Éjôé ja kandan

Nté ôse Salomon a mbe a bo’o Yéhôva ésaé, ayoñ Israël e mbe e nyiñe mvo’é. Ve Salomon a nga su’ulane lu’u abui binga ya meyoñ mefe; binga bete be mbe be kañe’e bengulemelan. Ane Salomon a nga taté na a tyendé, a taté fe na a kañe bengulemelan. Yéhôva a nga wô’ô jam ete ôlun. Ane a nga jô Salomon na: ‘Éjôé ja ye kôlô nda bôte jôé, a kandane mengabe mebaé. Ma ye ve mbo ésaé wôé ngabe ja dañ anen, nda bôte jôé ki ja ye jôô ngabe ja dañ tyôtyoé.’

Yéhôva a nga bo fe jam afe. Jéroboam, mbo ésaé Salomon a nga tobane nkuli mejô Achija zen. Nde Achija a nga nyabe ngômesane jé bifus awôm a bibaé, a jô Jéroboam na: ‘Yéhôva a ye kandé ayoñ Israël mengabe mebaé. Nyoñe’e bifus awôm amu wo ye jôô meyoñ awôm ya été.’ Éyoñe njô bôte Salomon a nga wô’ô jam ete, a nga kômbô wôé Jéroboam. Ane Jéroboam a nga tup, a ke Égypte. Mvuse ya valé, Salomon a nga wu, a Roboam, mone wé a nga jôô señe jé. Nde Jéroboam a nga simesane na a mbe a ntoo ngule ya bulan Israël.

Benya bôtô ya Israël be nga jô Roboam na: ‘Nge wo nyoñe bôte ba mvo’é, ba ye ba’ale élat a wo.’ Ve bemvôé bé be mbe be ngenane bisoé be nga jô nye na: ‘Wo yiane tibili be! Kô’ôlane be ésaé!’ Nde Roboam a nga tôñe melebe bemvôé bé. Ane a nga taté na a tibili ayoñ, ane e nga lume nye mvus. Nde ayoñ e nga tobe Jéroboam na nnye a bo njôô ya meyoñ awôm be nga su’ulane loone na, ayoñ Israël. Meyoñ mebaé mevok me nga su’ulane lobane na ayoñ Juda, a bôte ya meyoñ mete be nga ba’ale élat a Reboam. Meyoñ awôm a mebaé ya Israël me mbe ñhe me ntoo nkandan.

Jéroboam a nji be a yi na bôte bé be ke kañ e Jérusalem, amu nde Roboam a mbe a jôô wé. Ye wo yem amu jé? Amu Jéroboam a mbe a mate na bôte bé be bulane ke tabe éjôé Roboam si. Nde a nga kôme bone binyaka bi or bibaé, a jô bôte bé na: ‘Jérusalem a ne aka’a ôyap. Mi ne kañe va.’ Ane bôt be nga taté na ba kañe binyaka bi or; be su’ulane fe vuane Yéhôva.