“Loone bemvendé”

1. Aval avé Yéhôva a nga liti na mintômba mié mi ne édima?

YÉHÔVA a yene mintômba mié angôndô ya édima. A nga kuse mie a metyi me atyi’i mone dé. Yésus a ve bemvemdé ya ékôane bekristene mbe’e ya nyoñe ngap a mie. (Mame mi. 20:28) Zambe a yi na bemvendé be nyeñele mintômba mié. A mvolane Yésus, bemvendé ba volô mintômba na mi ke ôsu a wulu ba’aba’a a Yéhôva.—Ésa. 32:1, 2.

2. Za nnye Yéhôva a dañe nyoñe ngap? (Ézéchiel 34:15, 16)

² Yéhôva a nyoñe ngap a mintômba mié mise, ve a dañe nyoñe ngap a mi mia tôbane minjuk. A belane bemvendé asu na a volô mie mfa’a ya nsisim. (Lañe’e Ézéchiel 34:15, 16.) Ve, a yi fe na biabebiene bi jeñe mvolan éyoñe nalé a sili. Bi ne bi mvolan ôte éyoñe bia ye’elan a nlem ôse, a fe a zene ya “beba’ale a beye’ele” ya ékôane bekristen.—Éphé. 4:11, 12.

3. Aval avé môt ase ya be bia a ne bu’uban a mvolane bemvendé?

³ Ayé’é di, bia zu yene nta’ane mame Yéhôva a nga bo asu na bi bu’ubane mbamba élat a nye, a zene ya bemvendé. Bia ye bi biyalane ya minsili mi: Éyoñ évé nje bia yiane sili bemvendé mvolan? Amu jé bia yiane bo jam éte? A aval avé be ne bia volô? To’o bi ngenane teke tebe été ja sili na bemvendé be volô bia, biyalane ya minsili mite bia ye volô bia na bi tu’a nye’e nta’ane mame Yéhôva, a nalé a ne kamane binyiñe biangan.

ÉYOÑ ÉVÉ NJE BIA YIANE “LOONE BEMVENDÉ”?

4. Amu jé bi ne jô na kalate Jacques 5:14-16, 19, 20 a kobô ajô môt a kone nsisim? (Fombô’ô fe befôtô.)

⁴ Ñyé’é Jacques a kate bia avale Yéhôva a belane bemvendé na be volô bia a zene ya nsili wu: “Ye môt éziñ a kon e zañe jenan? A loone bemvendé ya ékôane bekristen.” (Lañe’e Jacques 5:14-16, 19, 20.) Jacques a kobô ajô môt a kone nsisim. Amu a jô môt a kone na, a loone bemvendé ya ékôane bekristen asu na be volô nye sa ke dokita. A jô na môt ate a ye beta bo mvo’é, éyoñ a maneya bi njamane ya abé a nga bo. Biyoñe biziñ, mame môt a kone nsisim a yiane bo asu na a beta bo mvo’é, me ne fe funan a ma môt a kone minsôn a bo asu na a saéban. Éyoñ ôkon wo ndeñele bia, bi wô’ô ke yene dokita a kate nye avale bia wôk, a bi wô’ô fe tôñe melep a ve bia. Avale te da da, éyoñe bia kone nsisim, bia yiane ke yene bemvendé ya ékôane bekristen, a kate be jame bi nga bo, ndembene ba ye bo ngule ya volô bia a zene ya melebe ma so Kalate Zambe.

5. Aval avé bi ne yeme na élate bia be Yéhôva é nga ndaman?

⁵ Kalate Jacques 5 a lebe bia na bi ke laan a bemvendé nge bia yene na mbunane wongan ô nga voé, a na élate jangan a Yéhôva é nga kômbô ndaman. É ne nya mfii na bi jeñe mvolan ôsusua na bia bo mbia jam a ne ndaman élate jangan a Yéhôva. Bia yiane bo zôsô a biabebien. Amu Kalate Zambe a jô na, bi ne du’u biabebien a simesane na bi ngenane bi bili mbamba élat a Yéhôva. (Jacq. 1:22) Bekristene béziñe ya ékôane bekristene ya Sardes be nga ku ôlam ôte, jôm éte nje Yésus a nga kate be na mimboone miap mi nji beta ve Yéhôva nlem avak. (Nlitan 3:1, 2) Zene jia ya yemelane nge bi ngenane bi bili mbamba élat a Yéhôva é ne éyoñ bia fombô avale bia bo mame ya nsisime den. Ye bi ngenane bi bo’o me a ayôñ ése avale bi mbe bi bo’o melu mvus? (Nlitan 2:4, 5) Bi ne sili biabebien avale minsili di: ‘Ye me ngenane fo’o me nye’e me lañe Kalate Zambe a bindi mame ma lañ? Ye ma kômesan a tabe fo’o ve mingume bisulan? Ye éva’a me mbe me bili ésaé nkañete é nga mane voé? Ye ma dañe bem ôsimesane wome ve njeñane moné?’ Nge éyalane jia ya minsili mite é ne na ôwé, nalé a ne liti na ô nga kon, a na wo yiane jeñe mvolan ôsusua na mame ma tu’a ndaman. Nde ñhe, nge biabebiene bia kate kui na bi tu’a yemete élate jangan a Yéhôva, nge ke na bi boya jam éziñe Yéhôva a vini, bia yiane ke jeñe mvolane be bemvendé.

