Aagas

Eevn wen dehn mi-di persikyoot Jeezas, hihn mi noa dat ih mi-di mek ih Pa hapi ahn dis mi gi Jeezas reel pees a main. Hihn mi stay obeedyant eevn wen ih mi haad fi du. Bikaaz a lov fi Jehoava, Jeezas mek ih servis tu Gaad di moas impoatant ting eena ih laif. Lang bifoa ih mi kohn pahn di ert, hihn da-mi Gaad “maasta werka.” (Prov. 8:30) Ahn wail ih mi deh pahn di ert, hihn mi eega fi teech peepl bowt ih Pa. (Mach. 6:9; Jan 5:17) Jeezas mi geh wahn lata jai di du dis werk. (Jan 4:34-36) Wi ku kapi Jeezas egzampl wen wi “kip aan di du di Laad werk wid evriting weh [wi] gat.” (1 Kor. 15:58) Wen wi “spen aala [wi] taim” eena di preechin werk, wi ku ga wahn moa pazitiv atichood bowt wi prablemz. (Aks 18:5) Fi egzampl, di peepl weh wi meet eena servis naamali ga lat moa prablemz dan wee. Bot, wen dehn staat tu yooz weh dehn di laan fahn di Baibl eena dehn laif, dehn ga les prablemz ahn dehn hapiya. Wen wee si humoch Jehoava kay bowt wi, dat help wi fi ga wahn eevn kloasa rilayshanship wid ahn. w19.04 10-11 ¶8-9

Dehn mi du evriting dehn kud fi stay weh fahn di wikid spirit dehn. Dehn majik buk mi kaas wahn lata moni. Bot insteda gi dehn weh er sel dehn tu sombadi els, dehn mi bon dehn op. Dehn neva kay humoch dehn buk mi kaas, fi dehn foakos da-mi fi pleez Jehoava. How wee ku kapi di egzampl a di Kristyanz fahn bak den? Da wahn waiz ting fi geh rid a eniting weh ga fi du spiritizm. Dis inklood eniting weh peepl wayr er put eena dehn hows fi protek dehnself fahn di wikid spirit dehn. (1 Kor. 10:21) Mek shoar di entataynment weh yu chooz prapa. Aks yuself: ‘Eni a mai entataynment ga fi du wid spiritizm? Mek shoar fi mek wahn disizhan weh wahn help yu fi stay weh fahn eniting weh Jehoava hayt. Wi waahn du wi bes fi “kip wahn klyaa kanshans wid Gaad.”​—Aks 24:16. w19.04 22-23 ¶10-12

Di eldaz ga wahn lata tingz weh dehn need fi kansida reeli gud wen dehn geh wahn ripoat bowt wahn seeryos sin. Di moas impoatant goal weh di eldaz ga da fi aana Jehoava ahn fi protek ih repyutayshan. (Lev. 22:31, 32; Mach. 6:9) Wahn nada impoatant goal weh di eldaz ga da fi mek shoar dat di bradaz ahn sistaz eena di kangrigayshan stay kloas tu Jehoava, ahn fi komfert ahn sopoat dehn wan weh da wahn viktim a seeryos sin. Di eldaz aalso chrai fi fain owt if di persn hoo komit di seeryos sin ripentant, ahn if ih ripentant, dehn help ahn fi bil bak ih rilayshanship wid Jehoava. (Jay. 5:14, 15) Wahn Kristyan hoo komit wahn seeryos sin fi satisfai ih rang dizaiya da sombadi weh spirichwali sik. Dis meenz dat ih noh ga wahn helti rilayshanship wid Jehoava agen. Eena wahn sens, di eldaz da spirichwal daktaz. Dehn chrai fi help di persn weh spirichwali sik fi geh beta. Di kongsl weh di eldaz giv fahn di Baibl help dehn bil bak dehn rilayshanship wid Jehoava, bot dis onli ku hapm if dehn reeli ripentant.​—Aks 3:19; 2 Kor. 2:5-10. w19.05 10 ¶10-11

Jehoava ku gi wi di dizaiya fi du sohnting. Maybi wi fain owt dat sombadi eeda eensaid er owtsaid a di kangrigayshan need sohn help. Dis mait mek wi aks wiself, ‘Weh Ai ku du fi help?ʼ Er maybi wi mi geh wahn chalenjin asainment fi du ahn wi noh tink wi ku du it gud inof. Er afta wi mi reed sohn vers eena di Baibl, wi mait aks wiself, ‘How Ai ku yooz weh Ah jos reed fi help adaz?ʼ Wen Jehoava si dat wi di tink bowt weh wi ku du, hihn ku gi wi di dizaiya fi du weh wi mi waahn du. Jehoava ku aalso gi wi di powa fi du sohnting. (Isa. 40:29) How hihn ku du dat? Hihn ku gi wi fi hihn hoali spirit fi du beta wid di skilz weh wi don ga. (Ex. 35:30-35) Jehoava ku yooz ih aaganaizayshan fi teech wi how fi du sertn tingz. If yu geh wahn asainment weh yu noh shoar how fi du, noh frayd fi aks fi help. Aalso, feel free fi aks yu jenaros Faada, Jehoava, fi ih “grayt powa” fi help yu du da asainment.​—2 Kor. 4:7; Look 11:13. w19.10 21 ¶3-4

