Tyame’ asimesan ese da tebe ñyemane Zambe ngame yat!

1. Abendé avé Paul a nga ve Bekristene ya ntete mimbu ôsu?

NLÔMANE Paul ô nga bendé Bekristene ya ntete mimbu ôsu na: “Te boan éfunan a si nyô.” (Bero. 12:2) Amu jé avale ngul abendé ete, a too ke na bese be mbe miñwo’an?​—Bero. 1:7.

2-3. Aval avé Satan a jeñe na a bo na bi lume Yéhôva mvus, a aval avé bi ne kui na bi sô’ô mbia b’asimesane be ne nyiine bia minlem?

² Nlem ô mbe ô taé’ Paul amu Bekristene béziñe ya éyoñ éte be nga jô’é na zezé ñyemane mame ya émo Satan nje é wulu be. (Beép. 4:17-19) Jam ete e ne fe kui bia wo den. Ngum ésaé beta masa ya émo ji a bili ô ne ve na a bo na bi lume Yéhôva mvus; Satan a ne mane bo mam mese asu na a tôé nsôñane wé ôte. Nge a yene na bi bili nsisim éngelezek, a ne belane wô na a ndaman élate jangan a Yéhôva. Asu na a mé ôsimesane wongan, a ne fe belane mam me nga kui bia ényiñ, metume ya jale dangan, nge ke ñye’elane bi nga bi.

³ Nge mbia mimfasane mi lôñeya “alem” minlem miangan été, ye bi ne fo’o ngule ya beta sô’ôlô mie si nga? (2 Bec. 10:4) Paul a yalane na: “Bia tyam asimesan, a jôm ése é ne mbetane yôp, nje ja betebane yôp, a tebe ñyemane Zambe ngame yat, a bia bi ôsimesan ôse nkôm ô bo Krist mewôk.” (2 Bec. 10:5) Nalé fo’o, Yéhôva a ne volô bia na bi sô’ô mbia b’asimesan nge be ntoo bia nlem. Fo’o ve ane ako’o nsul e wô’ô mane vili nsul ôse wo te nyiine môte nyul éyoñe nyo ja te lôbe nye, aval ete fe, Mejô me Zambe me ne mane vili nsul ôse émo Satan ja nyiñili bôt asimesan.

‘BO’ANE MINTYÉNDANE MINSISIME MIENAN ÉTÉ’

4. Abui ya be bia e nga bo jé éyoñ e nga yé’é benya mejôô?

⁴ Tame ve’ele simesane mam ô nga yiane tyendé ényiñe jôé éyoñ ô nga yem benya mejôô. Asu abui ya be bia, e nga sili na bi lume mbia mimboone miziñe mvus. (1 Bec. 6:9-11) Bia ve Yéhôva akiba amu a nga volô bia na bi bo de.

5. Kalate Beromain 12:2, a liti na bia yiane bo mam mebaé mevé?

⁵ Bi nji yiane ve’ele simesane na abim mintyéndan bi boya da yian. To’o bi nga jô’é beta minsem ôsusua na bia duban, bia yiane ke ôsu a ve ngule na bi sa’ale mam mese me ne bo na bi beta bo avale minsem ete. Jé bi ne bo? Nlômane Paul wo jô bia na: “Te boan éfunan a si nyô: ve mi veñesa’an ñveñesane ya bo minsisime mienane mimfefé.” (Bero. 12:2) Éfus éte ja ngôné mam mebaé. Jam ôsu, bia yiane ki bo “éfunan a si nyô,” nge ke jô’é na émo nje é mé bia. Jame baa, bia yiane “veñesan ñveñesane ya bo minsisim miangan mimfefé.”

