Avale bemvendé be ne volô bôte ba vaa ékôane bekristen

1-2. (a) Aval avé Yéhôva a yene bôte ba bo beta minsem, be teke kôñelane minlem? (b) Jé Yéhôva a yange na bebo minseme be bo?

YÉHÔVA a nji kañese avale mimboon ése; a vini nsem angôndô. (Bsa. 5:​4-6) A yi na bi semé bezôsô memvinda bé be ne Kalate Zambe été. A yeme na bi be’e metyi ya abé, ajô te, a nji yange na bi bo zôsô ne tiññ. (Bsa. 130:​3, 4) Nde fe a kañese ki na bôte be ‘belane beta mvame wé ane atyebe ya bo mvite mame teke wô’ô nyé nge ôson.’ (Jude 4) Kalate Zambe a jô fe na “bôte be ne te semene Zambe” ba ye jañe bita ya Armaguédon.—2 P. 3:7; Nlitan 16:16.

² Ve Yéhôva a nji yi na môt éziñ a jañ. Avale bi nga yene meyé’é ya mvuse me ne Nkume mmombô a bete nyi, Kalate Zambe a liti ne fômelé na, Zambe “a yi na bôte bese be kôñelane minlem.” (2 P. 3:9) Bemvendé ba vu Yéhôva éyoñe ba volô bebo minsem a ôjibi ôse na be kôñelane minlem a tyendé abo dulu dap a beta bi mbamba élat a Yéhôva. Ve sa ke bebo minseme bese mbe ba nkôñelane minlem. (Ésa. 6:9) Bevo’o be ne ke ôsu a bo mbia be mam akusa bo ngul ése bemvendé ba ve asu na be volô be na be kôñelane minlem. Jé bemvendé ba yiane ñhe bo éyoñ avale jam éte da kui?

“VA’ANÉ MBIA MÔT”

3. (a) Jé Kalate Zambe a jô na bemvendé ba yiane bo asu bebo minseme be nji kôñelane minlem? (b) Amu jé bi ne jô na, mbo nsem émiene nnye a tobe na be vaa nye ékôane bekristen?

³ Éyoñe mbo nsem a nji kôñelane nlem, bemvendé be vo’o bo jam afe, fo’o ve na be tôñe melebe bia koone me kalate 1 Becorinthien 5:13 a jô na: “Va’ané mbia môte zañe jenane miabebien.” Bi ne jô na, mbo nsem émiene nnye a tobe na be vaa nye ékôane bekristen; a kôane jôm émiena a nga bé. (Gal. 6:7) Amu jé bia jô nalé? Amu a bene tyendé akusa bo bemvendé ba jeñ abui biyoñe na be volô nye na a kôñelane nlem. (2 Bb. 17:​12-15) Mimboone mié mia liti na a tobeya na a tôñe ki memvinda me Yéhôva.—Deut. 30:​19, 20.

4. Amu jé bemvendé ba bo na ékôane bekristen é yeme na be vaaya mbo nsem éziñ ékôane bekristen?

⁴ Éyoñe ba vaa mbo nsem a nji kôñelane nlem ékôane bekristen, bemvendé ba kat ékôane bekristene na a nji beta bo Ngaa Yéhôva.b Nsôñane wop ô nji bo na be wo’o nye ôsone nyul. Ve ba bo de asu na ékôane bekristen é tôñ abendé ya Kalate Zambe da jô na bi “bo te yeñ” a avale môt éte a “bo bo te di” a nye. (1 Cor. 5:​9-11) Yéhôva a mbe a bili mbamba beamu ya ve atiñ éte. Nlômane Paul ô nga tili na: “Mone mvusu a ne bo na, amama’a ése é mane vus.” (1 Cor. 5:6) Bebo minseme be nji kôñelane minleme be ne te’elane ntyi’ane bôte bevo’o be nga nyoñe na, ba ye ve ngule ya nyiñ avale bezôsô memvinda be Yéhôva be ne.—Mink. 13:20; 1 Cor. 15:33.

