SIKÔLÔ 14

Ngôné’é miñye’elane mia dañe mfi

Behébreu 8:1

ÔBALEBAS: Nté wo bo nkañete wôé, volô’ô bôte ba vô’ôlô wo na be yen avale avé miñye’elane mia dañe mfi mia lu’an a nsôñane wôé a nlô ajô wo tôñesane wô.

AVAL Ô NE BO JAM ETE:

Wo yiane bi ngumba nsôñan. Jé nje nkañete wôé wo sôñ? Ye e kate bôte foé éziñ, ye e volô be na be kañese ñye’elan éziñ, nge ke e tindi be na be tôñe ñye’elan éziñ, fiale’ ñhe bifia wo ye belane bie. Jeñe’ na bone minlô mejô miôé mise mi volô wo na ô tôé nsôñane wôé.

Sili’i womiene na: ‘Aval minsili avé bôte ba vô’ôlô ma be ne sili bebien, a avale miñye’elan avé be ne kate wôk? Aval avé be ne sili minsili mite?’ Mvuse ya valé ta’a minsili mite, mi wo ye taté yalane mie mmie wo telé ôsu, nalé aye volô bôte na be vô’ôlô wo, be wôk, a kañese mame wo ye’ele be.
Tuka’a ngôné nlô ajô ya nkañete wôé. Nté wo bo nkañete wôé, ba’alane bifia ya nlô ajô bia dañe mfi, ô ne fe belane bifia bi bili atinane da, nalé a ye volô bôte ba vô’ôlô wo na be simesane nlô ajô wo tôñesane wô.
Bo’o na bone minlô mejô miôé mi bo tyi’ibi ya yen, a tyi’ibi ya wôk. Tobe’e ve abime miñye’elan éziñ, abim ô ne kôme timine teke di éyoñ. Ô nji bo ntindane ya la’ase abui miñye’elan, kôme’e timine ñye’elan ôse, ôsusua na wo ke ñye’elan ôvok, nyoñe’ éyoñe ya wo’on, te bo ôjeja’a ya ke ñye’elan ôvok.

Menyiine me nkobô, ô ne kate bôte ba vô’ôlô wo ñye’elan wo zu tôñesane wô, asu ya na be bo teke vuane wô, ô ne fe de bo mesuu me nkobô môé.