Bi ne tabe ndi na Yéhôva a jaméya bia

1-2. Jé Yéhôva a bo éyoñe bia jôbane minseme miangan (Fombô’ô fe fôtô ya ékô’ôla.)

NJÔ bôte David a mbe éyôé amu minsem a nga bo. (Bsa. 40:12; 51:3) Ve a nga jôban abé dé a nleme wé ôse, a Yéhôva a nga jamé nye. (2 Sam. 12:13) David a nga beta bo mevak éyoñ a nga yeme na Yéhôva a jaméya nye.—Bsa. 32:1.

² Aval ane David, bia fe bi ne bo mevak éyoñe bia yeme na Yéhôva a ne nkoon éngôngol, a na a ne ngule ya jamé mame me abé mangan. A ne fo’o jame ya mevak éyoñe bia yeme na Yéhôva a ne ôjeja’a ya jamé minseme miangan, éyoñe bia kôme jôban a nleme wongan ôse, a jeñe mvolan, a ve fe ngul ése na bi bo teke beta bo mbia be mam! (Mink. 28:13; Mame mi. 26:20; 1 Jean 1:9) A nleme wo kôme bia bômbô si amu bia yeme na Yéhôva a jaméya bia, a bo ve ane nsem éziñ ô nji tame boban!—Ézé. 33:16.

3-4. Jé sita éziñ a nga wô’ôtan éyoñ a maneya duban, a jé bia zu yen ayé’é di?

³ Ane éyoñe ja lôt, bôte béziñe be wô’ô yen ayaé ya kañese na Yéhôva a jaméya be. Bi tame yene jam é nga kui Jennifer, nnye ate a nga yaé benya mejôô été. Éyoñ a mbe ésoé, a nga taté na a bi mbia abo dulu, a mbe a bo’o mbia be mam asoé. Mvuse abui mimbu, nde a nga beta bulane be Yéhôva a duban. A jô na: “Susu’a mam me mbe me bo’o ényiñe jam é mbe ve na ma jeñe biôme bi mo, ma bo mvite mame ya bisôk, ma vibane meyok, me too ki mbia ñwô’an ôlun. Me mbe me yeme’e na, mbôle Yésus a nga zu wu asu dangan, nge me sili njaman a jôban, Yéhôva a ye jamé ma. Ve to’o me mbe me jôbaneya abé dam a sili Yéhôva njaman, me nji be me too ndi na a boya de.”

⁴ Ye biyoñe biziñ ô wô’ô yen ayaé ya kañese na Yéhôva a jaméya minsem ô nga bo melu mvus? Yéhôva a yi na bi wô’ôtane na a ko bia éngôngol aval ane David a nga wô’ôtan. Ajô te ayé’é di, bia zu yen amu jé é ne mfi na bi kañese na Yéhôva a jaméya bia, a jam é ne volô bia na bi bo de.

AMU JÉ É NE MFI NA BI KAÑESE NA YÉHÔVA A JAMÉYA BIA?

5. Jé Satan a yi na bi buni? Va’ak éve’an.

⁵ E kañese na Yéhôva a jaméya bia a ne bo na bi sa’ale melame me Satan. Bi nji yiane vuane na Satan a yi na bi bo teke ke ôsu a kañe Yéhôva. Asu na a tôé nsôñane wé, Satan a ye bo mame mese mfa’a ya bo na bi buni na Yéhôva a vo’o jamé minseme miangan. Bi tame yen éve’ane môt éziñe ya Corinthe be nga vaa ékôane bekristen, amu a nga bo mvite mame ya bisôk. (1 Cor. 5:1, 5, 13) Éyoñ a maneya jôbane abé dé, Satan a nga yi na bibu’a ya ékôane bekristene bi bo ayete minleme mfa’a ya jamé nye, a beta nyoñe nye a mevak ékôane bekristen. Satan a mbe fe a yi na môt ate a wô’ôtane na be vo’o nye jamé a na “ôlun ô jaé nye nlem avale da lôte nné” a na mame mete mese me bo nye na a bo teke beta ke ôsu a kañe Yéhôva. Satan a ngenane teke tyendé nsôñane wé nge melame a belane me. Ve “bi nji dimine minsôñane mié.”—2 Cor. 2:5-11.

