Aypril

Yoo di goh chroo wahn haad chraiyal? Maybi sohnbadi eena di kangrigayshan seh er du sohnting weh hert yu. (Jay. 3:2) Maybi di peepl weh yu werk wid er goh da skool wid mak yu bikaaz yu da wan a Jehoava Witnisiz. (1 Peet. 4:3, 4) Er maybi yu oan famili di chrai stap yu fahn goh da meetin er fahn preech. (Mach. 10:35, 36) If yoo di goh chroo wahn haad chraiyal, yu mait feel laik giv op. Bot yu ku bee shoar dat noh mata weh chraiyalz yu di goh chroo, Jehoava wahn gi yu di wizdom fi deel wid dehn ahn di schrent fi bayr op. Di Baibl gat een lata egzampl a how peepl weh noh perfek mi deel wid haad chraiyalz. Jehoava mi mek shoar fi inklood dehndeh egzampl eena fi hihn Werd. Wai? Soh dat wi ku laan fahn dehn. Jehoava mi yooz di apasl Paal fi rait bowt dat da Roamanz 15:4. Wen wi reed bowt dehnya Baibl egzampl, dehn gi wi komfert ahn hoap. Bot fi mek wi benifit, wi haftu du moa dan jos reed di Baibl. Wi haftu mek di Skripchaz chaynj di way wi tink ahn di way wi feel. w21.03 14 ¶1-2

Yoo luk pahn peepl hoo yu preech tu laik grayn weh raip ahn redi fi reep? If dis da di kays, chree tingz wahn hapm. Fers, yu wahn tek di preechin werk moa seeryos. Di taim lef fi di haavis shaat, soh no taim deh fi ways. Sekant, yu wahn bee hapi wen yu si peepl di rispan tu di mesij a di gud nyooz. Di Baibl seh: “Peepl rijais joorin di haavis taim.” (Isa. 9:3) Ahn terd, yu wahn si dehn az peepl weh ku bee wan a Krais disaipl. Ahn bikaaz a dat yu wahn chaynj yu prezentayshan fi soot weh dehn inchrestid eena. Jeezas neva ton ih bak pahn di peepl a Samayrya, laik weh ih disaipl dehn mi du. Insteda a dat, hihn mi si dehn az peepl weh ku bee wan a fi hihn disaipl. Wi need fi vyoo di peepl eena wi teritori di sayhn way tu, laik peepl weh ku bee Krais disaipl. Di apasl Paal mi set wahn veri gud egzampl fi wi fala. Hihn mi laan weh di peepl weh hihn preech tu bileev eena, hihn mi akchwali noa weh dehn mi inchrestid eena, ahn hihn mi si dehn az peepl weh ku bee Jeezas disaipl. w20.04 8-9 ¶3-4

Insteda kritisaiz di tingz weh adaz du, wi fi chrai wi bes fi andastan how dehn feel. Di onli persn weh andastan wi kompleetli da Jehoava. Soh wi shuda aks Jehoava fi help fi mek wi ku si adaz di way how hihn si dehn, ahn fi mek wi andastan how fi shoa kompashan tu dehn. Yu kyaahn pik wich brada er sista dizerv yu kompashan. Aala dehn fays prablemz weh simila tu weh Joana, Ilaija, Haygar, ahn Lat mi gaahn chroo. Sohntaim dehn mi kaaz di prablem fi dehnself. Bot fi bee aanis, aala wi don du dat som taim eena wi laif. Soh ih noh sopraiz wi dat Jehoava aks wi fi shoa kompashan tu wan anada. (1 Peet. 3:8) Wen wi lisn tu Jehoava, wi schrentn wi wandaful famili weh mek op a peepl fahn aal oava di werl. Soh mek wi mek op wi main fi lisn, laan, ahn shoa kompashan tu wi bradaz ahn sistaz. w20.04 18-19 ¶15-17

Jeezas da di bes egzampl a sombadi weh obay Jehoava. Soh wan impoatant way fi obay Jehoava da fi fala Jeezas egzampl az kloas az wi kud. (Jan 8:29) If wi waahn kip di fala di chroot, wi haftu bileev wid aala wi haat dat Jehoava aalwayz tel di chroot, ahn soh evriting weh ih tel wi eena fi hihn Werd, di Baibl, da chroo. Ahn wi aalso haftu bileev dat Jeezas da di Mesaiya. Lata peepl tudeh noh bileev dat Jeezas don di rool az King a Gaad Kingdom. Jan mi waan di Kristyan dehn dat lata peepl weh “noh di taak di chroot” mi wahn chrai fool op enibadi weh neva bileev di chroot bowt Jehoava ahn Jeezas wid aala dehn haat. (2 Jan 7-11) Jan mi rait: “Da hoo di lai? Da dehn wan weh seh dat Jeezas da noh di Krais.” (1 Jan 2:22) Di onli way fi mek shoar dat nobadi kyaahn fool wi op da fi kip di stodi Gaad Werd. Den wi wahn geh fi noa Jehoava ahn Jeezas. (Jan 17:3) Ahn wi wahn bee shoar dat wi ga di chroot. w20.07 21 ¶4-5

