Njamane Yéhôva wo soo wo bibotane bivé?

1. Amu jé é ne ayaé na ô kôme wô’ô jôme môt a kômbô jô éyoñ a jô na a jamé wo?

“MA JAMÉ WO.” Bifia bite bia bôône bia minleme si, e dañedañ éyoñe bia yeme na bia te jô nge bo jame da te balé môt éziñ! Ve é wô’ô bo ayaé ya kôme wô’ô jôme môt a kômbô jô éyoñ a jô na a jamé wo. Éko éziñe môte wo te bo jam é ne abé a kômbô jô na amvôé denane da zu ke ôsu. Nge ki na a nji kômbô beta kobô jame da te boban, ve amvôé denane da ye ke beta bo aval é mbe. Éyoñe môt a jô na a jamé wo, éfia éte é ne bi abui metinan.

2. Aval avé mimfufube mintilane mia kobô ajô njamane Yéhôva? (Fombô’ô fe ayemé.)

² Avale Yéhôva a jamé bia bebo mam abé da kôme selan a avale môt ase ya be bia a jamé nyi mbok. Njamane Yéhôva ô ne ngum aval. Ntili besam a nga jô Yéhôva na: ‘Nya njamane a ne be wo, nde te ba ye ko wo woñ.’a (Bsa. 130:4) Ôwé, njamane Yéhôva ô ne ‘nya njamane.’ Yéhôva nnye a kôme volô bia na bi wôk atinane ya nya njamane. E bifuse biziñe ya mimfufube mintilane ya nkobô Hébreu, bôte be nga tili Kalate Zambe be nga kobô ajô fatane njamane Yéhôva, be bela’an éfia éziñe be ngenane teke tame belane je éyoñe ba kômbô liti avale môta binam a jamé nyi mbok.

3. Aval avé njamane Yéhôva wo selan a éñwongan? (Ésaïe 55:​6, 7)

³ Éyoñe Yéhôva a jamé môt, a ne ve ane nge môt ate a nji tame seme môs éziñ. A bi ne beta bi nya ngulu élat a nye. Bia ve Yéhôva akiba amu a jamé bia éyoñ ése a nlem ôse.—Lañe’e Ésaïe 55:​6, 7.

4. Aval avé Yéhôva a volô bia na bi kôme wô’ô nya atinane ya njaman?

⁴ Nge njamane Yéhôva wo selan a njamane môta binam, aval avé bôte be be’e metyi ya abé ane bia be ne kôme wôk atinane ya nya njamane? Yéhôva a belane mbamba bive’an asu na a volô bia na bi kôme wôk aval avé a jamé bia. Ayé’é di, bia zu yene bive’ane biziñe ya été. Bia zu fe yene na éyoñe bia tyendé abo dulu dangan, Yéhôva a vuan abé bia te bo, a nalé a ve bia fane ya beta bo bemvôé bé. Éyoñe bia ye la’ase bive’ane bite, bia ye tu’a nye’e Zambe wongan a ne mvam a nkoon éngôngol, nnye ate a jamé bia abui meval.

YÉHÔVA A MANE VAA ABÉ DANGAN

5. Jé ja boban éyoñe Yéhôva a jamé abé dangan?

⁵ Kalate Zambe a wô’ô ve’e minsem a mimbe’e mi ne adit. Njô bôte David a nga kobô ajô minseme mié a jô’ô na: “Mbia be mame mam me yandaneya me nlô yôp: aval ane adite mbe’e ma dañe me adit.” (Bsa. 38:4) Ve Yéhôva a jamé minseme mi bôte ba jôban a kôñelan. (Bsa. 25:18; 32:5) Éfia Hébreu be nga kôñelane na “e jamé” ja tinane na “e bete” nge ki “e be’e.” Ajô te, éyoñe Yéhôva a jamé bia a ne ve ane bi be’e adite mbe’e bitul éyoñ éte a vaa bia wô.