5. Aval avé bia yiane yene mojañe ba vaa ékôane bekristen, a amu jé?

⁵ Aval avé bia yiane ñhe yene mojañe ba vaa ékôane bekristen? É ne été na bia yeñe ki a nye, ve bi nji yiane yene nye ane môt a vo’o tyendé môs éziñ. Ntômba ô nga jañ ô ne beta zu nyiin abemba été. Te vuane na môt ate a nga ve émiene ngumba be Yéhôva. Ve éyoñe ji, éngôngole jam é ne na, a kate kui na a tôé ngaka’a a nga bo Yéhôva, a amu nalé, a ne bo te bi ényiñe ya nnôm éto. (Ézé. 18:31) Ve nté ôse éyoñ é ngenan, a na Yéhôva a ngenane ve mvamane nye, bi too ndi na a ye tyendé. Nde aval avé bemvendé be ne liti na be too ndi na mbo nseme ba vaa ékôane bekristen a ye tyendé?

AVALE BEMVENDÉ BA VOLÔ BÔTE BA VAA ÉKÔANE BEKRISTEN

6. Mame mevé bemvendé ba bo asu na be volô môte ba te vaa ékôane bekristen?

⁶ Éyoñe ba vaa môt ékôane bekristen, ye bemvendé ba jô’é teke beta volô nye na a bulane be Yéhôva? Kokoo! Éyoñe bobejañe ya émo’o bemvendé ba kate nye na ba zu vaa nye ékôane bekristen, ba nyoñ éyoñe ya liti nye mam a ne bo asu na a bulan ékôane bekristen. Ve bemvendé ba ye ke su’u ve valé. Abui biyoñ, bemvendé ba ye kate mbo nseme na ba ye beta laan a nye mvus abime bengon éziñ, asu na be yeme nge a tyendéya été nsisime jé. Nge mbo nsem a kañese na bemvendé be beta laan a nye, ba ye jeñe na be volô nye na a kôñelane nlem a beta bulan ékôane bekristen. To’o a ngenane te kôñelane nlem éyoñ éte, bemvendé ba ye ke ôsu a jome nye a volô nye na a kôñelane nlem.

7. Aval avé bemvendé ba liti na ba vu fulu nkoon éngôngole Yéhôva éyoñe ba laan a môte be vaaya ékôane bekristen? (Jérémie 3:12)

⁷ Bemvendé ba ve ngule ya vu fulu nkoon éngôngole Yéhôva éyoñe ba laan a môte be vaaya ékôane bekristen. Éve’an é ne na, éyoñe bone be Israël be nga bo Yéhôva éngana’a, a nji yange na be taté kôñelane minlem ôsusua na a volô be. Ve a nga lôme bekulu mejô bé a too ki na bone be Israël be mbe be ngenane teke kôñelane minlem. Avale bi nga yene nlô ajô baa ya Nkume mmombô a bete nyi, Yéhôva a nga liti abim avé a ko bôt éngôngol éyoñ a nga kat Osée na a jamé minga wé a beta lat a nye akusa bo a mbe a ngenan a nyiñi’i nsem été. (Osée 3:1; Mal. 3:7) Bemvendé ba vu Yéhôva éyoñe ba yi a nleme wop ôse na mbo nsem a kôñelane nlem a ba ve ke nye jam éte ayaé.—Lañe’e Jérémie 3:12.

8. Aval avé nkana mon a nga jañe Yésus a nga nyoñe wo liti na Yéhôva a ne nkoon éngôngol a mvam? (Luc 15:7)

⁸ Tame simesane nkana mon a nga jañe Yésus a nga nyoñ, ñwô ôte bi nga yene nlô ajô baa ya Nkume mmombô a bete nyi. Ve nné ane ésa a nga yen ane mon a zu, ane “a nga ke mbil a ke wubane nye.” (Luc 15:20) Yene’e na, ésa a nji yange na mone wé a taté sili nye njaman. Ve a nga nyoñe ntyi’ane ya bo jôm ése ésa a nye’e mone wé a ne ngule ya bo asu dé. Nde fe Yéhôva a wô’ôtane nalé asu bôte be nga lume nye mvus, a bemvendé ba ve ngule ya vu Yéhôva mfa’a ôte. Ba yi na bôte be nga lume Yéhôva mvuse be bulane be nye. (Luc 15:​22-24, 32) Éyoñe mbo nsem a bulan ékôane bekristen, Yéhôva, Yésus, beéngele a ékôane bekristene be ne mevak!—Lañe’e Luc 15:7.