6. Jé mejô Yésus a nga jô Matthieu 12:43-45 ma ye’ele bia?

⁶ Ñveñesane Paul a jô wô va ô nji bo ve bone mintyéndane ya yôbe yôp. Jam ete da nambe abui mame ya ényiñ jangan. (Fombô’ô nka’ale ô ne nlô ajô na “Ye veñesan ane jôngôlô, ye ane évulabebas?”) Mintyéndane mia yiane kaa minsisim miangan été, ataté bone mefulu mese a aval bia wô’ôtane mam, akekui minkômbane mi ne bia nlem. Môt ase ya be bia a yiane sili émiene na: ‘Avale mintyéndan avé me nga bo asu na me bo Kristen: ye mi ya yôbe yôp, ye mi mia kôme so nlem, mi liti’i na me ne nya Kristen?’ Jam ete e ne nya nya mfii. Mejô me Yésus ya kalate Matthieu 12:43-45 ma liti jam bia yiane bo. (Lañek.) Mejô mete ma ve bia beta ñye’elane nyi: E nji sili ve na bi kandan a mbia b’asimesan, bia yiane fe jeñe na bi fole mbia b’asimesan a asimesan da ve Yéhôva nlem avak.

“MI BO MIMFEFÉ MFA’A YA . . .  MINLEM MIENAN”

7. Aval avé bi ne bo mimfefé mfa’a ya minlem miangan?

⁷ Ye môt a ne fo’o kôme kui na a bo mfefé mfa’a ya nleme wé nga? Bible a yalane na ôwé. A jô na: “Mi [ke ôsu] a bo mimfefé mfa’a ya minsisime ya minlem mienan, a jaé mfefé môt, ñwô ô nga téban ô funa’ane Zambe mfa’a ya zôsôô a mfubane ya benya mejôô.” (Beép. 4:23, 24) Teke vaa nge beté, bia bese bi ne tyendé a bo mimfefé mi bôt. Bi nji yiane su’u ve na bia wosane mbia b’asimesan a jô’é mefulu méziñ. Jam da sili é ne na bi bo ‘mimfefé mfa’a ya minlem miangan.’ Nalé a ne na bia yiane tyendé avale môte bi né: minkômbane miangan, mefulu mangan a mam mese ma tindi bia na bi bi avale minkômban a avale mefulu ete. Mbane ñwô wo sili bia éyoñ éte.

8-9. Aval avé jam é nga kui mojañ éziñ da liti bia mfi ya bo mintyéndane nleme wongan été?

⁸ Bi tame kobô ajô mojañ éziñ a mbe a bili nsisim évô. Éyoñ a teléya ñyuane meyok a mendum a nga baptizôban; bôte bese ya ngoto jé ve semé avale mintyéndan ete, a ve Yéhôva duma. Ve ngô’é éziñ, valé a ndeme duban, môte ve zu soñe nye ndume nda jé. Môt ate a mbe a bili’i meyok. Ôsusua, mojañ a nga jôé émien, teke yaa. Ve ajô é nga ndaman éyoñ ôkukute môte wu ô nga daa Yéhôva anyu nyul, ane jam ete e nga kui mojañ ébe’e nja’a. Mojañe ve zu wo’o môt ete ébôm. Jé é mbe é ndeñele’e mojañe nyi? Akusa bo ayé’é ya Bible é nga volô nye na a jô’é mendum, mojañ a mbe a ngenane teke kôme vaa nsisim évô nleme wé. A mbe a ngenane te bo mfefé môte nleme wé été.

⁹ Ve jam ete e nji bo na a sulu mo si. (Min. 24:16) Bemvendé be nga volô nye na a ke ôsu a yaé nsisim. Ane a nga kôme tyendé, a su’ulane fe bo mvendé. Nde ngô’é éziñ, nseñ Aba Éjôé, a nga tem a nga beta tebe aval été a nga tebe éyoñ a mbe a ndeme duban. Nso’o meyo’o éziñ a mbe a jeñe’e mvendé jia ya akônda mintañete. Mojañ a zu ñhe bo aya éyoñe ji? A nga vañe môt ate a évôvoé ése, a kobô nye nlem ô bôô nye si, a ye’elane nye na a bi nlem, a nyoñe fe nye a kele nye nda jé. Jé é nga volô mojañe na a bo te bo ane éyoñ ôsu? Amu mojañ a mbe a ntoo mfefé môte nleme wé été. A nji be a ngenan a bili nsisim évô, ve a mbe a mbili fulu nje’ebane nlem, a mbe a nga nye’e fe mvo’é. Ane a nga ve jôé Yéhôva duma.

