Disemba

If wi noh kanchroal weh wi seh, ih ku kaaz wahn lata prablem. Fi egzampl, sopoaz yu meet sombadi weh liv da wahn konchri wehpaat di preechin werk deh anda ban. Yu wuda aks ahn fi giv yu deetayl bowt how dehn du Jehoava werk eena da ayrya? Af koars yu noh wahn aks dehn dat, bikaaz yu noh waahn hert dehn. Wi lov wi brada ahn wi kay bowt dehn. Wi aalso wahn bee spesifik wen wi pray fi dehn. Bot dis da wahn taim wen wi shuda kip kwaiyet. If wi presha sombadi fi seh sohnting weh dehn noh fi tel nobadi, wee di shoa dat wi noh lov dehn er di bradaz ahn sistaz weh di pen pahn di persn fi kip kwaiyet bowt how di werk get don. Fi shoar, non a wi waahn mek tingz wers fi wi bradaz ahn sistaz weh liv da sohn konchri wehpaat wi werk deh anda ban. Saym way soh, no brada er sista weh di serv eena wahn konchri laik dat wuda waahn taak bowt how di Witnisiz du dehn minischri, meet tugeda, er du eniting els weh ga fi du wid dehn wership. w20.03 21 ¶11-12

Gaad neva mek wi fi ded. Bot, Adam ahn Eev neva lisn tu weh Jehoava mi tel dehn. Hihn mi tel dehn: “Az tu di chree a di nalij a gud ahn bad, yu noh fi eet di froot, bikaaz di day yu eet it yu wahn ded fi shoar.” (Gen. 2:16, 17) Saytan kaaz wahn lata prablem wen hihn priten laik da di snayk mi-di taak, an ih tel Eev di werdz a wi teks fi tudeh. Wel, shee mi bileev ahn, soh ih eet di froot ahn den ih gi sohn tu Adam ahn hihn eet tu. (Gen. 3: 6) Bikaaz a dat, wi sin ahn ded. (Roam. 5:12) Adam ahn Eev mi ded jos laik how Jehoava mi seh. Bot laytaraan, Saytan stil kantinyu fi tel lai bowt det. Wan a dehn lai da di teechin dat sohn paat a wi servaiv afta wi ded, weda dehn kaal it wi spirit, wi soal er sohnting els. Ahn dis taip a lai chrik wahn lata peepl rait dong tu tudeh.​—1 Tim. 4:1. w19.04 14-15 ¶3-4

Chiljren noh ga di saym abiliti az wahn adolt fi tink, fi reezn, er fi rekonaiz ahn kip weh fahn daynja. Soh ih eezi fi sombadi chrik an abyooz wahn chail. Peepl weh abyooz chiljren tel dehn aal kaina lai. Fi egzampl, dehn mait tel dehn dat di abyoos da di chail faalt, dat dehn fi kip di abyoos wahn seekrit, dat nobadi wahn lisn er kay if dehn ripoat di abyoos, er dat sekshwal abyoos da wahn naamal way fi shoa wahn chail humoch dehn lov dehn. Ih wahn tek di chail wahn lata yaaz fi laan dat aala dehndeh da loan lai. Ih ku eevn kaaz di chail fi groa op di tink dat ih damij ahn dat ih kuda neva ga wahn naamal rilayshanship, nat eevn wid Gaad. Dis infamayshan help wi fi andastan wai peepl weh geh abyooz sofa fi meni yaaz. Wi di liv eena di laas dayz. Wi di liv eena wahn taim wen peepl noh kay “non ataal bowt ada peepl,” ahn wen “wikid peepl ahn dehn wan weh di lai, weh di mek peepl tink seh dehn gud, wahn geh eevn wos.”​​—2 Tim. 3:1-5, 13. w19.05 15 ¶7-8

Eena weh wayz Jeezas mi teech? Fos, ih teech peepl bai weh ih mi seh. Fi hihn werdz mi ga powa kaaz ih mi tel di chroot bowt Gaad, ih mi teech di reel meenin a laif, an ih mi shoa dat Gaad Kingdom da di onli ting weh ku geh rid a hyooman sofarin. (Look 24:19) Jeezas mi aalso teech bai egzampl. Di way hihn mi liv shoa ih falowaz how dehn mi sopoas tu liv dehn laif. (Jan 13:15) Wen Jeezas mi teech? Hihn mi teech joorin ih minischri pahn di ert. (Mach. 4:23) Ih mi aalso kantinyu fi teech ih falowaz fi wahn lee wail afta ih rezorekshan. Fi egzampl, hihn mi apyaa tu wahn groop a disaipl, maybi oava 500 a dehn, an ih mi gi dehn di koman fi mek disaipl. (Mach. 28:19, 20; 1 Kor. 15:6) Az hed a di kangrigayshan, Jeezas mi kantinyu fi gi ih disaipl dehn inschrokshanz eevn afta ih mi gaahn bak da hevn. Fi egzampl, bowt rong di yaa 96 C.E., Krais mi dairek di apasl Jan fi gi inkorijment ahn kongsl tu anointid Kristyanz.​—Kol. 1:18; Rev. 1:1. w19.05 3 ¶4-5

