Avale Yéhôva a yi na ékôane bekristen é nyoñe bôte ba bo beta minsem

1. Jé Yéhôva a yi asu bôte bese?

YÉHÔVA a nga té bôt a fili ya top. Wo belane fili éte éyoñ ése éyoñe wo nyoñe mintyi’an. Ntyi’ane wo dañe mintyi’ane mise, ô ne wu môt a nyoñ éyoñ a ve émiene ngumba be Yéhôva a bo ébu’a jia ya nda bôte jé. Yéhôva a yi na môt ase a nyoñe ntyi’an ôte. Amu jé? A ne amu a nye’e bôt a a yi na be bo mevak. A yi na be bo bemvôé bé a na be nyiñe nnôm éto.—Deut. 30:​19, 20; Gal. 6:​7, 8.

2. Jé Yéhôva a yi na bôte be ngenane teke kôñelane minleme be bo? (1 Jean 2:1)

² Ve Yéhôva a tindi ki môt éziñ a ngule na a kañe nye. A jô’é na môt émien a tyi’i jam a ye bo. Jé é ne kui nge kristen é dubaneya ja tyam atiñe Zambe, a bo beta nsem? Nge a nji kôñelane nlem, ba yiane nye vaa ékôane bekristen. (1 Cor. 5:13) Ve to’o nalé, Yéhôva a too ndi na mbo nsem a ye bulane be nye. Jôme te nje beta amu a nga bo na Yéhôva a ve ntañ a ne na a ne jamé bôte ba kôñelane minlem. (Lañe’e 1 Jean 2:1.) Zambe wongane ya nye’an a ye’elane bebo minseme na be kôñelane minlem.—Zach. 1:3; Rom. 2:4; Jacq. 4:8.

3. Mame mevé bia zu yen ayé’é di?

³ Yéhôva a kate bia aval a yene nsem a bôte ba bo minsem, a a yi na bia fe bi yene mam ane nye. Ayé’é di da zu liti bia aval avé bi ne bo jam éte. Nté wo bo ayé’é di, jeñe’e na ô yem (1) avale be nga kôme mbia jam a nga boban ékôane bekristene ya Corinthe ntete mimbu ôsu, (2) melebe nlômane Paul ô nga ve éyoñe mbo nsem a nga kôñelane nlem a (3) mame nkañete ôte wo ye’ele bia a lat a avale Yéhôva a yene bekristene ba bo beta nsem.

AVALE BE NGA KÔME MBIA JAM A NGA BOBAN ÉKÔANE BEKRISTENE YA CORINTHE

4. Jam avé é nga boban ékôane bekristene ya Corinthe ntete mimbu ôsu? (1 Becorinthien 5:​1, 2)

⁴ Lañe’e 1 Becorinthien 5:​1, 2. Éyoñ a nga ke dulu lale a nga ke na a ke kañete mejô me Zambe, Paul a nga wô’ô mbia mefoé a lat a mfefé ékôane bekristene ya Corinthe. Mojañ éziñe ya ékôane bekristen éte a mbe a jô’ôbô a minga ésa wé. A mbe fo’o angôndô ya mbia jam a “avale mvite mame ya bisôk éte é nji tame bobane be bôte ya meyoñ”! Ane ô vaa na bôte ya ékôane bekristene be mbe be kañese’e mboon ôte, ve be mbe fe be yiane wô wô’ô mvaé. Éko éziñe bôte béziñe be mbe be simesa’ane na jam éte da liti abim avé Zambe a ne mvam, a abim avé a yeme wô’ô bôte be be’e metyi ya abé. Ve bia yeme na Yéhôva a kañese ki na mbia jam a bobane zañe bebo bisaé bé. A mbia ntabane wé, teke bisô na môt ate a nga ve éyôlé ékôane bekristene mvit. A mbe fe ve tindi bekristene bevo’o be mbe be yeñe’e a nye na be vu nye. Nde, jé Paul a nga jô ékôane bekristene na é bo?

5. Jé Paul a nga jô ékôane bekristene na é bo, a jam éte da tinan aya? (1 Becorinthien 5:13) (Fombô’ô fe fôtô.)

⁵ Lañe’e 1 Becorinthien 5:13. E kalate Paul a nga tili a ngule ya mfufube nsisim, a nga jô na be vaa mbo nsem a nji kôñelane nlem ékôane bekristen. Aval avé bôte ya ékôane bekristene be mbe be yiane nyoñe nye? Paul a nga jô be na be “bo te yeñ” a nye. Nalé a tinan aya? Paul a nga timine na atiñ éte da liti na be “bo bo te di a avale môt éte.” (1 Cor. 5:11) E tabe si na wo di a môt éziñ a ne ji’a bo na ô yeñ a nye. Da kôme yené ne fômelé na Paul a mbe a yiik na a kat ékôane bekristene na é nji yiane yeñ a môt ate. Nalé a nga ye bo na ékôane bekristen é bo teke vu mbia ntabane wé. (1 Cor. 5:5-7) A nde fe, e bo teke yeñ a avale môt éte a mbe ve volô nye na a yen abim avé a nga balé Yéhôva nlem, a a mbe ve wôk ôson a bi nkômbane ya kôñelane nlem.