9. Jé Yéhôva a yi na bebo minseme be bo?

⁹ Mame bi yeneya azekui vôme nyi ma liti ne fômelé na Yéhôva a kañese ki na bôte be nji kôñelane minleme be ke ôsu a tabe ékôane bekristen. Ve a nji lume be mvus. A yi na be bulan. Yéhôva a liti bia aval a yene bebo minseme be nji kôñelane minlem e kalate Osée 14:4: “Ma ye saé mbulane mvuse wop, ma ye nye’e be te nné; amu ayaa dam é kôlôya be [be].” Bemvendé ba yem avale Yéhôva a wô’ôtan, ajô te, ba jeñe mone ndem ase a liti na môt a tatéya na a kôñelane nlem. Mejô me Yéhôva mete ma yiane fo’o tindi bôte be lumeya Yéhôva mvuse na be bulane be nye teke jañele éyoñ.

10-11. Aval avé bemvendé ba ye jeñe na be volô bôte be nga vaa ékôane bekristen?

¹⁰ Jé ki bi ne jô mfa’a ya bôte be nga vaa ékôane bekristen, éko éziñe den a nga ke abui mimbu? Éko éziñe na ba bo bo ki fe nsem ô nga bo na be vaa be ékôane bekristen. A ne fe bo na, ba simesane ki fe jam ébien é nga bo na be vaa be ékôane bekristen. To’o be tabeya nseñ abim éyoñ avé, bemvendé ba ye jeñe na be yeme vôme ba nyiñ a ke jome be. Éyoñe ba bo avale minjoman éte, bemvendé be ne sili bôte bete nge be ne ye’elan a be a ve be ngule nyule na be bulan ékôane bekristen. É ne été na, nge be nga vaa môt éziñ ékôane bekristene den a nga ke abui mimbu, teke bisô na a kômeya bili atek mfa’a ya nsisim. Ajô te, nge môt ate a liti na a kômbô bulan ékôane bekristen, bemvendé be ne bo nta’ane mam asu na mojañ éziñ a ke bo nye ayé’é Kalate Zambe, to’o a ngenane te beta bo Ngaa Yéhôva. Ve e bité bite bise, bemvendé mbe ba yiane bo nta’ane mam ôte.

¹¹ Bemvendé ba vu Yéhôva mfa’a ya ko bôt éngôngol. Ajô te, ba ke ba jeñe bôte bese be nga lume Yéhôva mvus a tindi be na be bulane be nye. Mbo nsem a ne ji’a beta bo Ngaa Yéhôva éyoñ a liti na a kôñelaneya nlem a na a tyendéya mbia abo dulu wé.—2 Cor. 2:​6-8.

12. (a) Bemvendé ba yiane dañe tabe ntyel a avale mam avé? (b) Amu jé bi nji yiane simesane na Yéhôva a vo’o mvamane bôte be nga bo avale minsem éziñ? (Fombô’ô fe ayemé.)

¹² Bemvendé ba yiane dañe tabe ntyel a mame méziñ ôsusua na ba kañese na môt a beta bo Ngaa Yéhôva. Éve’an é ne na, nge môt a nga jabe mongô nge na a ne apostat, nge na a nga bo jam éziñ a nsôñane ya tyam alu’u dé éko éziñ ane mejian, bemvendé ba yiane jeñe na be kôme tabe ndi na avale môt éte é kômeya fo’o kôñelane nlem. (Mal. 2:14; 2 Tim. 3:6) Ba yiane kamane bobejañ a besita ya ékôane bekristen. Ve bia yiane yeme na, Yéhôva a ye kañese mbo nsem ase a kôme kôñelane nlem a tyendé mbia mboone wé. É ne été na bemvendé ba yiane fo’o bo ntyel éyoñe ba laan a bôte be nga koñe ba bevok, ve be nji yiane simesane na Yéhôva a vo’o mvamane bôte be nga bo avale minsem éziñ.c—1 P. 2:10.

MAM ÉKÔANE BEKRISTEN É NE BO

13. Nsela’ane mbé a ne zañ avale bia nyoñe môte bemvendé ba te komekan a avale bia nyoñe môte bemvendé ba te vaa ékôane bekristen?