Nowadayz, ih noh eezi fi mek wahn livin. Lata wi bradaz haftu werk lata owaz fi provaid food, kloaz, ahn shelta fi dehn famili. Ahn som haftu spen lata taim di chravl tu werk. Wahn lata wi bradaz mek dehn lee moni di du haad werk. Bai di en a di day, dehnya haad werkin bradaz ahn sistaz veri taiyad! Dehn mait feel soh taiyad dat di laas ting weh dehn wuda waahn du da stodi. Eevn doa ih mait haad, wi haftu fain di taim fi reeli stodi di Werd a Gaad ahn di poblikayshanz weh di aaganaizayshan provaid. Dis reeli nesiseri if wi waahn ga wahn gud rilayshanship wid Jehoava ahn liv fareva! (1 Tim. 4:15,16) Sohn peepl get op erli evri day ahn stodi wen evriting kwaiyet ahn dehn feel rilaks afta wahn gud sleep. Adaz tek wahn fyoo minits afta wahn haad day a werk, wen dehn noh ga no dischrakshan, fi reed ahn meditayt pahn di Baibl an ada poblikayshanz. w19.05 26 ¶1-2

Dehnya chaynj noh hapm oavanait, ner dehn noh hapm rait away. Wi mait need fi “chrai [wi] bes” fi wahn lang lang taim. (2 Peet. 1:5) Wi need fi du aal weh wi kud fi chaynj weh deh eena wi haat ahn wi main. Di fos impoatant step da pryaa. Wi need fi pray laik Dayvid weh mi seh: “Put wahn pyoar haat eena mi, Oa Gaad, ahn put wahn nyoo spirit eena mi; wahn laayal wan.” (Ps. 51:10) Wi mos admit dat wi need fi chaynj weh deh eena wi haat ahn main an aks Jehoava fi help wi. Di sekant impoatant step da fi meditayt. Az wi dig intu di Baibl eech day, wi need fi tek di taim fi tink bowt weh wi reed soh dat wi ku si wich tinkin ahn feelinz wi need fi chaynj. (Ps. 119:59; Heeb. 4:12; Jay. 1:25) Wi need fi si if wi ga eni taats er feelinz weh mait di leen tuwaadz dis werl tinkin. Wi need fi bee aanis wid wiself an admit wat da wi weeknis dehn ahn den werk haad fi geh rid a dehn. w19.06 8 ¶1; 10 ¶10; 12 ¶11-12

Wen wi di mek disizhanz, wi need fi set wahn taim ahn stik tu it. Noh chrai wayt fi di perfek taim, kaa da perfek taim mait neva kohn. (Eccl. 11:4) Yu haftu bee kyaaful fi noh alow ada tingz weh les impoatant fi dischrak yu ahn tek op di taim an enerji weh yu need fi du di moa impoatant tingz. (Fil. 1:10) If pasabl, chooz wahn taim wen yu wahn ga les dischrakshan. Mek adaz noa dat yu need taim fi foakos. Yu ku eevn ton aaf yu foan ahn noh chek yu e-mayl er soashal meedya til afta yu don du weh yu sopoas tu du. Wi ku kompyaa di rizolt a wahn disizhan tu wahn jerni. If wi reeli waahn reech di en a wi jerni, wi noh wahn giv op eevn if wi fain owt dat di road kloaz ahn dat wi need fi tek wahn difrent road. Sayhn way soh, if wi foakos pahn di rizolt a wahn disizhan, wi noh wahn giv op wen wi fays chalenjiz ahn chraiyalz.​—Gal. 6:9. w19.11 30 ¶17-18

Weh shuda bee yu reezn fi geh baptaiz? Ih shuda bee bikaaz yu kyaafuli stodi di Baibl ahn yu laan bowt Jehoava, weh hihn stan laik, ahn how hihn du tingz. Weh yu laan bowt hihn toch yu haat ahn mek yu staat tu lov ahn moa ahn moa. Yu lov fi Jehoava fi bee di moas impoatant reezn wai yu disaid fi geh baptaiz. Wahn nada reezn wai yu disaid fi geh baptaiz da dat yu laan weh di Baibl teech ahn now yu bileev weh ih seh. Kansida weh Jeezas mi seh wen ih mi gi di koman fi goh ahn chrayn peepl fi bee ih disaiplz. (Mach. 28:19, 20) Akaadn tu Jeezas, di wan dehn weh geh baptaiz need fi geh baptaiz ‘eena di naym a di Faada, di Son, ahn di hoali spirit.ʼ Weh dat meenz? Ih meenz dat yu mos bileev wid aala yu haat di chroot fahn di Baibl bowt Jehoava, ih Son Jeezas, ahn di hoali spirit. Dehnya teechin powaful ahn dehn ku moov wi tu akshan. w20.03 9 ¶8-9

