Be nji buti mesu si

Mvus éyoñ Njô bôt Nebucadnetsar a nga yene beta éve’ela biyeyem, a nga bo beta éve’ela or. Ane a nga telé je nje’ese ya Dura, a bañete beta be bôte ya Babylone; a nga loene fe Schadrac, Méschac a Abed-Nego. Ane a nga jô na: ‘Éyoñe mia ye wô’ô éduñe toñ, ndiñ, mvet, a éngombé, buta’ané mesu si a kañané éve’ela! Nyô ase a ye bene buti asu si a ye wuaban mbe’e ndu’an été.’ Behébreu belale ba, ba zu ñhe bo aya? Ye kañ éve’ela, ye ke ôsu a kañe ve Yéhôva étam?

Ane njô bôt a nga jô na be bôme mezik. Môt ase a nga buti asu si a kañ éve’ela; ve Schadrac, Méschac a Abed-Nego be nji de bo. Bôte béziñ be nga yene be, ane be nga jô njô bôte na: ‘Behébreu belale ba, ba te bene kañ éve’ela.’ Ane Nebucadnetsar a nga jô bendôman bete na: ‘Ma zu beta ve mia fane fe. Nge mi kele ôsu a ngan, mé wua mia mbe’e nduan. Yemané na teke zambe éziñ a ne nyii mia mo mam.’ Ane bendôman bete be nga jô nye na: ‘Bi nji yi na ô ve bia fane fe. Zambe wongan a ne nyii bia. Ja’a ki a nyii ke bia, A njô bôt, bia ye ke kañ éve’ela.’

Nebucadnetsar ve zu wô’ô mbia ôlun. Nde a nga jô bôte bé na: ‘Bo’ané na mbe’e nduan ô yôñ mebime zangbwa adañ abim be wô’ô bo!’ Ane a nga jô bezimbi bé na: ‘Ka’ané bôte ba, a wuané be mbe’e nduan!’ Mbe’e nduan ôte ô mbe aval ayôñ é mbe na, bezimbi bebien a nga lôm be nga dik été été. Behébreu be nga wuabane duan. Ve éyoñ Nebucadnetsar a ke bôt, a nga viane yene bôte benyin be wulu’u mbe’e nduan été. Ane a nga si’an, a sili bivete bié na: ‘Nga bia te wua bôte belal mbe’e nduan. Éyoñe ji me nlô bôte benyin, môte nyini nyi ke a funane ange!’

Ane a nga subu mbe’e nduan bebé a jô na: ‘Za’ané, a mia bebo bisaé be Zambe ya Ngul Ése!’ Môt ase a mbe fe’e ne vema éyoñe be nga yene Schadrac, Méschac a Abed-Nego be kui mbe’e nduan teke ayeñ éziñ. Bikôbe biap, bisile biap a biyé biap bi nji dik, nde fe, be nji be be nyume’e ôtita.

Ane Nebucadnetsar a nga jô na: ‘Zambe Schadrac, Méschac a Abed-Nego a ne fo’o ngul. A nga lôm ange wé na a nyii be. Teke zambe mfe a ne ane nye.’

Ye wo fe ô ne ntidane ya kabetane Yéhôva ane Behébreu belale ba, to’o jé ja kui?