May

Weh payrents ku du fi help dehn chiljren laan fi lov Jehoava? Pray fi Jehoava help, jos laik Manoawa. Aalso, teech bai egzampl. Weh yu seh impoatant; bot weh yu du ku afek yu chiljren wahn lat moa. Wee ku bee shoar dat Joazef ahn Mayri mi set wahn reeli gud egzampl fi Jeezas ahn di res a dehn chiljren. Joazef mi werk haad fi provaid fi ih famili. Pahn tap a dat, Joazef mi inkorij ih famili fi apreeshiayt spirichwal tingz. (Deut. 4:9, 10) Hihn mi kehr ih famili wid ahn da Jeroosalem “evri yaa” fi selibrayt di Paasoava. (Look 2:41, 42) Som a di ada pa dehn eena dehndeh dayz mi praabli tink dat fi kehr dehn famili pahn wahn chrip laik dat wuda bee haad, tek op wahn lata taim, ahn kaas wahn lat a moni. Bot Joazef mi lov Jehoava ahn hihn mi teech ih chiljren fi du di saym ting. Mayri mi noa di Skripchaz gud. Soh bai fi shee werdz an akshanz, shee mi teech ih chiljren fi lov Gaad Werd. w19.12 24-25 ¶9-12

Wi si proof a Jehoava lov fi wi wen wi tink bowt weh ih mi du wen Adam mi disobay ahn. Wen Adam mi chooz fi disobay ih hevnli Faada, Adam an ih disendant dehn da-mi no langa paat a Jehoava famili. (Roam. 5:12) Bot Jehoava mi du sohnting fi help Adam disendant dehn. Jehoava mi ponish Adam, bot ih mi pramis fi help Adam disendant dehn. Jehoava mi rait away pramis dat hihn mi wahn provaid wahn way fi mek obeedyant hyoomanz bee paat a fi hihn famili agen. (Gen. 3:15; Roam. 8:20, 21) Jehoava mi mek dis pasabl chroo di ransom sakrifais a ih Son, Jeezas. Jehoava mi proov humoch ih reeli lov wi wen ih mi giv op ih Son fi sayv wi. (Jan 3:16) Hihn da di bes Faada. Hihn lisn tu wi pryaaz, hihn provaid weh wi need fi liv, ahn hihn provaid weh wi need fi kip wahn kloas rilayshanship wid ahn. Hihn aalso chrayn ahn sopoat wi. Ahn pahn tap a dat, hihn wahn du wandaful tingz fi wi eena di fyoocha. Ih mek wi hapi fi noa dat wi Faada lov wi ahn waahn help wi! w20.02 6 ¶16-17; 7 ¶20

Sohnting eva mek yoo feel reeli schres owt? Maybi sombadi seh er du sohnting weh mi reeli hert yu. Er maybi da sohnting weh yoo mi seh er du. Fi egzampl, yu praabli mi mek wahn mistayk ahn yu di wori dat Jehoava wahn neva fagiv yu. Fi mek mataz wers, yu mait bileev dat yu noh ga fayt bikaaz yu di wori tu moch ahn yu feel dat yu da wahn bad persn. Bot, kansida sohn Baibl egzampl. Di prafit Samwel ma, Hana, da-mi wahn uman weh mi ga lata fayt. Bot stil, shee mi feel reeli schres owt wen shee mi-di fays wahn prablem eena ih famili. (1 Sam. 1:7) Di apasl Paal mi ga schrang fayt tu, bot hihn stil mi-di ‘wori bowt aala di ada kangrigayshan dehn.ʼ (2 Kor. 11:28) King Dayvid mi ga schrang fayt ahn Jehoava mi lov ahn wahn lat. (Aks 13:22) Bot stil, Dayvid mi mek sohn mistayk weh mi reeli schres hihn owt. (Ps. 38:4) Jehoava mi kaam ahn komfert eech wan a dehn. w20.02 20 ¶1-2

Wen yu dedikayt yuself tu Jehoava, yu pray tu ahn fahn yu haat ahn tel ahn dat yu waahn yooz yu laif fi serv ahn fareva. Wen yu dedikayt yuself tu Gaad, yu stap goh afta weh yoo waahn fi yu oanself. Now, yu bilangz tu Jehoava. Dat da wahn grayt privilij! (Roam. 14:8) Yu tel Jehoava dat fahn now aan, di moas impoatant ting fi yoo wahn bee fi serv hihn, noh fi pleez yuself. Dedikayshan da wahn seeryos pramis weh yu mek tu Jehoava. Jehoava noh foas wi fi mek da pramis. Bot wen wi doo mek da pramis, hihn ekspek wi fi kip it. (Ps. 116:12, 14) Wen yu dedikayt yuself tu Jehoava, nobadi els noa eksep yoo ahn Jehoava. Bot wen yu geh baptaiz, ih naamali tek plays fronta ada peepl, yoozhwali da wahn asembli er da wahn kanvenshan. Wen yu geh baptaiz, yu shoa adaz dat yu don dedikayt yuself tu Jehoava. Soh yu baptizm mek adaz noa dat yu lov Jehoava yu Gaad wid yu hoal haat, wid yu hoal soal, wid yu hoal main, ahn wid yu hoal schrent, ahn dat yu mek op yu main fi serv ahn fareva.​—Maak 12:30. w20.03 9 ¶4-5

