Yésus a tobe minlôman awôm a mibaé

Den a nga ke mbu wua a étun, Jean Baptiste a nga liti Yésus ane Ntômba Zambe. Éyoñe Yésus a nga taté ésaé nkañete jé, abui bôt é mbe é bili mbamba nkômban é nga su’ulane bo beyé’é bé, fo’o v’ane André, Simon Pierre, Jean, éko éziñ fe Jaques (monyañe Jean), Philippe, a Barthélemi (nyi ba loene fe na Nathanaël). Ane éyoñ é nga lôt, abui bôt afe é nga tôñe Krist.​—Jean 1:45-47.

Éyoñe ji, Yésus a nto ngule ya tobe minlômane mié. Ba ye bo bôte ba yeñe kom ése a nye, a ye fe ye’ele a yañele be. Ve ôsusua na a tobe be, Yésus a ke nkôl éziñe yôp, éko éziñe fefele Mañ ya Galilée, bebé a Capernaoum. A bo ngumba alu meye’elan été, éko éziñ a sili’i Zambe fek a ébotan. Môse wo tôé valé, a loene beyé’é bé, a tobe bôte 12 y’été na be bo minlôman.

Yésus a tobe bôte besamane bia te ve biyôlé e yôbe valé, a Matthieu, môte Yésus a nga loen a to wofise ba nyoñe taxe. Bôte betan bevok be ne Jude (nyi ba loene fe na Thaddée a “mone Jacques”), Simon môte ya Cana, Thomas, Jacques mon Alphée, a Judas Iscariot.​—Matthieu 10:2-4; Luc 6:16.

Ataté éyoñ éte, bôte 12 bete ba wulu a Yésus, a kôme fe be yem. Bevo’o y’été be ne bivuvumane bié. Jacques ba Jean be ne bobenyañ, a ba yiane bo bôte b’ôsu ba vuman a nye. A nge Alphée a ne monyañe Yôsep, ésa Yésus avale bôte béziñ ba simesan, nalé a tinane na mon Alphée, nye ate a ne nlômane Jacques, a yiane vuman a Yésus.

A nji fo’o bo ayaé na Yésus a simesane biyôlé minlômane mié. Ve, ye ô ne ngule ya ba’ale bie? Jam é ne volô wo e ne na ô ba’ale na, bôte bebaé be ne jôé na Simon, be Jacques be ne bebaé, a be Judas bebaé. Simon (Pierre) a bili monyañ a ne jôé na André, a Jacques (mone Zébédée) a bili monyañ Jean. A ne mbamba zene ya ba’ale biyôlé minlômane mwome mite. Bôte benyine befe be ne: nyoñe taxe (Matthieu), môt a nga su’ulane sôô (Thomas), nyi be nga loen élé si (Nathanaël), a mvôé Nathanaël (Philippe).

Beyé’é awôm a wua be ne bôte ya Galilée, jale Yésus ébien. Nathanaël a so Cana. Philippe, Pierre a André ba so Bethsaïda. Ve Pierre ba André ba ke tabe Capernaoum abim éyoñ éziñ, e vôme Matthieu a mbe a to. Jacques ba Jean ba nyiñe fe Capernaoum nge ke mefefel, a be bili beta ésaé e fefel valé, ñyobane kos. É ne v’ane Judas Iscariot, môt a ye su’ulane koñe Yésus nnye étam a ne nlômane wo so Judée.