Jehoava neva onli sen aynjelz fi waan Lat, bot aalso fi help ahn ron weh fahn di dischrokshan a Sadam. (Gen. 19:12-14, 17) Sayhn way soh, wi mait need fi waan wi brada if wi si dat hihn di du sohnting weh ku bring ahn chrobl. Eevn if hihn sloa fi aplai di kongsl fahn di Baibl, wi waahn bee payshent wid ahn. Bee laik di too aynjelz. Insteda giv op pahn wi brada, help ahn. Wi shuda waahn help ahn, noh onli bai weh wi seh bot bai di tingz weh wi du tu. (1 Jan 3:18) Wi mait haftu help wi brada yooz di saym advais wi gi ahn fahn di Baibl, ahn bee payshent wid ahn. Jehoava kuda mi foakos pahn Lat imperfekshan. Bot insteda dat, hihn mi mek di apasl Peeta rifaa tu Lat az wahn raichos man. (Ps. 130:3) Yu tink wi ku kapi di way Jehoava mi feel bowt Lat? If wi foakos pahn wi bradaz ahn sistaz gud kwalitiz, ih wahn eeziya fi mek wi bee moa payshent wid dehn. Ahn dis wahn mek it eeziya fi mek dehn aksep fi wee help. w19.06 21 ¶6-7

If di govament eena di konchri wehpaat yoo liv ban wi wership, yu mait wanda if yu shuda moov tu wahn konchri wehpaat dehn noh ga wahn ban. Dis da wahn persnal disizhan weh nobadi ku mek fi yoo. Bifoa yu mek op yu main bowt weh fi du, yu ku stodi weh di Kristyanz bak eena di taim a di apasl dehn mi du wen dehn mi-di fays persikyooshan. Di disaiplz eena Jeroosalem mi moov tu Judeeya ahn Samayrya an eevn az far az Foneesha, Saipros, an Antiyak. (Mach. 10:23; Aks 8:1; 11:19) Yu ku aalso stodi weh Paal mi du wen di Kristyanz mi fays persikyooshan agen. Hihn mi mek op ih main fi stay wehpaat peepl neva laik di preechin werk. (Aks 14:19-23) Weh wi laan fahn dehnya akonk? Wi laan dat eech famili hed need fi mek wahn persnal disizhan bowt weda fi moov er nat. Bifoa ih disaid weh fi du, ih shuda pray ahn den kyaafuli tink bowt how di moov wahn afek ih famili, weda da eena wahn pazitiv er negitiv way. Wi noh fi joj adaz fi di disizhan weh dehn mek. w19.07 10 ¶8-9

Jeezas mi tel wi fi “goh ahn chrayn peepl fahn owta aala di nayshan dehn.” (Mach. 28:19) Ahn wi noh onli need fi teech wahn styoodent weh Jeezas koman ih disaiplz fi du, bot wi aalso need fi help di styoodent fi noa how fi obay dehndeh koman eena ih laif. Wi fi bee payshent wid ahn an help ahn fi yooz Baibl prinsiplz eena ih laif. Som styoodents ku chaynj dehn tinkin ahn habits eena jos wahn fyoo monts, wail adaz mait tek lat moa taim. Wahn mishineri brada da Peru mi ga gud rizolts bikaaz ih mi payshent. Di brada seh: “Ah mi stodi too buks wid wahn Baibl styoodent weh naym Raul. Bot hihn mi stil ga big prablemz eena ih laif. Ih marij mi ful a chrobl, ih mi kos wahn lat, an ih chiljren neva rispek ahn bikaaz a how ih mi bihayv. Bot stil, hihn mi kohn tu di meetin dehn regyula, soh Ah mi kantinyu vizit ahn fi help hihn an ih famili. Moa dan chree yaaz afta Ah mi meet ahn, hihn mi kwalifai fi geh baptaiz.” w19.07 15 ¶3; 19 ¶15-17

Tink bowt weh aal di apasl Paal mi-di du wen hihn mi rait tu di kangrigayshan da Filipai. Hihn mi deh anda hows ares da Roam. Hihn mi kyaahn goh owt ahn preech. Bot stilyet, hihn mi kip ihself bizi di preech tu vizitaz ahn di rait letaz tu ada kangrigayshanz. Paal mi noa dat, laik Krais, hihn mi fi du ih bes ih hoal laif. Soh dats wai hihn mi kompyaa wi laif az wahn Kristyan tu wahn rays. (1 Kor. 9:24-27) Wahn rona weh di ron eena wahn rays foakos pahn di finish lain ahn noh mek tingz rong ahn dischrak ahn. Yu tink dat sombadi weh di ron eena wahn rays chroo wahn tong er wahn siti wuda stap ahn luk pahn tingz weh deh eena di difrent shap dehn? Af koars ih wudn du dat if ih waahn win! Eena di rays fi laif, wee need fi stay foakos. If wi stay foakos pahn wi goal, ahn kip di du wi bes jos laik Paal, wi wahn win di praiz! w19.08 3 ¶4; 4 ¶7

