May

Kristyanz eena di fers senchri mi geh afektid wen wahn grayt famin mi kohn “aal oava di lan.” Payrents mi-di wori how dehn mi wahn fain food fi dehn famili. Ahn wat bowt di yong peepl weh mi-di plan fi du moa eena di minischri? Maybi dehn mi-di wanda if dehn shuda mi wayt til afta di famin paas fi kantinyu wid dehn planz. Eevn doa di Kristyanz mi deh eena wahn haad sichuwayshan, dehn mi laan fi deel wid weh dehn mi-di goh chroo. Dehn mi kantinyu fi preech eena eni way dehn kud, ahn dehn mi hapi fi shayr weh dehn mi ga wid dehn bradaz ahn sistaz da Judeeya. (Aks 11:​29, 30) Di Kristyanz mi geh fi si how Jehoava mi-di help dehn wen dehn mi geh di tingz weh dehn need. (Mach. 6:​31-33) Dehn mosi mi feel kloasa tu dehn bradaz ahn sistaz weh mi help dehn. Ahn dehn wan weh mi gi doanayshan er help owt eena di rileef werk mi feel hapi bikaaz dehn mi redi fi giv.—Aks 20:35. w23.04 16 ¶12-13

Sohntaim, Jehoava mait moov peepl weh noh wership ahn fi help ih servants. Fi egzampl, hihn mi mek King Artazerkseez gi Nehimaiya permishan fi goh bak da Jeroosalem soh dat ih kuda mi help bil bak di siti. (Neh. 2:​3-6) Saym way soh, tudeh Jehoava ku yooz peepl weh noh wership ahn fi help wi wen wi need it. Jehoava noh aalwayz ansa wi pryaaz eena wahn amayzin way. Bot di ansa weh wi get da egzakli weh wi need fi help wi stay faytful tu Jehoava. Soh aalwayz luk owt fi si how Jehoava ansa yu pryaaz. Evri now an agen, stap ahn tink bowt how Jehoava di ansa yu pryaaz. (Saa. 66:​19, 20) Wi need fi shoa fayt, noh onli wen wi pray tu Jehoava, bot wen wi aksep ih ansa noh mata how ih wuda ansa wi.—Heeb. 11:6. w23.05 11 ¶13; 12 ¶15-16

Wen wi dedikayt wi laif tu Jehoava, wi di pramis ahn dat wi wahn wership ahn fi di res a wi laif. Wi haftu kip da pramis. Ahn fi dedikayt wi laif tu Gaad da noh wahn berdn. Jehoava mek wi fi du weh hihn waahn. (Rev. 4:11) Jehoava mek wi fi bee laik hihn an ih gi wi di dizaiya fi geh fi noa ahn an wership ahn. Sayka dat, wee ku geh kloas tu hihn ahn bee hapi fi du weh ih waahn. Pahn tap a dat, wen wi du weh Jehoava waahn ahn fala ih Son egzampl, wi wahn “fain res fi [wi] soal.” (Mach. 11:​28-30) Soh kantinyu bil op yu lov fi Jehoava az yu tink bowt aal di gud tingz weh Jehoava don du fi yu ahn di tingz weh ih wahn du fi yu eena di fyoocha. Di moa yu lov fi Jehoava groa, di eeziya ih wahn bee fi obay ahn. (1 Jan 5:3) Jeezas mi aalwayz du weh Jehoava waahn bikaaz hihn mi pray an aks Jehoava fi help. Hihn mi aalso foakos pahn di blesinz weh ih mi wahn get. (Heeb. 5:7; 12:2) Jos laik Jeezas, wi waahn aks Jehoava fi gi wi di schrent weh wi need ahn fi help wi foakos pahn di blesinz weh wi wahn get eena di fyoocha. w23.08 27-28 ¶4-5

Aala wi laik peepl weh payshent. Wi rispek dehn wan weh ku wayt fi sohnting widowt di geh beks. Ahn wen wee mek wahn mistayk, wi apreeshiayt it wen ada peepl payshent wid wi. Aala wi tankful dat wi Baibl teecha mi payshent wid wi wen wi mi-di fain it haad fi aksep ahn laan fi liv akaadn tu wahn Baibl teechin. Bot eevn moa dan dat, wi hapi dat Jehoava payshent wid wi! Eevn doa wi laik it wen ada peepl ga payshens, wee wiself mait fain it haad fi bee payshent. Fi egzampl, ih noh mait bee eezi fi stay kaam wen wi di wayt eena wahn lang lain, espeshali if wi don di ron layt fi sohnting. Wi mait geh beks bad if adaz get pahn wi nervz. Ahn sohntaim ih ku bee haad fi wayt fi di nyoo werl weh Jehoava pramis wi. Bot, wi need fi shoa payshens eena dehndeh difrent sichuwayshan. w23.08 20 ¶1-2