6. Yéhôva a wua abé dangane vé?

⁶ Kalate Zambe a belan éve’an éfe asu na a liti na Yéhôva a nyoñe minseme miangan a wua mie ôyap a vôme bi ne. Kalate Besam 103:12 a jô na: “Nté vôme jôbe da tôô a kandane vôme jôbe da dim, nté ôte fe a vaaya bia mintyamane metiñe miangan.” Mfa’a jôbe da tôô a ne angôndô ya ôyap a mfa’a jôbe da dim. Bevôme bete bebaé be vo’o tôbane môs éziñ. Nalé a tinane na Yéhôva a nyoñe minseme miangan a wua mie aval ôyabe bi vo’o ve’ele simesan. Jam éte da bôône bia minleme si a liti bia na éyoñe Yéhôva a jamé bia a ne ve ane bi nji tame bo abé môs éziñ!

7. Aval avé Kalate Zambe a kate bia jame Yéhôva a bo éyoñ a jamé minseme miangan? (Michée 7:​18, 19)

⁷ To’o ane éve’ane ja te liti na Yéhôva a vaa abé dangan a wua de ôyap, ye nalé a tinane na a ba’ale de vôm éziñ? Momo. Njô bôt Ézéchias a nga kobô ajô Yéhôva a jô’ô na: “Ô maneya wua mam abé mame mese mvuse jôé.” (Ésa. 38:​9, 17) Éve’an éte ja liti na Yéhôva a vaa abé bôte ba kôñelane nlem, éyoñ éte a wua de vôm a ye ke de beta yene môs éziñ. Nnoñe bifia ôte ô ne fe tinane na: “Ô maneya bo na [abé dam] é bo ve ane é nji tame bobane môs éziñ.” Kalate Zambe a ngôné ôsimesan ôte éve’an éfe a nga nyoñe kalate Michée 7:​18, 19. (Lañe’e.) Éfus éte ja liti na Yéhôva a wua abé dangane bido’o ya mañ été. Melu mvus, éyoñe be mbe be wua môte jôm édo’o mañ été, teke na a mbe ngule ya beta yene je.

8. Mame mevé bi yé’éya azekui va?

⁸ Kalate Zambe a liti ne ngeññe na éyoñe Yéhôva a jamé bia, a bo ve ane nge bi nji tame bo jam é ne abé môs éziñ. Ajô te, bi nji yiane beta ke ôsu a ve biabebiene bijô amu mame me abé mangan. David a nga kobô benya mejôô éyoñ a nga jô na: “Mevak a bôte mbia be mame bap be nga jaméban a bôte minseme miap mi nga butiban; mevak a môte Yéhôva a ye ke lañe nsem.” (Rom. 4:​6-8) Nya njamane nnye le!

YÉHÔVA A MANE TYAME BIKOBE BIANGAN

9. Bive’ane bivé Yéhôva a belane bie asu na a liti bia abim avé a jamé bia?

⁹ Yéhôva a belan éve’an éfe asu na a liti bia aval avé ntañ ô ne mane vaa abé bôte ba jôban a tyendé abo dulu. Kalate Zambe a jô na Yéhôva a sôp abé dangan a fubu de. Mvuse ya valé, mbo minsem a mane tuneban abé dé. (Bsa. 51:7; Ésa. 4:4; Jér. 33:8) Yéhôva émien a kôme kate bia asu’ulane ya mboon ôte éyoñ a jô na: “Akusa bo mam abé menane me ntoo évele ne tyañ, ma ye bo éfumulu aval ane sut; akusa bo me ne évele ne zôññ, ma ye bo aval ane mevule me ntômba.” (Ésa. 1:18) É ne nya ayaé na be vaa mebate me ne évele ne zôññ éfus éyé. Ve Yéhôva a belan éve’an éte asu na a liti bia na a ne jamé abé dangan aval é ne na é bo te beta yené.

10. Éve’an évé éfe Yéhôva a belane je asu na a liti bia abim avé njamane wé ô ne anen?

¹⁰ Avale bi nga yen ayé’é ya mvus, minseme miangane mi ne fe ane mvôla. (Matt. 18:​32-35) Ajô te, éyoñ ése bia bo nseme mise me Yéhôva, a ne ve ane bia tu’a kô’ôlane mvôla jangan. Za aka’a beta mvôla bi bili Yéhôva di! Ve éyoñ ése Yéhôva a jamé bia, a ne ve ane nge a mane tyame mvôla bi bili nye. A jô ki bia na bi beta ya’ane minsem émien a nga mane jamé. Avale môt a ne mevak éyoñe ba te jô nye na a bo te ya’an ékôla éziñ, avale te fe bi ne mevak éyoñe Yéhôva a jamé abé dangan!

