BO’OK ÉSAÉ NKAÑETE NYA MBOANE
Enjeñané na bi bo atyeñ ésaé nkañete—Womien kômesa’an aval ô ne ve nsoé kalate
AMU JÉ JAME TE É NE MFI: E ne fo’o été na, kalate ésaé asu bisulan a liti bia avale bi ne ve môte nsoé kalate, ve bive’ela bite bi ne ve minkpwas. Môt émien a ne belane bifia bi ne tyi’ibi asu dé. Ô ne tobe fatane mboone mfe, nge yene na, ngume nlô ajô éziñe wo wô’é a bôte ya vôm ô too. Ajô te nde, éyoñ ô maneya lañe nsoé kalate ôse, fombô’ô éve’ela ya tôñe ja so kalate ésaé asu bisulan, a bevidéo ba liti éve’ela ya tôñ. Ô ne belane melebe me ne si va, asu na womien ô kômesan ane ô ne ve nsoé kalate.
AVAL Ô NE BO:
Sili’i womiene na, ‘Ye ma kômbô fo’o belan éve’ela jia ya bive’ela bi ne kalate nyi?’
ÔWÉ MA KÔMBÔ
Kômesa’ane menyiine me nkobô môé. Éyoñ ô maneya batane môt, kate nye jôme wo te zu bo. (Éve’ane ji: “Ma te zu jome wo amu. . .”)
Fasek mame wo ye jô ôsusua na wo bôône môte nsili, ôsusua na wo lañe nye éfuse ya Kalate Zambe, a ôsusua na wo ve nye nsoé kalate. (Éve’ane ji: Ôsusua na wo lañe môt éfuse ya Kalate Zambe, ô ne jô na, “Éfuse ji ja ve bia mbamba éyalane ya nsili ôte.”)
MOMO, ME NJI KÔMBÔ
Tobe nlô ajô éziñ wo nye’e nsoé kalate été, a wu wo wô’é a miñyiane mi bôte ya vôm ô too
Fasek nsili éziñ ô ne tindi môte na a kat ôsimesane wé, a na a bi nkômbane ya laan a wo, ve nsili ôte ô nji yiane bo na môt a kate yalan. (Éve’ane ji: ô ne belane minsili ya afebe 2 ya bekalate mefoé.)
Tobe éfuse wo ye lañ. (Nge wo kômbô belane Réveillez-vous!, ô ne tyi’i na wo ye bo te lañ éfuse ya Kalate Zambe. Amu Réveillez-vous! a kui asu bôte be nji dañe bi ñyemane ya Kalate Zambe, a asu bôte be nji yene mfi ya miñyebe.)
Tili’i mam ô ne jô asu na ô liti môte mfi ya lañe nlô ajô ôte
Ô NE FE
Kômesa’ane nsili wo ye yalan éyoñe wo ye zu bo njoman
Tili’i mame ma ye volô wo na ô simesane jame wo yiane jô éyoñe wo ye beta so