6. Jé bekristene ba te bo mbia nseme ba yiane bo?

⁶ Môt a te bo nsem ô ne bo na be vaa nye ékôane bekristen, a yiane ke yene mvendé. (1 Cor. 5:11-13) Ba bese be nga bo mbia nseme ba yiane ke jeñe mvolan asu na be beta kôm élate jap a Yéhôva. Ba bese ba yi na Yéhôva a jamé be a zene ya ntañ, ba yiane bo “mame ma liti na be kôñelaneya minlem.” (Mame mi. 26:20) Zene jia ya liti na be kôñelaneya minlem é ne na be ke yene bemvendé nge ba te bo mbia nsem.

7. Za mfe a yi mvolane bemvendé?

⁷ Ésaé bemvendé é nji su’u ve na be volô bôte be nga bo mbia nsem; ba volô fe ba ba bili ate’e nsisim. (Mame mi. 20:35) Éve’an é ne na, é ne kui na ô kate juan a mbia minkômban. Jam éte é ne bo angôndô ya ayaé, e dañedañe nge ôsusua na wo yé’é benya mejôô ô mbe ô bo’o mam ane nyuane banga, ô yene’e pornographie, nge ke ô bo’o mvite mame ya bisôk. Ô nji yiane juane ndum éte étam. Ô ne tyi’i na wo ke laan a mvendé, nje éte ja ye kôme nyoñ éyoñe ya vô’ôlô wo, a ve wo mbamba melep asu na ô ke ôsu a ve Yéhôva nlem avak a dañe mbia minkômbane mite. (Eccl. 4:12) Nge ndum éte ja bo na ô kômbô bili atek, bemvendé be ne volô wo asu na ô bo teke vuane na ndum éte é ne ndeme ja liti na wo nyan a élate jôé a Yéhôva, a na ô nji yi na ô tabe ndi a womien.—1 Cor. 10:12.

8. Ye wo yiane ke yene bemvendé asu mone jam ase wo te bo? Timi’in.

⁸ Bi nji bo ntindane ya ke yene bemvendé asu mone jam ase a fombô ényiñe ya nsisime jangan. Bi tame jô na, wo te bo nge jô jôm éziñe ja te taé mojañe nge sita éziñe nlem, nge ke wôk ôlun a lôte nné. A lôte na ô ke yene mvendé, wo yiane tôñe melebe Yésus a nga ve, ma jô na ô ke laan a monyañe wôé nge ke kale jôé asu na mi beta bo mvo’é. (Matt. 5:23, 24) Ô ne fe jeñe minlô mejô mia kobô ajô mefulu ane évôvoé nlem, ôjibi, a njôane nlem asu na ô bo ngule ya tôñe mefulu mete éyoñ éfe. É ne été na, nge wo kate kui na ô kôm ajô éte akusa bo ngul ése wo te ve, ô ne ke sili mvendé mvolan. Kalate Paul a nga tili Bephilipien, a nga kate mojañ éziñe na a ke volô Évodie ba Syntiche na be kôme jo’ojo’o a mbe zañe jap. Mvendé ya ékôane bekristene jôé é ne fe volô wo avale da.—Philip. 4:2, 3.

AMU JÉ BIA YIANE LOONE BEMVENDÉ?

9. Amu jé bi nji yiane jô’é na ôson ô bo na bi kate loone bemvendé? (Minkana 28:13)

⁹ Da sili bia mbunan a ayo’o nlem asu na bi ke jeñe mvolan éyoñe bia te bo mbia nsem, nge ke éyoñe bia wô’ôtane ve ane bia vo’o dañe mbia minkômbane miangan. Bi nji yiane wôk ôsone ya loone bemvendé. Amu jé? Amu éyoñe bia tôñe nta’ane mame Yéhôva, nalé a liti na bi too ndi a nye a na bia tôñe miñye’elane mié mia volô bia na bi ba’ale mbunane wongane ngul. Bia liti na bia yi mvolane wé asu na bi bo mame me ne zôsô. (Bsa. 94:18) A bi ne tabe ndi na Yéhôva a ye jamé bia nge bia ke yene bemvendé, a telé mbia mboon ate.—Lañe’e Minkana 28:13.