Wan way wi ku mek shoar wi noh “stombl” nobadi els weh di ron eena di rays fi laif da fi mek dehn du tingz fi dehn way insteda aalwayz insis dat dehn du tingz fi wee way. (Roam. 14:13, 19-21; 1 Kor. 8:9, 13) Bot dat da wan a di mayn wayz how wee ahn sombadi weh ron eena wahn rays difrent fahn wan anada. Wahn persn weh ron eena wahn rays waahn win di praiz fi dehnself. Dehn noh waahn nobadi els geh di praiz. Soh dehn onli luk owt fi dehn oanself ahn du wateva dehn haftu du fi win. Soh dehn mait chrai shub evribadi els owta di way soh dat dehn ku ron lef dehn. Bot wee noh di kompeet gens wan anada. (Gal. 5:26; 6:4) Fi wee goal da fi help az moch peepl az wi kud fi kraas di finishin lain ahn win di praiz, weh da evalastin laif. Soh wi chrai fi aplai di kongsl fi “luk owt fi wan anada, ahn noh oanli fi [wi] oanself.” (Fil. 2:4 ) Eena di rays weh wi di ron, Jehoava pramis ih peepl dat dehn wahn geh di praiz if dehn finish di rays. Da praiz da evalastin laif, eeda da hevn er eena di Paradais rait ya pahn ert. w20.04 28 ¶10; 29 ¶12

Milyanz a Kristyanz wahn servaiv ahn mek it intu di nyoo werl. Di wan dehn weh liv pahn di ert wahn si wahn nada kaina vikchri oava det, bikaaz dehn wahn si bilyanz a peepl weh mi ded geh rayz op bak tu laif. Tink bowt how hapi wi wahn bee wen da taim kom! (Aks 24:15) An eevn di wan dehn weh alaiv ahn weh laayal tu Jehoava wid aala dehn haat wahn ga vikchri oava det, bikaaz dehn wahn neva ded. Dehn wahn ku liv fareva. Tudeh, evri Kristyan ku reeli fain komfert eena di rezorekshan weh Paal mi rait bowt tu di Korintyanz. Notn shuda hoal wi bak fan obay di advais weh Paal gi wi. Hihn mi seh dat wi fi du az moch az wi kud “eena di werk weh di Laad gi wi fi du.” (1 Kor. 15:58) If wi aalwayz chrai fi du wi bes eena da werk, wi wahn ga wahn hapi fyoocha heda wi. Wi wahn liv wahn laif weh beta dan weh wi kuda eva imajin. Ahn wi wahn si dat evriting weh wi du fi Jehoava da neva fi notn. w20.12 13 ¶16-17

Ih luk laik di prafesi dehn da Ezekiel 38:10-23; Daniel 2:43-45; 11:44–12:1; ahn Revilayshan 16:13-16, 21 di taak bowt di saym ting. If dat da di kays, den ih luk laik dis da weh wahn hapm. Afta di grayt chribyulayshan staat, “di king dehn weh di rool oava aal di ert” wahn yoonait tugeda az wan. (Rev. 16:13, 14) Di Baibl kaal da groop a nayshanz “Gag a di lan a Maygag.” (Ezek. 38:2) Da groop a nayshanz wahn atak Gaad peepl ahn chrai dischrai aala dehn wans an far aal. Eena wahn prafesi weh taak bowt weh wahn hapm joorin da taim, di apasl Jan mi si wahn staam weh di jrap sohn big big haylstoan pahn Gaad enimi dehn. Da simbolik haylstaam mait stan fi wahn schrang jojment mesij weh Jehoava peepl wahn diliva. Dat wahn provoak Gag a Maygag fi atak Gaad peepl ahn chrai waip dehn owt aafa di ert.​—Rev. 16:21. w20.05 15 ¶13-14

Gaad hoali spirit da wahn gif weh wi shuda chrezha. Wi ku schrentn wi apreeshiayshan fi hoali spirit wen wi tink bowt aal weh ih du eena fi wee taimz. Bifoa Jeezas mi gaahn da hevn, hihn mi tel ih disaipl dehn: “Wen di Hoali Spirit kohn pahn unu, unu wahn geh lata powa, ahn unu wahn ku goh aal bowt di plays di tel peepl bowt mee . . . aal oava di werl.” (Aks 1:8) Eena fi wee taimz, bowt ayt an a haaf milyan peepl fahn aal rong di werl di serv Jehoava wid di help a fi hihn hoali spirit. Wi aalso injai wahn spirichwal paradais bikaaz Gaad hoali spirit help wi fi divelop wandaful kwalitiz laik lov, jai, pees, payshens, kainis, gudnis, fayt, wahn jentl haat, ahn self-kanchroal; dehnya kwalitiz mek op di froot a Gaad hoali spirit. (Gal. 5:22, 23) Hoali spirit da wahn preshos gif fi chroo! w20.05 28 ¶10; 29 ¶13

