Aagas

Wai yu tink dat Jehoava ga wahn ‘buk weh mi geh rait op fronta hihnʼ wid sohn naym a peepl weh shoa bai di way dehn taak dat dehn fyaa hihn ahn meditayt pahn fi hihn naym? Weh wi seh shoa weh deh eena wi haat. Jeezas mi seh: “Kaaz wateva ful op wahn persn haat, dat da weh ih wahn taak bowt.” (Mach. 12:34) Jehoava waahn evribadi weh lov hihn fi injai evalastin laif eena di nyoo werl. Di way how wi taak ku shoa weda er nat Jehoava wahn aksep wi wership. (Jay. 1:26) Sohn peepl weh noh lov Jehoava taak eena wahn way weh shoa dat dehn beks, dat dehn noh kain, ahn dat dehn prowd. (2 Tim. 3:​1-5) Wi noh waahn bee laik dehndeh kaina peepl. Wi waahn bee redi fi pleez Jehoava wid di way wi taak. Bot yu tink Jehoava wahn bee hapi wid wi if wi taak eena wahn kain way da wi meetin dehn er eena di minischri bot wi taak eena wahn rof way tu wi famili membaz wen nobadi di si wi?—1 Peet. 3:7. w22.04 5 ¶4-5

Gaad put it eena di ten haan ahn di wail bees dehn haat fi mek dehn dischrai Babilan di Grayt. Yes, Jehoava wahn moov di nayshanz fi yooz di bees weh brait red, weh reprizent di United Nations, fi atak ahn dischrai aala faals rilijan. (Rev. 18:​21-24) Weh dis meenz fi wee? Wi need fi mek shoar dat wi wership “kleen ahn pyoar eena di sait a wi Gaad.” (Jay. 1:27) Wi shuda neva mek eniting fahn Babilan di Grayt afek wi wership tu Jehoava laik faals teechinz, paygan selibrayshanz, di loa moaral standadz a di werl, an eniting weh ga fi du wid spiritizm. Ahn wi waahn kantinyu fi waan peepl fi “kom owt fahn monks ahn” soh dat Gaad noh fain dehn gilti a di tek paat eena fi shee sin dehn.—Rev. 18:4. w22.05 11 ¶17; 14 ¶18

Payrents, chrai fain difrent wayz fi teech yu chiljren bowt Jehoava ahn bowt aala di gud tingz weh hihn don du fi yu. (Deut. 6:​6, 7) Dis impoatant fi du, espeshali if yu marij mayt noh serv Jehoava ahn soh yu kyaahn stodi regyula wid yu chiljren wen yu deh hoam. Wahn sista weh naym Christine seh: “Ih mi haad fi mek Ah fain wahn apachooniti fi taak tu mi chiljren bowt Jehoava. Bot weneva wahn apachooniti kom op, Ah wuda tek advantij a it.” Pahn tap a dat, seh pazitiv tingz bowt Jehoava aaganaizayshan ahn bowt yu bradaz ahn sistaz. Noh taak bad bowt di eldaz. Weh yu seh bowt dehn ku help yu chiljren disaid if dehn wahn goh tu di eldaz fi help wen dehn need it. Werk haad fi ga pees eena yu famili. Aalwayz shoa yu hozban ahn yu chiljren dat yu lov dehn. Taak bowt yu hozban eena wahn kain way weh shoa dat yu rispek ahn, an chrayn yu chiljren fi du di saym ting. Wen yu du dat, ih mek yu ga pees eena yu famili an ih eeziya fi mek yu chiljren laan bowt Jehoava.—Jay. 3:18. w22.04 18 ¶10-11

Di mesij weh Jeezas mi sen fi di Kristyanz da Efisos mi taak bowt humoch dehn bayr op ahn how dehn neva stap serv Jehoava, eevn doa dehn mi-di goh chroo chraiyalz. Bot dehn lov fi Jehoava neva az schrang az di lov weh dehn mi gat eena di biginin. Soh, if dehn mi waahn Jehoava aksep dehn wership, dehn mi need fi mek dehn lov fi Jehoava schrang agen. Saym way soh, wi need fi du moa dan jos bayr op. Gaad noh onli inchrestid eena weh wi du bot aalso wai wi du it. Soh wi need fi bayr op fi di rait reezn. Jehoava kay bowt di reezn wai wi wership hihn. Hihn waahn wi wership ahn owta lov ahn bikaaz wi tankful tu hihn. (Prov. 16:2; Maak 12:​29, 30) Wi need fi kip pan di wach. Di kangrigayshan da Sardis mi ga wahn difrent prablem. Eevn doa dehn mi serv Jehoava eena di paas, dehn mi stap du dat afta wahn wail. Jeezas mi tel dehn fi “wayk op.” (Rev. 3:​1-3) Af koars, Jehoava noh wahn ferget di werk weh wi du.—Heeb. 6:10. w22.05 3 ¶6-7