Di werl inkorij peepl fi jos tink bowt dehnself. Wan refrens buk seh dat joorin di 1970ʼs, dehn mi ga wahn lata buks weh mi giv advais bowt how fi ga sokses eena laif. Som a dehn buks foas di reeda fi noa an aksep dehnself ahn fi bee hapi bowt hoo dehn, kaaz notn rang wid dat. Noatis weh wan a dehndeh buk seh: “Bee in lov wid di moas byootiful, di moas eksaitin persn eva​—yuself.” Di buk seh dat yu noh fi mek nobadi tel yu weh fi du er how fi bihayv, ih beta fi foakos pahn yuself. Yu eva hyaa dat bifoa? Saytan mi inkorij Eev fi du sohnting simila. Hihn mi seh dat shee ku “bee laik Gaad, ahn [ih] wahn noa weh gud ahn bad.” (Gen. 3:5) Tudeh, lata peepl tink soh moch a dehnself dat dehn bileev dat nobadi, nat eevn Gaad ku tel dehn weh rait fahn weh rang. Fi egzampl, wi ku si da atichood eena peepl jos bai di way dehn vyoo marij. w19.05 23 ¶10-11

Sohntaim, King Dayvid mi feel laik ih schres da-mi tu moch fi ahn. Tink bowt di chalenjiz hihn mi haftu fays. Hihn mi feel reeli gilti bikaaz a aala di mistayk dehn weh hihn mi mek. (Ps. 40:12) Absalom, ih son weh ih lov soh moch mi gaahn gens ahn, an dis mi leed tu Absalom det. (2 Sam. 15:13, 14; 18:33) Den wan a Dayvid kloasis fren mi bichray ahn. (2 Sam. 16:23–17:2; Ps. 55:12-14) Wahn lata di saam dehn weh Dayvid rait diskraib how diskorij ih mi di feel, an aalso how schrang ih chros eena Jehoava. (Ps. 38:5-10; 94:17-19) Laytaraan, wan a di man dehn weh mi rait di Psalms staat tu red-aiy di way how di wikid peepl dehn liv. Maybi hihn da-mi wahn faar relitiv a di Leevait Aysaf, an ih yoostu serv da di templ eena Jeroosalem. Dis saamis mi sofa soh moch schres dat ih neva hapi ataal. Hihn mi eevn staat tu tink dat di riwaad dehn weh kohn fahn serv Jehoava neva inof.​—Ps. 73:2-5, 7, 12-14, 16, 17, 21. w19.06 17 ¶12-13

Saytan foakos pahn peepl nachral dizaiyaz. Ih nachral fi mek wi waahn laan sertn skilz soh dat wi ku provaid weh wee ahn wi famili need fi liv. (1 Tim. 5:8) Yoozhwali, wi geh dehndeh skilz wen wi goh da skool ahn stodi haad. Bot wi need fi bee kyaaful. Eena lata konchri, styoodents laan lata praktikal skilz da skool bot dehn aalso laan di soa-kaal wizdom a di werl. Di skool dehn nowadayz inkorij styoodents fi dowt dat Gaad egzis ahn fi disrispek di Baibl. Dehn teech dat hyoomanz egzis sayka evolooshan. Dehn klaym dat smaat peepl tink da way. (Roam 1:21-23) Dehndeh teechinz noh ga notn fi du wid “di wizdom a Gaad.” (1 Kor. 1:19-21, NW; 3:18-20) Wi shuda mek op wi main fi neva mek “dehn aagyument” fool wi “dehn mait song waiz, bot dehn da faals teechin.” (Kol. 2:8) Dehn kohn fahn Saytan werl. (1 Kor. 3:18) Neva mek Saytan stap yu fahn reeli get fi noa hoo da Jehoava. Fala Jehoava hai moaral standadz. Ahn noh mek Saytan fool yu soh dat yu noh fala Jehoava waanin dehn. w19.06 5 ¶13; 7 ¶17

Wateva sobjek yu chooz fi diskos, tink bowt di peepl weh yu wahn taak tu. Imajin how dehn wahn benifit if dehn laan weh di Baibl reeli teech. Wen yu di taak tu dehn, ih veri impoatant dat yu lisn tu dehn ahn rispek dehn opinyan. If yu du dat, yu wahn andastan dehn beta, ahn dehn mait waahn lisn tu yu. Bifoa wahn persn disaid fi staat tu stodi di Baibl, yu need fi spen moa taim an enerji di mek ritern vizits. Wai? Bikaaz peepl mait noh deh hoam, er dehn mait noh bee aybl fi taak tu wi di neks taim wi vizit dehn. Aalso, yu mait need fi goh bak sevral taimz bifoa di persn wilin fi aksep wahn Baibl stodi. Memba, wahn plaant groa wen yu waata it regyula. Sayhn way soh, wahn inchrestid persn lov fi Jehoava ahn fi Krais ku groa wen wi diskos Gaad Werd di Baibl wid dehn regyula tu. w19.07 14 ¶1; 15-16 ¶7-8