Wen wi mi disaid fi obay Gaad standadz, wi mi mek chaynjiz eena wi laif an eena weh wi mi bileev. Ih ku bee haad fi wi relitiv dehn aksep dehnya chaynjiz. Wahn lata taim, di fos ting dehn noatis da dat wi noh selibrayt haliday wid dehn nohmoh, ahn dat wi stap tek paat eena palitiks. At fers, som a wi relitiv dehn mait geh beks wid wi. (Mach. 10:35, 36) Bot wi noh waahn giv op pahn dehn. If wi stap chrai fi help dehn andastan wi bileef dehn, den da laik wi di seh dat dehn noh dizerv evalastin laif. Jehoava neva gi wi di jab fi joj​​—hihn gi da jab tu Jeezas. (Jan 5:22) If wi payshent, wi relitiv dehn mait wilin fi lisn tu wi mesij laytaraan. Wi need fi bee kain, bot wi noh fi mek wi relitiv dehn chaynj wi disizhan, eevn if wi haftu bayr op anda chraiyalz. Ih mait tek sohn taim bifoa wi relitiv dehn ku reeli andastan jos how impoatant ih impoatant tu wee fi serv Jehoava. w19.08 17 ¶10, 13; 18 ¶14

Yoo eva fays wahn prablem eena di paas ahn tink tu yuself, “Ai noa dat Ah kuda neva get chroo dat pahn mi oan”? Wahn lata wi mi praabli feel da way. Maybi wi mi seh it afta wi mi tink bowt how wi mi aybl fi koap wid wahn reeli bad siknis er wen sombadi weh wi lov mi ded. Wi feel laik di onli reezn wai wi kuda mi bayr op eech day da bikaaz Jehoava hoali spirit mi gi wi di “reel grayt powa” fi get chroo it. (2 Kor. 4:7-9) Wi aalso pen pahn Jehoava hoali spirit fi help wi deel wid di tingz weh di afek wi eena dis wikid werl. (1 Jan 5:19) Pahn tap a dat, wi haftu fait gens “di eevl spirit dehn.” (Ifee. 6:12) Wen Jehoava hoali spirit help wi, wi ga di powa, er schrent, fi du evriting weh wi need fi du, eevn wen wi di fays prablemz. Fi egzampl, eevn doa di apasl Paal mi fays chraiyalz, hihn mi kantinyu fi serv Jehoava ahn preech di gud nyooz. Hihn kuda mi du dis bikaaz hihn mi pen pahn “Krais powa.”​​—2 Kor. 12:9. w19.11 8 ¶1-3

Di Baibl da di onli buk weh eksplayn di chroot bowt weh Jeezas du fi yu. Laan fi lov Jeezas, ahn yu wahn lov Jehoava eevn moa. Wai? Bikaaz Jeezas mi kapi ih Pa egzampl eena wahn perfek way. Soh di moa yu laan bowt Jeezas, di beta yu wahn andastan ahn lov Jehoava. Tink bowt humoch lov Jeezas mi shoa tu peepl weh adaz mi luk dong pan jos bikaaz dehn mi poa, sik, er week. Aalso, tink bowt di advais weh hihn gi yu ahn how yu laif geh beta bikaaz yu lisn tu ahn. (Mach. 5:1-11; 7:24-27) Moa dan laikli, yu lov fi Jeezas wahn geh schranga wen yu reeli tink bowt di sakrifais weh hihn mek soh dat yu ku geh fergivnis fi yu sin dehn. (Mach. 20:28) Wen yu andastan dat Jeezas mi wilin fi ded fi yu, dat mait inkorij yu fi ripent an aks Jehoava fi fergivnis. (Aks 3:19, 20; 1 Jan 1:9) Di moa yu lov Jeezas ahn Jehoava, di moa yu wahn waahn bee wid peepl weh lov dehn tu. w20.03 5-6 ¶10-12

Wahn brada ku staat tu tink dat hihn moa kwalifai dan aala di ada bradaz wen ih kohn tu wahn sertn rispansabiliti eena di kangrigayshan. Er wahn brada waif ku staat tu seh tu ihself, ‘Mai hozban faar moa kwalifai fi da asainment dan brada man!ʼ Bot, if wi reeli ahn chrooli hombl, wi noh wahn tink dis way. Wi ku laan wahn lat fahn di way Moaziz mi rispan wen adaz mi geh wahn asainment. Moaziz mi apreeshiayt fi hihn asainment fi leed di nayshan a Izrel. Bot Jehoava mi gi adaz di abiliti fi du som a di werk weh Moaziz mi-di du. How Moaziz mi rispan? Hihn neva jelos. (Num. 11:24-29) Hihn mi hombl an ih mi alow adaz fi help ahn joj di Izrelait dehn. (Ex. 18:13-24) Now di Izrelait dehn neva mi wahn need fi wayt az lang fi mek Moaziz handl dehn kays kaaz hihn mi ga moa help. Dis shoa wi dat Moaziz mi kay moa bowt di peepl dan bowt wahn asainment er privilij. Dat da wahn gud egzampl fi aala wi! Wi need fi memba dat if wi waahn bee yoosful tu Jehoava, ih moa impoatant fi bee hombl dan fi ga wahn lata talent. w19.09 5-6 ¶13-14