Salaman mi kaal di jai weh wi feel wen wi werk haad “di gif weh kohn fahn Gaad.” (Eccl. 5:​18, 19) Salaman mi noa weh ih mi-di seh bikaaz hihn mi werk haad. Hihn mi bil sohn hows, plaant sohn grayp aachad, ahn mek sohn pool ahn gyaadn. Hihn mi aalso bil sohn siti. (1 Ki. 9:19; Eccl. 2:​4-6) Dat da-mi haad werk, ahn hihn mi feel gud bowt di werk weh ih mi du. Bot Salaman mi noa dat dehndeh tingz neva mi wahn mek hihn hapi. Hihn mi need fi du moa. Hihn mi aalso du wahn lata tingz fi Jehoava. Fi egzampl, fi sevn yaaz hihn mi soopavaiz di kanschrokshan a Jehoava byootiful templ weh dehn mi wahn yooz fi wership ahn. (1 Ki. 6:38; 9:1) Afta Salaman mi don du aala dehndeh tingz, hihn mi riyalaiz dat di moas impoatant ting da fi serv Jehoava. Dis da weh hihn mi rait: “Afta wi don kansida di hoal sichuwayshan, di rizolt da dis: Fyaa di chroo Gaad ahn kip ih komanment dehn.”—Eccl. 12:13. w22.05 22 ¶8

Di Baibl gat een wahn lata egzampl a peepl weh Jehoava mi fergiv. Yoo ku tink bowt eni egzampl? Maybi yu tink bowt King Manaaseh. Hihn da-mi wahn wikid man weh du wahn lata terabl tingz wen ih mi sin gens Jehoava. Hihn mi wership sohn faals gaad an ih mi inkorij adaz fi du di sayhn ting. Hihn mi eevn kil ih oan chiljren an aafa dehn az sakrifais tu sohn faals gaad. An eevn wers dan dat, hihn mi put wahn imij a wahn faals gaad eena Jehoava hoali templ. Dis da weh di Baibl seh bowt Manaaseh: “Hihn mi du wahn lata bad tingz weh Jehoava hayt fi ofen ahn.” (2 Chron. 33:​2-7) Bot wen Manaaseh mi shoa dat ih reeli sari fi weh ih du, Jehoava mi redi fi fergiv ahn. (2 Chron. 33:​12, 13) Maybi yu aalso tink bowt King Dayvid. Hihn mi komit sohn seeryos sin gens Jehoava. Hihn mi eevn komit adolchri ahn merda. Bot wen Dayvid mi shoa dat ih reeli sari fi weh ih du an ih mi admit dat ih sin gens Jehoava, Jehoava mi fergiv ahn tu. (2 Sam. 12:​9, 10, 13, 14) Yes, wee ku bee shoar dat Jehoava redi fi fergiv. w22.06 3 ¶7

Ih noh aalwayz eezi fi mek wi kip wi hoap schrang. Wi ku geh taiyad a wayt fi mek Gaad pramis dehn kohn chroo. Tu wee ih mait feel laik wi di wayt fi wahn lang taim, bot hihn noh si taim di way wee seeʼt. (2 Peet. 3:​8, 9) Jehoava wahn mek ih pramis dehn kohn chroo eena di bes way pasabl, bot hihn mait noh du tingz wen wee ekspek ahn fi du it. Weh ku help wi fi kip wi hoap schrang wail wi wayt fi mek Jehoava pramis dehn kohn chroo? (Jay. 5:7) Stay kloas tu Jehoava, bikaaz hihn da di wan weh wahn mek wi hoap kohn chroo. Fi mek wi ku ga hoap, wi haftu ga schrang fayt dat Jehoava egzis ahn dat “hihn wahn bles di wan dehn weh di chrai dehn bes fi du ih wil.” (Heeb. 11:​1, 6) Soh if wi reeli bileev dat Jehoava egzis, wi wahn bee moa kanfident dat hihn wahn mek ih pramis dehn kohn chroo. Fi kip wi hoap schrang, wi haftu pray tu Jehoava ahn reed di Baibl. Eevn doa wi kyaahn si Jehoava, wi ku jraa kloas tu ahn. Wi ku pray tu hihn ahn bee shoar dat ih wahn lisn tu wi.—Jer. 29:​11, 12. w22.10 26-27 ¶11-13