Dehn ga wahn lata reezn wai wi ku ekspek fi rekonaiz wi famili er frenz weh geh rezorek. Fi egzampl, bikaaz a di way Jehoava mi rezorek peepl eena di paas, wi ku ekspek dat Jehoava wahn bring dehn bak egzakli how dehn mi stan lee wail bifoa dehn ded. Dehn wahn luk, tink, ahn taak di saym way laik eena di paas. Memba dat Jeezas mi kompyaa det tu sleep ahn hihn mi seh dat di rezorekshan da laik wen yu di wayk op sombadi weh di sleep. (Mach. 9:18, 24; Jan 11:11-13) Wen sombadi wayk op, dehn luk ahn song di saym way how dehn mi luk ahn song bifoa dehn gaahn sleep. Ahn dehn ga di saym memriz. Mek wi luk pahn Lazaros egzampl. Hihn mi don ded fi foa dayz, soh ih badi mi don staat tu ratn. Bot, wen Jeezas mi bring Lazaros bak tu laif, ih sista dehn mi rekonaiz ahn az dehn si ahn, an Lazaros mi memba dehn.​—Jan 11:38-44; 12:1, 2. w20.08 14 ¶3; 16 ¶8

Eena som wayz, di anointid ahn di ada sheep simila tu eech ada. Jehoava noh lov wan groop moa dan di ada. Di too groop impoatant tu hihn. Wi noa dis bikaaz di prais weh ih pay fi bai di anointid ahn di ada sheep da di saym—di laif a ih preshos Son. Di onli ting weh mek dehn difrent fahn eech ada da di hoap weh dehn gat. Bot di too groop a peepl haftu stay laayal tu Gaad ahn tu Krais. (Ps. 31:23) Ahn memba dat Jehoava giv ih hoali spirit tu eech persn akaadn tu weh da persn need, noh mata if da persn anointid er if ih da wahn memba a di ada sheep. Jehoava gi eech wan a ih servant dehn wahn wandaful hoap fi di fyoocha. (Jer. 29:11) Eech wan a wi weh goh da di Memoaryal a Krais det ga wahn wandaful apachooniti fi prayz Gaad ahn Krais fi weh dehn du fi wi soh dat wi ku injai laif fareva. Di Memoaryal da di moas impoatant meetin weh chroo Kristyanz gat eech yaa. w21.01 18 ¶16; 19 ¶19

Moas a di peepl weh goh da di Memoaryal ga di hoap fi liv pahn di ert. Soh den, wai dehn goh? Dehn goh fi di saym reezn wai wahn persn wuda goh tu wan a ih fren wedn. Dehn waahn shoa dat dehn lov ahn sopoat di kopl weh di geh marid. Eena di saym way, di ada sheep goh da di Memoaryal bikaaz dehn waahn shoa dat dehn lov ahn sopoat Krais ahn di anointid Kristyanz. Di ada sheep aalso goh fi shoa dat dehn apreeshiayt Jeezas sakrifais, di saym sakrifais weh mek it pasabl fi mek dehn liv fareva pahn di ert. Wahn neks reezn wai di ada sheep goh da di Memoaryal da bikaaz dehn waahn obay Jeezas koman. Wen Jeezas mi fers shayr da speshal meel wid ih faytful apasl dehn, ih mi tel dehn: “Kip aan di du dis fi memba mi.” (1 Kor. 11:23-26) Soh di ada sheep wahn kip di goh da Krais Eevnin Meel az lang az som anointid Kristyanz stil di liv pahn di ert. w21.01 17-18 ¶13-14

If wi reeli lov peepl, wi wahn du kain tingz fi dehn. (Kompyaa Jaymz 2:17, 26.) Fi egzampl, Jehoava lov wi. (1 Jan 4:19) Ahn hihn tel wi dat ih lov wi eena fi hihn Werd di Baibl. (Ps. 25:10; Roam. 8:38, 39) Bot wee noa fi shoar dat Gaad lov wi, noh jos bikaaz a weh ih seh, bot aalso bikaaz a weh ih du. Jehoava mi alow ih preshos Son fi sofa ahn ded fi wi. (Jan 3:16) Soh wee noa fi wahn fak dat Jehoava reeli lov wi. Wi proov dat wi lov Jehoava ahn Jeezas wen wi obay dehn. (Jan 14:15; 1 Jan 5:3) Ahn Jeezas gi wi wahn klyaa koman fi lov wan anada. (Jan 13:34, 35) Bot wi noh fi jos tel wi bradaz ahn sistaz dat wi lov dehn, wi haftu shoa dehn dat wi lov dehn bai di tingz weh wi du.​—1 Jan 3:18. w21.01 9 ¶6; 10 ¶8

