NGAP 9
Bo’ané Yéhôva ésaé e nda bôt été
“Kañane nyô a nga té yôp a si.”—Nlitan 14:7
Aval ô maneya yé’é nsoé kalate wu, Kalate Zambe a bili abui miñye’elane mi ne volô wo a nda bôte jôé. Yéhôva a yi na mi nyiñe meva’a été. A nga ka’a na nge mi telé ékaña’a jé ôsu, a ye kô’ôlane mia biôme bise bivok. (Matthieu 6:33) A yi na mia nye mi bo benya bemvôé. Belane mengule môé mese na ô yemete amvôé dôé a Zambe. Beta ma’a môt a binam a ne bi, nnye le.—Matthieu 22:37, 38.
1 YEMETE MINKAÑE MI NE ZAÑE MIA YÉHÔVA
JÔME KALATE ZAMBE A JÔ: “A me aye bo mia Ésa, a mi aye bo bo’ befam a bo’ be binga asu dam.” (2 Becorinthien 6:18) Zambe a yi na ô bo mvôé jé. Meye’elane me ne volô wo. Yéhôva a jô wo na ô “ye’elane te jô’é.” (1 Bethessalonicien 5:17, Mfefé Nkôñelan) A yi na ô kate nye mame me ne wo nlem été. (Bephilippien 4:6) Éyoñe wo ye’elan a nda bôte jôé, bé yen aval avé wo nye’e Yéhôva.
Nge wo yi na ô laan a Yéhôva, wo yiane fe vô’ôlô nye. Wo vô’ôlô nye éyoñe wo yé’é Kalate Zambe a bekalate ba so Bible. (Besam 1:1, 2) Kôme fe fase mame wo yé’é. (Besam 77:11, 12) E vôlô’ô Zambe a tinane fe na ô tabe mbane bisulan.—Besam 122:1-4.
E kañete bôte bevo’o mejô me Zambe a ye fe yemete minkañe mi ne zañe mia Yéhôva. Nge wo ve mengule ya bo mame mete, wé tu’a subu nye bebé.—Matthieu 28:19, 20.
JÔM Ô NE BO:
Nyoñ éyoñe môs ôse na ô lañe Kalate Zambe a na ô ye’elan a nda bôte jôé
Mame ya nsisim mme ma yiane tebe ôsu nda bôte jôé, sa ke mimvôman
2 MI BO AYÉ’É NDA BÔTE JENAN A MEVAK
JÔME KALATE ZAMBE A JÔ: “Mi suba’ane bebé be Zambe, ndemben a ye subu mia bebé.” (Jacques 4:8) Mia yiane bi ngumba nta’ane mam asu ayé’é nda bôt, a jeñe na mi tône wô. (Metata’a 18:19) Ve abime te étam da yiane ki. Zambe a yiane tebe ôsu ényiñe ya nda bôte jenan môs ôse. Volô nda bôte jôé ése na é bi mbamba élat a Yéhôva, ô ne de bo nge wo laane be mejô me Yéhôva éyoñ ése: “Éyoñ [ô to] si nda jôé, a éyoñe w’awulu zen, a éyoñ w’abômbô si, a éyoñ w’akôlô si.” (Deutéronome 6:6, 7) Jeñe na ô vu mbo ésaé Zambe ya melu mvus a mbe jôé na Josué, nye a nga jô na: “Mfa’a wom a nda [bôte] jam, bi aye bo Yéhôva ésaé.”—Josué 24:15.
JÔME MI NE BO:
Mia yiane bi nta’ane mame ya ayé’é nda bôte, mame mia yé’é me fombô’ô nda bôt ése