6. Jé bi ne bo nge bia simesane na Yéhôva a ngenane teke bia jamé minseme bi nga bo melu mvus?

⁶ Éyoñe bia kañese na Yéhôva a jaméya bia nalé a ne bo na bi bo teke beta ve biabebiene mekua. Nlem ô wô’ô bia taé éyoñe bia te bo mbia nsem. (Bsa. 51:17) Nalé ate a nji bo abé, amu mone môte ya nleme wongan a ne bia volô na bi tyendé abo dulu. (2 Cor. 7:10, 11) Ve jame da, nge bia ke ôsu a ve biabebiene mekua éyoñe bi maneya jôbane minseme miangan, jam éte é ne bo na bi bili atek. Ve éyoñe bia kañese na Yéhôva a jaméya bia, nalé a ye bo na bi bo teke beta ve biabebiene bijô. Bia ye bo ngule ya ke ôsu a kañe Yéhôva aval a yi, a mone môte ya nlem a too mfuban, mevak été. (Col. 1:10, 11; 2 Tim. 1:3) Nde ñhe, aval avé bi ne bo na nleme wongan ô kañese na Yéhôva a jaméya bia?

JÉ É NE VOLÔ BIA NA BI KAÑESE NA YÉHÔVA A JAMÉYA BIA?

7-8. Yéhôva a nga jô Moïse aya mfa’a wé émien, a aval avé jam éte da bôône bia minleme si? (Nkôlan 34:6, 7)

⁷ Simesa’ane jame Yéhôva a nga jô mfa’a wé émien. Tame fase jame Yéhôva a nga jô Moïse Nkôle Sinaï éyoñ a mbe a yi na a tu’a nye yem.a (Lañe’e Nkôlan 34:6, 7.) Akusa bo Yéhôva a bili mbamba mefulu, a nga tyi’i na a kate Moïse na a ne “Zambe ya éngôngol a mvam.” Nde, ye bi ne jô na avale Zambe di é ne kôme bene jamé mbo ésaé wé a jôban abé dé a nleme wé ôse? Momo! Nge a bene bo de, a ne liti na a ne njejet teke ko bôt éngôngol, avale mefulu Zambe a vo’o bi môs éziñ.

⁸ Bi ne ñhe tabe ndi na, éyoñe Yéhôva a jô na a ne Zambe ya nkoon éngôngol, jam éte é ne abôm ane koé, amu a vo’o ve’ele laane minsos. (Bsa. 31:5) Bi ne ngule ya buni mejô mé. Nge bia yene ayaé ya jô’é fulu ya ve biabebiene bijô amu minseme bi nga bo melu mvus, bi ne ñhe sili biabebiene na: ‘Ye ma buni fo’o na Yéhôva, Zambe a ko bôt éngôngol a mvama’ane fe be, a ne bo teke jamé mbo nsem ase a jôban abé dé a tyendé? Nde ñhe, ye me nji yiane kañese na a jaméya ma?’

9. Jé kalate Besam 32:5 a ye’ele bia a lat avale Yéhôva a jamé minseme miangan?

⁹ Bindi’i miñye’elane Yéhôva a ve bia kalate wé a lat a aval a jamé bia. Bi tame yen avale ntili Besam David a nga liti avale Yéhôva a jamé. (Lañe’e Besam 32:5.) David a nga jô na: “Ô nga jamé mbia jame ya abé dam.” Éfia ya nkobô hébreu be nga kôñelane na “e jamé” é ne fe tinane na “e bete yôp,” “e kee je ôyap,” nge ke “e be’e.” Éyoñe Yéhôva a nga jamé David, a mbe ve ane a nga vaa minseme mié a kele mie ôyap. David a mbe ngule ya beta bo mevak amu Yéhôva a mbe a jaméya minseme mié. (Bsa. 32:2-4) Bia fe bi ne bi avale mvo’é éte. Éyoñe bia kôme jôban abé dangan, bia yiane ki beta ke ôsu a be’e mbe’e ya ve biabebiene mekua asu minseme bi nga bo, a too ke na Yéhôva a maneya bia jamé.

10-11. Bifia “avôle ya jamé” bia liti bia jé a lat a Yéhôva? (Besam 86:5)

¹⁰ Lañe’e Besam 86:5. David a jô na Yéhôva a ne “avôle ya jamé.” Nalé a liti na Yéhôva a ji’a ki wôk ôlun éyoñe bia bo jam é ne abé, a na a bili nkômbane ya jamé môt ase a jôban abé dé. Amu jé bia jô nalé? Amu ngabe baa ya éfus éte ja jô na: “A mvam abui be ba bese ba loone wo.” Avale bi nga yen ayé’é ya mvus, nye’an ô ne mbane wo tindi Yéhôva na a bi ngul élat a bebo bisaé bé ba wulu ba’aba’a a nye. Nye’an ôte ñwô fe wo tindi nye na a “yeme dañe jamé” bôte bese ba jôbane minseme miap. (Ésa. 55:7.) Nge bia yen ayaé ya kañese na Yéhôva a ne ngule ya jamé bia, bi ne sili biabebiene na: ‘Ye ma buni fo’o na Yéhôva a ne ngule ya jamé ba bese ba jôban abé dap a ba yi mvame jé? Nge ma buni nalé, ma yiane ñhe kañese na a jaméya ma éyoñe me nga ye’elane nye na a ko ma éngôngol.’