Kristyanz weh anointid wid hoali spirit ga di hoap fi deh wid Jeezas fareva di rool lang wid ahn eena Gaad Kingdom. Dehn wahn akchwali deh wid Krais; dehn wahn si ahn, taak tu ahn, an eevn spen taim wid ahn. (Jan 14:2, 3) Kristyanz weh ga di hoap fi liv pahn di ert wahn aalso feel Jeezas lov an atenshan. Eevn doa dehn noh wahn si Jeezas, dehn frenship wid ahn wahn geh schranga wail dehn injai di bes laif weh Jehoava ahn Jeezas set fi dehn. (Isa. 9:6, 7) Wen Jeezas invait wi fi bee ih fren ahn wi aksep, wi geh wahn lata blesinz. Fi egzampl, wi di benifit fan ih lov ahn sopoat rait now. Wi ga di apachooniti fi liv fareva. Ahn weh moa impoatant, wi frenship wid Jeezas wahn leed wi tu di bes chrezha eva—wahn kloas rilayshanship wid Jeezas Pa, Jehoava. Da wahn speshal gif fi mek Jeezas kaal wi fi hihn fren! w20.04 25 ¶15-16

Di apasl Paal mi rait da leta tu di anointid Kristyanz eena Korint weh mi wahn geh rayz op bak tu laif fi liv da hevn. Gaad mi “set [dehn] apaat fi bee wan wid Krais Jeezas,” ahn Gaad “kaal [dehn] fi bee ih hoali peepl.” Paal mi aalso menshan “aala Krais falowaz weh don ded.” (1 Kor. 1:2; 15:18; 2 Kor. 5:17) Eena wahn nada leta weh Paal mi rait, ih mi seh dat di wan dehn weh ‘yoonaitid wid Jeezas wen dehn ded laik hihnʼ wahn aalso bee ‘yoonaitid wid Jeezas wen dehn geh rayz op bak tu laif jos laik hihn.ʼ (Roam. 6:3-5) Jeezas mi geh rayz op bak tu laif az wahn spirit ahn gaahn da hevn. Soh dat da di saym ting weh wahn hapm tu aala “Krais falowaz” hoo da di anointid Kristyanz. Paal mi rait dat Krais mi geh rayz op bak fahn di ded az “di fers wan [Lit., “fersfroot,” ftn.] weh geh rezorek fahn monks aala di peepl weh don ded.” (1 Kor. 15:20) Jeezas da-mi di fers wan fi eva geh rayz op bak fahn di ded az wahn spirit ahn fi geh evalastin laif. w20.12 5-6 ¶15-16

Tudeh, az soon az anointid Kristyanz ded, dehn geh rayz op bak fi liv da hevn. Di apasl Paal help wi fi bee shoar a dat wen wi reed 1 Korintyanz 15:51, 52. Wi ku onli imajin how hapi dehn wahn hapi. Di wan dehn weh wahn chaynj “kwika dan di blink a wahn aiy” wahn ga werk fi du wen dehn get da hevn. Di Baibl tel wi weh kaina werk dehn wahn du. Jeezas mi tel dehn: “An Ah wahn gi di persn weh win di vikchri ahn weh du weh Ah seh di atariti fi rool oava di nayshan dehn. Da persn wahn geh di saym atariti weh Ai geh fahn mai Faada. Ahn da persn wahn rool oava di nayshan dehn wid wahn aiyan rad weh ih wahn yooz fi brok op di nayshanz laik klay pat.”— Rev. 2:26, 27. w20.12 12 ¶14-15

Wen di apasl Paal mi rifaa tu Jeezas az “di fers wan [Lit., “fersfroot,” ftn.],” hihn mi-di seh dat ada hyoomanz weh mi ded afta Jeezas mi wahn geh rayz op bak tu laif fi goh liv da hevn. Di apasl dehn an ada anointid Kristyanz mi wahn fala Jeezas. (1 Kor. 15:18) Soon, dehn mi wahn geh rayz op bak tu laif fi liv da hevn, jos laik Jeezas. Wen Paal mi rait di leta tu di Korintyanz, “Krais falowaz” neva mi-di geh rayz op bak tu laif fi liv da hevn az yet. An akaadn tu Paal, dat mi wahn tek plays som taim eena di fyoocha. Hihn mi rait: “Eech wan wahn rezorek eena dis aada: di fers wan weh geh rezorek da di Krais. Den, di peepl weh bilangz tu di Krais wahn geh rezorek joorin di taim wen ih kohn bak fi deh wid ih peepl.” (1 Kor. 15:23; 1 Tes. 4:15, 16) Tudeh, wi di liv joorin da taim deh. Yes, di apasl dehn an ada anointid Kristyanz weh ded mi haftu wayt fi geh dehn riwaad fi liv da hevn ahn bee ‘yoonaitid wid Jeezas wen dehn geh rayz op bak tu laif jos laik hihn.ʼ​—Roam. 6:5. w20.12 5 ¶12; 6 ¶16-17