Saytan stap peepl fahn reeli get fi noa Jehoava. Afta di det a Jeezas apasl dehn, sohn faals Kristyanz, er apastayts, mi staat tu teech loan lai. (Aks 20:29, 30) Dehnya faals teechaz mi stap peepl fahn reeli get fi noa di chroo Gaad. Fi egzampl, dehn stap yooz Gaad naym eena dehn kapi a di Baibl, ahn dehn yooz taitl laik “Laad” insted. Wen dehn mi tek owt Gaad naym fahn di Baibl ahn yooz “Laad” insted, ih neva eezi fi wahn persn weh reed di Baibl si di difrens bitween Jehoava ahn di ada “laadz” weh di Baibl taak bowt. (1 Kor. 8:5) Dehn mi kaal Jehoava ahn Jeezas “Laad.” Dis mi mek it haada fi mek peepl ku si dat Jehoava ahn Jeezas da noh di saym. (Jan 17:3) Dis da-mi reel kanfyoozhan. Ahn soh di faals teechin a di Chriniti, weh noh bays pahn di Baibl, mi-di spred. Bikaaz a aala dis, lata peepl bileev dat ih impasabl fi noa Gaad. Dat da wahn big lai!​—Aks 17:27.w19.06 5 ¶11

Wan way fi du wi bes eena wi servis tu Gaad da fi du beta eena wi preechin skilz. (Prov. 1:5; 1 Tim. 4:13, 15) Da wahn aana fi bee “paadna” weh werk lang wid Gaad! (1 Kor. 3:9) Wen yu “mek shoar a di moa impoatant tingz” ahn foakos pahn di minischri, yu wahn “serv Jehoava wid jai.” (Fil. 1:10, NW; Ps. 100:2) Az wahn servant a Jehoava, yoo ku bee shoar dat hihn wahn giv yu di powa fi finish di jab weh ih gi yu fi du, noh mata weh chalenjiz er prablemz yu mait gat. (2 Kor. 4:1, 7; 6:4) Weda yu serkomstans alow yu fi preech lat er lee bit, yoo ku ‘feel gud bowt yuselfʼ kaaz yu du yu veri bes. (Gal. 6:4) Wen yu du dis, yu shoa humoch yu lov Jehoava ahn yu nayba, ahn “yu wahn sayv dehn wan weh di lisn tu yu, ahn yuself tu.”​—1 Tim. 4:16. w19.04 6 ¶15; 7 ¶17

Wan a di mayn wayz how Saytan an ih deemon dehn chrai fi chrik peepl da chroo spiritizm. Dehn peepl weh praktis spiritizm klaym seh dat dehn noa bowt er ku kanchroal tingz weh hyoomanz noh ga di powa fi du. Fi egzampl, som peepl klaym fi ga di powa fi pridik di fyoocha chroo blak majik er horoskoap. Adaz mait ak laik dehn mi-di taak tu sombadi weh don ded. Som peepl praktis oabya ahn dehn mait chrai put wahn kers pahn sombadi els. Wahn servay weh som peepl mi du eena 18 difrent konchri eena Latin America ahn di Caribbean proov dat wan owta evri chree persn bileev eena blak majik, ahn nayli di saym amonk a peepl bileev dat ih pasabl fi kantak di ded. Wahn neks servay weh dehn mi du eena 18 difrent konchri da Africa proov dat moa dan haaf a di amonk a peepl weh mi tek paat bileev eena majik. Af koars, noh mata wehpaat wi mait liv, wi fi protek wiself fahn eni faam a spiritizm. w19.04 20-21 ¶3-4

Jehoava Gaad hayt aal kaina wikidnis. (Ps. 5:4-6) Sekshwal chail abyoos da wahn harabl ahn disgostin sin weh Gaad reeli hayt! Bikaaz wee da Jehoava Witnisiz, wi fala Jehoava egzampl ahn hayt chail abyoos. Wi noh talarayt it eena di Kristyan kangrigayshan ataal. (Roam. 12:9) Eni kaina chail abyoos goh gens “di komanment weh Jeezas Krais gi”! (Gal. 6:2) Di komanment weh Jeezas Krais gi wi bays pahn lov ahn promoat jostis. Bikaaz chroo Kristyanz obay dis komanment, dehn chreet chiljren wid lov ahn mek dehn feel sayf. Bot chail abyoos selfish an ih noh rait, ih tek weh di chail inosens. Sad fi seh, ih eevn afek chroo Kristyanz. Wai? Bikaaz lata “wikid peepl” deh, ahn som a dehn mait eevn chrai fi get eena di kangrigayshan. (2 Tim. 3:13) Pahn tap a dat, sohn peepl weh seh dat dehn da paat a di kangrigayshan di giv een tu dehn doti dizaiyaz ahn dehn sekshwali abyooz chiljren. w19.05 8 ¶1-3

