ase a bete sitima nyi aye nyiñ.” Bo’one ngul! Teke môt a ye wu va.’

Mvuse melu 14, ôkôs ô nga tebe. Be nga su’ulane ke kui ékôte mañe ya Malte, e zu koone sitima a maneya bu’i bitun bitun; ve bôte 276 bese be mbe sitima ate be nga nyiñ. Bôte béziñ ya été be nga jok asu na be ke kui kindik, bevo’o ki be nga tyebe bitune ya sitima a nga bu’i. Bôte ya Malte be nga nyoñe be ngap, a be nga kôbane be nduan.

Mvuse ngon éla, bezimbi be nga bet e sitima mfe, a kee Paul e Rome. Éyoñe Paul a kuiya wôé, Bobejañ be nga zu tôbane nye. Éyoñ Paul a nga yene be, a nga ve Yéhôva akéva, a nalé a nga ve nye ngule nyul. Ja’a Paul a mbe mone mimbôk, be nga kañese na a tabe nda jé, mone bezimbi a ba’ale nye. A nga tabe valé mimbu mibaé. A mbe a kañete’e bôt be mbe be za’a nye yen, mam ma fombô Éjôé Zambe a Yésus. Paul a nga tili fe mekônda ya Asie Mineure a Judée bekalate. Yéhôva a nga belane fo’o Paul asu na mbamba foé a katebane mesi mesi.