Mbamba foé mfa’a ya miñyebe a ne mbé?

1. Ye miñyebe mise mi ne abeñ?

Bôte be bili mbamba minleme be ne miñyebe mise. Mbamba fôé a ne na, Zambe a yene bôte bete, a anyoñe fe be ngap. Ve jam é ne abé é ne na, bôte ba belane miñyebe na be bo mbia be mam. (2 Becorinthien 4:​3, 4; 11:13-​15) Mefoé ma jô na, abui miñyebe da kuli abui metyi, a zene ya bita. Miñyebe mite mia bo na, betebe ôsu ya miñyebe be tibili bongô, a ndamane be, éyoñe ba bômban a be. Jame te da bo benya bebuni Zambe angôndô ya mintaé nlem!​—Lañe Matthieu 24:3-5, 11, 12.

Nté nya ñyebe a ke ôsu a ve Zambe duma, bivuse miñ­yebe ki, mi a ve nye nlem abé. Mia ve miñye’elan mi nji bo Kalate Zambe été, ane bivuse miñye’elan mfa’a ya Zambe a bewu. Ve Yéhôva a yi na bôte be yeme benya mejô mfa’a wé.​—Lañe Ézéchiel 18:4; 1 Timothée 2:3-5.

2. Mbamba foé mbé a ne mfa’a ya ñyebe?

Ve mbamba foé a ne na, Zambe a tu’a yeme miñyebe mi ajô ve anyu na mia nye’e nye, a too ke na, mia nye’e émo Satan. (Jacques 4:4) Mejô me Zambe ma loene bivus miñyebe mise na “Beta Babylone.” Babylone a mbe nnôm tison, vôm bivuse miñyebe mi nga taté, mvuse ndône mendim melu me Noé. Ana’ana, Zambe a zu mane tyi’i ne bem, miñyebe mise mia laane minsos, a tibili môt a binam.​—Lañe Nlitan 17:1, 2, 5, 16, 17; 18:8.

Mbamba fôé mfe a ne na, bôte be bili mbamba nlem, a be ne miasan bivuse miñyebe été, Yéhôva a vuane ki be. A kôane bôte bete éyoñ a ye’ele be benya mejô.​—Lañe Michée 4:2, 5.

3. Jé nje bôte be ne mbamba nleme ba yiane bo?

Yéhôva a nyoñe ngap a bôte ba nye’e mam me ne zôsô, a mam me ne abeñ. A tindi be na, be kui bivuse miñyebe atan. Bôte ba nye’e Zambe ba kañese na be ji’a tyendé abo dulu dap.​—Lañe Nlitan 18:4.

Ntete mimbu ôsusua, bôte be mbe mbamba nlem, be nga wôk benya mejô me so’o be minlômane mi Yésus, a nyoñe me a mevak. Be nga yé’é mfefé fatan ényiñ wo so be Yéhôva. Fatan ényiñ éte é mbe zene ya mevak, é mbe fe é bili nsôñan a ndi nlem. Be ne mbamba évé’an asu dangan den, amu be nga nyoñe mbamba mefoé a télé Yéhôva ôsu ényiñe jap.​—Lañe 1 Bethessalonicien 1:8, 9; 2:13.

Yéhôva a nyoñe bôte bese ba kôlô bivuse miñyebe, a ne bôt ya nda bôt jé. Ô ne yebe mbamba nloene Yéhôva a loene wo na ô kañe nye. Nge wo yebe mbamba nloene ate, mia nye mi aye bo amvôé. A wo ye fe bi mfefé nda bôte Bengaa be Yéhôva ja nye’e wo, a ényiñe ya nnôm éto.​—Lañe Marc 10:29, 30; 2 Becorinthien 6:17, 18.

4. Aval avé Zambe aye bo na, si se é tabe e meva’a été?

Mbamba foé a ne na, bivuse miñyebe bia zu jañ. Zambe a zu mane va mam mese ma ndeñele bia, e si se. Te ke môs éziñ, bivuse miñyebe mi aye beta duk bôt, nge bo be na be kandane mengam. Bôte bese b’aye nyiñe nlatan ékaña’a nya Zambe.​—Lañe Nlitan 18:20, 21; 21:3, 4.