“Paul a ve Zambe akéva a bii fe ayo’o nlem”

Éyoñ akônda ya Rome é wô’ôya na Paul a zu, abui bobenyañ e nga zu jome nye, bevo’o be nga wulu kilimeta 64. Be nga telé miñyiane mi Paul ôsu, aval avé mboon ôte ô nga nambe nye? “Éyoñ a nga yene be, Paul a nga ve Zambe akéva [a bi ayo’o] nlem.” (Mam 28:15) Bôte bese be mbe be yeme’e na Paul a wô’ô ve bôte ngule nyul, ve éyoñ a mbe nda mimbôk, mekônda a mbe a jome’e mme me nga ke jome nye, nnye be nga ve ngule nyul.​—2Bec 13:10.

Melu mangane ma fe, abui bejome mekônda da yañele bia a ve bia ngule nyul. Aval ane bebo bisaé be Yéhôva bese, bejome mekônda fe be wô’ô bili atek, nlem ô wô’ô tyebe be yôp, a mo me wô’ô jombô be. Éyoñe njome mekônda ba minga wé ba ye beta zu jome akônda dôé, jé ô ne bo mfa’a ya ve be ngule nyul, asu na mi “volôbane minlem (veane ngule nyul)”?​—Bero 1:11, 12.

• 

  Tabe’e bisulane asu nkañete. Éyoñe bekañete ba ve ngule ése na be su’u sondô njoman, nalé a ve njome mekônda ngule nyul. (1Bet 1:2, 3; 2:20) Ô ne nyoñ ésaé nkpwa’a mefane ya étun éyoñ ngon akônda dôé é bili njoman. Ye ô ne ve éyôlé jôé na ô kañete a nye nge ke a minga wé, to’o mia ke bo ayé’é dôé éziñ nsamba? Ba wô’ô mvaé éyoñe ba saé a bekañete bese, ja’a ba be ndôme taté ésaé nkañete, nge ke ba ba ko woñe ya kañete.

• 

  Bo’o akap. Y’ô ne ve nye étaba’a nge ke jôme ya di? Nalé a liti be na wo nye’e be. Ba nye’e ki ngule binyiñ.​—Lc 10:38-42.

• 

  Bo’o mewôk a tôñe melebe a ve wo. Njome mekônda a ne meva’a ya volô bia na bi yemete amvôé dangan a Yéhôva. Biyoñe biziñ, a ne yene mfi ya komekane bia. (1Bec 5:1-5) Éyoñe bia bo mewôk a tabe njôane wé si, nalé a soo nye mevak.​—Beh 13:17.

• 

  Yeme’e ve akéva. Kate’e njome mekônda a minga wé abim avé wo semé ésaé ba bo. Ô ne kate be de a anyu, ô ne fe tili be mone kalate.​—Beco 3:15.