6. Aval avé bobejañe ya ékôane bekristene be nga nyoñe kalate Paul a nga tili be, a jé mbo nsem a nga bo mvuse ya valé?

⁶ Éyoñ a maneya lôme kalate a nga tili bekristene ya Corinthe, Paul a nga taté na a sili émien aval ékôane bekristen éte ja ye nyoñe kalate wé. Mvuse ya valé, Tite a nga zu kate nye foé é nga ve nye ava’a nlem. Ékôane bekristen é nga yeme nyoñe kalate Paul a nga tili. (2 Cor. 7:​6, 7) Be nga tôñe melebe mé. Nde fe bone bengone be nga lôte mvuse ya valé, éyoñe Paul a maneya lôme kalate wé, mbo nsem a nga kôñelane nlem a tyendé mbia mboone wé! A nga tyendé ntabane wé a été nsisime jé a tôñe bezôsô memvinda be Yéhôva. (2 Cor. 7:​8-11) Jé Paul a zu ñhe jô ékôane bekristene na é bo éyoñe ji?

AVAL ÉKÔANE BEKRISTEN É MBE É YIANE NYOÑE MBO NSEM A KÔÑELANE NLEM

7. Jé môte be nga vaa ékôane bekristen a nga bo mvuse ya valé? (2 Becorinthien 2:​5-8)

⁷ Lañe’e 2 Becorinthien 2:​5-8. Paul a nga jô na “melep abui bôt é nga ve, [me mbe me] yian asu avale môt éte.” Bi ne jô tyi’ibi na melebe mete me nga tôé nsôñane be mbe be bili a lat a môt ate. Nsôñan ôvé? Nsôñane ya na a kôñelane nlem.—Héb. 12:11.

8. Jé Paul a nga beta jô ékôane bekristene na é bo?

⁸ Ve Paul a nga jô ékôane bekristene na: ‘Mia yiane jamé mojañ a te bo nsem a nlem ôse a volô nye nlem’ a “kôme nye liti nye’an avale da yian.” Paul a mbe a yiik na be liti môt ate a zene ya mame ba jô a bo na be jaméya nye, a na ba nye’e nye nya nye’ane. Be mbe fe be yiane kôme liti nye na ba wô’ô mvaé amu a te beta bulan ékôane bekristen.

9. Amu jé bôte béziñe be nga yen ayaé ya jamé mojañ a nga kôñelane nlem?

⁹ Éko éziñ atata’a, bôte béziñe be nji be meva’a ya yeme na môt ate a beteya bulan ékôane bekristen. Amu jé bia jô nalé? Mame môt ate a nga bo me nga soo abui minjuk, a me nga yiane fe ndeñele bôte béziñe ya ékôane bekristen. Bôte ya ékôane bekristene be nga saé ngul asu na be ke ôsu a tôñe bezôsô memvinda be Yéhôva. Bôte béziñe be nga yiane simesane na mboon ôte ô mbe ékotekot, na ba kôme bele kañese na môt a te bo avale beta minseme di a beta bulan ékôane bekristen. (Ve’ek a Luc 15:​28-30.) Ve amu jé é mbe mfi na bôte ya ékôane bekristene be liti mojañe na ba nye’e nye a nleme wop ôse?

10-11. Jé é mbe ve kui nge bemvendé be nga ye bene jamé mbo nsem a nga kôñelane nlem?

¹⁰ Tame ve’ele simesane jam é nga ye kui nge bemvendé be nga ye bene kañese na môt a nga kôñelane nlem a bulan ékôane bekristen, nge ki na bobejañe ba bene liti nye nye’an éyoñ a bulaneya ékôane bekristen. Éko éziñ a nga ye bo éyôé a “lôte nné.” A mbe ve simesane na Yéhôva a vo’o beta jamé nye môs éziñ, a yene na é nji bo mfi na a beta ve ngule ya tyendé.

¹¹ Jam é nga ye dañe beta bo abé é ne na, nge bobejañ a besita ya ékôane bekristene be nga ye bene jamé mbo nsem a nga kôñelane nlem, be nga ye ndaman élate jap a Yéhôva. Amu jé? Amu be nji ye liti na ba vu Yéhôva, nnye ate a jamé bebo minsem ba kôñelane minlem, ve be nga ye liti na ba vu Satan, nyu a ne njenjet a nyu a mvamane ki bôt. Ajô te, be nga ye bo bikpwelé Satan a belane bie asu na a bo na môt ate a bili ate’e mfa’a ya nsisim.—2 Cor. 2:​10, 11; Éphé. 4:27.