Weh Jeezas mi meen wen ih mi seh dehndeh werdz? Jeezas neva mi-di seh dat Kristyanz wuda injai it wen peepl hayt dehn. Insted, hihn mi-di waan wi bowt weh mi wahn hapm tu wi. Wee da no paat a dis werl. Wi liv akaadn tu Jeezas teechin ahn wi preech di mesij hihn mi preech. Bikaaz a dis, di werl hayt wi. (Jan 15:18-21) Wee waahn pleez Jehoava. Soh if peepl hayt wi bikaaz wi lov wi Faada, dat da fi dehn prablem. Wi laik it wen peepl rispek wi, bot wi noh fi tink dat wi noh wert notn if peepl noh laik wi. Wi noh noa wen peepl wahn staat tu persikyoot wi er wen di govament dehn wahn chrai stap wi fahn wership Jehoava. Bot wi doo noa wan ting, dat wi ku pripyaa fahn now if wi schrentn wi rilayshanship wid Jehoava, if wi bil op wi korij, an if wi laan weh wi ku du wen peepl hayt wi. If wi pripyaa now, ih wahn help wi fi kantinyu serv Jehoava now an eena di fyoocha. w19.07 6 ¶17-18; 7 ¶21

Wen wi kandok Baibl stodiz wid peepl weh noh rilijos, wi need fi help dehn fi schrentn dehn fayt dat Gaad egzis. Ahn wi need fi help dehn bil fayt eena di Baibl. Dis mait meenz dat wi ripeet wahn mayn point oava ahn oava. Evri taim wi stodi wid dehn, wi mait need fi diskos proof dat di Baibl da reeli Gaad Werd. Wi ku shoa dehn how Baibl prafesi don kohn chroo, how di Baibl karek wen ih taak bowt saiyens ahn hischri, ahn how di Baibl help wi eena wi evriday laif. Wen wi shoa lov fi peepl weda dehn rilijos er nat, wi help dehn fi bee disaiplz a Krais. (1 Kor. 13:1) Az wi teech dehn, wi goal da fi shoa dat Gaad lov wi ahn dat hihn waahn wi lov hihn tu. Evri yaa, towznz a peepl weh neva ga no inchres eena Gaad er rilijan bifoa, geh baptaiz bikaaz dehn laan fi lov Gaad. Soh bee pazitiv, ahn shoa lov ahn persnal inchres eena peepl. Lisn tu dehn. Chrai fi andastan how dehn feel ahn tink. Teech dehn bai fi yoo egzampl how fi bee disaiplz a Krais. w19.07 24 ¶16-17

Shalom daata dehn mi deh monks di peepl dehn weh Jehoava mi yooz fi bil op bak di waal a Jeroosalem. (Neh. 2:20; 3:12) Eevn doa Shalom da-mi wahn prins, fi hihn daata dehn mi wilin fi du haad ahn daynjaros werk. (Neh. 4:15-18) Eena fi wee day, sistaz wilin ahn hapi fi help du wahn speshal kaina servis tu Gaad, weh da kanschrokshan ahn mantaynans a di bildin dehn weh dedikaytid tu Jehoava. Fi dehn skil, eeganis, ahn laayalti impoatant fi mek dis werk ga sokses. Jehoava mi moov Tabita fi spen ‘ih taim di help peepl ahn di du gud,ʼ espeshali tu di wido dehn. (Aks 9:36) Bikaaz shee mi jenaros ahn kain, wahn lata peepl mi moan wen shee mi ded. Bot dehn mi moa dan hapi wen di apasl Peeta mi rezorek ahn. (Aks 9:39-41) Weh wi laan fahn Tabita? Weda wi yong er oal, man er uman, aala wi ku du praktikal tingz fi help wi bradaz ahn sistaz. w19.10 23 ¶11-12

How wi ku stombl sombadi? Imajin dis sichuwayshan. Wahn Baibl styoodent weh mi ga wahn jrinkin prablem fainali get it anda kanchroal. Ih mek shoar dat ih kip faar fan it ahn noh jrink agen. Hihn mek lata chaynjiz eena ih laif ahn geh baptaiz. Layta, wahn brada invait ahn tu wahn get-tugeda an aafa ahn wahn jrink ahn tel ahn: “If yoo praktis self-kanchroal, yu wahn ku jrink jos lee bit.” Ih wuda bee reeli sad if di nyoo brada wuda lisn tu da rang advais ahn geh huk pahn alkohol agen! Wi Kristyan meetinz help wi fi put intu praktis di koman dehn weh deh eena wi teks fi tudeh. Dehn rimain wi a weh Jehoava si az moa impoatant ahn how fi put intu praktis weh wi laan soh dat wi stay kleen. Dehn aalso inkorij wi fi lov fi wi Gaad ahn wi bradaz. Ahn wen wi lov Gaad ahn wi bradaz wid aala wi haat, wi wahn du wi veri bes fi noh stombl adaz. w19.08 10 ¶9; 11 ¶13-14