Di apasl Paal mi-di taak bowt wahn persn weh geh rayz op bak tu laif wid wahn badi weh ku liv da hevn—“wahn spirichwal badi.” (1 Kor. 15:43-44) Wen Jeezas mi liv pahn di ert, hihn mi ga wahn fizikal badi. Bot wen ih mi geh rayz op bak tu laif, hihn “mi kohn fi bee wahn spirit weh gi laif” ahn den ih gaahn bak da hevn. Dat da di saym ting weh wahn hapm tu anointid Kristyanz; dehn wahn geh rayz op bak wid wahn badi weh ku liv da hevn. Paal mi seh: “Jos laik how wee da laik di wan weh geh mek owta dos, saym way soh, wi wahn bee laik di wan weh kohn fahn hevn.” (1 Kor. 15:45-49) Memba dat Jeezas neva geh rayz op bak tu laif wid wahn hyooman badi. Paal mi gi wi di reezn wai wen ih mi tel wi: “Flesh ahn blod kyaahn bee paat a Gaad Kingdom” da hevn. (1 Kor. 15:50) Di apaslz an ada anointid Kristyanz neva mi wahn geh rayz op bak tu laif wid hyooman badi weh ku ratn. w20.12 10-11 ¶10-12

Gaad hoali spirit mi gaid som a Jeezas disaiplz eena di fers senchri fi rait bowt di rezorekshan a di wan dehn weh wahn liv da hevn. Di apasl Jan mi seh: “Mi dyaa bradaz, eevn doa wi da Gaad chiljren, wi noh noa yet weh wi wahn bee eena di fyoocha. Wi noa dat wen ih shoa ihself, wee wahn bee laik hihn.” (1 Jan 3:2) Soh anointid Kristyanz noh noa weh dehn wahn bee laik wen dehn geh rayz op bak tu laif fi liv da hevn wid spirit badi. Bot, dehn wahn si Jehoava wen dehn get dehn riwaad. Di Baibl gi wi sohn infamayshan bowt it. Di anointid wan dehn wahn deh wid Krais wen hihn “dischrai aala di govament dehn an aal atariti ahn powa.” Ahn “di laas enimi weh wahn geh dischrai, da det.” An afta aala dat hapm, Jeezas ahn di wan dehn weh rool lang wid ahn wahn put dehnself an evriting els anda Gaad kanchroal. (1 Kor. 15:24-28) Wi ku jos imajin how eksaitin da taim wahn bee! w20.12 8 ¶2

Laayal Kristyanz weh noh ga di hoap fi liv da hevn wid Krais ga di hoap a wahn rezorekshan tu. Di Baibl seh dat di apasl Paal an evribadi els weh goh da hevn da “paat a di fers rezorekshan fahn di ded.” (Fil. 3:11) Yu noh tink dat meenz dat wahn nada rezorekshan wahn tek plays afta dat? Dat da weh Joab mi seh mi wahn hapm tu hihn eena di fyoocha. (Job 14:15) Paal mi seh: “Di peepl weh bilangz tu di Krais wahn geh rezorek joorin di taim wen ih kohn bak fi deh wid ih peepl.” Ahn dehn wahn deh wid Jeezas da hevn wen ih dischrai aala di govament dehn an aal atariti ahn powa. Ahn “det wahn bee di laas enimi weh wahn geh dischrai.” Wi noa fi shoar dat di wan dehn weh geh rayz op bak tu laif fi liv da hevn wahn neva ded. (1 Kor. 15:23-26) Dehn wan weh ga di hoap fi liv pahn di ert ku luk faawod tu weh Paal mi seh eena di skripcha teks fi tudeh. Wi noa dat enibadi weh noh raichos kuda neva goh da hevn, soh di tingz weh Paal mi seh shoa wi dat eena di fyoocha wi ku luk faawod tu wahn rezorekshan rait ya pahn di ert. w20.12 6-7 ¶18-19