Imajin dis. Joab di sidong eena ashiz an ih deh eena lata payn. (Joab 2:8) Ih soa-kaal fren dehn kip di seh dat hihn da noh wahn gud persn ahn dehn chrai dischrai ih repyutayshan. Joab mi don ga wahn lata tingz fi deel wid ahn pahn tap a dat, hihn mi haftu deel wid di sadnis weh ih feel bikaaz ih chiljren mi ded. At fers, Joab neva seh notn. (Joab 2:13) If Joab soa-kaal frenz mi tink dat bikaaz ih neva seh notn ih meenz dat hihn mi wahn abandan Jehoava, den dehn mi rang. Maybi Joab mi eevn rayz ih hed ahn luk pahn dehn wen ih seh: “Ah noh wahn giv op mi laayalti eevn if Ah haftu ded!” (Joab 27:5) Weh mi help Joab fi ga korij ahn bee schrang eevn doa ih mi-di sofa wahn lat? Eevn wen Joab mi feel reeli sad, hihn neva looz hoap dat fi hihn lovin Gaad wuda help ahn. Hihn mi noa dat eevn if ih ded, Jehoava wuda bring ahn bak tu laif.—Joab 14:​13-15. w22.06 22 ¶9

Jehoava, di Wan weh kriyayt hevn an ert, gi wi wahn preshos gif. Hihn alow wi fi pray tu ahn. Jos tink bowt it: Wi ku poar owt wi haat tu Jehoava eni taim an eena eni langwij. Wi ku pray tu wi lovin Faada eevn if wi deh eena wahn haaspital bed er eena prizn. Ahn wi ku bee shoar dat Jehoava lisn tu wi. Wi soh tankful fi dis gif, noh chroo? King Dayvid mi cherish fi hihn privilij fi pray. Hihn mi sing tu Jehoava ahn seh: “Mek mi pryaaz bee laik insens weh geh pripyaa fronta yu.” (Ps. 141:​1, 2) Eena Dayvid taim, di prees dehn yoostu tek dehn taim fi pripyaa di hoali insens weh dehn mi yooz eena chroo wership. (Eks. 30:​34, 35) Soh weh Dayvid mi-di seh da dat ih mi wahn tink gud bowt weh ih mi waahn tel Jehoava wen ih pray tu ahn. Ahn dat da egzakli weh wee waahn du tu. Wi waahn wi pryaaz mek Jehoava hapi. w22.07 20 ¶1-2; 21 ¶4

Venjans bilangz tu Jehoava. Jehoava noh gi wi di atariti fi tek rivenj gens sohnbadi weh seh er du sohnting weh hert wi. (Roam. 12:​20, 21) Sins wi noh perfek ahn wi noh ga aala di faks, wi kyaahn joj wahn sichuwayshan di way how Gaad joj. (Heeb. 4:13) Sohntaim, wi feelinz ku mek it haad fi mek wi noa wat da di rait ting fi du. Jehoava mi mek Jaymz rait dis: “Wen sombadi geh beks, ih noh du weh rait eena Gaad sait.” (Jay. 1:20) Wee ku chros dat Jehoava wahn du weh rait ahn hihn wahn tek kayr a mataz eena fi hihn oan taim. Wen wi fergiv, wi shoa dat wi chros eena Jehoava jostis. Wen wi lef mataz eena Jehoava han, wi shoa dat wi chros dat hihn wahn geh rid a aala di prablemz weh sin kaaz. Eena di nyoo werl, “wi noh wahn memba aala dehndeh tingz weh mi deh eena di paas ahn dehn noh wahn afek wi haat eeda.”—Isa. 65:17. w22.06 10-11 ¶11-12

Di fak dat peepl di chreet wi bad da proof dat wi ga Jehoava blesin. (Mach. 5:​11, 12) Di Devl deh bihain aala dis. Bot Jeezas moch moa powaful dan Saytan! Sins Jeezas di sopoat dis werk, di gud nyooz wahn reech peepl aal rong di werl fahn aala di nayshan dehn. How wi noa dat? Wahn nada chalenj weh wi ga wen wi di preech da dat peepl taak difrent langwij. Eena di vizhan weh Jeezas mi gi di apasl Jan, Jeezas akchwali mi-di tel ahn dat dat neva mi wahn stap wi fahn preech di gud nyooz. (Rev. 14:​6, 7) How wi deel wid da chalenj? Wi di gi az moch peepl az pasabl di chaans fi hyaa di Kingdom mesij. Tudeh, peepl fahn aal rong di werl ku reed infamayshan weh bays pahn di Baibl pahn wi websait, jw.org, bikaaz ih deh eena moa dan 1,000 langwij! Di Govanin Badi mi aproov fi chranslayt di Injai Laif Fareva! buk, weh da wi mayn poblikayshan weh wi yooz fi mek disaiplz, eena moa dan 700 langwij! w22.07 9 ¶6-7