10. Jé ja sili nge bia kômbô tyendé nya ntyéndane?

¹⁰ Môt a kôlô ki si mame tyé éyoñ éte a teme na a tyendéya, môt a tyendé ki ane nkabeke dis. Bia yiane “late ngul” mimbu mimbu. (2 P. 1:5) Ve mintyéndane mite mia bobane ki fo’o ve amu na môt a boya abui mimbu ékôane Yéhôva. Bia yiane kôme bibane na bi taté na bia tyendé nlem été. Mam méziñ me ne volô bia mfa’a ôte. Mevé?

AVAL AVÉ BI NE BO MINLEME MIANGAN MIMFEFÉ?

11. Aval avé meye’elane ma volô bia na bi bo minleme miangane mimfefé?

¹¹ Meye’elan me ne jam ôsu. Bi ne vu ntili Besam mfa’a ôte, nnye ate a nga ye’elane Yéhôva a jô’ô na: “Téé’ me nlem ô ne mfuban, a Zambe; a beta ve me nsisim ô ne mvo’é nlem été.” (Bs. 51:10) Bia yiane kañese na bia yiane tyendé a bi mbamba minlem, a ye’elane Yéhôva na a volô bia mfa’a ôte. Amu jé bi ne tabe ndi na Yéhôva a ye volô bia? Éyoñe Yéhôva a nga yen ayete minlem bone b’Israël, a nga kate nkulu mejô Ézéchiel jam é ne fe ve bia ngule nyul, a nga jô nye na: “Ma ye ve be nleme wua, a ma ye futi [be] mfefé nsisim minlem été; ma ye vaa nleme ya akok ô ne be minsôn été, a ve be nleme ya minsôn.” (Éz. 11:19) Da yené na Yéhôva a nga volô be na be tyendé, a kômbô fe volô bia den.

12-13. (a) Besam 119:59 a liti na jé bia yiane bindi? (b) Minsili mivé wo yiane sili womien?

¹² Bia yiane fe bindi. Éyoñ ése bia lañe Bible, bia yiane kôme nyoñ éyoñe ya fas a bindi mam bia yé’é, akekui bia ye yemelan asimesan a mefulu bia yiane tyendé. (Lañe’e Besam 119:59; Beh. 4:12; Jc. 1:25) Bia yiane jeñe na bi tu’a fas nge émo a zezé ñyemane mame ya été bi nga kômbô dutu bia. Bia yiane kôme yebe na bi bili mefulu méziñ me ne abé, a ve ngule na bi tyendé.

¹³ Sili’i womiene na: ‘Ye e ne bo na me ne éviele nge ke na ma kômbô bôte bevok?’ (1 P. 2:1) ‘Ye me ne éngelezek amu ayoñe dam da wum, nge amu me nga bo beta besikôlô, nge ke amu me ne mfañe môt?’ (Min. 16:5) ‘Ye ma biasé bôte bevo’o amu be nji bi biôme bi mo ane ma, nge ke amu bia be be bi se ke ayoñe da?’ (Jc. 2:2-4) ‘Ye ma nye’e mam ma wum émo?’ (1 Jean 2:15-17) ‘Ye ma nye’e mvite mimvôman a mi mia ngôné évô?’ (Bs. 97:10; 101:3; Amos 5:15) Nge wo kôme nyoñ éyoñe ya yalane minsili mite, wo ye yemelane na wo yiane bo mintyéndane miziñ ényiñe jôé.​—Bs. 19:14.

