David a nji ko woñ

Ô wô’ô bo aya éyoñe wo ko woñ?— Éko éziñ ô wô’ô sili nyua nge ke éso mvolan. Ve môte mfe a ne volô wo. A ne ngul abui a lôte bôte bese. Ye ô yemeya nye?— Ôwé, a ne Yéhôva Zambe. Bi tame zu kobô ajô ndômane be mbe be loone na David e Kalate Zambe. A mbe a yeme na Yéhôva a ne volô nye éyoñ ése, nde a mbe te ko jôm éziñe woñ.

A so mongô, ésa David ba nyia be nga ye’ele nye na a nye’e Yéhôva. Jamete é nga volô David na a bo te ko woñ ja’a a tôbane za jame. A mbe a yeme na Yéhôva a ne Mvôé jé, a na A ye volô nye. Môs éziñ, David a nga too a ba’ale mintômba, ane beta ngbwengbwem é nga zu to’é mone ntômba wua! Ye wo yeme jôme David a nga bo? A nga leñe ngbwengbweme te a wôé je a mo! Môs ôfe, éyoñ ours éziñ é nga zu jeñe na é bi ntômba, David a nga wôé fe ours ate! Wo buni na za a nga volô David?— Nalé fo’o, Yéhôva.

Jam éfe é nga boban é liti’i na David a mbe étua ayok. Bone be Israël be mbe be wosan a bôte béziñe be mbe be loone na Bephilistin. Mone bezimbi wua ya be be a mbe nya nya ayabe môt, émômôtô ébien! A mbe éyôlé na Goliath. Goliath ate a mbe a kpwe’ele bone be Israël, a kpwe’ele fe Yéhôva. A mbe a jô’ô na, ‘e môt a wô’ôtan émiene na a ne fam, a za’a wosane ma.’ Ve bone b’Israël bese be mbe be ko woñe ya ke wosane nye. Éyoñe David a wô’ya ajô te, a nga ke kobô a Goliath a jô’ô na: ‘Ma zu wosane wo! Yéhôva é volô ma na me dañe fe wo!’ Ye wo simesane na David a mbe ayok?— Ôwé, a mbe nya nya ayo’o môt. Ye wo kômbô yem aval avé nlañ ôte ô nga man?

David ve nyoñe toloo wé, a mekôke metan, a taté na a mate mbil na a ke wosan émômôtô. Éyoñe Goliath a nga yene na David a nga’an mone mongô, jamete é nga bo na a woé. Nde David a nga jô nye na: ‘Wo zu be ma a nkpwaté mekôn, ve ma zu be wo a jôé Yéhôva!’ Ane a nga to’é ôkôk a futi wô toloo wé été, a nga mate mbil, a lume de mone Philistin ate. Nde ôkô’ te ô nga nyiine Goliath mvom asu, ézezañe mis! Ane émômôtô ate a nga ku si bubutu, ve wu! Woñe ve bi Bephilistin, ane bese be nga mane tup. Aval avé mone mongô ane David a nga kui na a wôé émômôtô?— Yéhôva nye a nga volô nye, Yéhôva a nga dañ émômôtô ate ngul!

Nlañe David wo ye’ele bia jé?— Wo ye’ele bia na Yéhôva a ne ngul a dañe bôte bese. A ne mvôé jôé. Nde ñhe, nge woñ wo bi wo môs éziñ, te vuane na Yéhôva a ne volô wo na ô bo ayok!