Jeezas mi feel kompashan fi peepl. Di apasl Machyu mi seh: “Wen ih si di krowd a peepl, ih haat gaan owt tu dehn, kaaz dehn da-mi laik sheep weh dehn oana chreet bad ahn dash wan said. Dehn da-mi laik sheep widowt wahn shepad.” (Mach. 9:36) Ahn how Jehoava mi feel? Jeezas seh: “Mai Faada da hevn noh waahn non a dehnya lee wan fi geh laas.” (Mach. 18:14) Dis mek wi feel hapi bikaaz ih shoa dat Jehoava lov wi wahn lat. Soh az wi geh fi noa Jeezas beta, wi lov fi Jehoava wahn groa schranga. Yu ku aalso laan fi shoa moa lov ahn bee wahn machoar Kristyan wen yu spen taim ahn geh fi noa machoar bradaz ahn sistaz eena di kangrigayshan. Noatis how hapi dehn hapi. Dehn noh ga no rigret bowt dehn disizhan fi serv Jehoava. Aks dehn fi tel yu bowt som a di tingz weh dehn ekspeeryens eena dehn servis tu Jehoava. Wen yu ga wahn impoatant disizhan fi mek, aks dehn fi advais. Memba dat “wen wahn lata peepl gi yu advais, yu wahn ga sokses.” w22.08 3 ¶6-7

Aala wi wahn fays difrent chraiyalz. Bot wi wahn neva haftu fays wahn chraiyal pahn wi oan. Laik wahn lovin pa, Jehoava aalwayz di wach oava wi. Hihn deh kloas tu wi, ih redi fi lisn tu wi wen wi aks fi help, an ih eega fi sopoat wi. (Isa. 43:2) Wi shoar dat wi ku bayr op anda eni chraiyal bikaaz hihn gi wi evriting weh wi need fi noh giv op. Ih gi wi di privilij fi pray tu ahn, ih gi wi di Baibl ahn soh moch spirichwal food, an ih gi wi lovin bradaz ahn sistaz fi help wi wen wi need it. Wi soh tankful dat wi ga wahn hevnli Faada weh wach oava wi! Wi feel laik di saamis weh seh: “Wi haat rijais eena ahn.” (Ps. 33:21) Wi ku shoa Jehoava dat wi tankful dat ih lov ahn kay fi wi wen wi mek gud yoos a evriting weh ih gi wi fi help wi. Ahn wee haftu du wi paat soh dat Gaad kantinyu tek kayr a wi. If wee kantinyu du wi bes fi obay Jehoava ahn du weh hihn seh da di rait ting fi du, hihn wahn wach oava wi fareva! w22.08 13 ¶15-16

Wahn lata peepl tudeh noh noa hoo dehn ku chros. Dehn noh shoar if dehn ku chros peepl weh dehn rispek, laik palitishan, saiyentis, ahn biznizman. Dehn mait noh feel shoar if dehnya peepl waahn di bes fi dehn. Pahn tap a dat, dehn noh rispek di rilijos leedaz weh klaym seh dehn da Kristyan. Soh ih noh fi sopraiz wi dat dehn noh chros di Baibl, di buk weh dehnya rilijos leedaz klaym seh dehn di fala. Aala Jehoava peepl kanvins dat hihn da di Gaad weh aalwayz tel di chroot an ih aalwayz waahn di bes fi wi. (Ps. 31:5; Isa. 48:17) Wi noa dat wi ku chros weh eena di Baibl. Noatis weh wahn ekspert weh stodi di Baibl seh: “Notn weh Gaad Werd seh da lai, an eniting weh hihn seh aalwayz kohn chroo. Gaad peepl ku chros weh hihn seh bikaaz dehn put dehn chros eena ahn.” w23.01 2 ¶1-2

Wi bil op wi bradaz ahn sistaz wen wi help dehn fi schrentn dehn fayt eena Jehoava. Som a dehn ga peepl weh teez dehn bikaaz dehn da Witnisiz. Adaz haftu deel wid sohn seeryos helt prablemz er dehn di chrai noh fi feel diskorij bikaaz sohnbadi hert dehn feelinz. Den dehn ga sohn ada bradaz ahn sistaz weh di wayt fi wahn lang taim fi mek dis sistem kohn tu wahn en. Aala dehnya tingz ku tes wi bradaz ahn sistaz fayt. Di bradaz ahn sistaz eena di fers-senchri kangrigayshan mi gaahn chroo sohn simila sichuwayshan. Di apasl Paal mi yooz di Baibl fi schrentn ih bradaz ahn sistaz fayt. Fi egzampl, maybi di bradaz weh da-mi Joo neva noa weh fi seh wen dehn famili kritisaiz dehn ahn tel dehn dat di Jooish rilijan beta dan fi dehn wan. Fi shoar, di leta weh Paal mi sen tu di Heebroo Kristyanz mi schrentn dehn wahn lat. (Heeb. 1:​5, 6; 2:​2, 3; 9:​24, 25) Di way how Paal mi eksplayn tingz mi help dehn fi noa weh fi seh tu enibadi, inkloodin dehn famili membaz weh neva serv Jehoava. w22.08 23-24 ¶12-14