Wahn persn weh dipres mait feel laik ih noh kwalifai fi taak tu Jehoava eena pryaa. Wan way wi ku komfert dehn da if wi pray wid dehn, ahn yooz dehn naym wen wi di pray. Eena di pryaa wi ku tel Jehoava humoch wee ahn di kangrigayshan lov di persn. Wi mait aks Jehoava fi mek di persn weh di sofa feel sayf ahn geh di komfert weh ih need. Pryaaz laik dehnya ku reeli komfert dehn. Tink bifoa yu taak. Wen yu haysti fi taak, yu ku en op di hert di persn. Bot kain werdz ku heel. (Prov. 12:18) Soh pray tu Jehoava fi help yu fain kain ahn komfertin werdz fi yooz. Memba dat di bes way fi komfert sombadi da if wi yooz Gaad Werd, di Baibl. (Heeb. 4:12) Wen wi komfert adaz, wi rimain dehn dat Jehoava lov dehn. Ahn wi mos neva faget dat Jehoava da aalso wahn Gaad a Jostis. Eevn if nobadi els noh si, Jehoava noa bowt evri kaina wikidnis. Hihn si evriting, ahn hihn wahn mek shoar dat evribadi weh abyooz wahn chail ahn noh ripent geh ponish.​—Num. 14:18. w19.05 18 ¶18; 19 ¶19, 21

Saytan waahn mek wi ton gens Jehoava; hihn waahn wi stap lov ahn. Soh dat da wai hihn chrai chaynj er kanchroal di way wi tink an insted, mek wi tink di way hihn tink. Hihn chrai fi fool wi wid tingz weh kaal wi atenshan soh dat wi fala hihn. (Kol. 2:4) Yu tink wi deh eena seeryos daynja a geh fool op bai Saytan? Yes, af koars! Memba dat weh Paal mi rait da Koloashanz 2:8 da-mi fi Jehoava peepl. Hihn mi rait it espeshali fi anointid Kristyanz, noh fi peepl weh noh noa Gaad. (Kol. 1:2, 5) Bak den di Kristyanz mi deh eena big daynja, ahn tudeh wee eena eevn grayta daynja. (1 Kor. 10:12) Bot wai wi seh dat? Wel, bikaaz Saytan geh pich dong pahn di ert, ahn hihn di chrai haad fi chrik Gaad laayal servants. (Rev. 12:9, 12, 17) Pahn tap a dat, wi di liv eena wahn taim weh “wikid peepl ahn hipokrits wahn goh fahn bad tu wos.”​—2 Tim. 3:1, 13. w19.06 2 ¶1-2

Ilaija mi geh frayd wen Kween Jezibel chretn fi kil ahn. Soh ih ron gaahn da Bayr-sheeba. Hihn mi soh diskorij dat “ih aks fi mek ih ded.” Weh mi mek ih mi feel soh? Ilaija da neva wahn perfek man, hihn “da-mi wahn man jos laik mee ahn yoo.” (Jay. 5:17) Maybi hihn mi feel laik ih kudn handl di schres an ih mi reeli taiyad. Ilaija praabli mi tink dat aala ih haad werk fi help peepl fi wership Jehoava mi yoosles, dat notn eena Izrel mi geh beta, ahn dat hihn da-mi di onli wan weh stil di serv Jehoava. (1 Ki. 18:3, 4, 13; 19:10, 14) Jehoava mi andastan how Ilaija mi feel, soh ih neva skoal Ilaija fi seh how ih mi feel. Insted, Ih mi help Ilaija fi geh bak ih schrent. (1 Ki. 19:5-7) Laytaraan, eena wahn kain way, Jehoava mi karek di way Ilaija mi-di tink wen ih shoa Ilaija fi hihn amayzin powa. Den Jehoava tel Ilaija dat ih stil ga 7,000 peepl eena Izrel weh rifyooz fi wership Bayal. (1 Ki. 19:11-18) Jehoava gi Ilaija dehnya egzampl fi shoa ahn dat ih stil lov ahn. w19.06 15-16 ¶5-6

Aalwayz fala inschrokshanz. If wi mek it wahn habit fi aalwayz fala di dairekshan weh wi geh fahn rispansabl bradaz, wi wahn avoid prablemz. (1 Peet. 5:5) Fi egzampl, eena wahn konchri wehpaat di werk deh anda ban, di rispansabl bradaz mi tel di poblishaz noh fi lef poblikayshanz wid peepl eena di minischri. Bot, wahn painyaa brada mi feel dat hihn noa beta, an ih stil lef poblikayshanz wid di howshoalda dehn. Wat da-mi di rizolt? Wahn lee wail afta dehn mi du sohn infaamal witnisin, di polees stap dehn ahn kweschan dehn. Ih luk laik di polees dehn mi-di fala di bradaz ahn dehn mi aybl fi geh di poblikayshan dehn weh di brada mi-di giv owt. Weh dis ekspeeryens teech wi? Wi need fi fala dairekshan eevn if wi noh gree wid it. Jehoava aalwayz bles wi wen wi fala di bradaz hoo hihn apoint fi tek di leed monks wi.​—Heeb. 13:7, 17. w19.07 12 ¶17

