Wai Bad Tingz Hapm, ahn Wai Peepl Sofa?

Wen sohnting veri bad hapm, peepl wuda naamali aks: “Wai dis hapm?” Wi soh hapi dat di Baibl ku ansa da kweschan fi wi!

1. Weh Saytan mi du fi mek bad tingz staat tu hapm eena di werl?

Saytan di Devl mi ribel gens Gaad. Saytan mi waahn rool oava adaz, soh hihn mi chrik di fers too hyooman, Adam ahn Eev, fi ribel gens Gaad tu. Fi du dat, Saytan mi tel Eev wahn lai. (Genesis 3:1-5) Ih mek Eev bileev dat Jehoava mi-di hoal bak sohnting gud fan ahn. Soh da laik hihn mi-di seh dat peepl wuda bee hapiya if dehn noh obay Gaad. Saytan mi tel di fers lai eva wen ih tel Eev dat shee neva mi wahn ded. Dat da wai di Baibl seh dat Saytan “laiyad ahn hihn da di faada a di lai dehn.”​—Jan 8:44.

2. Weh Adam ahn Eev mi chooz fi du?

Jehoava mi chreet Adam ahn Eev veri gud. Hihn tel dehn dat dehn ku eet fahn evri chree eena di gyaadn a Eedn eksep fi wan a dehn. (Genesis 2:15-17) Bot dehn stilyet disaid fi eet fahn da chree weh Gaad tel dehn noh fi eet fram. Eev “pul di froot ahn staat tu eet it.” Laytaraan, Adam “staat tu eet it tu.” (Genesis 3:6) Soh di too a dehn brok Gaad koman. Bikaaz Adam ahn Eev mi perfek, ih mi nachral fi mek dehn du weh rait. Bot wen dehn mi chooz fi noh obay Gaad, dehn mi sin ahn dehn mi rijek fi hihn roolaship. Da disizhan deh mi mek dehn sofa wahn lat.​—Genesis 3:16-19.

3. How di disizhan weh Adam ahn Eev mi mek afek aala wi tudeh?

Adam ahn Eev mi sin gens Jehoava, ahn sayka dat dehn neva perfek nohmoh. Bikaaz wee da Adam ahn Eev pikni, wi baan wid sin ahn soh wi noh perfek needa. Dis da weh di Baibl seh bowt Adam: “Sin mi fos kom eena di werl sayka wan man, ahn sin bring det. Soh det spred tu evribadi.”​—Roamanz 5:12.

Lata difrent tingz kaaz wi fi sofa. Sohntaim wi sofa bikaaz a bad disizhanz wi mek. Sohntaim da sayka bad disizhanz weh ada peepl mek. An ada taimz wi sofa bikaaz wi deh da di rang plays da di rang taim.​—Reed Ecclesiastes 9:11.

SAACH FI MOA

4. Di wan weh rispansabl fi wi sofarin

Lata peepl bileev dat Gaad da di wan weh di rool oava di hoal werl. Yu tink dat da chroo? Play di VEEDYO.

VEEDYO: Hoo Di Kanchroal di Werl? (1:24)

Reed Jaymz 1:13 ahn 1 Jan 5:19, ahn den diskos dis kweschan:

• Yu tink Gaad da di wan weh rispansabl fi di bad tingz weh di hapm ahn di sofarin weh peepl fays?

5. Weh hapm sins Saytan staat rool?

VEEDYO: Wai Gaad Talarayt Sofarin?​—Veedyo Klip (3:07)

Reed Genesis 3:1-6, ahn den diskos dehnya kweschan:

• Weh lai Saytan mi tel Eev?​—Si vers 4 ahn 5.

• Weh Saytan mi seh fi mek ih luk laik Jehoava mi-di hoal bak sohnting gud fahn peepl?

• Akaadn tu Saytan, peepl need Jehoava az dehn Roola fi bee hapi?

Reed Ecclesiastes 8:9, ahn den diskos dis kweschan:

• Weh hapm joorin di taim wen Jehoava noh di rool dis werl?

1. Adam ahn Eev mi perfek ahn dehn mi liv eena Paradais. Bot dehn mi lisn tu Saytan ahn ton gens Jehoava

2. Afta dehn ton gens Jehoava, di werl geh ful op wid sin, sofarin, ahn det

3. Jehoava wahn geh rid a sin, sofarin, ahn det. Peepl wahn geh di chaans fi bee perfek ahn liv eena Paradais agen

6. How Jehoava feel wen ih si wi di sofa?

Gaad eevn kay bowt fi wee sofarin? Si weh King Dayvid ahn di apasl Peeta mi rait. Reed Psalm 31:7 ahn 1 Peeta 5:7, ahn den diskos dis kweschan:

• How ih mek yoo feel fi noa dat Jehoava noatis wi prablemz ahn dat ih hert hihn fi si wi sofa?

WEH WI LAAN?

Saytan di Devl ahn di fers too hyoomanz rispansabl fi di bad tingz ahn sofarin eena dis werl. Jehoava feel hert wen ih si wi di sofa, ahn hihn wahn soon geh rid a sofarin.

Mek Wi Rivyoo:

• Weh lai Saytan di Devl mi tel Eev?

• How Adam ahn Eev ribelyan afek aala wi?

• How wi noa dat Jehoava kay bowt fi wee sofarin?

FAIN OWT MOA

Laan how di Baibl eksplayn wat da sin.

“Wat Da Sin?” (Web aatikl)

Reed moa bowt di ishu weh Saytan di Devl mi bring op eena di gyaadn da Eedn.

“Wai Gaad Alow Sofarin?” (Di Wachtowa, Janiweri 1, 2014)

Fain komfertin ansaz tu wahn kweschan weh noh eezi fi ansa.

“Wai di Nazi Dehn Mi Kil Milyanz a Jooz? Wai Gaad Neva Stap Dat Fahn Hapm?” (Web aatikl)

Si weh wahn man mi laan bowt di sofarin weh hihn si di hapm rong ahn.

Ah Noh Deh Pahn Mi Oan Nohmoh (5:09)