Peepl eena Saytan werl noh noa hoo dehn ku chros. Dehn kyaahn chros nobadi, kaaz di leedaz eena bizniz, palitiks, ahn rilijan lai ahn cheet dehn. Dehn kyaahn chros dehn frenz, naybaz, an eevn famili membaz. Dis noh fi sopraiz wi, bikaaz di Baibl mi prafesai dat eena “di laas dayz . . . , peepl . . . noh wahn bee laayal. . . . Dehn wahn slanda eech ada. . . . Dehn wahn bichray wan anada.” Dat meenz dat peepl wahn bee laik Saytan, di gaad a dis werl, weh nobadi ku chros. (2 Tim. 3:​1-4; 2 Kor. 4:4) Az Kristyanz, wee noa dat wi ku chros Jehoava eena evriting. Wee kanvins dat hihn lov wi ahn dat hihn “wahn neva abandan” fi hihn frenz. (Ps. 9:10) Wi ku aalso chros Jeezas Krais bikaaz hihn mi giv op ih laif fi wi. (1 Peet. 3:18) Ahn wi don laan fahn wi oan ekspeeryens dat wi ku chros di gaidans weh wi geh fahn di Baibl.—2 Tim. 3:​16, 17. w22.09 2 ¶1-2

Chroo hapinis da noh jos wahn feelin weh kom ahn goh. Da sohnting weh wahn persn ku feel fi ih hoal laif. How dat pasabl? Jeezas mi help wi fi andastan how eena di Sermon Pahn di Mongtin, wen ih mi seh: “Di wan dehn hoo noa seh dehn need Gaad wahn bee hapi.” (Mach. 5:3) Jeezas mi noa dat wi “need Gaad.” Hihn mi noa dat Jehoava Gaad, wi Kriyayta, mi mek wi wid wahn schrang dizaiya fi geh fi noa ahn wership Ahn. Ahn sins Jehoava da “di hapi Gaad,” enibadi weh wership hihn ku bee hapi tu. (1 Tim. 1:11) Yu tink wi ku bee hapi onli if wi noh ga prablemz? No. Eena Jeezas Sermon Pahn di Mongtin, hihn mi seh dat eevn “di wan dehn weh di moan ahn baal” ku stil bee hapi. An ih mi seh dat “di wan dehn weh fays persikyooshan fi di sayk a raichosnis” ku bee hapi tu. (Mach. 5:​4, 10, 11) Jeezas mi-di teech wi dat chroo hapinis noh dipen pahn wi sichuwayshan eena laif. Wi ku bee hapi if wi geh fi noa Gaad ahn jraa kloas tu ahn.—Jay. 4:8. w22.10 6 ¶1-3

Wizdom help wahn Kristyan fi andastan dat “wahn taim deh fi kip kwaiyet ahn wahn taim deh fi taak.” (Eccl. 3:7) Da sohn konchri, dehn wuda seh: “Werdz da laik silva, bot sailens da laik goal.” Dis meenz dat sohntaim ih beta fi stay kwaiyet dan fi taak. Mek wi luk pahn wahn egzampl. Eena wan ayrya, dehn ga wahn elda weh ga lata ekspeeryens. Lata taim, eldaz fahn ada kangrigayshanz wuda aks ahn fi help wen dehn ga wahn tof sichuwayshan fi deel wid. Noatis weh wahn nada elda eena da ayrya seh bowt dis elda: “Hihn aalwayz kyaaful fi noh shayr praivit infamayshan bowt ada kangrigayshanz weh ih help.” Di ada eldaz weh serv lang wid dis brada rispek ahn fi di wizdom weh ih shoa. Ahn dehn ku chros dat hihn noh wahn tel adaz bowt eni praivit mataz eena di kangrigayshan. Wi need fi bee aanis, tu, if wi waahn mek adaz chros wi. Wi chros wahn aanis persn bikaaz wi noa ih wahn aalwayz tel di chroot.—Ifee. 4:25; Heeb. 13:18. w22.09 12 ¶14-15

Wahn lata peepl rifyooz fi lisn wen chroo wizdom “di hala owt haad eena di schreet.” (Prov. 1:20) Akaadn tu di Baibl, dehn ga chree groop a peepl weh rijek wizdom. Dehn da peepl weh “noh ga ekspeeryens,” peepl weh “lov mak adaz,” ahn peepl weh “foolish.” (Prov. 1:​22-25) Dehn wan weh “noh ga ekspeeryens” da peepl weh bileev evriting weh dehn hyaa ahn weh eezi fi geh fool. (Prov. 14:15) Fi egzampl, milyanz a peepl bileev di lai weh rilijos ahn politikal leedaz tel dehn. Ahn dehn shak wen dehn fain owt dat dehn leedaz lai tu dehn. Bot dehn wan weh noh ga ekspeeryens, laik weh Proverbs 1:22 taak bowt, chooz fi liv da way bikaaz dehn laik it soh. (Jer. 5:31) Dehn noh waahn laan weh di Baibl teech er fala ih standadz. Fi shoar wi noh waahn bee laik dehndeh peepl weh noh waahn laan di chroot.—Prov. 1:32; 27:12. w22.10 19 ¶5-7