Wi mait wanda, ‘How Ah ku noa fi shoar dat Jehoava noh giv op pahn mi?ʼ Wen wi aks wiself da kweschan, wi don di ansa it aredi. Yaaz agoa, The Watchtower mi seh: “Wi [mait] kip aan di mek di saym mistayk oava ahn oava agen, ahn maybi wi stil di schrogl wid wahn bad habit weh wi mi ga bifoa wi staat tu serv Jehoava. . . . Yu mait tink tu yuself dat yu komit wahn sin weh Jehoava kuda neva fergiv yu fa. Ahn dat da egzakli weh Saytan waahn yu tink. Bot di fak dat yu feel sad ahn yu beks wid yuself sayka weh yu du da proof dat yu da noh wahn bad persn ahn dat Jehoava ku fergiv yu. Soh stay hombl ahn kip aan di pray tu Jehoava fi fergiv yu, fi help yu ga wahn kleen kanshans, fi help yu feel beta bowt yuself, ahn fi help yu stap mek di saym mistayk.” Bifoa di apasl Paal da-mi wahn Kristyan, hihn mi mek wahn lata seeryos mistayk. Ahn Paal mi memba evriting weh hihn mi du. (1 Tim. 1:12-15) Bot hihn mi bileev dat Jehoava kuda mi fergiv ahn bikaaz a di ransom sakrifais ahn dat di ransom da-mi wahn persnal gif weh Jehoava giv tu hihn. Soh dat da weh mi help Paal fi noh hoal aan tu schrang gilti feelinz. An eena da way deh, hihn kuda mi foakos pahn weh ih kuda mi du fi giv Jehoava ih bes dong tu di en. w20.11 27 ¶14; 29 ¶17

Saytan yooz lata tingz fi dischrak wi. Weh wi du wen dat hapm? Ih eezi fi tink dat dehnya tingz noh reeli bad. Fi egzampl, wi mait tink: ‘Wel, Ah noh wahn geh disfeloship if Ah du dis, soh Ai noh tink da sohnting seeryos.ʼ Da kaina tinkin veri rang. Ih wuda bee beta if wi aks wiself kweschanz laik dehnya: ‘Saytan di chrai yooz dis temtayshan fi dischrak mai haat? If Ah giv een tu rang dizaiyaz, Ai wuda gi Jehoava bad naym? If Ai du dis, ih wahn jraa mi kloasa tu mai Gaad, er ih wahn push mi weh fan ahn?ʼ Tink bowt dehndeh kweschan. Pray fi wizdom soh dat yu ku bee aanis wid yuself wen yu ansa dehn. Dat ku protek yu ahn help yu fi stan op schrang ahn noh giv een tu temtayshan, jos laik weh Jeezas mi du wen ih seh: “Goh fahn ya, Saytan!” (Mach. 4:10) Memba, wahn haat weh noh foakos noh wert notn. w20.06 12-13 ¶16-17

Wen wi hombl, wi wilin fi obay Jehoava bikaaz wi andastan dat fi hihn standadz gud fi wi. (Ifee. 4:22-24) Wen wi hombl, wi tink dat weh Jehoava waahn moa impoatant dan weh wee waahnt. Aalso wen wi hombl, wi si adaz az moa impoatant dan wee. Sayka dat, wi ga wahn gud rilayshanship wid Jehoava ahn wi bradaz ahn sistaz eena di kangrigayshan. (Fil. 2:3) If wi noh kyaaful, doh, wi ku staat tu ak laik peepl eena di werl weh prowd ahn selfish. Ih luk laik dat da-mi wahn prablem fi di Kristyanz bak eena di fers senchri C.E., bikaaz dis da weh di apasl Paal mi rait tu di Roamanz: “Ah di tel aala unu dat unu noh fi tink tu moch a unuself, bot unu fi bee sensabl eena di way unu tink bowt unuself.” Paal mi rekonaiz dat wi haftu rispek wiself. Bot wi need fi bee hombl soh dat wi kip di prapa vyoo a wiself ahn noh tink tu moch a wiself. w20.07 2 ¶1-2

Joorin di taim wen Aysa mi-di rool az king, di peesful taim weh dehn mi-di injai mi did kohn tu wahn en. Wahn big big aami wid moa dan wan milyan soalja mi kohn fahn Eetiyopya. Di komanda da-mi wahn man weh mi naym Zeera, ahn hihn mi kanfident dat ih kuda mi kanka Jooda. Bot Aysa mi chros eena Gaad; hihn neva chros eena wahn aami. Eena wahn pryaa, Aysa mi seh: “Help wi, Oa Jehoava wi Gaad, kaaz wi di pen pahn yoo, ahn da eena fi yoo naym wi di kom op gens dis krowd.” (2 Chron. 14:11) Aldoa di Eetiyopyan aami da-mi too taimz di saiz a Aysa aami, hihn mi noa dat Jehoava da wahn powaful Gaad weh ku help ih peepl. Dat da egzakli weh mi hapm; wid Jehoava help, Aysa mi kanka di Eetiyopyan aami. (2 Chron. 14:8-13) Wi noh noa egzakli weh wahn hapm tu eech wan a wi eena di fyoocha, bot wi doo noa dat di pees weh Jehoava peepl di injai rait now noh wahn laas fareva. In fak, Jeezas mi seh dat eena di laas dayz, ‘aala di nayshan dehn wahn hayt wi.ʼ—Mach. 24:9. w20.09 17-18 ¶14-16