10. Jé é ne bia kui nge bia jeñe na bi solé minseme miangan?

¹⁰ Éyoñe bia ke kate bemvendé mbia jame bia te bo, nalé a bo na Yéhôva a jamé bia a na bi beta bi mbamba élat a nye. Ve nge bi jeñe na bia solé nseme wongane teke ke yene bemvendé, bia ye ndeñele biabebiene zezé amu bia ye ke bi mvolan éziñ. Éyoñe Njô bôte David a nga jeñe na a solé minseme mié, nalé a nga bo na a kone nlem, nsisim, to’o minsôn. (Bsa. 32:3-5) Aval ane aveñe da tu’a tôk nge bia kôme ki de saé, aval éte da da, été nsisime jangan é ne tu’a ndamane nge bi nji jeñe mvolan. Mbôle Yéhôva a nji yi na bi tebe aval été éte, ajô te a kate bia na bi ke laan a bemvendé, mbe bete ba ye volô bia na bi beta bo bemvôé bé.—Ésa. 1:5, 6, 18.

11. Aval avé bi ne ndeñele bôte bevok éyoñe bia solé mbia nseme bia te bo?

¹¹ Nge bia solé mbia nseme bia te bo, nalé a ne ndeñele bôte bevok. Bi ne bo na nsisime Zambe é bo te ke beta bo ékôane bekristen été a ndamane mvo’é é ne zañe bobejañ a besita. (Éphé. 4:30) Ajô te, nge bia yeme na ébu’a éziñe ya ékôane bekristen é nga bo mbia nsem, bia yiane je volô na é ke yene bemvendé asu jam éte.a Nge bia solé mbia nseme môte mfe a te bo, nalé a ne bo na bi be’e mekua ya été. (Lév. 5:1) Nye’ane bia nye’e Yéhôva wo yiane bia tindi na bi kobô benya mejôô. Nge bi bo nalé, bia ye volô na ékôane bekristen é tabe mfuban, a na môt a te bo mbia nsem a beta bi mbamba élat a Yéhôva.

AVAL AVÉ BEMVENDÉ BA VOLÔ BIA?

12. Aval avé bemvendé ba volô bôte be ne nte’ane nsisim?

¹² Kalate Zambe a jô bemvendé na be volô ba bese ba yi na be beta kôm élate jap a Yéhôva. (1 Thes. 5:14) Nge ô nga bo nsem éziñ, bemvendé ba ye sili wo minsili asu na be kôme yem ôsimesane wé a avale wo wô’ôtan. (Mink. 20:5) Ô ne volô bemvendé éyoñe wo kôme be yoé nleme wôé, to’o jam éte é ne bo ayaé, éko éziñ amu metume môé, avale môt ô ne, nge ke amu ô ne awusonô. Te ko woñe nge wo jô jam éziñ é ne yené ve ane é nji bo mvo’é. (Job 6:3) A lôte na be nyoñe ntyi’an avôl avôl, bemvendé ba nyoñ éyoñe ya vô’ôlô wo asu na be kôme yem avale mame me nga boban ôsusua na ba ve wo melep. (Mink. 18:13) Ésaé mba’ale mintômba ja sili ôjibi, jôm éte nje ba yeme na be vo’o volô môte nge ba laan a nye ve éyoñe jia.

13. Aval avé bemvendé be ne volô bia a zene ya meye’elane map a melebe ba ve bia me so’o Kalate Zambe? (Fombô’ô fe befôtô.)

¹³ Bemvendé be nji yi na ô wô’ô womien éngôngol a lôte nné amu jame wo te bo. A lôte na be bo nalé, ba ye ye’elan asu dôé. Wo ye yen abim avé meye’elane map me ne “bo ngul.” Mvolane wop wo tinane fe na “be wo’o [wo] mbon e jôé Yéhôva.” (Jacq. 5:14-16) “Mbon” ôte ô ne benya mejôô bia koone be Kalate Zambe. Bemvendé ba ye kôme belane mejô mete asu na be bôé wo nleme si a volô wo na ô beta bi mbamba élat a Yéhôva. (Ésa. 57:18) Melebe ya Kalate Zambe ba ve wo, me ne volô wo na ô tu’a yemete ntyi’ane wôé ya ke ôsu a bo jam é ne zôsô. A zene jap, wo ye wô’ô tyiñe Yéhôva é jô’ô wo na: ‘Zene nyô, wulu’u été.’—Ésa. 30:21.