Yu ga peepl weh mait luk kanfident ahn seh tingz playn ahn schrayt, bot dat noh meenz dat dehn prowd. (Jan 1:46, 47) Stilyet, weda wi shai er nat, aala wi need fi werk haad fi bee hombl. Kansida di egzampl a di apasl Paal. Jehoava mi yooz hihn wahn lat fi staat nyoo kangrigayshanz eena lata difrent konchri. Hihn maita mi eevn du moa eena di minischri dan eni a di ada apasl dehn. Stilyet, Paal neva tink dat hihn mi moa impoatant dan ih bradaz. Hihn mi seh dat hihn mi ga wahn gud rilayshanship wid Jehoava, noh bikaaz hihn mi speshal er bikaaz hihn mi du wahn lat fi Gaad, bot bikaaz Jehoava mi shoa hihn lov ahn kainis weh ih neva dizerv. (1 Kor. 15:10) Paal da-mi wahn gud egzampl a wahn hombl persn. Wen hihn mi rait ih leta tu di Kristyanz da Korint, hihn neva boas bowt ihself, eevn doa som eena di Kangrigayshan mi-di taak bad bowt ahn!​—2 Kor. 10:10. w19.09 3 ¶5-6

Wan reezn wai wi mait fain it wahn chalenj fi obay Jehoava da bikaaz aala wi inherit sin an imperfekshan. Dat da di reezn wai wi noh aalwayz waahn obay Jehoava. Wen Adam ahn Eev mi disobay Gaad an eet di froot, dehn mi disaid fi dehnself weh gud ahn weh bad. (Gen. 3:22) Tudeh, jos laik Adam ahn Eev, moas peepl di ignoar Gaad ahn dehn di disaid fi dehnself weh rait ahn weh rang. Eevn peepl hoo noa ahn lov Jehoava mait fain it haad fi obay hihn kompleetli. Di apasl Paal mi aalso ekspeeryens dis chalenj. (Roam. 7:21-23) Laik Paal, wi waahn du weh Jehoava seh rait fi du. Bot wi need fi aalwayz fait di dizaiya fi du weh rang. Wahn nada reezn wai ih ku bee wahn chalenj fi obay Jehoava da bikaaz a di kostomz ahn tinkin a di peepl wehpaat wi groa op. Wahn lata peepl wahn tel wi tingz weh goh gens weh Jehoava waahn. Soh wi haftu kip di chrai haad fi noh tink di sayhn way laik dehn peepl. w19.09 15 ¶4-6

Wi need fi andastan dat eech wan a wi onli ga wahn sertn amonk a enerji. Soh wi need fi tink kyaafuli bowt weh wi chooz fi du wid wi taim. Fi egzampl, wi ku ways wahn lata enerji di chrai geh mateeryal tingz. Noatis weh Jeezas mi seh tu wahn rich yong man hoo mi aks ahn: “Da weh Ah ku du fi geh fi liv wid Gaad fareva?” Maybi hihn da-mi wahn gud yong man bikaaz di Gaspl a Maak seh dat Jeezas mi ga “lov eena ih haat far ahn.” Soh Jeezas mi gi di yong man di invitayshan eena wi skripcha teks fi tudeh. Di yong man mi waahn fala Jeezas, bot ih neva waahn giv op weh ih mi oan “kaa hihn mi doti rich.” (Maak 10:17-22) Bikaaz a dat, hihn mi rijek di yoak weh Jeezas mi aafa ahn an ih mi kantinyu fi yooz aala ih enerji fi mek “moni.” (Mach. 6:24) If da mi yoo, weh chois yoo wuda mi mek? Now an agen, ih gud fi mek wi tink bowt weh wi di put fos eena wi laif. Wai? Soh dat wi ku mek shoar dat wi di yooz wi enerji eena di bes way pasabl. w19.09 24 ¶17-18

Wi preechin werk noh wahn don til Jehoava seh ih don. Humoch moa taim lef fi mek peepl kohn fi noa hoo da Jehoava ahn Jeezas Krais? (Jan 17:3) Wi noh noa. Bot wi doo noa dat enibadi weh “ga di rait haat kandishan fi evalastin laif,” ku stil aksep di gud nyooz bifoa di grayt chribyulayshan staat. (Aks 13:48, NW) How wee ku help dehnya peepl bifoa ih tu layt? Chroo ih aaganaizayshan, Jehoava di gi wi aal weh wi need fi teech peepl di chroot. Fi egzampl, wi geh chraynin evri week da di midweek meetin. Dis meetin help wi fi noa weh fi seh wen wi meet sombadi fi di fos taim er wen wi goh pahn wahn ritern vizit. An if yu ga wahn nais kanvasayshan wid sombadi weh shoa inchres ahn yu lef dehn wahn chrak er wahn magazeen, dehn wahn ku reed moa til yu ku goh vizit dehn agen. Da fi wee persnal rispansabiliti fi kip bizi di preech az moch az wi kud evri mont. w19.10 9 ¶7; 10 ¶9-10