Wi noh noa weh reezn di werl leedaz wahn gi fi eksplayn wai dehn di atak Babilan di Grayt. Dehn mait seh dat da bikaaz a rilijan di werl kyaahn ga pees ahn dat dehn aalwayz di chrai fi tel di govament dehn weh fi du. Er dehn mait seh dat da bikaaz dehndeh rilijos aaganaizayshan tu rich an oan tu moch tingz. (Rev. 18:3, 7) Wen di werl leedaz atak faals rilijan, dehn praabli noh wahn dischrai aala di membaz weh mi bilangz tu dehndeh rilijan. Raada, ih seemz laik di nayshanz wahn geh rid a di rilijos aaganaizayshan dehn. Wans dehndeh aaganaizayshan geh dischrai, ahn dehn gaan, peepl weh yoostu bee paat a dehn wahn riyalaiz dat dehn rilijos leedaz kyaahn fulfil dehn pramis. Soh dehn wahn seh dat dehn noh ga notn fi du wid dehndeh rilijan nohmoh. Di dischrokshan a Babilan di Grayt noh wahn tek lang. (Rev. 18:10, 21) Jehoava pramis dat hihn wahn “kot shaat di amonk a dayz” a di chribyulayshan soh dat fi hihn ‘speshal peepl weh hihn pikʼ ahn di chroo rilijan wahn servaiv.​—Maak 13:19, 20. w19.10 15 ¶4-5

Az wahn ma, maybi yu mi geh rayz bai payrents weh geh beks fi evri lee ting ahn weh taak rof tu yu. Soh yu mait tink dat ih naamal fi chreet yu chiljren laik dat. Eevn afta yu laan how Jehoava waahn yu chreet yu chiljren, ih mait stilyet bee haad fi mek yu stay kaam ahn bee payshent wid dehn, espeshali wen yu taiyad. (Ifee. 4:31) Wen yu feel da way, ih veri impoatant dat yu aks Jehoava fi help. (Ps. 37:5) Wahn nada chalenj weh sohn ma mait fays da dat dehn fain it haad fi shoa dehn chiljren humoch dehn lov dehn. Wan reezn da bikaaz sohn ma neva geh rayz eena wahn famili wehpaat dehn payrents mi ga wahn kloas rilayshanship wid dehn. If da soh yoo mi geh rayz, yu noh haftu mek di saym mistayk yu payrents mi mek. Wahn ma hoo obay Jehoava mait haftu laan how fi shoa lov tu ih chiljren. Ih mait bee haad fi mek ih chaynj. Bot ih pasabl, ahn dat wahn mek shee an ih famili moch moa hapiya. w19.09 18-19 ¶19-20

Wahn persn weh di wership Jehoava ahn di spen wahn lata taim an enerji di chrai fi geh rich eena dis werl, da laik sombadi weh di chrai fi serv too maasta. Ih noh wahn di wership onli Jehoava. Bifoa di yaa 100 C.E., sohn membaz a di kangrigayshan da Layodiseeya mi-di boas seh: “Ai rich, an Ai ga plenti tingz. Ai ga evriting weh Ai need.” Bot Jehoava ahn Jeezas mi si dehn az ‘poa ahn pitiful ahn blain ahn naykid.ʼ Jeezas neva kongsl dehn kaaz dehn mi rich, no, Jeezas mi kongsl dehn bikaaz dehn lov fi moni mi-di damij dehn rilayshanship wid Jehoava. (Rev. 3:14-17) If wi noatis dat wi di staat tu lov moni, wi need fi bee kwik fi karek wi tinkin. (1 Tim. 6:7, 8) If wi noh karek wi tinkin, wi wahn staat tu lov ada tingz tu ahn Jehoava noh wahn aksep wi wership. Jehoava “waahn wi wership onli hihn.”​​—Deut. 4:24. w19.10 27 ¶5-6

Di Greek werd weh chranslayt az “anda di kanchroal” meenz “kehr lang.” Look mi yooz wahn simila Greek werd eena wahn nada way eena di buk a Aks. Hihn mi yooz it fi diskraib wahn ship weh geh ‘kehr langʼ bai di breez. (Aks 27:15) Wahn Baibl teecha mi seh dat wen di apasl Peeta mi rait dat di Baibl raita dehn mi deh “anda di kanchroal” a di hoali spirit, hihn mi yooz da ekspreshan fi mek peepl tink bowt wahn ship weh di sayl. Peeta mi-di seh dat jos laik how di breez kehr wahn ship tu wehpaat di sayla waahn goh, da rait soh Gaad hoali spirit mi dairek di Baibl raita dehn fi du dehn werk. Di sayhn Baibl teecha weh wi mi menshan erliya mi seh: “Di Baibl raita dehn da-mi laik wahn ship weh ga dehn sayl oapm.” Dehn mi redi fi du di werk weh di hoali spirit mi dairek dehn fi du. Jehoava mi du weh hihn mi need fi du; hihn giv dehn di “breez” er hoali spirit. Ahn di Baibl raita dehn mi fala di dairekshan a di hoali spirit. Ahn jos laik wen di rait kaina breez bloa fi mek wahn ship sayl chroo rof weda ahn reech wahn sayf plays, saym way soh, di hoali spirit help wee fi deel wid tof sichuwayshanz eena laif az wi wayt fi reech Paradais, wehpaa wi wahn liv fareva. w19.11 9 ¶7-9

