David ba Goliath

Yéhôva a nga jô Samuel na: ‘Kele’e nda Jessé. Mone wé wua nnye a ye bo njôô ya Israël señe Saül.’ Ane Samuel a nga ke be Jessé. Éyoñ a nga yene ntôle fame wé, a nga jô nlem été na: ‘Éko éziñ ndômane nyi nje Yéhôva a tobeya.’ Ve Yéhôva a nga jô nye na: ‘Sa ke nnye le, ma yene jôm é ne môte nlem, sa ke aval a yené atan.’

Ane Jessé a nga beta soo bone bé besaman. Ve Samuel a nga jô nye na: ‘Yéhôva a nji tobe môte wua ya be be. Ye ô nji bi mona fam mfe?’ Jessé nye na: ‘Me ngenan me bili mona fame wua, David. A ba’ale mintômba miam.’ Éyoñe David a nga so, Yéhôva a nga jô Samuel na: ‘Nnye le!’ Ane Samuel a nga sôé David mbone nlô, a telé nye njôô ya Israël señe Saül.

Mvuse mon éyoñ, bone b’Israël be nga ke wosane Bephilistin; Bephilistin be mbe be bili ngungule mone bezimbi ô to jôé na Goliath. Môs ôse, a mbe a kpwe’ele bone b’Israël a jô’ô na: ‘Lômané môt a zu juan a ma. Nge a bôme ma, bia ye bo belo benan. Ve nge me bôme nye, mia ye bo belo bangan.’

David a nga zu nkane bita ya Israël na a zu ve bobenyañe bé bidi. Éyoñ a nga wô’ô mame Goliath a mbe a jô’ô, a nga jô na: ‘Ma zu ke juan a nye!’ Ve Saül a nga jô na: ‘Ô ngenane mongô.’ David nye na: ‘Yéhôva a ye volô ma.’

Saül a mbe a yi na David a jaé biôm mewosane bié, ve David a nga jô na: ‘Me vo’o wosan a biôm bite.’ Ane David a nga nyoñe tolo wé, a kele ôtôñ. Nde a nga fiale mekô’ô metan, a futi me mfek. Ane a nga bume mbi. Éyoñe Goliath a nga yene nye, a nga jô na: ‘Za’a a mon. Anone ya yôp a betite ya fé be biya jôme ya di.’ David a nji ko woñ. A nga yalane nye na: ‘Wo zu be ma a nkpwaté mekôn a akoñ, ve ma, ma zu be wo a jôé Yéhôva. Ô nji juan a bia; wo juan a Yéhôva. Môt ase a zu yeme dene na, ngule Yéhôva ja dañe ngule nkpwaté mekôn a akoñ. Wo zu wu mo mangan.’

Ane David a nga to’é ôkôk a futi wô tolo, a lume wô Goliath a ngule jé ése. Ane ôkô’ô ôte ô nga nyiine Goliath mvom asu. Nye ve wu. Ane Bephilistin bese be nga mane tup. Ye wo fe ô too ndi a Yéhôva ane David?