Jehoava mi pramis wahn laayal man da Jeroosalem, weh naym Simiyan, dat ih noh mi wahn ded bifoa ih mi si di Mesaiya. Sins Simiyan mi-di wayt fi yaaz fi di Mesaiya kohn, da pramis mosi mi reeli inkorij hihn. Jehoava mi riwaad Simiyan fi ih fayt an indyoarans. Wan day, wen Simiyan mi deh anda di powa a di ‘spirit,ʼ hihn mi gaan eena di templ, ahn da dehsoh ih mi si baybi Jeezas. Jehoava mi yooz Simiyan fi diliva wahn prafesi bowt dis baybi hoo mi wahn groa op fi bee di Krais. (Look 2:25-35) Aldoa Simiyan neva liv fi si Jeezas fulfil ih minischri pahn ert, Simiyan mi tankful fi di privilij weh Jehoava mi gi ahn. An ih wahn ga lat moa gud tingz fi bee tankful fa eena di fyoocha! Eena di nyoo werl, Simiyan wahn geh fi si how evribadi pahn di ert wahn bee bles bikaaz a Jeezas roolaship. (Gen. 22:18) Wee ku aalso bee tankful fi eni privilij weh Jehoava gi wi. w19.10 22 ¶7; 23 ¶12

Weda wi rich er poa, wi need fi protek wi haat. Wi onli ku du dat if wi noh divelop wahn lov fi moni. An aalso, if wi noh alow wi werk fi bee moa impoatant tu wi dan wi servis tu Jehoava. Bot how wi ku noa if dat di hapm tu wi? Wel, wi ku aks wiself dehnya kweschanz: ‘Ai yoozhwali di tink bowt werk wen Ai deh da meetin er eena feel servis? Ai aalwayz di wori if Ah wahn ga inof moni eena di fyoocha? Moni ahn mateeryal tingz di kaaz prablemz eena mai marij? Ai wuda wilin fi du werk weh adaz luk dong pan, if ih alow mi fi spen moa taim di serv Jehoava?ʼ (1 Tim. 6:9-12) Wen wi tink bowt dehndeh kweschanz, wi need fi memba dat Jehoava lov wi. Ahn Hihn mi mek di pramis tu wi: “Ah wahn neva lef unu; Ah wahn neva dizert unu.” Dat da wai di apasl Paal mi rait: “Noh di lov moni.”​—Heeb. 13:5, 6. w19.10 29 ¶10

Wen wi werk lang wid wi bradaz ahn sistaz ahn si dehn gud kwalitiz fi wiself, wi laan fahn dehn ahn geh kloasa tu dehn. Fi egzampl, how yoo feel wen yu deh pahn servis ahn yu hyaa yu fren di eksplayn di reezn fi weh ih bileev er di taak fahn ih haat bowt Jehoava an ih perpos? Moa dan laikli, yu lov ahn eevn moa. Adeline, wahn sista weh 23 yaaz oal, mi aks ih fren weh naym Candice, fi goh wid ahn fi preech eena wahn teritori weh haadli geh werk. Shee seh: “Wi mi waahn du moa eena di minischri, ahn wi mi waahn injai it moa. Di too a wi mi need inkorijment soh dat wi kuda mi kantinyu gi Jehoava wi bes.” How dehn mi benifit wen dehn mi werk tugeda? Adeline seh: “Da di en a eech day, wi mi taak bowt how wi mi feel ahn bowt weh mi inkorij wi bowt di kanvasayshanz weh wi mi ga. Wi yoostu aalso taak bowt how wi si dat da Jehoava di dairek wi eena wi minischri. Di too a wi mi injai dehndeh kanvasayshanz ahn wi mi geh fi noa eech ada beta.” w19.11 5 ¶10-11

Eena Baibl taimz, wahn soalja wuda geh aana if ih ak brayv eena wahn waar. Bot ih wuda mi feel shaym if ih mi kohn fahn waar widowt ih sheel. Tasitos, wahn Roaman man weh stodi hischri, mi rait: “If wahn soalja mi lef ih sheel bihain, dat da-mi di bigis shaym.” Dat da wan reezn wai wahn soalja wuda mek shoar dat ih hoal aan tait tu ih sheel. Wi ku hoal aan tait tu wi fayt, weh da laik wahn sheel, if wi aalwayz goh da wi Kristyan meetin dehn, an if wi taak tu adaz bowt Jehoava an ih Kingdom. (Heeb. 10:23-25) Pahn tap a dat, wi reed di Baibl evri day ahn pray tu Jehoava fi help wi yooz weh ih seh eena wi laif. (2 Tim. 3:16, 17) Den, “no wepan weh dehn bring gens yu wahn ga eni kaina sokses.” (Isa. 54:17) Wi ‘fayt weh da laik wahn sheelʼ wahn protek wi. Wi wahn stan op schrang, ahn werk said bai said wid wi bradaz ahn sistaz. Ahn wi wahn du moa dan win di fait weh wi ga evri day​—wi wahn ga di aana fi bee pahn Jeezas said wen hihn win di waar gens Saytan an ih falowaz.​—Rev. 17:14; 20:10. w19.11 19 ¶18-19