Sohntaim wi feel diskorij bikaaz wi ga prablemz. Af koars, wi noh fi ignoar wi prablemz. Bot wi noh fi tink bowt wi prablemz aal di taim needa. Kaaz if wi du dat, wi wahn ferget bowt aala di gud tingz weh Jehoava pramis wi. (Rev. 21:3, 4) Wi ku geh soh diskorij dat wi staat tu feel week ahn den wi stap serv Jehoava. Mek wi luk pahn how wahn sista fahn di United States mi kip ih fayt schrang wail ih mi-di tek kyaa a ih hozban weh mi sik bad. Eena wahn leta, shee mi seh: “Sohntaim, wi sichuwayshan reeli mek wi feel schres owt ahn diskorij, bot wi hoap schrang. Ah soh tankful fi evriting weh Jehoava gi wi fi schrentn wi fayt ahn fi inkorij wi. Wi mi reeli need dis advais an inkorijment. Ih help wi fi fi bayr op ahn kantinyu serv Jehoava.” Fahn weh dis sista seh, wi laan dat wi ku get oava diskorijment! How? Memba dat yu chraiyalz da wahn tes fahn Saytan. Chros dat Jehoava wahn komfert yu. An apreeshiayt di spirichwal food weh hihn provaid. w19.11 16 ¶9-10

Ih reeli impoatant fi mek eldaz aplai dis Baibl prinsipl. Wahn elda noa dat hihn noh fi infaam ih waif bowt tingz eena di kangrigayshan weh sopoas tu bee praivit. If hihn wuda du dat, nobadi wuda chros ahn, an dat ku damij fi hihn repyutayshan. Di bradaz ahn sistaz sopoas tu ku chros di bradaz weh di tek di leed eena di kangrigayshan, soh di apointid bradaz noh fi bee laiyad. (1 Tim. 3:8; ftn., NW.) Dat meenz dat dehn noh fi lai tu adaz er laik gasip bowt adaz. If wahn elda lov ih waif, hihn noh wahn tel ahn tingz weh shee noh need fi noa. Wahn waif ku help ih hozban kip wahn gud repyutayshan. Shee du dis wen ih noh chrai fi foas ih hozban fi taak bowt tingz weh ih shuda kip kanfidenshal. Wen wahn waif du dis, shee noh onli di sopoat ih hozban, bot shee di shoa dat shee rispek enibadi weh tel ih hozban tingz weh praivit. Eevn moa impoatant dan aala dat, shee mek Jehoava hapi bikaaz shee di ad tu di pees ahn yooniti a di kangrigayshan.​—Roam. 14:19. w20.03 22 ¶13-14

Eena di yaa 1512 B.C.E. wen di tabernakl mi geh set op da di batam a Mongt Sainai. Moaziz mi kandok di serimoni wen Jehoava mi apoint Ayron an ih son dehn fi bee prees. (Ex. 40:17; Lev. 9:1-5) How Jehoava mi shoa di nayshan a Izrel dat hihn mi pleez wid di prees dehn weh mi jos geh apointid? Wail Ayron ahn Moaziz mi-di bles di peepl, Jehoava mi sen faiya fahn hevn fi swala op di res a di sakrifais weh mi deh pahn di alta. (Lev. 9:23, 24) Weh di faiya fahn hevn mi shoa wen di prees dehn mi geh anointid? Rait dehsoh, Jehoava mi sen di faiya fi shoa dat hihn pleez wid dehn ahn dat hihn sopoat Ayron ahn fi hihn son dehn weh ih mi chooz fi bee prees. Wen di Izrelait dehn mi si di proof dat Jehoava mi-di sopoat di prees dehn, dehn mi noa dat dehn mi wahn need fi sopoat di prees dehn tu. Wai di way how Jehoava mi shoa dat hihn mi pleez wid di prees dehn eena Izrel impoatant fi wee tudeh? Dis da bikaaz dehn prees reprizent di 144,000 prees weh wahn serv langsaid Jeezas da hevn. (Heeb. 4:14; 8:3-5; 10:1) Ih klyaa fi si dat Jehoava di gaid ahn bles ih aaganaizayshan tudeh. w19.11 23 ¶13; 24 ¶14, 16