Gaad aaganaizayshan gi wi inschrokshanz fi kip wi sayf. Dehn kip di rimain wi fi giv di eldaz wi kantak infamayshan soh dat dehn ku noa wehpaat wi deh joorin wahn imerjensi. Wi mait aalso geh inschrokshanz fi eeda stay er lef fahn wehpaat wi deh, ahn fi geh di tingz weh wi need. Er wi mait eevn geh dairekshan pahn how er wen fi help adaz. If wi noh obay di inschrokshanz weh dehn gi wi, den wi ku put wi laif ahn di laif a di eldaz weh di tek kayr a wi eena daynja. (Heeb. 13:17) Wahn lata bradaz ahn sistaz mi haftu lef dehn hows bikaaz a wahn dizaasta. Soh dehn mi haftu du dehn bes fi adap tu dehn nyoo sichuwayshan ahn du moa eena dehn servis tu Jehoava. Dehn kantinyu “preech di gud nyooz a di werd a Gaad,” jos laik di erli Kristyanz weh mi skyata bowt bikaaz a persikyooshan. (Aks 8:4) Wen dehn preech, dat help dehn fi stay foakos pahn di Kingdom insteda foakos pahn weh dehn di goh chroo. Sayka dat, dehn aalwayz hapi ahn ga pees. w22.12 19 ¶12-13

Jehoava valyu eech wan a wi. Bifoa Jeezas mi sen owt ih apasl dehn fi goh preech, ih mi help dehn fi noh bee frayd fi persikyooshan. (Mach. 10:​29-31) Hihn mi du dis wen ih taak tu dehn bowt sohn lee berd weh mi kaman eena Izrel. Dehndeh berd neva wert moch eena Jeezas dayz. Bot hihn mi tel ih disaipl dehn: “Non a dehn wahn jrap da grong widowt unu Faada noa bowt it.” Hihn mi aalso tel dehn: “Unu wert moa dan aala dehnya lee berd.” Soh Jeezas mi-di rimain ih disaiplz dat Jehoava valyu eech wan a dehn, soh dehn neva ga no reezn fi bee frayd fi persikyooshan. Fi shoar, Jeezas disaiplz mi memba weh Jeezas tel dehn wen dehn si di lee berd dehn wail dehn mi-di preech eena difrent vilij ahn tong. Enitaim yu si wahn lee berd, memba dat Jehoava kay bowt yoo tu, bikaaz yu “wert moa dan aala dehnya lee berd.” Wid fi hihn sopoat, yu noh haftu bee frayd wen yu fays persikyooshan. w23.03 18 ¶12

Sohntaim, wi goh chroo wahn lata prablemz. Fi egzampl, wi famili mait ton gens wi er wi mait looz wi jab. Wen wi goh chroo prablemz fi wahn lang taim, ih mait mek wi feel laik wi noh ga hoap, an ih mait mek wi feel dipres. Saytan yooz dehndeh tingz fi mek wi tink dat Jehoava noh lov wi. Saytan waahn mek wi tink dat Jehoava ahn fi hihn aaganaizayshan da di reezn wai wi di sofa. Di Izrelaits weh mi liv da Eejip az slayv mi gaahn chroo sohnting laik dat. Eena di biginin, dehn mi bileev dat Jehoava mi asain Moaziz an Ayron fi set dehn free. (Eks. 4:​29-31) Bot laytaraan Fayro mi mek dehn laif haada, ahn dehn mi en op di blaym Moaziz an Ayron fi di prablemz weh dehn mi-di goh chroo. (Eks. 5:​19, 20) Di Izrelait dehn mi blaym Gaad laayal servants. Dat sad, noh chroo? If yoo di goh chroo chalenjiz fi wahn lang taim, pray tu Jehoava ahn poar owt yu haat tu ahn, an pen pahn hihn fi sopoat yu. w22.11 15 ¶5-6