If yu rait dong di tingz weh yu plan fi du, ih wahn eeziya fi mek yu du it. (1 Kor. 14:40) Fi egzampl, di aaganaizayshan dairek di badi a eldaz fi asain wahn elda fi rait dong eech disizhan weh dehn mek, dehn aalso haftu rikaad hoo geh asain fi du it ahn wen da persn fi finish du it. Wen eldaz fala dis dairekshan ih eeziya fi mek dehn du weh dehn seh dehn wahn du. Yu ku chrai du sohnting laik dat wid di tingz dehn weh yu naamali du evriday. Fi egzampl, yu ku rait dong wahn lis a di tingz dehn weh yu need fi du joorin di day ahn put dehn eena di aada weh yu waahn du dehn. Dis noh wahn onli help yu kompleet weh yu staat bot ih wahn aalso help yu du moa tingz eena lee bit a taim. Bot yu wahn need fi werk haad. Ih tek wahn lata werk fi fala wi plan ahn kompleet weh wi staat. (Roam. 12:11) Di apasl Paal mi tel Timoti fi “mek shoar fi reed Gaad Werd” ahn “noh fi stap du dehn tingz” soh dat ih ku bee wahn beta teecha. Wi ku yooz Paal advais fi eniting weh wi waahn du fi Jehoava.​—1 Tim. 4:13, 16. w19.11 29-30 ¶15-16

Wen Jehoava mi aks Moaziz fi leed di Izrelait dehn owta di lan a Eejip, Moaziz neva ga moch kanfidens ahn hihn mi tel Jehoava oava an oava dat hihn neva feel kwalifai fi du weh Jehoava mi-di aks ahn fi du. Gaad ansa mi shoa dat hihn mi ga kompashan fi Moaziz, ahn dat hihn mi andastan how Moaziz mi feel. (Ex. 4:10-16) Sayka dat, Moaziz kuda mi kehr sohn powaful mesij a jojment tu Fayro. Moaziz mi si how Jehoava mi yooz Ih powa wen ih mi sayv di Izrelaits ahn dischrai Fayro ahn fi hihn aami eena di Red See. (Ex. 14:26-31; Ps. 136:15) Afta Moaziz mi leed di Izrelait dehn owta Eejip, dehn mi kip di komplayn bowt evriting. Stil, Moaziz mi si humoch payshens Jehoava mi ga wid di peepl dehn weh Hihn mi free fahn slayvri. (Ps. 78:40-43) Ahn wen Moaziz mi aks Jehoava fi mek ih noh dischrai di Izrelait dehn, Moaziz mi aalso si dat Jehoava hombl tu, kaaz Jehoava mi lisn tu ahn. (Ex. 32:9-14) Afta Moaziz mi help free di Izrelait dehn fahn Eejip, fi hihn rilayshanship wid Jehoava mi geh soh kloas dat da-mi laik if hihn kuda mi si fi hihn hevnli Faada.​—Heeb. 11:27. w19.12 17 ¶7-9

Moas a Jeezas disaiplz da-mi fahn Gyalilee. Soh ih mi mek moa sens fi ga wahn meetin wid dehn pahn wahn mongtin da Gyalilee raada dan fi meet da sombadi hows da Jeroosalem. Aalso, afta Jeezas mi geh rezorek, hihn mi don meet op wid ih 11 apasl dehn eena sombadi hows da Jeroosalem aredi. If Jeezas mi waahn giv di inschrokshan fi goh preech ahn baptaiz peepl onli tu ih apasl dehn, hihn kuda mi du it da Jeroosalem insteda aks di uman dehn an ada disaiplz fi meet ahn da Gyalilee. (Look 24:33, 36) Soh di koman weh Jeezas mi giv da neva onli fi ih 11 faytful apasl. Jeezas mi en aaf ih inschrokshanz di tel dehn dat hihn mi wahn aalwayz deh wid dehn, eevn op tu di en a dis sistem a tingz. (Mach. 28:19, 20) Wahn lata peepl tudeh di chrayn adaz fi bee Jeezas disaiplz. Tink bowt it! Evri yaa, nayli 300,000 peepl kohn fi bee Krais disaiplz, geh baptaiz, ahn kohn fi bee wan a Jehoava Witnisiz. Dat reeli amayzin! w20.01 2 ¶1; 3 ¶5-6