Wi Laad Jeezas mi noa dat di werl mi wahn hayt evribadi weh chooz fi bee fi hihn disaipl. Soh pahn di nait bifoa ih ded, hihn mi waan dehn bowt it. (Jan 17:14) Fahn da taim til now, peepl weh deh gens chroo wership di persikyoot faytful Kristyan Witnisiz a Jehoava. Az di en a dis sistem a tingz di geh kloasa, wi ekspek wi enimi dehn fi deh gens wi eevn moa. (Mach. 24:9) How wi ku pripyaa wiself fahn now fi fays persikyooshan wen ih kohn? Wi noh need fi picha aala di bad tingz weh ku hapm tu wi. If wi du dat, ih ku kaaz wi fi geh soh frayd dat wi stap serv Jehoava eevn bifoa wi ekspeeryens eni prablem. (Prov. 12:25; 17:22) Fyaa da wahn powaful wepan weh wi ‘enimi, di Devl,ʼ chrai fi yooz gens wi. (1 Peet. 5:8, 9) Wi need fi schrentn wi rilayshanship wid Jehoava now moa dan eva. w19.07 2 ¶1-3

Di apasl dehn mosi mi veri eksaitid wen dehn mi get tugeda pahn di mongtinsaid. Afta Jeezas mi geh rezorek, hihn mi aks dehn fi meet hihn da da plays. (Mach. 28:16) Dat da-mi praabli di taim wen “ih apyaa tu moa dan 500 a wi bradaz ahn sistaz dehn sayhn taim.” (1 Kor. 15:6) Wai Jeezas mi aks ih disaipl dehn fi meet ahn deh? Fi gi dehn wahn eksaitin koman: “Goh ahn chrayn peepl fahn owta aala di nayshan dehn fi bee mi disaipl dehn.” (Mach. 28:18-20) Di disaipl dehn weh mi hyaa Jeezas werdz, mi layta geh fi bee paat a di fos-senchri Kristyan kangrigayshan. Di mayn goal a da kangrigayshan da-mi fi mek moa disaiplz a Krais. Tudeh, lata kangrigayshanz a chroo Kristyanz deh, ahn dehndeh kangrigayshanz ga di saym mayn goal az di erli Kristyanz. w19.07 14 ¶1-2

Wahn chravlin oavaseeya da Norway seh dat peepl weh noh waahn taak bowt Gaad yoozhwali laik taak bowt weh di hapm rong di werl. Afta ih meet sombadi an inchrojoos ihself, hihn wuda seh: “Weh yu tink bowt wi fyoocha? Hoo yu tink ku gi wi hoap? Palitishanz, saiyentis, er sombadi els?” Afta ih lisn kyaafuli, hihn wuda reed er koat wahn skripcha weh taak bowt wahn beta fyoocha. Som peepl inchrestid eena di Baibl pramis dat di ert wahn laas fareva ahn dat gud peepl wahn liv pan it fareva. (Ps. 37:29) Ih gud fi chrai difrent wayz fi staat kanvasayshan wid di peepl wi meet. Wai? Bikaaz weh mek wan persn lisn noh mait mek sombadi els waahn lisn. Som peepl noh main taak bowt Gaad er di Baibl, bot adaz prifaa fi taak bowt ada tingz fos. Eena eeda sichuwayshan, wi shuda tek di apachooniti fi taak tu peepl. (Roam. 1:14-16) Jehoava da di wan weh mek di chroot groa eena di haat a di peepl weh lov weh rait.​—1 Kor. 3:6, 7. w19.07 22-23 ¶10-11

Di grayt lov weh Gaad ga fi wi mek wi waahn lov wi bradaz. (1 Jan 4: 20, 21) Wi mait tink dat ih eezi fi lov wi bradaz ahn sistaz. Dis da bikaaz wi wership Jehoava ahn wi chrai fi kapi fi hihn kwalitiz. Wee fala Jeezas egzampl a how fi shoa lov; hihn mi eevn giv op ih laif fi aala wi. Bot, sohntaim ih haad fi obay di komanment fi lov wan anada. Yoadya ahn Sintiki da-mi sohn haad-werkin sistaz weh mi werk “tugeda” wid di apasl Paal. Bot ih luk laik dehn kudn gree pahn sohnting ahn dehn mi stap bee frenz. Eena di leta weh Paal mi sen tu di kangrigayshan wehpaat dehn too sistaz mi-di serv, Paal mi gi dehn klyaa kongsl fi “stap kwaaril ahn chrai fi gree wid wan anada.” (Fil. 4:2, 3) Paal mi aalso tink dat ih mi nesiseri fi tel di hoal kangrigayshan fi “du evriting widowt di komplayn ahn aagyu.”​—Fil. 2:14. w19.08 9 ¶6-7