12. Aval avé bôte ya ékôane bekristene ya Corinthe be mbe ve liti na ba vu Yéhôva?

¹² Aval avé bôte ya ékôane bekristene ya Corinthe be mbe ve liti na ba vu Yéhôva sa ke Satan? Be mbe ve bo de éyoñe ba jamé bôte ba kôñelane minlem avale Yéhôva a bo. Tame fase jame bôte béziñe be nga tili Kalate Zambe be nga jô a lat a Yéhôva. David a nga jô na Yéhôva a ne “mvaé, a [nkômesane] ya jamé.” (Bsa. 86:5) Michée a nga tili na: “Za a ne Zambe aval a ne wo, nyô a jamé mbia be mam, a dañe ntyamane metiñ?” (Mich. 7:18) Ésaïe fe a nga jô na: “Mbia môt a jôké’é zene jé, a môt a ne te zôsô [asimesane dé]; nde a bula’ane be Yéhôva, nnye ate a ye ko nye éngôngol; a be Zambe wongan, amu a ye dañe jamé.”—Ésa. 55:7.

13. Amu jé bemvendé be nji be be yiane beta jañele éyoñe na be kañese na mbo nsem a kôñelaneya nlem a bulan ékôane bekristen? (Fombô’ô nka’ale ô ne nlô ajô na, “Éyoñ évé nje be nga kañese na môte ya Corinthe a bulan ékôane bekristen?”)

¹³ Asu na ékôane bekristene ya Corinthe é vu Yéhôva, é mbe é yiane kañese mojañ a mbe a ndôme kôñelane nlem a liti nye nye’an. Ékôane bekristen é nga liti na é ne “mewô’ô mfa’a ya mame mese,” amu é nga tôñe melebe Paul a nga ve na ja yiane nyoñe mbo nsem a nga kôñelane nlem a meva’a mese. (2 Cor. 2:9) É ne été na môt ate a mbe a boya abime bengon éziñ ane be nga vaa nye ékôane bekristen, ve melebe be nga ve nye me nga tindi nye na a kôñelane nlem. Ajô te, bemvendé be nji mbe be yiane beta jañele éyoñe na be kañese na a bulan ékôane bekristen.

AVALE BI NE VU ZÔSÔ A MVAME YÉHÔVA

14-15. Miñye’elane mivé bi ne nyoñ a lat a avale be nga kôme jam é nga boban ékôane bekristene ya Corinthe? (2 Pierre 3:9) (Fombô’ô fe fôtô.)

¹⁴ Be nga tili avale be nga kôme jam é nga boban ékôane bekristene ya Corinthe e Kalate Zambe “asu na bi bi ñye’elan.” (Rom. 15:4) Nkañete ôte wo ye’ele bia na Yéhôva a kañese ki jôm ése é ne mbia mboon e zañe bebo bisaé bé. Bôte béziñe be ne simesane na mbôle Yéhôva a ne ‘mvam,’ a ye kañese na môt a nji kôñelane nlem a ke ôsu a tabe ékôane bekristen. Ve sa ke nde Yéhôva a liti mvame jé nalé; Yéhôva a ne mvam, ve a kañese ki avale mimboon ése, ñyenane mame wé a lat a abé a mvaé ô nji tyendé. (Jude 4) Nge Yéhôva a nga ye jô’é na bebo minseme be ke ôsu a tabe ékôane bekristen, a nga ye liti na a nji bo mvam, a nalé a nga ye telé ékôane bekristene mbia été.—Mink. 13:20; 1 Cor. 15:33.

¹⁵ Bia yé’é fe na Yéhôva a nji yi na môt éziñ a jañ. A kômbô nyii bôt éyoñ ése nalé a sili. A mvamane bôte ba tyendé a bôte ba kômbô kôm élate jap a nye. (Ézé. 33:11; lañe’e 2 Pierre 3:9.) Ajô te, éyoñe môte ya Corinthe a nga kôñelane nlem a jô’é mbia mboone wé, Yéhôva a nga belane Paul asu na a kat ékôane bekristene na ja yiane jamé nye a beta nyoñe nye ékôane bekristen été.

16. Avale be nga kôm ajô môte ya Corinthe da ye’ele wo jé a lat a Yéhôva?

¹⁶ Éve’ane ya ékôane bekristene ya Corinthe ja liti bia na Yéhôva a ne njalan a nye’an, a ne zôsô a mintyi’ane mejô mié mi ne zôsô. (Bsa. 33:5) Ye nalé a tindi ki wo na ô kômbô tu’a ve Zambe wongane duma? Bi ne mevak amu bia yeme na Yéhôva a mvamane bia amu bia bese bi be’e metyi ya abé, a bia yi njamane wé. Bi ne fe mevak amu a nga ve ntañ asu na a jamé minseme miangan. Ngo’o abim avé minleme mia bômbô bia si éyoñe bia yeme na, teke vaa nge beté, Yéhôva a nye’e bebo bisaé bé a a yi na be nyiñe mevak été nnôm éto!

17. Jé bia ye yene meyé’é ma zu?

¹⁷ Nge môt éziñ a bo beta nseme melu ma, aval avé bemvendé ya ékôane bekristene be ne vu nye’ane Yéhôva a volô môt ate na a kôñelane nlem? Jé bobejañ a besita ba yiane bo éyoñe bemvendé ba tyi’i na ba vaa môt éziñ ékôane bekristene nge kañese na a bulan? Bia ye bi biyalane ya minsili mite meyé’é ma zu.