11. Jé Kalate Zambe a kômbô jô éyoñ a jô na be jaméya minseme mienan? (Mame minlôman 3:19)

¹¹ Yéhôva a nji su’u ve na a tyame bikôla biangane nge ki minseme miangan, a bo fe ve ane nge bi ngenane teke tame bo abé môs éziñ. (Lañe’e Mame minlôman 3:19.) Bi tame nyoñe mon éve’an. Tame simesane na ô bili môte beta ékôla, éyoñ éte wo kôme yen ane môt ate a nyoñe nkôs a tene wô vôme mi nga mane san ékôla éte. É ne été na môt ase a ne ngule ya beta lañe tañ a nga tili, ve jam éte ja kôme selan a éyoñe ba jô na môt a tyame jôm éziñ. Asu na bi kôme wô’ô éve’an éte, bia yiane yeme na nkôse be mbe be bela’ane wô melu mvus ô mbe nkôman a fatane mvila’a éziñ, a gomme, a mendim. Asu na môt a tyame jôme be mbe be tili’i a nkôs ôte, môt ate a mbe a yiane belan éfus éyé ba te dube mendim. Ajô te, éyoñe be mbe be tyame’e ékôla éziñ, é mbe é jañe’e aval é ne na teke na môt éziñ a mbe ve beta yene jôm é mbe ntilan afep. Fo’o ve ane nge be nji tame tili ékôla éte vôm éziñ. Nlem ô ne bia njalan a mevak éyoñe bia yeme na éyoñe Yéhôva a jamé abé dangan, a ne ve ane nge bi ngenane teke de tame bo môs éziñ!—Bsa. 51:9.

12. Éve’an afibe nkute ja tinane jé asu dangan?

¹² Yéhôva a belan éve’an éfe asu na a liti aval avé a tyam abé dangan. A jô na: “Me tyameya mintyamane metiñe miôé, aval ane afibe nkut, a mam abé môé, aval ane nkut.” (Ésa. 44:22) Éyoñe Yéhôva a jamé bia, a ne ve ane a belan afibe nkut asu na a buti abé dangan, ndembene bia ye ke de beta yene môs éziñ.

13. Bia wô’ôtan aya éyoñe Yéhôva a jamé abé dangan?

¹³ Jé bive’ane bite bise bia ye’ele bia? Éyoñe Yéhôva a maneya jamé abé dangan, bi nji yiane beta ke ôsu a ve biabebiene bijô amu abé bi nga bo. Metyi Yésus a nga sôé me nga mane ya’an abé dangan ése. Éyoñe Yéhôva a jamé abé dangan, a ne ve ane nge bi ngenane teke tame bo abé môs éziñ. Nne Yéhôva a jamé bia nalé éyoñe bia kôñelane minleme nya nkôñelane.

YÉHÔVA A KAÑESE NA BI BETA BO BEMVÔÉ BÉ

14. Amu jé bi ne tabe ndi na éyoñe Yéhôva a jamé bia a ne ve ane nge bi nji tame bo abé môs éziñ? (Fombô’ô fe befôtô.)

¹⁴ Nya njamane a so be Yéhôva a volô bia na bi beta bi mbamba élat a nye. A volô fe bia na bi bo teke ve biabebiene bijô a lôte nné. Ajô te, bi nji yiane simesane na Yéhôva a ye ke ôsu a wô’ô bia abé nlem été, a jeñe mezene ya foñesô bia. Avale jam éte da ye ke ve’ele kui môs éziñ. Éyoñe Yéhôva a jô na a jamé bia, amu jé bi ne tabe nye ndi? Yéhôva a nga jô nkulu mejô Jérémie na: “Ma ye jamé mame map a bo teke fe simesan abé dap.” (Jér. 31:34) Paul a nga belan avale bifia da éyoñ a nga jô na: “Ma ye ke beta simesane minseme miap.” (Héb. 8:12) Ve mejô mete ma tinan aya?