Ih nais fi si dat wahn lata kangrigayshan ahn difrent bradaz ahn sistaz di help dehn bradaz eena ful-taim servis fi stay eena dehn asainment. Dehn du dis eena lata difrent wayz. Fi egzampl, dehn inkorij dehn, dehn gi dehn mateeryal tingz weh dehn mait need, ahn dehn help dehn tek kyaa a dehn famili membaz bak hoam. If som bradaz ahn sistaz eena ful-taim servis geh wahn nyoo asainment fi serv da fi yoo kangrigayshan, noh tink dat da bikaaz dehn mi du sohnting rang. Insted, help dehn fi ajos eeziya. Gi dehn wahn waam welkom ahn komen dehn fi di werk weh dehn mi du, eevn if dehn kyaahn du az moch bikaaz a helt prablemz. Geh fi noa dehn. Laan fahn di lata nalij, chraynin, an ekspeeryens weh dehn ga. At fers, di bradaz ahn sistaz weh geh wahn nyoo asainment mait need yu help fi fain wahn plays fi liv, wahn way fi get rong, wahn jab, an ada tingz weh dehn need. w19.08 23-24 ¶12-13

Gag wahn chros eena “man powa,” weh da ih militeri. (2 Chron. 32:8) Wee wahn du sohnting weh wahn luk foolish tu di nayshanz; wee wahn chros eena Jehoava wi Gaad. Wai wi seh dat dis wahn luk foolish? Da bikaaz Babilan di Grayt mi powaful, bot fi shee gaadz neva sayv shee fahn “di bees” an ih “ten haan”! (Rev. 17:16) Soh Gag wahn tink dat ih wahn ku dischrai wi eezi-wan. “Laik klowd weh di kova di lan,” Gag wahn atak Jehoava peepl. Bot den Gag wahn riyalaiz dat da wahn chrap; ih noh ga no way fi ron. Laik Fayro da di Red See, Gag wahn laan dat hihn di fait gens Jehoava. (Ex. 14:1-4; Ezek. 38:3, 4, 18, 21-23) Jeezas an ih hevnli aami wahn protek Gaad peepl ahn kompleetli dischrai Gag an ih aamiz. (Rev. 19:11, 14, 15) Bot weh wahn hapm tu Jehoava bigis enimi, Saytan, hoo lai tu di nayshan dehn ahn mek dehn atak Gaad peepl da di waar a Armagedon? Jeezas wahn chroa Saytan an ih deemon dehn eena wahn deep deep hoal, wehpaat dehn wahn lak op fi wahn towzn yaaz.​—Rev. 20:1-3. w19.09 11-12 ¶14-15

Ih nachral fi mek wi hoap fi di gud tingz weh Jehoava pramis. Bot wen tingz weh wi ekspek fi hapm noh hapm wen wi ekspek, wi ku looz wi zeel. Wi ku eevn geh diskorij. (Prov. 13:12) Dis mi hapm tu som a wi bradaz rong di yaa 1914. Rong da taim, lata anointid bradaz mi ekspek fi goh da hevn. Bot, wen dat neva hapm, how di faytful bradaz mi deel wid dehn disapointment? Dehn neva giv op, bikaaz fi dehn mayn goal da-mi fi du di wil a Gaad, noh fi goh da hevn. Dehn mi mek op dehn main fi ron di rays ahn noh giv op. Fi shoar yoo di luk faawod tu di taim wen Jehoava wahn klayr ih naym ahn proov dat fi hihn roolaship rait, ahn wen hihn wahn fulfil aala ih pramis dehn. Yu ku bee shoar dat Jehoava wahn mek dehnya tingz hapm rait pahn taim. Til da taim kohn, mek wi kip bizi di serv wi Gaad, ahn noh alow tingz weh noh hapm wen wi ekspek fi sloa wi dong er diskorij wi. w19.08 4-5 ¶9-10

Aks yuself: ‘Peepl noa mee az wahn kaam ahn hombl persn? Ai wilin fi du werk weh moas peepl wuda luk dong pan soh dat Ai ku serv adaz? Ai kain tu adaz?ʼ Jeezas mi peesful fi werk wid, ahn hihn mi injai di chrayn adaz. (Look 10:1, 19-21) Jeezas atichood mi mek it eezi fi mek ih disaipl dehn aks ahn kweschanz. Ahn hihn mi aalso waahn noa weh dehn mi-di tink. (Mach. 16:13-16) Jeezas disaipl dehn mi groa, jos laik plaants weh geh protekshan fahn bad weda. Dehn mi pay atenshan tu di lesn dehn weh Jeezas mi teech ahn dehn mi projoos gud froot. Yoo ga sohn atariti oava adaz? If soh, aks yuself: ‘How Ai chreet adaz wen Ai deh hoam er da werk? Ai promoat pees? Mai atichood mek it eezi fi mek adaz aks mee kweschanz? An, Ai lisn tu weh dehn ga fi seh?ʼ Wi shuda neva bee laik di Farisee dehn. Dehn mi geh beks wen peepl neva kanvins bai weh dehn mi-di teech, ahn dehn mi reeli kruwil tu peepl hoo neva ga di saym aidyaaz laik dehn.​—Maak 3:1-6; Jan 9:29-34. w19.09 20 ¶1; 23 ¶9-11

