Ba tube mbia Njô bôt

Joseph a vele Marie na a kate nye mbia foé. Ange Yéhôva a te kate nye biyeyeme na: ‘Kôlô’ô si, a nyoñ mongô ba nyia wé, ô mate a ke Égypte, ô tabe’e wôé akekui éyoñ me aye kate wo: amu Hérode a ye jeñ mongô a wôé nye.’​—Matthieu 2:13.

Été été, Joseph ba Marie a mone wop ba tube zañ alu. Ba bo de avôl avôl amu Hérode a yemeya na, b’astrologue ba te joñôlô nye. A nga jô be na be ke nye kate vôme Yésus a mbe. Ve jame da, be nga bulane si jap teke de bo. Hérode ve zu wô’ô mbia ôlun. Mbôl a ngenan a kômbô’ô wôé Yésus, nde a ve atiñe na, be wôé bobefame bese be ngenan teke lôte mimbu mibaé a étun, be too Bethléhem a minlam mia bômane nye. Mame b’astrologue be mbe be so’o vôme jôp da tôô be nga kate nye, mme me nga volô nye na a top ôkala ôte.

Awu ya ayôme bobefam bete bese e ne fo’o mbia jam! Bi vo’o yem abime bobefam e nga wu éyoñ éte, ve miñyôn a mintaé benyia be nga wôk, mia tôé nkulan ajô Jérémie, nkulu mejô Zambe.​—Jérémie 31:15.

Awolô ete ebien, Joseph a nda bôte jé ba tup a ke Égypte, ba ke fe ôsu a nyiñe wôé. Ve alu éziñ, ange Yéhôva a nga beta zu kobô Joseph biyeyem, a jô’ô nye na: ‘Kôlô’ô si, ô nyoñe mongô ba nyia wé, ô ke si ya Israël: amu ba be nga kômbô wôé mongô be wuya.’ (Matthieu 2:20) Nde Joseph a yemelane na, nda bôte jé é nto ve bulane nlame wop. Nkulan ajô ôfe ya Kalate Zambe ñwô wo tôébane le: Mone Zambe a ke Égypte.​—Ôsée 11:1.

Éko éziñ na, Joseph a nga jeñe na a ke tabe Judée a nda bôte jé, a mbe a yiane bo fefele Bethléhem, vôm be mbe be nyiñi’i ôsusua na ba tup a ke Égypte. Ve a wô’ô na Archélaüs, mone mbia njô bôte Hérode nnye a nga jôé Judée. E biyeyeme bife, Zambe a bemene Joseph na a bo ntyel. Nde Joseph a nda bôte jé ba ke mfa’a ya nord a ba tabe Nazareth, si ya Galilée, ôyab a Jérusalem vôme Bejuif ba kañe Zambe. Nde Yésus a yaé wôé, a nalé a jalé nkulan ajô ôfe: “A ye loene nye na, môte ya Nazareth.”​—Matthieu 2:23.