Wail di apasl Paal mi deh eena Korint, hihn mi stay wid Akwila ahn Prisila ahn werk wid dehn ‘laik how dehn yoostu mek tent fi sel.ʼ Wen Paal mi seh dat hihn mi werk “day ahn nait,” hihn neva meen dat aal weh hihn mi du da werk. Hihn mi tek taim aaf fahn ih werk, laik pahn di Sabat. Pahn da day hihn mi ga di apachooniti fi preech tu di Jooz, hoo neva werk pahn da day eeda. (Aks 13:14-16, 42-44; 16:13; 18:1-4) Paal mi haftu werk, bot stilyet, hihn mi mek shoar dat hihn mi aalwayz fain taim fi ‘tel peepl di gud nyoozʼ bowt Gaad. (Roam. 15:16; 2 Kor. 11:23) Ahn hihn mi inkorij adaz fi du di sayhn ting. Hihn mi aalso seh dat Akwila ahn Prisila “mi-di werk fi Krais Jeezas” lang wid hihn. (Roam. 12:11; 16:3) Paal mi tel di bradaz ahn sistaz fi mek dehn ‘kip aan di du di Laad werk wid evriting weh dehn gat.ʼ (1 Kor. 15:58; 2 Kor. 9:8) Jehoava mi eevn mek di apasl Paal rait: “If unu noh werk, unu noh fi eet.”​​—2 Tes. 3:10. w19.12 5 ¶12-13

Jehoava mi kriyayt di fos kopl wid di dizaiya fi ga chiljren. Bot da hoo fi disaid weda er nat wahn marid kopl wahn ga chiljren, ahn wen dehn wahn ga chiljren? Eena sohn kolcha, peepl ekspek dat wahn kopl weh jos geh marid fi staat tu ga chiljren az soon az pasabl. Dehn famili ahn frenz mait chrai fi presha dehn fi ga chiljren. Jetro, wahn brada fahn Asia, seh: “Eena di kangrigayshan, sohn kopl weh ga chiljren presha adaz weh noh ga chiljren fi staat wahn famili az soon az pasabl.” Jeffrey, wahn neks brada fahn Asia, seh: “Som a dehn tel koplz weh noh ga chiljren dat laytaraan dehn noh wahn ga nobadi fi tek kyaa a dehn wen dehn geh oal.” Bot eech kopl need fi disaid fi dehnself weda er nat dehn waahn ga chiljren. Dat da fi dehn disizhan; da fi dehn rispansabiliti. (Gal. 6:5) Af koars, frenz ahn famili waahn mek di marid kopl bee hapi, bot aala wi need fi memba dat di kopl need fi mek dehn oan disizhanz.​—1 Tes. 4:11. w19.12 22 ¶1-3

Yoo fain it haad fi tink a Jehoava az yu Faada? Sohn peepl mait tink dat Jehoava soh grayt dat dehn kuda neva bee impoatant tu hihn. Dehn dowt dat di Almaiti Gaad kay bowt dehn az wahn persn. Stil, wi lovin Faada noh waahn wi feel da way. Hihn da di Wan weh gi wi laif an ih waahn mek wi ga wahn rilayshanship wid ahn. Afta di apasl Paal mi mek dis klyaa, ih mi eksplayn tu dehn wan weh mi-di lisn tu ahn da Atenz dat Jehoava “noh deh faar fahn non a wi.” (Aks 17:24-29) Gaad waahn eech wan a wi fi taak tu hihn jos laik how wahn pikni wuda taak tu ih payrents weh lov ahn, ahn weh waahn help ahn. Adaz mait fain it haad fi si Jehoava az dehn hevnli Faada bikaaz dehn oan faada neva shoa dehn lov an afekshan. Wahn Kristyan sista seh: “Mi pa neva kain tu mi. Wen Ah mi fos staat stodi di Baibl, ih mi haad fi mek Ah feel kloas tu wahn hevnli Faada. Yoo feel da sayhn way? If yu ansa da yes, yoo ku bee shoar dat soon yu wahn ku aalso vyoo Jehoava az di bes Faada. w20.02 3 ¶4-5

Jeezas teech wi dat eevn if di tingz weh wi ku du noh luk impoatant tu wee az wi geh oalda, Jehoava valyu wateva wi ku du eena fi hihn servis. (Ps 92:12-15; Look 21:2-4) Soh foakos pahn weh yu ku du. Fi egzampl, yu ku taak bowt Jehoava, yu ku pray fi yu bradaz, an yu ku inkorij adaz fi stay faytful. Jehoava si yu az fi hihn felo werka, noh bikaaz a weh yu ku du, bot bikaaz yu wilin fi obay hihn. (1 Kor. 3:5-9) Wi soh tankful dat wee di wership Jehoava, wahn Gaad weh reeli valyu wi servis tu hihn! Hihn mi kriyayt wi fi du fi hihn wil, ahn dat mek wi feel reeli hapi. (Rev. 4:11) Eevn doa di werl mait si wi az yoosles, Jehoava noh vyoo wi da way. (Heeb. 11:16, 38) Wen wi feel diskorij bikaaz a siknis, moni prablemz, er oal ayj, wi waahn memba dat notn ku mek Gaad stap lov wee.​—Roam. 8:38, 39. w20.01 18 ¶16; 19 ¶18-19