Sohntaim werl leedaz yooz simila werdz wen dehn di taak bowt how fi mantayn wahn gud rilayshanship bitween nayshanz. Bot di anonksment weh di Baibl taak bowt dat ‘evriting fain ahn peesfulʼ wahn bee difrent. Wai? Wen dis hapm, peepl mait tink seh dat di werl leedaz dehn fainali mek di werl wahn sayfa plays. Bot akchwali, dis wahn bee di staat a di grayt chribyulayshan. Ahn “jos den wen dehn noh di ekspek it, bad bad chrobl wahn kohn pahn dehn.” (Mach. 24:21) Wi stil noh noa weh wahn kaaz di werl leedaz fi mek da anonksment er how dehn wahn mek it. Ahn wi stil noh noa weda er nat ih wahn bee sevral anonksment er jos wan big wan. Bot wateva hapm, dis da weh wi noa: Hyooman roolaz kyaahn bring pees, soh fi dehn anonksment noh fi fool wi. Raada, da di sain dat “di day a Jehoava” bowt fi staat!​—1 Tes. 5:2. w19.10 8-9 ¶3-4

Di waar a Armagedon wahn bee di en a dis sistem a tingz. Bot wi noh ga notn fi wori bowt, bikaaz dis wahn bee Gaad waar. (Prov. 1:33; Ezek. 38:18-20; Zech. 14:3) Wen Jehoava gi di koman, Jeezas Krais wahn leed Gaad aami intu waar. Hihn wahn ga di 144,000 ahn milyanz ahn milyanz a aynjelz wid ahn. Tugeda, dehn wahn fait gens Saytan, ih deemonz, an aala ih aami dehn weh deh pahn di ert. (Rev. 6:2; 17:14) Jehoava pramis wi: “No wepan weh dehn bring gens yu wahn ga eni kaina sokses.” (Isa. 54:17) “Wahn big big krowd” a Jehoava faytful servants wahn “kohn fahn owta . . . di grayt chribyulayshan” alaiv! Den dehn wahn kantinyu fi serv hihn. (Rev. 7:9, 13-17) Di Baibl reeli gi wi hoap fi di fyoocha! Wee noa dat “Jehoava protek dehn wan weh faytful.” (Ps. 31:23) Aal hoo lov ahn wership Jehoava wahn hapi fi si wen hihn klayr ih naym a aal lai.​—Ezek. 38:23. w19.10 18-19 ¶17-18

Az wi di geh kloasa ahn kloasa tu di en a “di laas dayz,” wi mait fays wahn lata tof sichuwayshanz. (2 Tim. 3:1) Fi egzampl, afta wahn ilekshan eena West Africa, dehn mi ga wahn lata vailens. Fi moa dan siks monts wi bradaz ahn sistaz kudn moov bowt laik how dehn mi waahn bikaaz a di vailens eena dehn ayrya. Weh mi help dehn fi koap joorin dehndeh haad taimz? Som a di bradaz ahn sistaz mi aybl fi stay da ada bradaz hows weh mi-di liv eena wahn ayrya weh mi moa sayf. Wan brada mi seh: “Eena wahn sichuwayshan laik dat, Ai mi hapi, kaaz Ai mi deh wid frenz. Wee mi aybl fi inkorij eech ada.” Wen “di grayt chribyulayshan” staat, wi wahn hapi fi ga gud frenz weh lov wi. (Rev. 7:14) Soh ih impoatant dat wi bil schrang frenship now. (1 Peet. 4:7, 8) Wai? Bikaaz wi enimiz wahn chrai fi yooz laiz fi divaid wi. Dehn wahn chrai fi ton wi gens eech ada. Bot dehn wahn fayl. Dehn kuda neva kaaz wi fi stap lov wi bradaz ahn sistaz. w19.11 2 ¶1-2; 7 ¶19

