Ye wo to ô yeme’ek?

Amu jé be mbe be ve’e binga Israël?

MELU mvus, éyoñe mona fam a mbe a kombô lu’u mona minga, a mbe a ve’e nye éyoñ menda me bôte map ma kañese aluk. Nnôme ngon a mbe ngule ya ve biôm bi ne édima, betit, nge ke nsoé moné. Biyoñe biziñ, nnôme ngon a mbe ngule ya ya’ane mevek a bisaé bi mo, aval ane Jacob a nga ke saé asu ésaa Rachel, mimbu zañbwa. (Met. 29:17, 18, 20) Amu jé be mbe be ve’e binga?

Ñyeme mam éziñ, Carol Meyer, a jô na: “Biôme be mbe be va’a bi mbe bi tañe’ ésaé ngone ja ke aluk é mbe é bo’ok, nje éte é mbe nya mfii e dañedañ asu menda me bôte me mbe me bili abui mefup.” Meve’e me mbe fe me yemete élat é ne zañe nda bôte mona fam a nyi mona minga. Menda me bôte mete me mbe fe me su’ane biyoñe ya minjuk. Meve’e me mbe fe me liti na mona minga a bili atiñ aluk, a na nnôm nnye a asu taté na a nyoñe ngap a nye, aval ésaa a mbe a bo’ok.

Meve’e me nji be me tinane na mona minga a mbe jôme ba kuan. Kalate Les institutions de l’Ancien Testament a jô na: “Moné nge ke biôme be mbe be va’a nda bôte mona minga é mbe é bo’o na abui bôte e yen melu’u ya Israël ve ane makit. Ve, [meve’e] me ne ane das be mbe be va’a nda bôte mona minga, sa ke na ba kuse nye.”

Mesi méziñ, ba ke ôsu a ve’e binga den. Éyoñe Bekristene ba ve ngo jap aluk, mbamba ñyenane mam wop a yiane “yené be bôte bese.” Be nji yiane sili biôm a lôte nné. (Beph. 4:5; 1 Bec. 10:32, 33) Éyoñe ba bo nalé, da kôme yené na be nji bo “ôzañ akum.” (2 Tim. 3:2) Éyoñe Bekristene ba bo te sili nnôme ngone wop abui biôm, nalé é volô nye na a bo teke dañe tu’i a ésaé asu na a bi moné ya mevek, a na a ji’a tôé nsôñane wé ya lat aluk. Nde fe, nge nnôme ngon wop a ne nkpwa’a mefan, a ye ke bo ntindane ya telé ésaé nkpwa’a mefane jé asu na a jeñ abui moné ya ke ve’e minga wé.

Mesi méziñ, bijôé mbie bia tyi’ abime moné ba yiane ve asu mevek. Nge é ne nalé si be too, Bekristene ba yiane semé atiñ ete. Bia jô nalé amu jé? Kalate Zambe a jô na Bekristene ba yiane bo “ba be tele ôsu mewôk,” a tôñe metiñe me nji wosan a metiñe ya Kalate Zambe.​—Bero. 13:1; Mam. 5:29.