Jehoava da di Wan weh mek wi ga laif, ahn hihn ga di powa fi bring peepl bak tu laif. Hihn mi gi di prafit Ilaija di powa fi rezorek di son a di wido fahn Zarefat. (1 Ki. 17:​21-23) Laytaraan, wid Gaad help, di prafit Ilaisha mi rezorek di son a wahn Shoonamait laydi. (2 Ki. 4:​18-20, 34-37) Dehndeh rezorekshan an ada rezorekshan weh mi hapm proov dat Jehoava ga di powa fi bring peepl bak tu laif. Wen Jeezas mi deh pahn ert, hihn mi proov dat ih Pa mi giv ahn da saym powa. (Jan 11:​23-25, 43, 44) Now Jeezas deh da hevn ahn Gaad giv ahn “aal atariti da hevn ahn pahn di ert.” Soh hihn ku mek di pramis kohn chroo weh seh dat “aala di wan dehn weh deh eena di toom dehn” wahn kohn bak tu laif wid di hoap fi liv fareva.—Mach. 28:18; Jan 5:​26-29. w22.12 5 ¶10

Wen di peepl mi rijek Izeekyel, dehn mi-di rijek Jehoava tu. Weh Jehoava mi seh eena di teks fi tudeh mi komfert Izeekyel bikaaz eevn doa di peepl mi rifyooz fi lisn tu hihn, dat neva meen dat hihn da neva wahn gud prafit. Jehoava mi tel Izeekyel dat wen di jojment mesij weh hihn preech kohn chroo, di peepl mi wahn “noa dat wahn prafit mi deh monks dehn.” (Ezek. 2:5; 33:33) Fi shoar dehndeh werdz mi komfert Izeekyel ahn gi ahn di schrent weh ih mi need fi preech. Wen wi noa dat Jehoava da di wan weh sen wi fi preech, dat gi wi korij. Da wahn aana fi mek Jehoava kaal wi ih “witnisiz.” (Isa. 43:10) Dat da wahn wandaful privilij! Jehoava mi tel Izeekyel: “Noh frayd,” an ih tel wee tu: “Noh geh fraitn.” (Ezek. 2:6) Wai wi shudn frayd fi di peepl weh deh gens wi? Jehoava sen wee, jos laik how ih mi sen Izeekyel, ahn soh wi ga Jehoava sopoat.—Isa. 44:8. w22.11 3-4 ¶4-5

Tudeh wi reeli apreeshiayt wi eldaz ahn ministeeryal servants. Dehnya faytful bradaz tek gud kayr a wi, ahn wi tank Jehoava fi dehn! Bot how wi ku shoa dat peepl ku chros wee? Wee lov wi bradaz ahn sistaz, ahn wi waahn noa how dehn di du. Bot wi haftu bee reeznabl ahn rispek dehn praivasi. Som a di bradaz eena di fers-senchri Kristyan kangrigayshan mi “laik gasip an intafyaa eena ada peepl bizniz, di taak bowt tingz weh dehn noh fi taak bowt.” (1 Tim. 5:13) Wee noh waahn bee laik dat non ataal. Bot sopoaz sombadi tel wi sohnting persnal ahn dehn aks wi noh fi tel nobadi bowt it. Fi egzampl, wahn sista mait tel wi bowt wahn helt prablem weh ih di deel wid er wahn nada chraiyal weh ih di goh chroo, an ih aks wi fi kip it tu wiself. Wi shuda du weh ih aks wi fi du. w22.09 10 ¶7-8

Fi “chaynj di way [wi] tink,” wi haftu egzamin wiself ahn mek chaynjiz weh shoa dat wi di obay Jehoava standadz. Soh wi noh jos waahn du tingz fi luk gud fronta adaz. Wi reeli waahn chaynj hoo wee pahn di eensaid. Dis da sohnting wi need fi kip aan di du aal di taim. Wen wi geh perfek, wi wahn ku pleez Jehoava eena evriting weh wi du. Bot fi now wi haftu werk haad fi mek wi ku pleez Jehoava. Paal mi seh da Roamanz 12:2 dat wi need fi chaynj di way wi tink soh dat wi ku noa weh Gaad waahn. Wi need fi luk pahn wiself gud fi mek shoar wi di tink di way Jehoava tink ahn noh di way di werl tink wen ih kohn tu di disizhanz weh wi mek er di goalz weh wi set eena laif. w23.01 8-9 ¶3-4

Yu tink Jehoava kanchroal evriting soh dat sohnting gud kom owta evri bad sichuwayshan? No, dat da noh weh di Baibl teech. (Eccl. 8:9; 9:11) Bot wi doo noa dat wen wi fays wahn chraiyal, Jehoava noa bowt it ahn hihn hyaa wi wen wi bayg ahn fi help. (Ps. 34:15; Isa. 59:1) Noh onli dat, hihn ku help wi bayr op wen wi di goh chroo wahn chraiyal. How hihn du dat? Jehoava komfert wi an inkorij wi da di rait taim. (2 Kor. 1:​3, 4) Yoo ku tink bowt wahn taim eena yu laif wen Jehoava mi komfert yu an inkorij yu egzakli wen yu mi need it? Yoozhwali wi noh noatis how Jehoava help wi chroo wahn prablem til afta wi goh chroo it. w23.01 17-18 ¶13-15