Saytan, “di pa a aala di lai dehn,” di yooz peepl weh deh anda fi hihn kanchroal fi spred laiz bowt Jehoava ahn bowt wi bradaz ahn sistaz. (Jan 8:44) Fi egzampl, apastayts tel lai ahn twis di faks bowt Jehoava aaganaizayshan pahn websait, TV, an ada tingz. Dehndeh lai deh monks Saytan ‘aro dehn weh ga faiya da en.ʼ How wee shuda ak if sombadi staat tu tel wi lai laik dehndeh? Wi rijek dehn! Wai? Bikaaz wee ga fayt eena Jehoava ahn wi chros wi bradaz. Az a mata a fak, wi noh kamyoonikayt wid apastayts. Wi noh kwaaril wid dehn bowt eniting er fi eni reezn, eevn if wi jos waahn noa da weh dehn di seh bowt wi Ahn wi noh alow dehn fi mek wi fayt week. Yoo rifyooz fi lisn tu er kwaaril wid apastayts bowt laiz weh dehn spred? Dat veri gud. Bot wi mos kip pahn di lukowt, kaaz Saytan ga ada wepan weh ih chrai fi yooz gens wi. w19.11 15 ¶8; 16 ¶11

Wen wi di mek wahn disizhan, wi need fi aks wiself wai wi di du it. Jehoava waahn mek wi bee aanis eena evriting weh wi du. Soh wen wi mek disizhanz, wi waahn bee aanis wid wiself ahn wid adaz bowt wi reezn. If wi noh reeli aanis, moa dan laikli wi wahn fain it haad fi du weh wi seh wi wahn du. Fi egzampl, wahn yong brada mait disaid fi bee wahn regyula painyaa. Bot afta sohn taim, hihn schrogl fi kompleet di amonk a owaz weh wahn painyaa need fi mek, an ih bayli fain jai eena ih minischri. Maybi hihn mi tink dat di mayn reezn wai hihn mi waahn painyaa da-mi fi pleez Jehoava. Bot yu tink ih kuda mi bee bikaaz hihn mi jos waahn pleez ih payrents er sohnbadi weh ih luk op tu? Tink bowt wahn Baibl styoodent weh disaid dat ih waahn stap smoak. At fers, hihn mait stap smoak fi wan er too weeks eevn doa ih fain it haad, bot den ih giv op ahn staat tu smoak agen. Afta wahn wail, doh, ih ga sokses! Hihn aybl fi stap smoak bikaaz a ih lov fi Jehoava an ih dizaiya fi pleez Ahn.​—Kol. 1:10; 3:23. w19.11 27 ¶9; 29 ¶10

Di apasl Paal mi shoar dat hihn mi wahn finish di rays ahn reech ih goal. Az wahn anointid Kristyan, hihn mi luk faawod fi di praiz weh “da di laif weh wahn neva en.” Bot, fi reech da goal, hihn mi riyalaiz dat hihn mi haftu kip “di push fi reech di finishin lain.” (Fil. 3:14) Paal mi yooz wahn inchrestin iloschrayshan fi help di Kristyanz da Filipai fi kip foakos pahn dehn goal. Paal mi rimain di Kristyanz da Filipai dat dehn mi wahn bee wahn sitizn a hevn. (Fil. 3:20) Wai dehn mi need fi memba dat? Wel, eena dehn dayz, peepl mi reeli waahn bee wahn Roaman sitizn bikaaz dehn wuda mi geh lata benifits. Bot, anointid Kristyanz da-mi sitizn a wahn faar beta govament, wahn govament weh wuda gi dehn way moa benifits. Now, wen yu kompyaa dehnya too sitiznship, fi bee wahn Roaman sitizn wudn ga az moch valyu az fi bee wahn sitizn a hevn! Anointid Kristyanz tudeh set wahn gud egzampl az dehn kip di push fi reech dehn goal fi liv fareva da hevn. w19.08 6 ¶14-15

Da freedom mi way beta dan di freedom weh wahn Izrelait kuda mi geh joorin di Joobilee yaa! (Lev. 25:8-12) Fi egzampl, wahn man weh mi geh ih freedom joorin di Joobilee yaa mait en op az wahn slayv agen, an eena di langa ron, ih mi wahn ded tu. Bot di freedom weh Jeezas provaid wahn laas fareva. Pahn Pentikaas 33 C.E., Jehoava mi anoint di apasl dehn an ada faytful man an uman wid hoali spirit. Hihn mi adap dehn az fi hihn pikni soh dat eena di fyoocha hihn ku rezorek dehn da hevn fi rool wid Jeezas. (Roam. 8:2, 15-17) Dehnya anointid Kristyanz da-mi di fers fi benifit fahn di freedom weh Jeezas mi anonks eena di sinagag da Nazaret. (Look 4:16-19, 21) Dehnya man an uman da-mi no langa slayv tu di faals teechinz a di Jooish rilijos leedaz er tu dehn chradishanz weh neva bays pahn di Baibl. Gaad mi aalso kansida dehn fi bee free fahn sin weh leed tu det. Dis simbolik Joobilee, er freedom, weh mi staat wen Krais falowaz mi geh anointid eena 33 C.E., wahn en wen Krais Towzn-Yaa Rool finish. w19.12 11 ¶11-12