Imajin yu yong ahn yu fain owt yu ga wahn terabl dizeez. Er yu di geh oal ahn yu looz yu jab, ahn yu kyaahn fain wahn neks wan. Er yu kyaahn du az moch az weh yu yoostu du eena yu servis tu Jehoava. If yoo di goh chroo sohnting laik dis, yu mait feel laik yu noh yoosful nohmoh. Prablemz laik dehnya ku tek weh yu jai, dehn ku mek yu feel bad bowt yuself, ahn dehn ku mek yu kyaahn get lang wid adaz. Dis werl shoa how Saytan vyoo laif. Hihn aalwayz chreet hyoomanz laik dehn yoosles ahn laik dehn noh impoatant. Bikaaz hihn kruwil, hihn mi tel Eev dat shee wuda mi bee free if shee mi disobay Gaad. Bot hihn mi wel ahn noa dat dat mi wahn kaas shee ih laif. Fahn eva sins, Saytan da di wan weh di kanchroal dis werl. Soh ih shudn sopraiz wi ataal dat wahn lata di leedaz eena di werl noh valyu laif er kay bowt how peepl feel. Pahn di ada han, Jehoava waahn wi feel gud bowt wiself, ahn hihn help wi wen wi di fays sichuwayshanz weh ku mek wi feel yoosles.​—Roam. 12:3. w20.01 14 ¶1-4

Fi bowt 40 yaaz, Jerimaiya mi liv monks peepl weh neva laayal. Dis inklood ih naybaz ahn maybi eevn som a ih relitiv fahn Anatat wehpaat ih mi groa op. (Jer. 12:6) Bot Jerimaiya neva kip tu ihself. Az a mata a fak, hihn mi tel ih laayal sekiteri Barok how ih mi-di feel. Ahn wee aalso noa how Jerimaiya mi-di feel tu, kaaz ih deh eena di Baibl. (Jer. 8:21; 9:1; 20:14-18; 45:1) Joorin di taim wen Barok mi-di rait dong weh mi hapm tu Jerimaiya, di too a dehn mi laan fi lov ahn rispek eech ada wahn lat. (Jer. 20:1, 2; 26:7-11) Fi yaaz, Jerimaiya neva frayd fi waan di Izrelait dehn bowt weh mi wahn hapm eena Jeroosalem. (Jer. 25:3) Di neks taim Jehoava mi inkorij di peepl fi ripent, hihn mi aks Jerimaiya fi rait di waanin pahn wahn skroal. (Jer. 36:1-4) Az Jerimaiya ahn Barok mi werk kloas tugeda pahn dis asainment weh Jehoava mi gi dehn, dehn mi moa dan laikli taak bowt tingz weh mi schrentn dehn fayt. w19.11 2-3 ¶3-4

How wi shuda chreet bradaz ahn sistaz weh anointid? Ih wuda bee rang fi admaiya wahn persn tu moch, eevn if da persn da wan a Krais anointid bradaz. (Mach. 23:8-12) Wen di Baibl taak bowt di eldaz, ih inkorij wi fi “chrai ga fayt laik dehn,” bot ih noh tel wi fi mek wahn hyooman wi leeda. (Heeb. 13:7) Da chroo, di Baibl doo seh dat som dizerv “dobl pay.” Bot dis da bikaaz dehn “di du wahn gud werk di leed” ahn dehn “di werk haad di preech ahn di teech,” noh bikaaz dehn anointid. (1 Tim. 5:17) If wi staat tu gi anointid Kristyanz tu moch prayz an atenshan, wi ku mek dehn feel shaym. Er eevn wers, wi ku mek dehn staat tu geh prowd. (Roam. 12:3) Fi shoar, non a wi wudn waahn du notn fi kaaz wan a Krais breda fi mek wahn mistayk laik dat!​—Look 17:2. w20.01 29 ¶8

Di apasl Paal mi ga soh moch reezn wai hihn mi feel schres owt. Di prablemz weh ih bradaz ahn sistaz mi-di fays mi mek hihn feel schres owt. (2 Kor. 2:4) Peepl mi beet ahn op ahn chroa ahn eena prizn bikaaz dehn neva laik weh hihn mi-di du. Hihn mi aalso haftu bayr op anda sohn tof sichuwayshan, laik noh ga food fi eet. (Fil. 4:12) Ahn bikaaz hihn mi eena shiprek chree taim, wi ku onli imajin humoch hihn mosi mi-di wori wen hihn mi haftu chravl bai boat. (2 Kor. 11:23-27) Weh mi help Paal fi deel wid ih woriz? Paal yoostu wori bowt ih bradaz ahn sistaz wen dehn mi fays chalenjiz, bot hihn neva chrai solv aala dehn prablemz bai ihself. Paal mi noa dat hihn mi kyaahn du evriting. Hihn mi aks adaz fi help tek kayr a di kangrigayshan​—bradaz weh ih kuda mi pen pan, laik Timoti ahn Taitos. Fi shoar, di werk weh dehn bradaz mi du mi help Paal fi noh wori tu moch.​—Fil. 2:19, 20; Taitos 1:1, 4, 5. w20.02 23 ¶11-12

