Amu jé é ne mfi na ô k’ôsu a bu’uban ényiñ?

Faizal nnye ate a nga salebane nlem, mbu wua mvus awu minga wé, a jô na: “Éyoñe ma lañ Kalate Job, me lôô na Yéhôva a nga yeme fo’o bo na be tili nye. Éyoñe bia lañ nkañete éziñ e Bible été wo lu’an a été jangan, nalé a volô bia nlem.” A beta jô na: “E ne fo’o mfi na bi k’ôsu a bu’uban ényiñ.”

Tarsha a mbe a nga’an ésoé éyoñe nyia a nga wu. A jô na: “E yeme Nté wongan a ne jam da ve nsôñan ényiñ, ndi nlem, a mevak, akusa bo minju’u mise bi bili. Bi ne tabe ndi na, Yéhôva a ne su’u bia a volô bia môs ane môs.”

MINLÔ MEJÔ bia te yen mia te liti aval avé mbia be mam ba kui bia ényiñ be ne bo na, ényiñ é bo te ke’ajibi. Nté wo jibi minju’u wo tôbane mie, ô ne sili womien nge ô ne fo’o ke ôsu a bu’uban ényiñ, a nge môt éziñ a nyoñe fo’o wo ngap. Tabe’e ndi na Zambe a nyoñe ngap a minju’u miôé. Ô ne dia mise mé.

Ntili Besam 86 a nga liti ndi nlem a bili be Zambe a jô’ô na: “E môs y’ôlun, ma loone wo, a wo yalane ma.” (Besam 86:7, Mfefé Nkôñelan) Ô ne ñhe sili womiene na, ‘Aval avé Zambe a ye yalane ma “e môs y’ôlun”?’

E ne été na Zambe a ye ke vaa minju’u miôé été été, ve Mejô mé ma liti na, a ne ve bia mvo’é ya nlem asu na bi jibi. Bible a jô na: “Te tyelane minleme yôp a jam éziñ; ve mfa’a ya jam ese, mam mi asili me kateba’ane be Zambe a meye’elan a nja’an a mvean akéva. A mvo’é Zambe, nje éte je adañ fe’ ése, je aye ba’ale minlem mienan a minsimesane mienan be Krist Yésus.” (Bephilippien 4:6, 7) Tame yen avale bifuse ya Bible bi bia liti na Zambe a nyoñe bia ngap.

Zambe a nyoñe wo ngap

“Teke wua y’été [mvokuma] Zambe a vuan. . . . Mi ne tañ anen a dañ abui bemvokuma.”—Luc 12:6, 7, Mfefé Nkôñelan.

TAME FAS: Bone b’anon ane bemvokuma be ne zezé mise me bôt, ve Zambe a nyoñe ngap a be. Teke wua y’été Zambe a ne vuan; bese be ne dia asu dé. Bone be bôt be ne dia abui a dañe bemvokuma. Mona môt a ne ététéa ja dañe mfi Zambe a nga té si va, amu a nga té nye ‘éve’ela jé,’ a ve nye ngule ya vu mefulu mé.—Metata’a 1:26, 27.

“A Yéhôva, ô faseya ma a yeme ma. . . . W’ayem ane m’asimesan . . . Ve’ele’e ma, a yem minsimesane miam.”—Besam 139:1, 2, 23.

TAME FAS: Zambe a kôme wo yem. A yem asimesan é solô wo nlem été a mam ma ndeñele wo. Ja’a bôte bevok be nji kôme yem minju’u wo tôbane mie, Zambe a nyoñe wo ngap a kômbô fe volô wo. Amu nalé, ô ne ke ôsu a bu’uban ényiñ.

Ô nji nyiñe zezé

“Wô’ô meye’elane mam, a Yéhôva, a kañese na, ñyône wom ô kui be wo. . . . Tame vit alo dôé be ma; môs m’aloen tame ji’a yalane ma. . . . A simesaneya meye’elane ya nyô a ne éngôngo.”—Besam 102:1, 2, 17.

TAME FAS: Yéhôva a yene mili’i mese bone be bôt ba sôé éyoñe ba tôbane minjuk. (Besam 56:8) A yene fe mili’i môé. Zambe a simesane minju’u miôé mise a mili’i môé amu ô ne dia mise mé.

“Te fombô beyéye, amu me ne Zambe wôé; m’aye ve wo ngu; ya, m’aye volô wo . . . Amu ma, Yéhôva Zambe wôé . . . [Ma jô] wo na, Te ko woñ; m’aye volô wo.”—Ésaïe 41:10, 13.

TAME FAS: Zambe a bili nkômbane ya volô wo. Nge wo ku, a ye su’u wo.

Mbamba ényiñ a yange wo ôsu

“Amu beta nye’an, Zambe a nga nye’e bôte ya si nyô, a nga lôm atyi’i Mone dé, ajô te bôte bese môt a buni nye, a ye jañ, ve tabe ényiñ ya melu mese.”—Jean 3:16.

TAME FAS: Zambe a nga kañese ve Mone wé Yésus, ane ntañ asu dôé amu ô ne angôndô ya dia mise mé. Ntañ wo ve wo fane ya bu’ubane mbamba ényiñ nnôm éto.a

To’o nlem ô tyele wo yôp a na ényiñe jôé é nto teke ajibi, nyoñe’ éyoñe ya yé’é Mejô me Zambe, a yemete ndi nlem ô bili bengaka’a Zambe a bo asu melu ma zu. Nge ô bo nalé, wo ye bo mevak a wo ye ke ôsu a bu’uban ényiñ.

a Nge wo kômbô yeme mam mefe a lat a aval ô ne bu’ubane ntañ Yésus a nga ve, yene’e vidéo a ne nlô ajô na, Simesa’an awu Yésus e www.pr418.com. Kele’e BEKALATE > BEVIDÉO > BISULAN A ÉSAÉ NKAÑETE JANGAN.