Non a wi laik wen peepl insolt wi. Bot if wi enimi dehn insolt wi, an if weh dehn seh mek wi feel opset, wi ku geh diskorij. (Prov. 24:10) Soh how wi shuda feel wen peepl insolt wi? Jos laik di apasl Paal, wi ku bee “hapi . . . wen dehn insolt [wi].” Wai? Bikaaz wen peepl insolt wi er ton gens wi, ih shoa dat wee da Jeezas chroo disaiplz. (1 Peet. 4:14) Jeezas mi seh dat peepl mi wahn persikyoot ih falowaz. (Jan 15:18-20) Dat mi hapm tu di Kristyanz eena di fers senchri. Eena dehndeh dayz, peepl weh mi liv anda di Greek kolcha mi vyoo Kristyanz az week ahn foolish. Ahn di Jooz mi tink dat Kristyanz da “jos aadineri peepl,” laik fi egzampl, di apasl Peeta ahn Jan. (Aks 4:13) Wahn lata peepl mi tink dat Kristyanz da week peepl weh kyaahn fait fi dehnself. Dehn neva get involv eena palitiks, soh dehn mi kyaahn mek chaynjiz eena di govament. Dehn neva jain eni aami, soh dehn kudn fait eena waar er difen dehnself. Ahn peepl eena di kamyooniti mi luk dong pahn dehn. Yu tink di Kristyanz eena di fers senchri mi mek di bad tingz weh peepl seh bowt dehn stap dehn? Non ataal! w20.07 14-15 ¶3-4

Di apasl Jan mi lov ih bradaz ahn sistaz wahn lat, an ih mi waahn mek dehn ga schrang fayt. Fi hihn lov ahn kansaan fi dehn klyaa fi si eena di kongsl weh hihn mi gi dehn eena di chree letaz weh ih mi rait. Ih veri inkorijin fi noa dat di peepl weh wahn rool wid Jeezas da hevn shoa lov ahn kansaan fi peepl jos laik Jan. (1 Jan 2:27) Mek aala wi tek tu haat di kongsl hihn mi gi wi. Mek wi mek op wi main fi liv akaadn tu di chroot. Dat meenz dat wi wahn obay Jehoava eena evriting weh wi du. Stodi fi Hihn Werd ahn put yu chros eena it. Bil schrang fayt eena Jeezas. Rijek hyooman tinkin an apastayt teechinz. Noh eva play laik yu di serv Jehoava ahn saym taim du tingz weh rang, ahn noh eva lisn tu peepl weh chrai kanvins yu fi du weh rang. Liv akaadn tu Jehoava hai moaral standadz. Ahn mek wi fergiv wi bradaz ahn sistaz if dehn opset wi, ahn mek wi help eni wan a dehn weh need it. Wen wi du dat, ih wahn help dehn stay schrang. Den, noh mata weh wi goh chroo, wi wahn kip di fala di chroot. w20.07 24-25 ¶15-17

Jehoava alow eech wan a ih faytful servant dehn fi ga wahn roal eena ih kangrigayshan. Eevn doa aala wi ga wahn difrent roal, eech wan a wi preshos tu Jehoava an aala wi need wan anada. Di apasl Paal mek it klyaa dat non a wi kyaahn luk pahn wahn nada servant a Jehoava ahn seh “Ai noh need yoo.” (1 Kor. 12:21) If wi waahn di kangrigayshan ga pees, wi haftu lov wan anada ahn werk tugeda. (Ifee. 4:16) Wen wi werk tugeda, di kangrigayshan wahn groa schranga an evribadi wahn lov wan anada moa ahn moa. Chroo ih hoali spirit, Jehoava apoint aala di elda dehn eena di kangrigayshan. Bot eech elda ga difrent spirichwal gif ahn skilz. (1 Kor. 12:17) Som a dehn mait jos staat serv az elda ahn dehn noh ga lata ekspeeryens. Adaz mait kyaahn du moch bikaaz a dehn ayj ahn dehn mait ga helt prablemz. Bot no elda shuda luk pahn wahn nada elda ahn tink dat dehn noh yoosful eena di kangrigayshan. Insteda dat, eech elda shuda fala di kongsl weh Paal gi da Roamanz 12:10. w20.08 26 ¶1-2; 27 ¶4

Fi help wi stay pahn di road tu laif, Jehoava yooz ih aaganaizayshan fi gaid wi. Wen Gaad aaganaizayshan gi wi wahn nyoo eksplanayshan a wahn Baibl teechin er gi wi inschrokshanz pahn moaral standadz, wi aksep dehn ahn put dehn intu praktis. Bot weh wi du wen Gaad aaganaizayshan mek wahn chaynj weh afek ada paats a wi laif, laik wen dehn disaid fi sel di Kingdom Haal wehpaat wi aten wi meetinz? Wi wahn kip wi jai if wi memba dat di werk weh wi du da fi Jehoava ahn dat hihn di leed fi hihn aaganaizayshan. (Kol. 3:23, 24) King Dayvid mi set wahn gud egzampl wen hihn mi doanayt moni fi bil di templ. Hihn mi seh: “Da hoo mee ahn mai peepl dat wi ku mek valanteri aafrin laik dis? Bikaaz evriting da fahn yoo, ahn weh wi gi yoo, da fahn yu oan han.” (1 Chron. 29:14) Da di saym ting wid wee tudeh; eni amonk a moni weh wi giv tu Jehoava kohn fahn hihn eena di fers plays. Stilyet, ih mek Jehoava feel veri hapi wen wi gi wi taim, wi enerji, ahn di tingz weh wi oan fi du fi hihn werk.​—2 Kor. 9:7. w20.11 22-23 ¶14-16