Payrents, help yu chiljren fi chooz gud frenz. Wahn ma ahn pa need fi noa hoo dehn chiljren di spen taim wid ahn weh dehn di du. Dehn aalso need fi noa hoo dehn chiljren di kamyoonikayt wid chroo soashal meedya ahn pahn dehn foan. Dehn frenz ku afek how dehn tink ahn how dehn bihayv. Wahn lata payrents mek di efoat fi araynj fi mek dehn chiljren spen taim wid peepl weh di set wahn gud egzampl eena dehn servis tu Gaad. Fi egzampl, NʼDéni ahn Bomine, wahn kopl da Côte dʼIvoire, mi aalwayz invait di serkit oavaseeya fi stay da dehn hows. NʼDéni seh: “Dis mi afek wi son eena wahn gud way. Hihn mi staat tu painyaa, ahn now hihn di serv az wahn serkit oavaseeya.” Di erliya payrents staat tu teech dehn chiljren, di beta. (Prov. 22:6) Kansida di egzampl a Timoti. Timoti ma, Yoonis, an ih grani, Lois, mi staat tu teech hihn fahn “smaal.”​—2 Tim. 1:5; 3:15. w19.12 25 ¶14; 26 ¶16-17

Bee wahn fren weh adaz ku chros. Fi egzampl, wi noh jos waahn pramis dat wi wahn help wi bradaz weh need help bot wi aalso waahn du tingz fi help dehn owt. (Mach. 5:37; Look 16:10) Ih komfert peepl weh need help wen dehn noa dat dehn ku pen pahn wi. Wahn sista eksplayn wai dis da chroo, shee seh: “Ih komfert yu bikaaz yu noh haftu wori weda er nat di persn weh aafa fi help wahn dehdeh pahn taim fi du egzakli weh ih pramis fi du.” Wen wi di fays wahn chraiyal er disapointment, ih naamali komfertin if wi ku taak tu wahn fren weh wi ku chros. Bot fi mek wi ku bee wahn fren weh adaz ku chros, wi haftu ga payshens. Afta Zanna hozban mi lef ahn, shee mi fain komfert wen ih mi tel ih kloas frenz how ih mi-di feel. Shee seh: “Eevn doa Ah mosi mi seh di saym tingz oava an oava, dehn mi ga payshens az dehn mi lisn tu mi.” Yoo ku aalso shoa dat yoo da wahn gud fren if yu wilin fi lisn gud. w20.01 10-11 ¶9-11

Aal chroo di Baibl, wi ga wahn lata egzampl a faytful man weh Gaad mi gi ih hoali spirit tu. Stil, dehn neva geh di hoap fi liv da hevn. Fi egzampl, hoali spirit mi gaid Dayvid. (1 Sam. 16:13) An ih mi help ahn fi andastan di deep tingz bowt Jehoava. Hoali spirit mi aalso dairek hihn fi rait paat a di Baibl. (Maak 12:36) Bot eevn wid aala dat, di apasl Peeta mi seh dat Dayvid neva “gaan op da hevn.” (Aks 2:34) Jan di Baptis mi “ful op a di Hoali Spirit.” (Look 1:13-16) Jeezas mi seh dat dehn noh ga nobadi weh mi grayta dan Jan, bot den ih mi seh dat Jan neva mi wahn bee paat a di Kingdom a hevn. (Mach. 11:10, 11) Jehoava mi yooz ih hoali spirit fi gi dehnya faytful man di powa fi du sohn amayzin tingz, bot ih neva yooz da spirit fi chooz dehn fi liv da hevn. Yu tink dis meenz dat dehn neva az faytful? No. Ih jos meenz dat Jehoava wahn bring dehn bak tu laif eena Paradais pahn ert.​—Jan 5:28, 29; Aks 24:15. w20.01 25 ¶15

Jehoava invait wi fi bee paat a ih famili weh wership ahn. Di membaz a dis famili da peepl weh don dedikayt dehn laif tu Hihn ahn weh put fayt eena di ransom sakrifais a ih Son. Wee da wahn hapi famili. Wi injai di bes laif now ahn wi rijais bikaaz wi ga di hoap fi liv fareva​—weda da hevn er eena Paradais pahn ert. Bikaaz Jehoava lov wi wahn lat, hihn mek it pasabl soh dat wi ku bee paat a fi hihn famili. Bot fi du dat, Jehoava mi haftu mek wahn big sakrifais. (Jan 3:16) Gaad mi “pay wahn hai prais” fi wi. (1 Kor. 6:20) Jehoava mi mek it pasabl fi ga wahn kloas rilayshanship wid ahn chroo di ransom sakrifais a ih Son, Jeezas. Wee ga di aana fi kaal di graytis Persn eena di yoonivers fi wee Faada. Ahn Jehoava da di bes Faada. Wi mait agree wid weh di Baibl raita mi aks: “Wid wat Ah wahn pay Jehoava bak fi aala di gud tingz weh ih du fi mi?” (Ps. 116:12) Di ansa da dat wi kuda neva pay bak wi hevnli Faada. Bot di lov weh hihn shoa wee mek wi lov ahn bak. w20.02 8 ¶1-3