14. Amu jé é ne nya mfii na bi bi mbamba mewoso?

¹⁴ Jeñe’e fe na ô bi mbamba mewoso. To’o bia jô aya, bi vo’o wulu a mbia be bôt a buni na jôme ja ye ke bo bia. (Min. 13:20) Bôte bia be be bia saé, a bongô be sikôlô bevo’o be vo’o tu’a volô bia na bi yene mam ane Yéhôva. Ve bi ne koone mbamba bemvôé éyoñ bia tabe bisulan Aba Éjôé. Bisulane bia tindi bia na bi bi “nye’an a mbamba mimboane mi mam.”​—Beh. 10:24, 25.

BO’O NGULE MBUNAN ÉTÉ!

15-16. Aval avé Satan a jeñe na a tyendé bia ôsimesan?

¹⁵ Te vuane na Satan a jeñ a ngul ése na a tyendé ôsimesane wôé. Ajô te, a belane fatane mfasane ya émo asu na ésaé Kalate Zambe a bo be bia é bo momo.

¹⁶ Azukui den, Satan a ke ôsu a sili bia avale nsili a nga sili Ève afub Éden: “Ye Zambe a nga tu’a fo’o jô na . . . ?” (Met. 3:1, Mfefé Nkôñelan) Bi wô’ô wô’ô bôte ya émo Satan be sili bia avale minsili ete: ‘Ye mia bele na Zambe a tu’a kamane na befam befam a binga binga be lu’an? Ye Zambe a tu’a fo’o kamane na be jem abô’ô kilisimas a abô’ô abialé nga? Ye Zambe wônan a tu’a fo’o bene na mi nyoñe metyi? Ye Zambe ya nye’an a ne fo’o tu’a tyili mia na mi yeñ a bôte benane fo’o ve amu ba te tebe feñe nga?’

17. Jé bia yiane bo nge minsili miziñ mia ndeñele bia, a kalate Becolossien 2:6, 7 a liti na jam ete da ye bo bia mfi ôvé?

¹⁷ Bia yiane kôme yem amu jé bia buni mame Yéhôva a ye’ele bia. Nge biabebien bi teke tu’a fak asu na bi bi biyalane ya minsili mia ndeñele bia, bi ne tem bisô bi nga jaé bia nlem. Bisô bite ki bi ne ndamane bia asimesan a wôé mbunane wongan. Jé bi ne ñhe bo asu na te jam ete da kui bia? Bible a jô na bia yiane ve ngule mfa’a ya na biabebiene bi yemelane na Mejô me Zambe “me ne mvaé, ma nyoñeban, a [na] me ne mvo’é ésese’e.” (Bero. 12:2) Nge bia bo mbane ya yé’é, bia ye tu’a wô’ô na benya mejôô ya Bible me ne betotyii. Bia ye fe yemelane na memvinda me Yéhôva mese me ne zôsôô. Nge bi bo nalé, bia ye bo ane élé ja lôme minkañe mié ôyabe si été, bia ye tebe ne bip a bo ‘ngule mbunane wongan été.’​—Lañe’e Becolossien 2:6, 7.

18. Nge bi nji yi na émo Satan é mé asimesane dangan, jé bia yiane bo?

¹⁸ Ô nji yiane yange na môte mfe nnye a yemete mbunane wôé. Ajô te, jeñe’e na ô bo mfefé môt. Bo’o mbane ya ye’elane Yéhôva na a ve wo mbamba nsisime wé. Bindi’i mame wo yé’é; sili’i womiene nge asimesane dôé da lu’an a nkômbane Zambe. Jeñe’e na ô bi mbamba mewoso; wulu’ a bôte be ne volô wo na ô bi ôsimesane Yéhôva. Nge ô bo nalé, émo Satan ja ye ke kui na é mé asimesane dôé. Wo wo ye viane kpwé kpwé “asimesan a jôm ése . . . ja betebane yôp a tebe ñyemane Zambe ngame yat.”​—2 Bec. 10:5.