Az Witnisiz a Jehoava, wi sokses noh bays pahn humoch peepl wi bring eena Gaad aaganaizayshan. (Look 8:11-15) Tu Jehoava, az lang az wi noh giv op eena di preechin werk wi di ga sokses. Wai? Bikaaz wi di obay hihn an ih Son. (Maak 13:10; Aks 5:28, 29) Wi ga wahn speshal reezn fi preech az moch az wi kud now: Di en a dis werl deh kloas! Wi noh ga lata taim lef fi preech dis gud nyooz weh ku sayv peepl laif. Noh hoal bak ner wayt fi evriting eena yu laif fi bee perfek soh dat yu ku du dis impoatant werk. Now da di taim fi schrentn yu dizaiya fi preech, fi laan moa bowt di mesij weh deh eena di Baibl, fi bil op yu korij, ahn fi disiplin yuself. Moa dan ayt milyan peepl di preech di gud nyooz aal oava di werl. Soh wi invait yu fi werk lang wid wi soh dat yu ku feel di jai weh onli kohn fahn Jehoava. (Neh. 8:10; Look 5:10) Preech az moch az yu kud ahn kantinyu fi du dis til wen Jehoava seh di werk don. w20.09 7 ¶18-20

Wi noh fi mek mateeryal tingz dischrak wi. Som peepl weh rich tink dehn powaful, bot di Baibl seh dat richiz ku chrik wi ahn mek wi looz wi lov fi Jehoava. Ih ku mek wi looz wi apreeshiayshan fi di Werd a Gaad, ahn bifoa wi noa it, wi noh eevn waahn goh preech tu adaz. (Mach. 13:22) If wi waahn protek di tingz weh Jehoava gi wi, wi need fi ak faas wen wi si daynja. Wi ku plan heda taim weh wi wahn du if wi si wahn imoaral seen, kruwil vailens, er apastayt mateeryal wail wi di yooz di Intanet er wail wi di wach wahn moovi er TV proagram. If wi redi fi weh ku hapm, wi ku ak rait away fi protek wi frenship wid Jehoava ahn stay kleen eena fi hihn sait. (Ps. 101:3; 1 Tim. 4:12) Wi need fi protek di preshos tingz weh Jehoava gi wi—tingz laik di chroot fahn di Baibl ahn di privilij fi teech dehndeh chroots tu adaz. If wi protek dehnya chroots, wi wahn injai wahn kleen kanshans fronta Gaad, wi wahn ga wahn laif weh ga reel meenin, ahn wi wahn feel di hapinis weh kohn wen yu help sombadi fi geh fi noa Jehoava. w20.09 30 ¶16-19

Yoo da wahn baptaiz servant a Jehoava? If yu ansa da yes, wen yoo mi geh baptaiz yu mi shoa evribadi dat yu ga fayt eena Jehoava ahn dat yu wilin fi serv ahn lang wid fi hihn aaganaizayshan. Tudeh, Jehoava di leed ih aaganaizayshan eena wahn way weh shoa weh kaina persn hihn, wat da ih perpos dehn, ahn wat da ih standad dehn. Mek wi luk pahn chree a Jehoava kwalitiz weh wi ku si eena fi hihn aaganaizayshan. Fers, “Gaad chreet evribadi di saym way.” (Aks 10:34) Da bikaaz a lov Jehoava mi sen fi hihn Son fi pay di ransom prais soh dat “evribadi ku bee free fahn sin.” (1 Tim. 2:6; Jan 3:16) Jehoava yooz fi hihn peepl fi preech di gud nyooz tu evribadi hoo wahn lisn, ahn dis da how hihn help wahn lata peepl fi benifit fahn di ransom. Sekant, Jehoava da wahn Gaad a pees an aada. (1 Kor. 14:33, 40) Dats wai wi shuda ekspek dat di wan dehn weh wership hihn wuda serv ahn az wahn aaganaiz ahn peesful groop. Terd, Jehoava da di “Gran Inschrokta.” (Isa. 30: 21) Dat da wai ih aaganaizayshan werk haad fi teech peepl bowt ih Werd di Baibl eena di kangrigayshan an eena di minischri. w20.10 20 ¶1-3