14. Avale kalate Begalate 6:1 a liti, aval avé bemvendé be ne volô môt ase a nyoñe “mbia abo dulu”? (Fombô’ô fe befôtô.)

¹⁴ Lañe’e Begalate 6:1. Éyoñe kristene ja nyoñe “mbia abo dulu,” ja liti na é nji beta tôñe memvinda me Yéhôva ényiñe jé. Mbia abo dulu bia jô nye va, a ne bo na wo te nyoñe ntyi’ane teke taté fas, nge ke bo mbia nsem. A nye’an ôse, bemvendé ba ye jeñe na be “sôan avale môt éte a évôvoé ése.” Éfia Grec be nga kôñelane na “e sôan” ja tinane fe na e beta toé éves asu na môt a bo teke bo éyem. Aval ane ntyetyeñe dokita wo ve ngule ya saé môt éves ja te bu’i teke dañe bo na a wô’ô mintaé, bemvendé fe ba jeñe na be bem ôsimesane wop ve mfa’a ya volô môt a kone nsisim, sa ke na be bo na a wô’ô émien éngôngol a lôte nné nge bi ôlune nlem. Ve ba ye’ele fe be na be ‘tabe ntyel a bebien.’ Nté ba volô bia na bi sôan abo dulu dangan, bemvendé ba yeme fe na bebiene be be’e metyi ya abé a na é ne be kui na be nyoñe mbia abo dulu. A lôte na be liti na ba dañe bôte bevok, nge ke ve be bijô a lôte nné, ba yiane ve ngule jap ése na be ko bôt éngôngol.—1 P. 3:8.

15. Jé bi ne bo nge jam éziñe da ndeñele bia?

¹⁵ Bi ne tabe ndi a bemvendé ya ékôane bekristene jangan. Be nga yañele be asu na be bo ngule ya ba’ale mame ba kate be, na melebe ba ve me so ve Kalate Zambe sa ke ôsimsane wop, a volô bia na bi be’e mimbe’e miangan. (Mink. 11:13; Gal. 6:2) Môt ase ya be be a selan a nyu mbok, ve bi ne fili ya ke yene môt ase ya be be éyoñe jam éziñe da ndeñele bia. É ne été na, bia ye ke ke yene mvendé nyu, a beta ke yene nyu mbok asu na bi bi melep a nsôñan ô too na wua ya be be a kate bia jame bia kômbô wôk. Nge bi bili avale fulu éte, wôna bia ye bo avale bôte da yi na be kate be ve mame “ba kômbô wôk” a lôte na be wô’ô “ñye’elan ô ne mfi” wo so Kalate Zambe. (2 Tim. 4:3) Éyoñe bia ke yene mvendé asu jam éziñ, mvendé éte é ne bia sili nge bi tatéya laane jam éte a mvendé éfe a melebe mevé é nga ve bia. Fulu ya yemelane minné mié ja ye tindi mvendé éte na é taté ke laan a mvendé éfe.—Mink. 13:10.

MBE’E MÔT ASE YA BE BIA A BE’E

16. Mbe’e ôvé môt ase ya be bia a be’e?

¹⁶ Bemvendé ba ve bia melep a volô bia éyoñe bia tôbane njuk éziñ, ve ésaé jap é nji bo na be kate bia ntyi’ane bia yiane nyoñ. Môt ase ya be bia a yiane liti ényiñe jé ya môs ôse na a nye’e Yéhôva a ve nye nlem avak, a zene ya mam a jô nge bo. A mvolane bemvendé, bi ne ke ôsu a ba’ale élate jangan a Yéhôva. (Rom. 14:12) Nde ñhe, a lôte na be kate bia jame bia yiane bo, bemvendé ba dutu ôsimesane wongane ve Kalate Zambe. Éyoñe bia tôñe melebe ba ve bia me so’o Kalate Zambe, nalé a ne volô bia na bi “bo ngule ya yemelane” jam é ne mvaé a ji é ne abé asu na bi nyoñe mbamba mintyi’an.—Héb. 5:14.

17. Jé Yéhôva a yi na bi bo?

¹⁷ Bi bili fo’o beta mvome ya bo mintômba mi Yéhôva! Yéhôva a nga lôme Yésus, “mbamba mba’ale mintômba,” asu na a zu ya’ane ntañe ndembene bi ne bi fane ya nyiñe nnôm éto. (Jean 10:11) Yéhôva a belane bemvendé ya ékôane bekristen asu na a tôé ngaka’a nyi: “Ma ye ve mia beba’ale aval ane nleme wom wo nye’e, mbe bete ba ye jee mia zene ya ñyemane a fek.” (Jér. 3:15) Éyoñe bia kone nsisime nge bili atek, bi nji yiane ko woñe ya loone bemvendé asu na be volô bia. Ngo’o nge bia nyoñe ntyi’ane ya kôme bu’uban a nta’ane mame Yéhôva a nga mane bo na a ve bia bemvendé ékôane bekristen été.