Jehoava mi tel Gidiyan fi sen hoam moa dan 99 persent a ih aami. Hihn mosi mi tink tu ihself, ‘Ai reeli need fi mek dis chaynj? Dis wahn eevn werk?ʼ Bot stilyet, Gidiyan mi obay weh Jehoava mi tel ahn. Tudeh, eldaz kapi Gidiyan egzampl wen dehn obay di aaganaizayshan ahn chaynj di way dehn du tingz. (Heeb. 13:17) Gidiyan mi obay Jehoava eevn wen ih mi frayd ahn di asainment mi daynjaros. (Joj. 9:17) Afta Jehoava mi shoa Gidiyan dat ih mi wahn help ahn, Gidiyan mi noa fi shoar dat Jehoava mi wahn help ahn protek Fi Hihn peepl. Eldaz weh liv wehpaat di werk deh anda ban kapi Gidiyan egzampl. Eevn doa dehnya eldaz mait geh beet op, looz dehn jab, er polees mait ares er kweschan dehn, dehn bradaz stil di tek di leed da di meetin dehn an eena di preechin werk. Joorin di grayt chribyulayshan, eldaz wahn need korij fi obay di inschrokshanz weh dehn wahn get, eevn wen dat put dehn laif eena daynja. w23.06 5-6 ¶12-13

Jehoava mek dehn rait dong eena di Baibl di gud tingz weh Hai Prees Jehoyada du soh dat wee ku laan fan it. (Roam. 15:4) Wen Jehoyada mi ded, dehn mi giv ahn wahn speshal aana. Dehn mi beri ahn “eena Dayvid Siti wehpaat dehn beri di king dehn, bikaaz hihn mi du wahn lata gud tingz fi Izrel, fi di chroo Gaad, ahn fi Gaad templ.” (2 Chron. 24:​15, 16) Jehoyada egzampl ku help aala wi fi ga lata rispek fi Jehoava. Di eldaz eena di kangrigayshan ku kapi Jehoyada egzampl wen dehn kip di luk fi wayz how dehn ku protek di kangrigayshan. (Aks 20:28) Jehoyada egzampl ku help oalda bradaz ahn sistaz fi si dat wen dehn ga lata rispek fi Jehoava ahn dehn stay laayal tu Ahn, hihn wahn kantinyu yooz dehn fi mek ih perpos kohn chroo. Yong peepl eena di kangrigayshan ku laan wahn lat fahn di way how Jehoava mi chreet Jehoyada. Jos laik Jehoava, dehn ku chreet oalda wanz wid aana ahn rispek, espeshali dehn wan weh di serv Jehoava fi wahn lang taim. (Prav. 16:31) Mek aala wi bee laayal an obay “di wan dehn weh di tek di leed.”—Heeb. 13:17. w23.06 17 ¶14-15

Da di meetin dehn, yoo ku disaid humoch taim yu wahn put op yu han fi koment. Bot memba, if yu put op yu han tu moch, yu ku mek di kandokta feel laik ih haftu pik yu oava ahn oava agen eevn if adaz noh geh wahn chaans fi koment yet. Dis ku diskorij adaz ahn mek dehn noh waahn put op dehn han. (Eccl. 3:7) Wen lata bradaz ahn sistaz put op dehn han fi koment, yu noh mait geh fi koment az moch az yu wuda waahn. Sohntaim, di kandokta mait noh eevn pik yu. Dat ku mek wi feel bad, bot wi shudn kech feelinz wen dehn noh kaal pahn wi. (Eccl. 7:9) If yu kyaahn koment az moch az yu wuda waahn, maybi yu ku lisn gud tu yu bradaz ahn sistaz koments soh dat yu ku komen dehn afta di meetin. Yu bradaz ahn sistaz ku geh wahn lata inkorijment wen yu komen dehn, jos laik how yu koment wuda inkorij dehn. w23.04 23-24 ¶14-16

