Mimfefé bibu’a mibaé ya Tin ékôan

BETA ésulane ya mbu 2024 a nga bobane Ngon awôm é too melu metan, be nga yôtane na: Mojane Jody Jedele ba Jacob Rumph be ntoo bibu’a ya Tin ékôane Bengaa be Yéhôva. Bobejañe bete bebaé ba kañe Yéhôva a nlem ôse den a ntoo abui mimbu.

Mojañe Jedele a nga bialé Missouri, États Unis a nga yaé benya mejôô. Ba nda bôte jé be mbe be ñyiñi’i vôme bekañete mbamba foé be mbe be jemba’an. Nalé a nga bo na a yem abui bobejañ é mbe so’o bevôme bevôm, na da zu suk ésaé nkañete vôme be mbe. Nye’an a nga yene zañe jap ô nga nambe nye angôndô. A nga dubane Ngon awôm é too melu 15 mbu 1983, a mbe a ngenan ésoé. A mbe a nye’e ésaé nkañete aval é ne na, ve nné ane a nga mane sikôlô, a nga nyoñ ésaé nkpwa’a mefan, Ngon ébulu ya mbu 1989.

Aso mongô, bebiaé bé be mbe be kele’e ba kale jé Béthel. Nalé a nga volô na be bi nsôñane ya ke saé Béthel, ba kale jé bese be nga tôé nsôñan ôte. Mojañe Jedele a nga taté na a saé Béthel ya Wallkill Ngon ébulu ya mbu 1990. A nga taté saé wofise wo ba’ale mfubane ya Béthel, mvuse ya valé a nga ke saé wofise wo fombô ajô mvo’é minsôn.

Zia biyoñ éte, bikôane bekristene biziñe ya nkobô Panya bi mbe bi jemba’ane bobejañe ba tebele bie, ane mojañe Jedele a nga taté na a yé’é Panya a ke suk ékôane bekristene jia ya été. Mvuse mon éyoñ, a nga tôbane nkpwa’a mefan éziñ a too jôé na Damaris, be mbe circonscription wua. Ane be nga su’ulane lu’an, a ke saé Béthel nsamba.

Be nga kôlô Béthel mbu 2005 na ba ke nyoñe ngap a bebiaé bap. Nté ôte ôse, be mbe bekpwa’a mefan. Mojañe Jedele a mbe ñye’ele ya sikôlô bekpwa’a mefan, a too fe ébu’a jia ya wofise wo su’u bobejañe ba ke menda mebiañ (comité de liaison hospitalier) a ji ya émo’o ja fombô ajô melôñe ya betisone béziñ (comité de construction régional).

Mbu 2013, be nga beta loone mojañe Jedele ba ngal e Béthel na be ke suk ésaé melôñe ya Warwick. Ataté éyoñ éte, be nga saé fe Béthel ya Patterson a nyi ya Wallkill. Mojañe Jedele a mbe a saé wofise wo suk ésaé melôñ (LDC) a wofis asu mame me tii a menda mebiañ. Ngone lale ya mbu 2023, mojañe Jedele a nga bo mvolô ya émo’o bobejañe ba tebele bisaé. Éyoñ a beta simesane mimbe’e mise a nga be’e a jô na: “Éyoñe ba ve wo mfefé mbe’e, ô ne wô’ôtane ve ane nge mbe’e ôte wo ye lôte wo nkôñ. Éyoñe wo wô’ôtane nalé, éyoñ éte nje ñhe wo yiane dañe tabe ndi a Yéhôva amu nnye étam a ne ve bia ngule ya be’e mimbe’e mite.”

Mojañe Rumph a nga bialé Californie, États Unis. Éyoñ a mbe mongô, nyia wé a mbe avoé nsisime ve a mbe a va’a ngule ya ye’ele nye benya mejôô. Nde fe mewo’one mese, a mbe a kele’e be émvame minga jé, nje éte é mbe ayôñe mfa’a ya nsisim. Émvame jé éte a nga volô nye na a bi nkômbane ya yé’é benya mejôô, ane a nga taté ayé’é éyoñ a mbe a bili mimbu 13. A nga dubane Ngon ébulu ya mbu 1992 é too melu 27, a mbe a ngenan ésoé. Bia ve Zambe akiba, amu nyia wé a nga beta bo ayôñe nsisim, ésa wé, kale jé a monyañe wé fe be nga yaé nsisim a duban.

Ngon ébulu ya mbu 1995, mojañe Rumph a nga nyoñ ésaé nkpwa’a mefan éyoñ a nga mane sikôlô, amu a nga yen abim avé bekpwa’a mefane be mbe mevak. Mbu 2000, a nga ke suk ésaé nkañete Équateur. Équateur wôé nnye a nga yen a nye’e Inga, ngone ya Canada, nye fe a mbe nkpwa’a mefan, ane be nga lu’an. Mimbu mi nga tôé valé, be nga suk ésaé nkañete mone angôs bekañete ya tison éziñ Équateur. Mone angôse bekañete ate a ntoo beta ékôane bekristene den.

Ane éyoñ é nga lôt, mojañe Rumph ba ngale be nga bo bekpwa’a mefane be ne ngum aval, a mvuse ya valé, bejome bikôane bekristen. Mbu 2011 be nga bañete be sikôlô ya Galaad, aba 132. Mvuse sikôlô ate be nga lôme be abui bevôm e si ése. Be nga saé Béthel, be bo bemissionaire a bejome bikôane bekristen, mimbe’e mite mise mi nga soo be abui mevak. Mojañe Rumph a nga bi fe beta mvome ya bo ñye’ele ya Sikôlô bekañete mbamba foé ya Éjôé.

Ébubua ôkone COVID-19 é nga bo na mojañe Rumph ba ngale be bulan États Unis. Be nga bañete be Béthel ya Wallkill, e wôé nnye be nga yañele mojañe Rumph asu émo’o bobejañe ba tebele bisaé. Ane be nga beta be lôme Béthel ya Équateur, wôé mojañe Rumph a mbe ébu’a jia ya émo’o bobejañe ba tebele wofise ya Béthel. Mbu 2023 be nga lôme be e Warwick. Mojañe Rumph a nga bo mvolô ya émo’o bobejañe ba tebele bisaé Ngon ôsu ya mbu 2024. Éyoñ a beta simesane bevôme bese a nga saé a jô na, “Jame da bo na mbe’e éziñ ô bo ngum aval, é nji bo vôme wo saé ve bôte mia be be mia saé.”

Bia nye’e ésaé bobejañe bete ba bo a nlem ôse a bia ke “ôsu a nyane kane bôt éte.”—Philip. 2:29.