¹¹ Bi ne bi ngule nyul éyoñe bia yeme na Yéhôva a nji vuane na bi ne bebo mam abé. (Bsa. 139:1, 2) Jam éte da kôme yené ne ngeññ Same mfe David a nga tili, a ne fe bia volô na bi kañese na Yéhôva a jaméya bia.

BI NJI YIANE VUANE JAME YÉHÔVA A SIMESANE MFA’A WONGAN

12-13. Avale Besam 103:14 a liti, jé Yéhôva a simesane mfa’a wongan, a jam éte da tindi nye na a bo jé?

¹² Lañe’e Besam 103:14. David a jô na Yéhôva a “simesane na bi ne metek.” A zene ya bifia bite, David a liti jame da ya mame ma bo na Yéhôva a bo avôle ya jamé bebo bisaé bé ba jôbane minseme miap, amu a yeme na bi be’e metyi ya abé. Asu na bi kôme wô’ô jam éte, ntamané tu’a fase mejô me David mete.

¹³ David a jô na, Yéhôva “a yem ntéane wongan.” A nga kôm Adam “a mete’e ya si,” a yeme miñyiane mi môta binam aval ane nkômbane ya ke ôyo, nkômbane ya di nge vebe. (Mett. 2:7) Ve éyoñ Adam ba Ève be nga sem, bifia ‘e so mete’e’ bi a nga beta bi atinan afe. Mbôle bi ne mvoñe bôt Adam, bi nga kôbô metyi ya abé, nalé ate a tindi bia na bi bi nkômbane ya bo abé éyoñ ése. Yéhôva a nji su’u ve na a yeme na bi be’e metyi ya abé; David a jô na a “simesane” de. Yéhôva a kôme bia yeme nya ñyemane. Éyoñe David a nga jô na Yéhôva a simesane na bi ne metek, a mbe a kômbô’ô liti na Yéhôva a yeme na bi be’e metyi ya abé; jam éte nde ñhe da bo na a mvamane bia. Bi ne timine mejô me David ma avale di: Yéhôva a kôme yeme na biyoñe biziñ, bi ne kate kui na bi ve nye nlem avak; éyoñe bia bo jam é ne abé, nalé a tindi nye na a mvamane bia a jamé bia éyoñe bia jôban abé dangan.—Bsa. 78:38, 39.

14. (a) Jé David a beta jô a lat a avale Yéhôva a jamé bia? (Besam 103:12) (b) Jé bi ne yé’é avale Yéhôva a nga jamé David? (Fombô’ô fe nka’ale “Avale Yéhôva a jamé a vuan.”)

¹⁴ Jé é ne volô bia na bi kôme tabe ndi na Yéhôva a jaméya bia? (Lañe’e Besam 103:12.) David a jô na éyoñe Yéhôva a jamé minseme miangan, a ne aval ane “vôme jôp da tôô [est] a kandane vôme jôp da dim [ouest].” Éyoñe bia fase vôme jôp da tôô é ne, a vôme jôp da dim; bi nga yene na bevôme bete bebaé me vo’o tôbane môs éziñ. Jé jam éte da ye’ele bia a lat a avale Yéhôva a jamé minseme miangan? Kalate éziñ a timine bifia ya éfus éte a jô’ô na: “Zambe a vaa mbia jame bia te bo a wua nye ôyap, fo’o ve aval ane mbia ényum éziñ a mane jañ. Ajô te bi ne ñhe tabe ndi na a ye ke beta simesane minseme bi nga bo môs éziñ nge beta wô’ô wô’ô ényume ya été.” Tame fas, éyoñe wo wôk ényum éziñ, ye nalé a bo ki na ô beta simesane mame méziñ? Ve éyoñe Yéhôva a jamé, teke jam éziñ é ne beta bo na a simesane de, nge foñôsô bia.—Ézé. 18:21, 22; Mame mi. 3:19.