¹³ Avale bi nga yen ayé’é ya mvus, biyoñe biziñe be ne yôtan ékôane bekristene na mojañ éziñ a te bi minkomekan. Éyoñe nalé a kui, bi ne ke ôsu a yeñ a nye bi yeme’e na a kôñelaneya nlem a na a jô’éya mbia mboone wé. (1 Tim. 5:20) A ngenan ébu’a jia ya ékôane bekristen a a yi na bobenyañe bé ya nsisime be ve nye ngule nyul. (Héb. 10:​24, 25) Ve jam éte da selan a éyoñe ba kobô ajô môte ba te vaa ékôane bekristen. Bia ye “bo te yeñe” nge “di a avale môt éte.”—1 Cor. 5:11.

14. Aval avé bekristene be ne belane mone môte ya nleme wop a ne ñyañelan a zene ya Kalate Zambe asu na be yem avale ba yiane nyoñe bôte be nga vaa ékôane bekristen? (Fombô’ô fe fôtô.)

¹⁴ Ye mame bia te yene ma tinane na bia yiane vuane môte be nga vaa ékôane bekristen éyoñe jia ya biyoñe bise? Momo. Teke bisô na bia ye ke yeñ a avale môt éte. Ve bekristene be ne belane mone môte ya nleme wop a ne ñyañelan a zene ya Kalate Zambe asu na be yeme nge ba yiane bañete môte be nga vaa ékôane bekristen ésulan, a ne bo évuvumane jap nge môt a mbe mvôé jap. Nge a zu tabe ésulan, bia ye nyoñe nye aya? Ôsusua, bi nji be bi bata’an avale bôt éte. Ve to’o avale bité éte, kristen ése ja yiane belane mone môte ya nleme wé a ne ñyañelan a zene ya Kalate Zambe asu na é yeme jame ja yiane bo. Bôte béziñe be ne wô’ô mvaé ya batane nye nge tame nye mbamba nsoon éyoñ a zu tabe ésulan. Ve bi nji yiane laan ayap a nye nge lôt éyoñ a nye na bia bo mame mefe.

15. Kalate 2 Jean 9-11 a kobô ajô avale bebo minsem avé? (Fombô’ô nka’ale ô ne nlô ajô na, “Ye Jean ba Paul be mbe be kobô’ô ajô fatane nseme jia?”)

¹⁵ Bôte béziñe be ne sili bebiene na, ‘Nga Kalate Zambe a jô na kristene ja batan avale môt éte ja nyoñe ngabe mbia mboone wé?’ (Lañe’e 2 Jean 9-11.) Bifuse bia bômane bifuse bite bia liti na ba kobô ajô beapostat a bôte ba tindi ba bevo’o na be bo mbia be mam. (Nlitan 2:20) Ajô te, nge môt a ke ôsu a wumulu miñye’elane beapostat nge mbia mimboone miziñ, bemvendé ba ye ke bo nta’ane mame ya ke jome nye. É ne été na, bi too ndi na môt ate a ngenane ve beta tyendé. Ve nté a ngenane teke tyendé, bi nji yiane batane nye nge bañete nye ésulan.

BI VU FULU NKOON ÉNGÔNGOL A MVAME YÉHÔVA

16-17. (a) Jé Yéhôva a yi na bebo minseme be bo? (Ézéchiel 18:32) (b) Aval avé bemvendé be ne saé a Yéhôva éyoñe ba jeñe na be volô bebo minseme na be kôñelane minlem?

¹⁶ Jé bia te yé’é e meyé’é metane ya Nkume mmombô a bete nyi? Bia te yé’é na Yéhôva a nji yi na môt éziñ a jañ! (Lañe’e Ézéchiel 18:32.) A yi na bebo minseme be beta lat a nye. (2 Cor. 5:20) Jôme te nje a mbe a kate’e bebo bisaé bé be mbe be bo’o éngana’a na be kôñelane minlem a bulane be nye. Bemvendé ya ékôane bekristene be bili mvome ya saé a Yéhôva mfa’a ya volô bebo minseme na be kôñelane minlem.—Rom. 2:4; 1 Cor. 3:9.

¹⁷ Tame simesan abime mevak é ne yôp éyoñe bebo minseme ba kôñelane minlem! Yéhôva, Ésa wongane ya yôp été émien a ne mevak éyoñ ése a yen ane ntômba ô nga jañe wo bulan abemba dé été. Nye’ane bia nye’e Yéhôva wo tu’a bo ngul éyoñe bia yen abim avé a ne nkoon éngôngol a mvam.—Luc 1:78.