Éyoñe môte bi nga luk a bo mejian

“Me nga kômbô wu éyoñe nnôme wom a nga li’i ma, na a ke nyiñ a ngone minga. A nga koñe fo’o ma, e dañe dañ éyoñ ma simesane mam mese me nga nyume mamien asu dé.”—Maria, Espagne.

“Éyoñe minga wom a nga li’i ma atemetem, a mbe v’ane jôm éziñ é nga wu ma nyul été. Minsôñane miangan a mam bi nga mane tak bi nga jaé ntuk. Biyoñ biziñ, éyoñe me mbe me simesa’ane na me maneya yet, nlem ô nga beta ma bo éyôé.”—Bill, Espagne.

MEJIAN me ne jam da taé nlem mbia jam. E ne été na, belu’u béziñ be nga yene na be ne jamé nluk a te sem, a beta kôm élate jap.a Ve jame da, ja’a alu’u da tyamé nge momo, nluk a nji ke e nseñ, a wô’ô ke ôsu a juk nlem été. Aval avé a ne dañ mintaé a wôk?

BIFUSE YA BIBLE BI NE VOLÔ WO

Akusa bo mintaé be bili, abui beluk e nga yene mvolane Bible été. Be nga yé’é na Zambe a yene mili’i map, a wô’ô fe mintaé miap.—Malachie 2:13-16.

“Éyoñe nleme wom ô nga jaé a minsimesan, ô nga volô ma, ô nga ve ma avak.”—Besam 94:19, Mfefé Nkôñelan.

Bill a jô na: “Éyoñe ma lañ éfus éte, me lôô Yéhôva a fôlô’ ma, fo’o v’ane ésa a wô’ô mone wé mintaé a wô’ô bo.”

“Be nyô a ne [zôsô] w ’aye liti na, ô ne [zôsô].”—Besam 18:25.

Carmen nnye ate nnôm a nga bo mejian tañ abui bengon a jô na: “Nnôme wom a nji kui na a ba’ale alu’u dangan. Ve me mbe me to ndi na Yéhôva nye a ye bo zôsô a ma kom ése. A ye samele ma môs éziñ.”

“Te tyelane minleme yôp a jam éziñ; ve mfa’a ya jam ese, mam mi asili me kateba’ane be Zambe a meye’elan a nja’an a mvean akéva. A mvo’é Zambe, nje éte je adañ fe’ ése, je aye ba’ale minlem mienan a minsimesane mienan be Krist Yésus.”—Bephilippien 4:6, 7.

Sasha a jô na: “Me nga lañe bifuse bite abui biyoñ. Nté me nga ke ôsu a ye’elan, Zambe a nga ve ma mvo’é ényiñe jam.”

Bôte bese ba be nga kômbô sulu mo si biyoñ biziñ. Ve be nga tabe Yéhôva Zambe ndi, ane be nga yene mvolan Mejô mé été. Bill a yemete jam ete a jô’ô na: “Mbunane wom ô nga bo na ényiñe jam é bi nsôñan éyoñ é mbe é yené v’ane me maneya jañele mam mese. Ja’a me nga wulu “mbi’ili ô ne dibi ya awu,” Zambe a nga su’u ma.”—Besam 23:4.

a Minlô mejô mi ne Vee ôyo! a ne nlô a jô na, “L’infidélité conjugale” ya Ngone nyini é to melu 22 ya mbu 1999 mia liti nge e ne mfi na môt a jamé nge momo (L’infidélité : des conséquences tragiques; La réconciliation est-elle possible ?; Quand on opte pour le divorce).

Mam me nga volô bôte bevok

Bindi’i bifuse bi ne wônô wo.

Bill a jô na: “Éyoñe ma lañe kalate Job a Besam, ma tene bifuse bia lu’an a été me tele. Me nga yemelane na, betili Kalate Zambe bete fe be nga wô’ô avale mintaé me bili.”

Mezik me ne bane wo nlem.

Carmen a jô na: “Me mbe me wô’ô mezik éyoñ me mbe me kate’e ke ôyo alu. Jam ete e nga volô ma nlem abui.” Daniel ki a jô na: “Me nga yé’é avale ba bôme mvet, a azi’i da so été é mbe é bo’o na, nlem ô bômbô ma si ne mieññ.”

Kate’ avale wo wô’ôtan.

Daniel a jô na: “Me nji be me bili fulu ya kate bôt avale ma wô’ôtan. Ve me mbe me bili mbamba bemvôé, a me mbe me laan a be môs ôse. Me mbe me tili’i be bekalate nge laan a be asu na be yem avale ma wô’ôtan. Jam ete e nga volô ma nya abuii.” Sasha a jô na: “Mvolane nda bôte jam ô mbe nya mfii. Nyia wom a mbe valé éyoñ ése. A mbe a nyoñ éyoñe ya vô’ôlô ma éyoñe me mbe me kômbô’ô laan. Ésa wom a nga bo na me wô’ôtane na ba nye’e ma, a volô fe ma na, me yet ôte’ete’e ôte’etek.”

Bo’o mbane meye’elan.

Carmen a jô na: “Me mbe me ye’ela’an éyoñ ése. Me mbe me wô’ôta’ane na Zambe a ne ma bebé, na a vô’ôlô ma, a na a su’u ma. Mbia biyoñ bite, me nga subu nye bebé.”