Jehoava waahn wee fi obay hihn tu. Hihn dizerv wi obeedyans bikaaz hihn da di Wan weh kriyayt wi ahn hihn da di Wan weh di kip wi alaiv. Bot, di moas impoatant reezn wai wi obay Jehoava da bikaaz wi lov ahn. (1 Jan 5:3) Eevn doa wi ga lat moa reezn wai wi shuda obay Jehoava, hihn noh foas wi fi obay ahn. Jehoava kriyayt wi wid di abiliti fi mek wi oan disizhanz, soh hihn hapi wen wi chooz fi obay hihn bikaaz wi lov ahn. Payrents mek roolz fi protek dehn chiljren kaaz dehn waahn dehn chiljren fi bee sayf. Wen chiljren obay di roolz weh dehn payrents set, dehn shoa dat dehn chros ahn rispek dehn payrents. Soh ih eevn moa impoatant dat wee noa an obay wi hevnli Faada standadz. Wen wi du dat, wi shoa Jehoava dat wi lov ahn rispek ahn, ahn wi aalso protek wiself. (Isa. 48:17, 18) Bot, peepl weh rijek Jehoava ahn fi hihn standadz onli en op di hert dehnself.​—Gal. 6:7, 8. w20.02 9-10 ¶8-9

Jos laik Abigayl, if wi si dat sombadi weh bowt fi mek wahn seeryos mistayk, wi need fi ga di korij fi taak op. (Ps. 141:5) Wi haftu taak tu dehn wid rispek, bot wi kyaahn frayd fi taak tu dehn needa. If wi aafa kongsl tu sombadi bikaaz wi lov dehn, wi proov dat wee da wahn chroo chroo fren. (Prov. 27:17) Ih reeli impoatant fi mek eldaz ga di korij fi taak tu di wan dehn eena di kangrigayshan weh du sohnting rang. (Gal. 6:1) Eldaz rekonaiz dat dehn noh perfek, ahn dehn need fi bee hombl, ahn sohntaim dehn wahn need kongsl tu. Bot eldaz noh mek dat stap dehn fahn karek dehn wan weh need disiplin. (2 Tim. 4:2; Tai 1:9) Wen eldaz chrai fi kongsl sombadi, dehn chrai fi du it eena wahn payshent ahn kain way. Di lov weh dehn ga fi dehn brada er sista moov dehn fi help dehn brada er sista. (Prov. 13:24) Bot fi aana ahn sopoat Jehoava standadz moa impoatant tu dehn ahn dehn du dis wen dehn protek di kangrigayshan fahn chrobl.​—Aks 20:28. w20.03 20 ¶8-9

Jehoava mi mek Moaziz bee wahn sayvya fi di Izrelait dehn. Bot da wen Jehoava mi yooz hihn? Yu tink da-mi afta ‘di Eejipshan dehn mi teech Moaziz evriting weh dehn mi noaʼ ahn Moaziz mi tink seh hihn mi redi? (Aks 7:22-25) No, Jehoava neva yooz Moaziz til afta Hihn mi help ahn fi bee hombl ahn fi ga wahn jentl haat. (Aks 7:30, 34-36) Jehoava mi gi Moaziz di korij fi stan op fronta di moas powaful roola a Eejip. (Ex. 9:13-19) Fahn dis wi si dat Jehoava yooz dehn wan weh chrai fi kapi fi Hihn kwalitiz ahn hoo pen pahn Hihn fi schrent. Aal chroo hischri, Jehoava mi yooz ih servants eena lata difrent wayz. How hihn wahn yooz yoo? Wahn lat dipen pahn how haad yoo wilin fi werk. (Kol. 1:29) If yu wilin fi mek Jehoava yooz yu, hihn ku mek yu bee sombadi weh eega fi preech an ih ku mek yu bee wahn gud teecha. Hihn ku aalso mek yu bee wahn persn weh ga lata skilz, wahn laayal fren, ahn sombadi weh ku komfert adaz. Er hihn ku mek yu bee wateva els hihn need yu fi bee fi mek fi hihn wil kohn chroo. w19.10 21 ¶5; 25 ¶14

Di bes way fi mek gud frenz weh wahn help wi fi stay laayal tu Jehoava da fi bee wahn gud fren. (Mach. 7:12) Fi egzampl, eena di Baibl ih tel wi fi yooz wi enerji fi help adaz, espeshali dehn wan weh “ga need.” (Ifee. 4:28) If wi foakos da fi help adaz, den wi wahn bee hapi. (Aks 20:35) Wi frenz wahn sopoat wi wen wi ga prablemz ahn dehn wahn help wi fi ga pees a main. Wi frenz aalso help wi wen dehn lisn tu wi az wi tel dehn how wi feel, jos laik how Ilaihyu mi lisn wen Joab mi tel ahn bowt ih chraiyalz. (Job 32:4) Wi noh fi ekspek wi frenz fi tel wi weh fi du er weh disizhan fi mek, bot wi waahn lisn tu dehn advais weh bays pahn di Baibl. (Prov. 15:22) Ahn jos laik how King Dayvid neva tu prowd fi aksep help fahn ih frenz, wee noh wahn bee tu prowd fi aksep help fahn wi frenz wen wi need it needa. (2 Sam. 17:27-29) Gud frenz laik dis da wahn gif fahn Jehoava.​—Jay. 1:17. w19.04 11 ¶12; 12 ¶14-15