Stodi Gaad Werd ahn meditayt pan it. Wahn chree wahn bee schrang if di roots deh deep dong eena di grong. Saym way soh, wen wi stodi di Baibl, da laik wi di mek wi roots goh deep dong. Soh dis wahn mek wi fayt geh schrang ahn wi wahn stik tu Jehoava. Az wahn chree groa, ih roots goh dong deepa ahn spred owt. Jos laik dat, wen wi stodi ahn meditayt, wi fayt groa schranga ahn wi ga moa kanfidens dat Jehoava way da aalwayz di bes way. (Kol. 2:​6, 7) Tek taim fi tink bowt how Jehoava inschrokshan, gaidans, ahn protekshan mi help ih peepl eena di paas. Fi egzampl, eena wahn vizhan, Izeekyel mi si wahn templ ahn hihn mi pay kloas atenshan az wahn aynjel mi-di tek mezhament a dis templ. Dis vizhan mi schrentn Izeekyel an ih aalso teech wi how wi ku liv op tu Jehoava standadz ahn kip wi wership tu hihn kleen. (Ezek. 40:​1-4; 43:​10-12) Wee wahn benifit wen wi du wahn deep stodi a di Baibl ahn meditayt pahn di tingz weh wi laan. Wee ku bee faytful ahn chros Jehoava wid wi hoal haat.—Saa. 112:7. w23.07 18 ¶15-16

Di Baibl gat een lata gud egzamplz weh yong bradaz ku fala. Dehnya man mi lov Gaad ahn mi tek kayr a fi hihn peepl eena lata difrent wayz. Yu ku aalso kapi di gud egzamplz a machoar Kristyan bradaz eena yu famili an eena di kangrigayshan. (Heeb. 13:7) Ahn yu ga di bes egzampl weh yu ku fala—Jeezas Krais. (1 Peet. 2:21) Wen yu stodi dehnya egzampl, tink bowt di kwalitiz weh stan owt moas tu yoo. (Heeb. 12:​1, 2) Den disaid how yu ku kapi dehn egzampl. Wahn man weh tink eena wahn spirichwal way noh ak haysti, bot ih tink gud bowt weh ih wahn du bifoa ih du it. Soh werk haad fi protek yu main ahn mek shoar yu kip aan di du dat eena yu laif. Fers, yooz di Baibl fi laan bowt how Jehoava tink ahn feel, ahn den tink bowt wai ih impoatant fi du weh ih seh. Neks, yooz weh yu laan fi mek beta disizhanz weh wahn pleez Jehoava. (Saa. 119:9) If yu laan fi tink laik dat, ih wahn help yu fi bee wahn machoar Kristyan man.—Prav. 2:​11, 12; Heeb. 5:14. w23.12 24-25 ¶4-5

Payrents ku teech dehn pikni how fi rispan eena wahn jentl way wen sombadi kweschan dehn bowt weh dehn bileev. (Jay. 3:13) Dehn du dis wen dehn praktis wid dehn pikni joorin famili wership. Payrents ku diskos difrent tapiks weh mait kom op da skool ahn shoa dehn pikni how fi ansa eena wahn jentl way soh dat peepl wahn waahn lisn tu dehn agen. Wen yu praktis weh yu wahn seh, dat ku help yu fi bee kanfident wen yu di eksplayn weh yu bileev tu adaz, ahn yu wahn aalso kanvins yuself dat weh yu bileev da chroo. Di aatikl seeriz weh naym “Kweschanz Weh Yong Peepl Aks” pahn jw.org ku help yong peepl fi bee kanvins bowt weh dehn bileev eena. Wen yu stodi dehndeh aatikl seeriz az wahn faamli, evribadi wahn ku laan fi difen dehn fayt eena wahn jentl way. w23.09 17 ¶10; 18 ¶15-16

Yoo eva set wahn spirichwal goal bot den yu fain it haad fi reech? If dat da di kays, yu noh deh pahn yu oan. Fi egzampl, Philip mi waahn poar owt ih haat tu Jehoava eevn moa, bot ih mi-di fain it haad fi fain taim fi pray tu ahn. Erika goal da-mi fi reech erli fi di meetin fi feel servis, bot shee stil mi-di reech layt nayli evri singl taim. If yu set wahn goal weh yu noh reech yet, pleez noh feel diskorij. Noh mata if yu goal big er smaal, ih stil tek lata werk. Wen yu shoa dat yu waahn reech yu goal, yu proov dat yu rilayshanship wid Jehoava preshos tu yu ahn dat yu waahn giv ahn yu bes. Jehoava apreeshiayt aala yu haad werk, an ih noh ekspek moa dan weh yu ku giv ahn. (Saa. 103:14; Mic. 6:8) Soh wen yu set wahn goal fi yuself, mek shoar da wahn goal weh yu ku reech. w23.05 26 ¶1-2