15. Jé bi ne bo nge bia ve biabebiene mekua a lat a minseme bi nga bo melu mvus?

¹⁵ Aval avé mejô me David bia koone me kalate Besam 103 me ne volô bia na bi kañese na Yéhôva a jaméya bia? Nge bia ke ôsu a ve biabebiene bijô a lat a minseme bi nga bo melu mvus, bi ne sili biabebiene na: ‘Ye ma vuane jame Yéhôva a kôme simesane mfa’a wom; a na a kôme yeme na me ne mbo abé, a fe na a ne ngule ya jamé mbo ésaé wé ase a kôme jôbane minseme mié aval ane ma? Ye ma beta simesane jame Yéhôva nye a maneya vuan?’ Yéhôva a beta ki simesane minseme bi nga bo melu mvus. Bia fe bia yiane bo avale da. (Bsa. 130:3) Éyoñe bia kañese na Yéhôva a jaméya bia minseme bi nga bo melu mvus, nalé a bo na bi bo teke beta ke ôsu a ve biabebiene bijô, ve na bi ke ôsu a kañe Yéhôva mevak été.

16. Va’ak éve’ane ja liti amu jé é ne abé na bi ke ôsu a ve biabebiene bijô asu minseme Yéhôva a maneya bia jamé. (Fombô’ô fe fôtô.)

¹⁶ Tame fas éve’ela di. Éyoñe môt a dutu metua, a ne bo a fombô’ô rétroviseur biyoñe biziñ asu na a yene nge metua a ne nye mvus; ve nge a lôt éyoñe na a fombô rétroviseur ate, nya ajôô a ne na a ye su’ulane ke yale fé nge ke jimbi metua mfe. Bi lôô na asu na a wulu mvo’é, a yiane dañe beme mise mé ôsu. Aval éte da da, e simesane minseme bi nga bo melu mvus, a ne bo na bi nyoñe ñye’elan éziñ, nge volô bia na bi tu’a yemete ntyi’ane wongane ya bo teke beta ku ôlame ya bo mie. Ve nge bia ke ôsu a bem ôsimesane wongane ve minseme bi nga bo melu mvus, nalé a ne bo na bi ve biabebiene bijô a lôte nné, ngule ki bia ve asu na bi bo Yéhôva Zambe ésaé, é ne viane mane tek. Ajô éte bia yiane bem ôsimesane wongane ve ésaé bia bo Yéhôva a mbamba ényiñ a ka’ale bia asu melu ma zu, vôme bia ye bo te beta “simesane mame ya mvus.”—Ésa. 65:17; Mink. 4:25.

KELEK ÔSU A BÔÉ NLEME WÔÉ SI

17. Amu jé bia yiane ke ôsu a bôé minleme miangane si na Yéhôva a jaméya bia?

¹⁷ Bia yiane ke ôsu a bôé minleme miangane si na Yéhôva a nye’e bia a na a ne ngule ya jamé bia. (1 Jean 3:19) Amu jé? Amu Satan a ye ke ôsu a belane mezene mese mfa’a ya bo na bi buni na Yéhôva a nye’e ki bia a na a vo’o bia jamé. Aval ése é ne, te bia vuane na nsôñane wé ô ne ve wua, a yi na bi bo teke beta ke ôsu a kañe Yéhôva. Bia yeme na Satan a ye tu’a ke ôsu a ve mengule mese asu na a tôé nsôñane wé amu émien a kôme yeme na a li’iya nye ve mon éyoñ. (Nlitan 12:12) Bi nji yiane jô’é na nnye a bi medañ!

18. Jé bi ne bo asu na bi bôé minleme miangane si na Yéhôva a nye’e bia a na a ne ngule ya jamé bia?

¹⁸ Ayé’é ya mvus, bi nga yene mame bi ne bo asu na bi tabe ndi na Yéhôva a nye’e bia. Asu na bi bôé minleme miangane si na a jaméya bia, bia yiane simesan avale môte Yéhôva a ne. Bia yiane nyoñ éyoñe ya bindi mame Kalate Zambe a jô a lat a avale Yéhôva a jamé minseme miangan. Te bia vuane na Yéhôva a yeme na bi be’e metyi ya abé a na a ye mvamane bia. A bia yiane fe ba’ale na éyoñe Yéhôva a jamé bia, a beta ki simesane mame mete. Nge bia fe bi too ndi a nkoon éngôngole Yéhôva aval ane David, bia ye bo ngule ya jô na: “Akiba a Yéhôva, amu ‘ô nga jamé abé dam’!”—Bsa. 32:5.