Dis wail bees aalmoas luk laik di wail bees weh ga sevn hed, bot ih ga wahn brait red kala. Di buk a Revilayshan kaal it “di imij a di wail bees” ahn “di ayt king.” (Rev. 13:​14, 15; 17:​3, 8) Jan mi laan dat dis “king” mi egzis, den ih disapyaa, an laytaraan ih kohn bak agen. Dis da di bes way fi diskraib di United Nations aaganaizayshan, bikaaz dehn promoat evriting weh di werlwaid politikal sistem waahn! Fers, ih mi naym di League of Nations. Den ih disapyaa joorin Werl Waar II. Ahn laytaraan, ih kohn bak az di United Nations. Di wail bees dehn, er govament dehn, yooz faals infamayshan fi mek peepl ton gens Jehoava an ih peepl. Jan mi seh dat da laik if dehn gyada “aala di king dehn a di ert” fi goh tu di waar a Armagedon. Dat da “di grayt day a Gaad di Almaiti.”—Rev. 16:​13, 14, 16. w22.05 10 ¶10-11

Wen Jeezas mi laan fi reed di Hoali Raitin dehn pan ih oan, ih mi geh fi noa di Skripchaz gud ahn fi lov dehn, ahn dat mi help ahn fi obay dehn. Yu praabli memba weh mi hapm da di templ wen Jeezas mi 12 yaaz oal. Di rilijos teechaz weh mi noa di Laa a Moaziz gud mi “impres wid humoch tingz [Jeezas] mi andastan ahn wid di way ih mi-di ansa dehn.” (Look 2:​46, 47, 52) Yoo tu ku geh fi noa ahn lov Gaad Werd wen yu reed it evri day. Wi ku laan wahn lat fahn weh Jeezas mi tel di skraib, di Farisee, ahn di Sadyusee dehn weh mi noa di Laa gud. Dehnya rilijos leedaz mi reed di Skripchaz wahn lat, bot dehn neva laan notn fahn weh dehn mi reed. Jeezas mi menshan chree reezn wai dehnya peepl neva di geh di sens owta weh dehn reed fahn di Skripchaz. Weh hihn mi tel dehn ku help wi fi du beta eena wi Baibl reedin. Ih wahn help wi (1) fi andastan weh wi reed, (2) fi fain spirichwal chrezhaz, ahn (3) fi mek Gaad Werd chaynj wi. w23.02 8-9 ¶2-3

Sohn tingz weh wi noh fi du da flert, jrink tu moch, oava eet, er seh tingz weh hert adaz. Wi aalso noh waahn wach poarnografi, eniting weh vailent, er ada tingz weh simila. (Ps. 101:3) Di Devl aalwayz di luk fi wayz fi damij wi rilayshanship wid Jehoava. (1 Peet. 5:8) If wi noh kyaaful, wi ku staat hoal malis, bee prowd, jelos, greedi, er stap bee aanis. (Gal. 5:​19-21) If wi noh chrai get rid a dehndeh feelinz rait away, dehn ku tek root eena wi haat laik wahn daynjaros ahn paiznos plaant. (Jay. 1:​14, 15) Wahn daynja weh ku bee haad fi noatis da bad kompni. Wi haftu memba dat wi ku staat tu ak laik di peepl weh wi spen lata taim wid. (1 Kor. 15:33) If wi kyaaful, wi noh wahn spen taim wid bad kompni. (Look 21:34; 2 Kor. 6:15) Insteda dat, wi waahn stay faar fahn eniting weh ku damij wi rilayshanship wid Jehoava. w23.02 16 ¶7; 17 ¶10-11

Az yu mi geh fi laan bowt Jehoava, yu lov far ahn groa, ahn dat mek yu feel kloasa tu ahn. Da lov kud laas fareva! Eena wahn kain way Jehoava tel wi dat wi ku mek ih haat hapi wid di tingz weh wi seh ahn du. (Prov. 23:​15, 16) Di way yu liv yu laif wahn proov dat yu reeli lov Jehoava. Dat da di bes goal fi gat eena laif. How yu ku shoa dat yu lov Jehoava? Fers, eena wahn speshal pryaa yu dedikayt yu laif tu ahn. (Ps. 40:8) Den, wen yu geh baptaiz, dis wahn shoa evribadi dat yu don dedikayt yu laif tu ahn. Di day wen yu geh baptaiz da di hapiyis ahn moas impoatant day a yu laif. Fahn da day yu laif chaynj, bikaaz yu noh di liv fi yuself nohmoh, bot yu put Jehoava fers eena yu laif. (Roam. 14:8; 1 Peet. 4:​1, 2) Dat mait song laik wahn big chaynj fi chroo. Bot dat da di onli way fi liv di bes laif eva. w23.03 5-6 ¶14-15