Peepl weh ga korij mait feel frayd sohntaim, bot dat noh stap dehn fahn du weh rait. Danyel da-mi wahn yong man weh mi ga lata korij. Hihn mi stodi di skripchaz weh Gaad prafit dehn mi rait, ahn dat mi inklood di prafesi dehn weh Jerimaiya mi rait tu. Sayka dat, Danyel mi geh fi andastan laytaraan dat di Jooz weh da-mi priznaz da Babilan fi wahn lang taim mi wahn soon geh set free. (Dan. 9:2) Fi shoar, wen Danyel mi si Baibl prafesi kohn chroo, fi hihn chros eena Jehoava mi geh schranga. Enibadi weh ga schrang chros eena Gaad wahn ga lata korij tu. (Kompyaa Roamanz 8:​32, 37-39.) Di moas impoatant ting weh Danyel mi du da-mi fi pray tu ih Pa, Jehoava, aal di taim. (Dan. 6:10) Hihn mi kanfes ih sin dehn tu Jehoava, an ih wuda aalwayz tel Jehoava how ih reeli feel. Danyel mi aalso aks ahn fi help. (Dan. 9:​4, 5, 19) Danyel da jos laik wee, hihn neva baan wid korij. Insted, hihn mi haftu stodi di Baibl, pray, ahn chros eena Jehoava fi help ahn laan fi shoa korij. w23.08 3 ¶4; 4 ¶7

Wen wi obay dehn wan weh ga atariti, wee an adaz benifit. How dat pasabl? Wel, wi noa dat if wi du dat, wi noh wahn sofa di kansikwens laik dehn wan weh brok di laa. (Roam. 13:​1, 4) Wen wi obay dehn wan weh ga atariti, dehn wahn ku si dat Jehoava Witnisiz da obeedyant peepl. Fi egzampl, sohn yaaz agoa da Nigeria, dehn mi ga sohn soalja weh mi gaan eena wahn Kingdom Haal joorin wahn kangrigayshan meetin. Dehn mi-di luk fi peepl hoo neva pay dehn taks, bot di aafisa weh mi in chaaj mi tel di soaljaz fi lef fahn deh. Ih tel dehn: “Jehoava Witnisiz aalwayz pay dehn taks.” Wen yu obay di laa, yu help kip di gud repyutayshan weh Jehoava Witnisiz gat. Ahn wan day, da gud repyutayshan wahn ku help protek wi bradaz ahn sistaz. w23.10 9 ¶13

Som a Jehoava servant dehn di wayt fahn lang taim mek di en kohn. Sohn peepl tink dat di en di tek tu lang fi kom. Bot, Jehoava noa egzakli how ih servants feel. Az a mata a fak, hihn mi tel ih servant Habakok: “Di vizhan wahn kohn chroo da di taim weh Ai don set, an di taim di kohn kwik-wan, an ih noh wahn tel no lai. Eevn if ih wuda tek lang, kip di luk owt far it! Bikaaz fi shoar ih wahn kohn chroo. Ih noh wahn bee layt!” (Hab. 2:3) Yu tink Gaad mi gi da pramis onli tu Habakok? Er yu tink dehndeh werdz ga meenin fi wee tudeh? Jehoava mi tel Paal fi aplai dehndeh werdz tu Kristyanz, hoo di wayt fi di nyoo werl. (Heeb. 10:37) Eevn if wi feel dat Jehoava pramis fi sayv wi di tek tu lang fi kohn, wi ku bee “shoar ih wahn kohn chroo. Ih noh wahn bee layt!” w23.04 30 ¶16

Eevn doa Jehoava mi proov tu di peepl dat hihn mi-di yooz Moaziz fi gaid dehn, dehn mi rifyooz fi aksep dis. (Num. 14:​10, 11) Dehn mi kantinyu fi du dis oava ahn oava. Ahn bikaaz a dis, Jehoava neva mek dehn gaan eena di Pramis Lan. (Num. 14:30) Bot som a di Izrelaits mi fala Jehoava gaidans. Fi egzampl, Jehoava mi seh: “Kayleb . . . mi obay mi wid ih hoal haat.” (Num. 14:24) Soh hihn mi bles Kayleb, ahn hihn mi mek ih pik wehpaat ih mi waahn liv eena di lan a Kaynan. (Jash. 14:​12-14) Eevn doa som a di Izrelaits mi ded eena di wildanes, fi dehn disendant mi set wahn gud egzampl. Wen Jehoava mi gi Jashwa di asainment fi leed dehn, dehn “mi ga lata rispek” fi Jashwa fi az lang az ih mi liv. (Jash. 4:14) Soh Jehoava mi bles dehn ahn gi dehn di lan weh hihn mi pramis dehn.—Jash. 21:​43, 44. w24.02 21 ¶6-7