15. Jé ja tinane na Yéhôva a simesane ki fe abé dangan?

¹⁵ Kalate Zambe a belane ki éfia “simesan” éyoñ ése asu na a kobô ajô môt a fase jam éziñ é nga bobane melu mvus. A belane fe éfia éte asu na a kobô ajô môt a bo jam éziñ. Mbo mam abé a mbe a tyele élé fefele Yésus a nga jô Yésus na: “A Yésus, ô simesa’ane ma éyoñe wo ye kui Éjôé jôé.” (Luc 23:​42, 43) A nji jô Yésus na a simesane nye fo’o ve éyoñ éte ébien. Éyalane Yésus a nga ve nye é mbe é liti’i na a ye bo mame méziñ asu na a wômôlô mbo abé ate. Ajô te, éyoñe Yéhôva a jô na a simesane ki fe abé dangan, nalé a tinane na a jaméya bia, a na a ye ke fe bia beta foñesô melu ma zu amu abé bi nga bo.

16. Kalate Zambe a ve’e fili ja so bia nya njamane a jé?

¹⁶ Éyoñe Yéhôva a jamé bia, bia kôme wô’ôtane na bi ntoo fili. Kalate Zambe a belan éve’an éfe asu na a volô bia na bi kôme wô’ô avale jam éte da boban. Mbôle bi nga bialé abé été, bi bili fe nkômbane ya bo mame me ne abé, mame mete mme ma bo na bi bo “alo ya abé.” Ve éyoñe Yéhôva a jamé bia, bia bo ve ane alo é “kôtébaneya nsem.” (Rom. 6:​17, 18; Nlitan 1:5) Ôwé, njamane Yéhôva wo bo na bi wô’ôtane na bi kôtébaneya éto belo.

17. Aval avé njamane wo volô môte na a yet? (Ésaïe 53:5)

¹⁷ Lañe’e Ésaïe 53:5. Kalate Zambe a jô na mbôle bi be’e metyi ya abé, bi ne ane bôte be bili ôkone be vo’o saé. Ve mbôle Yéhôva a nga ve ntañ a zene ya be Mone wé, bi ne ve ane bôte be yeteya. (1 P. 2:24) Éyoñe bia sem, bia ndamane mbamba élate bi bili a Yéhôva. Ve a zene ya ntañ, Yéhôva a ne jamé bia a bi ne beta bi ngul élat a nye. Éyoñe môt a bili ngul ôkon a bo mvo’é, a wôk angôndô ya mevak, bia fe bi ne mevak éyoñe bia yete mfa’a ya nsisim a beta bi mvame Yéhôva a zene ya ntañ.

AVAL AVÉ NJAMANE YÉHÔVA WO NAMBE BINYIÑE BIANGAN?

18. Je bia te yé’é a zene ya abui bive’ane Kalate Zambe a belane bie éyoñ a kobô ajô njamane Yéhôva? (Fombô’ô fe nka’ale ô ne nlô ajô na, “Avale Yéhôva a jamé bia.”)

¹⁸ Jé bive’ane bia te yen ayé’é di bia ye’ele bia a lat a njamane Yéhôva? Éyoñe Yéhôva a jamé abé dangan, a ne ve ane nge bi nji tame bo jam é ne abé môs éziñ, a bi ne tabe ndi na a ye ke foñesô bia melu ma zu amu abé bi nga bo. A nalé a ve bia fane ya bi mbamba élat a Ésa wongane ya yôp été. Ve bia yeme na njaman ô ne mbamba dase Yéhôva a ve bia. A ve bia das éte amu a nye’e bia a amu a ne akap. Sa ke amu bia yiane de.—Rom. 3:24.

19. (a) Jam avé da yiane tindi bia na bi ve Yéhôva akiba? (Beromain 4:8) (b) Jé bia ye yen ayé’é da zu?

¹⁹ Lañe’e Beromain 4:8. Môt ase ya be bia a yiane ve Yéhôva akiba amu na a ne Zambe ya ‘nya njamane!’ (Bsa. 130:4) Ve nge bia yi na Yéhôva a jamé bia, bia yiane bo jam éziñ é ne nya mfii. Yésus a nga jô na: “Nge mia jamé bôte ba bo mia abé, Ésa wônan a ne yôp a ye fe jamé mia bikobe bienan.” (Matt. 6:​14, 15) Ajô te, bia yiane vu Yéhôva a jamé bôte bevok. Ve aval avé bi ne bo de? Bia ye bi éyalane ya nsili ôte ayé’é da zu.