If wi hombl ahn satisfai wid weh wi gat, ih ku help wi fi noh red aiy adaz. Wen wi hombl, ih help wi fi noh tink tu moch a wiself. Wahn hombl persn noh wahn feel laik hihn dizerv moa dan evribadi els. (Gal. 6:3, 4) Sombadi weh satisfai wid weh dehn gat noh wahn kompyaa dehnself wid adaz. (1 Tim. 6:7, 8) Wen wahn persn weh hombl ahn satisfai wid weh ih gat si sombadi geh sohnting gud, hihn hapi fi dehn. Wi need Gaad hoali spirit fi help wi noh fi ga red aiy ahn fi help wi fi bee hombl ahn satisfai wid weh wi gat. (Gal. 5:16; Fil. 2:3, 4) Jehoava hoali spirit ku help wi fi egzamin wi tinkin ahn di reezn wai wi du weh wi du. Gaad ku help wi fi stap red aiy weh ada peepl ga, an ih ku aalso help wi fi divelop gud kwalitiz.​—Ps. 26:2. w20.02 15 ¶8-9

Dedikayshan da wahn pramis weh Jehoava ekspek yu fi kip. Soh kip kloas tu yu kangrigayshan. Now yu da paat a wi big spirichwal famili weh inklood di bradaz ahn sistaz eena di kangrigayshan. If yu goh da di meetinz regyula, yu frenship wid dehn wahn geh schranga. Reed ahn meditayt pahn Gaad Werd evri day. (Ps. 1:1, 2) Tek yu taim ahn tink bowt weh yu reed. Den di werdz wahn reech yu haat. Neva stap pray. (Mach. 26:41) Wen yu pray fahn yu haat ih wahn help yu fi jraa kloasa tu Jehoava. “Weh unu fi aym fa fos, da fi bee paat a di kingdom a hevn.” (Mach. 6:33) Yu ku du dat if yu mek di preechin werk di moas impoatant ting eena yu laif. Wen yu goh preech regyula, yu wahn kip yu fayt schrang. Eni prablemz weh yu mait fays eena dis werl “da noh notn” ahn da onli fi wahn “shaat taim.” (2 Kor. 4:17) Bot yu dedikayshan ahn baptizm wahn alow yu fi ga wahn beta laif now ahn di “chroo chroo laif” weh wahn soon kohn. Da chroo, ih wahn kaas yu sohnting. Bot ih wert it!​​—1 Tim. 6:19. w20.03 13 ¶19-21

If yu Baibl styoodent noh di mek chaynjiz eena ih laif, soona er layta yu wahn haftu aks yuself if yu shuda stap stodi di Baibl wid ahn. Bifoa yu mek wahn disizhan, aks yuself dehnya kweschan: ‘Mai Baibl styoodent di mek proagres akaadn tu ih persnal sichuwayshan?ʼ ‘Ih di staat tu put intu praktis weh ih di laan?ʼ (Mach. 28:20) Sad fi seh, sohn Baibl styoodents da laik di Izrelait dehn eena Izeekyel day. Dis da weh Jehoava mi tel Izeekyel bowt dehn: “Luk! Yu da laik wahn romantik lov sang tu dehn, weh sombadi weh ga wahn byootiful vais sing ahn weh dehn play pahn wahn schring inschrument. Dehn wahn hyaa weh yu seh, bot nobadi wahn du weh yu tel dehn.” (Ezek. 33:32) Ih mait bee haad fi tel sombadi dat wi wahn stap stodi wid dehn. Bot wi haftu memba dat “di taim shaat” weh lef. Raada dan spen taim di stodi wid sombadi weh noh di mek spirichwal proagres, wi need fi saach fi peepl weh shoa dat dehn “gat di rait haat kandishan fi evalastin laif.”​​—Aks 13:48, NW. w20.01 6 ¶17; 7 ¶20

Moas a di taim, faals rilijan noh teech di chroot dat wan day obeedyant hyoomanz wahn liv pahn di ert fareva. (2 Kor. 4:3, 4) Tudeh, moas a faals rilijan teech dat aal gud peepl goh da hevn wen dehn ded. Bot ih mi difrent wid di smaal groop a Baibl Styoodents weh mi-di poblish di Watch Tower eena di layt 1800ʼs. Dehn mi andastan dat Gaad mi wahn mek di ert wahn Paradais agen, ahn dat milyanz a peepl weh obeedyant tu hihn wahn liv rait ya pahn ert​​—noh da hevn. Bot, ih mi tek taim fi mek dehn reeli andastan hoo dehn obeedyant peepl mi wahn bee. Af koars, di Baibl Styoodents mi aalso andastan fahn di Baibl dat wahn groop a peepl wuda mi geh pik “fahn owta di werl weh Krais mi pay fa wid ih blod” fi rool wid hihn da hevn. (Rev. 14:3) Da groop wahn mek op a 144,000 faytful Kristyanz hoo mi serv Gaad wid zeel ahn dedikayshan wail dehn mi deh pahn ert. w19.09 27 ¶4-5