Zambe a nga té fam ôsu a minga ôsu

Yéhôva a nga bé afube vôm be mbe be loone na Éden. Afub éte é mbe njalan a bilok, bilé a betit. Mvuse ya valé, Zambe a nga té môt ôsu a mete’e ya si, a futi nye mvebe y’ényiñe mimbile mi jôé. Ye wo yeme jam é nga kui éyoñ a boya nalé? Nde môt a nga taté na a nyiñ! Yéhôva a nga jô Adam na a ba’ale afup, a na, a ve betite biyôlé.

Yéhôva a nga ve Adam atiñ éziñ. A nga jô Adam na: ‘Ô ne ngule ya di bibuma ya bilé bise, ane ô vaa ve ébuma ya élé jia. Nge ô dii ébuma ya élé éte, wé wu.’

Mvuse ya valé, Yéhôva a nga jô na: ‘M’aye bo Adam mvolô a yiane nye.’ Nde a nga bo na Adam a ke ôyo ayap. Ane Zambe a nga bo Adam minga a évese ya ébaé mvaé jé. Éyôlé minga ate é mbe Ève. Adam ba Ève be nga be nda bôt ôsu é nga nyiñ e si va. Adam a nga bo aya éyoñ a nga yene minga wé? A nga wô’ô abui mevak, nde a nga jô na: ‘Za avale mbamba jam Yéhôva a boya ma di! Ma fe me kômeya bi minga!’

Yéhôva a nga jô Adam ba Ève na be biaé abui bon, a na be jalé si. A mbe a yi na be saé fufulu, asu na si ése é bo Paradis, nge ke mbamba afup, aval ane afube ya Éden. Ve mam me nji boban avale Yéhôva a mbe a kômbô’ô. Amu jé?