Sekant Kingz
2 Wen Jehoava mi bowt fi kehr Ilaija op eena di skai* eena wahn schrang schrang breez, Ilaija an Ilaisha lef Gilgal. 2 Ilaija tel Ilaisha: “Pleez stay rait ya, bikaaz Jehoava di sen mi da Betel.” Bot Ilaisha seh: “Ah swayr dat jos laik how Jehoava livin ahn jos laik how yoo livin, Ai noh wahn lef yu.” Soh dehn gaahn da Betel. 3 Den wan a di prafit dehn* da Betel kom owt kohn meet Ilaisha, an ih tel ahn: “Yoo mi noa dat Jehoava di tek weh yu maasta fahn yu?” Den Ilaisha seh: “Ah mi don noa dat, soh bee kwaiyet.”
4 Den Ilaija tel Ilaisha: “Pleez stay ya Ilaisha, bikaaz Jehoava di sen mi da Jeriko.” Bot Ilaisha seh: “Ah swayr dat jos laik how Jehoava livin ahn jos laik how yoo livin, Ai noh wahn lef yu.” Soh dehn gaahn da Jeriko. 5 Den wan a di prafit dehn* da Jeriko gaahn tu Ilaisha ahn tel ahn: “Yoo mi noa dat Jehoava di tek weh yu maasta fahn yu?” Den Ilaisha seh: “Ah mi don noa dat, soh bee kwaiyet.”
6 Den Ilaija tel ahn: “Pleez stay rait ya, bikaaz Jehoava di sen mi da di Jaadn Riva.” Bot Ilaisha seh: “Ah swayr dat jos laik how Jehoava livin ahn jos laik how yoo livin, Ai noh wahn lef yu.” Soh di too a dehn gaan. 7 Ahn 50 a di prafit dehn* mi fala Ilaija an Ilaisha. Bot dehn stan op wahn lee wayz fahn dehn ahn wach dehn wail dehn mi-di stan op bai di Jaadn Riva. 8 Den Ilaija tek aaf ih roab, roal it op, ahn nak di waata wid it. Den di waata split apaat soh dat too a dehn kuda mi waak kraas di riva pahn jrai grong.
9 Az soon az dehn kraas, Ilaija tel Ilaisha: “Weh yu wuda waahn Ah du fi yu bifoa Gaad tek mi fahn yu?” Soh Ilaisha aks ahn: “Ah ku pleez geh som* a di spirit* weh Gaad gi yu?” 10 Hihn tel ahn: “Dis da noh wahn smaal lee ting weh yu di aks mi fa. If yu si mi wen Gaad di tek mi weh fahn yu, den yu wahn geh weh yu di aks fa; bot if yu noh si mi, den ih noh wahn hapm.”
11 Soh dehn gaahn di taak lang di way, den aal af a sodn wahn waar chariyat ahn sohn haas weh mi luk laik faiya kohn bitween di too a dehn ahn separayt dehn. Ahn den wahn schrang schrang breez kehr Ilaija op eena di skai.* 12 Wail Ilaisha mi-di wach, ih staat tu hala: “Mi laad, mi laad! Ah si Izrel chariyat an ih haas dehn.” Ahn wen ih kudn si Ilaija nohmoh, ih grab aan tu ih oan kloaz ahn tayr it. 13 Afta dat ih gaahn pik op di roab weh mi jrap aafa Ilaija, den ih gaahn bak gaahn stan op saida di Jaadn Riva. 14 Den ih tek Ilaija roab, nak di waata wid it, an ih seh: “Wehpaat Ilaija Gaad, Jehoava, deh?” Ahn wen ih nak di waata, di waata split apaat soh dat Ilaisha kuda mi kraas.
15 Wen di prafit dehn* da Jeriko si ahn fahn faar, dehn seh: “Di spirit weh Gaad mi gi Ilaija deh wid Ilaisha now.” Soh dehn gaan op tu ahn, an bow dong tu ahn wid dehn fays tu di grong. 16 Ahn dehn tel ahn: “Wi ga 50 brayv man wid wi, pleez mek dehn goh luk fi yu maasta. Maybi di breez* fahn Jehoava pik ahn op ahn chroa ahn pahn wan a di mongtin dehn er eena wan a di vali dehn.” Bot hihn seh: “No, noh sen dehn.” 17 Bot dehn mi kip aan di aks ahn, an ih staat tu feel laik dehn mi-di put ahn pahn di spat. Soh ih seh: “Sen dehn den.” Soh dehn sen di 50 man, ahn dehn mi kip aan di luk far ahn fi chree dayz, bot dehn neva fain ahn. 18 Wen dehn gaahn bak tu Ilaisha da Jeriko, wehpaat ih mi-di stay, hihn tel di man dehn: “Ah neva tel unu noh fi goh?”
19 Afta wahn wail, di man dehn fahn di siti tel Ilaisha: “Maasta, yu ku si dat di siti deh da wahn gud spat, bot di waata noh kleen, ahn di soil pahn di lan noh gud needa.”* 20 Den ih seh: “Bring mi wahn smaal bowl weh nyoo ahn put saalt eena it.” Soh dehn bring it far ahn. 21 Den ih gaahn da di waata spring wehpaat di waata mi-di kohn fram an ih chroa saalt eena it, an ih seh: “Dis da weh Jehoava seh, ‘Di waata kleen now. Ih noh wahn mek peepl ded nohmoh, an ih noh wahn mek wuman kyaahn ga baybi.’”* 22 Ahn di waata kleen op tu tudeh, jos laik weh Ilaisha mi seh.
23 Den ih lef fahn deh ahn gaahn da Betel. An az ih mi-di goh lang di way, sohn lee bwai kom owt fahn di siti ahn staat tu tek ahn mek papishoh. Dehn stay mi-di tel ahn: “Goh fahn ya, yu baalhed man yu! Goh fahn ya!” 24 Den ih ton rong, luk pahn dehn, ahn kaal dong wahn kers* pahn dehn eena Jehoava naym. Den too byaa* kom owta di faris ahn tayr op 42 a dehn intu peesiz. 25 Afta dat Ilaisha kantinyu lang di way ahn gaahn da Mongt Karmel, ahn fahn deh ih gaahn bak da Samayrya.