Jos laik how wahn dakta geh fi noa how wi haat di du wen ih chek wi pols, da rait soh wi ku fain owt how schrang wi lov fi Jehoava if wi chek how schrang wi lov fi wi bradaz ahn sistaz. If wi si dat wi noh ga schrang lov fi wi bradaz ahn sistaz, den dis shoa dat wi lov fi Jehoava mait bee week tu. Bot wen wi stay di shoa dat wi lov wi bradaz ahn sistaz, dat proov dat wi lov fi Jehoava schrang. If wi lov fi wi bradaz ahn sistaz di geh week, dis da wahn seeryos prablem. Wai? Bikaaz if wi noh lov wi bradaz ahn sistaz, Jehoava noh wahn waahn bee wi fren. Di apasl Jan mi mek dat klyaa wen ih seh: “If ih noh lov ih bradaz weh ih ku si, den ih kyaahn lov Gaad weh ih neva si yet.” (1 Jan 4:20) Weh dat teech wi? Jehoava onli wahn pleez wid wi if wi “lov wan anada.”—1 Jan 4:​7-9, 11. w23.11 8 ¶3; 9 ¶5-6

Wen King Jehoawash da-mi wahn lee bwai, ih pa mi ded ahn Jehoyada di hai prees mi rayz ahn op ahn teech ahn bowt Jehoava. Jehoawash mi waiz bikaaz ih mi lisn tu Jehoyada advais. Soh Jehoawash mi disaid fi serv Jehoava, an ih mi help di peepl fi serv Jehoava tu. Pahn tap a dat, Jehoawash mi mek shoar dat dehn fiks op bak Jehoava templ. (2 Chron. 24:​1, 2, 4, 13, 14) If yu payrents er sohnbadi di teech yu fi serv ahn lov Jehoava, den dat da di bes gif dehn kuda eva gi yu. (Prav. 2:​1, 10-12) Dehn ga lata wayz yu payrents ku chrayn yu. Yu wahn mek yu payrents hapi wen yu lisn tu di advais weh dehn gi yu fahn di Baibl. Bot moa dan dat, yu wahn mek Jehoava hapi ahn yu wahn ga wahn schrang frenship wid ahn. (Prav. 22:6; 23:​15, 24) Yu noh tink dat dehnya da gud reezn wai wi shuda kapi di egzampl weh Jehoawash set wen ih mi smaal? w23.09 8-9 ¶3-5

Jehoava pramis fi lisn tu wi pryaaz. Jehoava lov ih faytful servant dehn, soh hihn wuda neva ignoar dehn pryaaz. (Saa. 10:17; 37:28) Bot, dis noh meenz dat Jehoava wahn gi wi evri singl ting wi aks fa. Wi mait haftu wayt til di nyoo werl fi mek Jehoava gi wi som a di ting dehn weh wi pray fa. Jehoava kip ih perpos in main wen ih lisn tu wi pryaaz. (Isa. 55:​8, 9) Paat a da perpos da fi mek di ert ful op a hapi peepl weh yoonaitid anda Fi Hihn roolaship. Bot Saytan mi seh dat hyoomanz wuda bee beta aaf di rool dehnself. (Jen. 3:​1-5) Fi proov dat Saytan mi-di lai, Jehoava alow hyoomanz fi rool oava dehnself. Dat da wai wi ga lata prablemz tudeh. (Ikl. 8:9) Bot wi andastan dat Jehoava noh wahn geh rid a aala dehndeh prablemz rait now. w23.11 21 ¶4-5

Jehoava pramis dat “lata nayshan” wahn geh bles sayka Aybraham. Bot Aybraham ahn Saara stil neva ga wahn son eevn wen Aybraham mi don 100 yaaz oal ahn Saara mi 90. Bikaaz dehn mi don paas di ayj fi ga pikni, ih mi praabli luk laik dehn wuda neva ga wahn son. Dat da-mi wahn reel tes fi Aybraham fayt. Bot stil “Aybraham mi kanvins dat hihn wuda mi bee di faada a lata nayshanz.” (Roam. 4:​18, 19) Af koars da hoap mi kohn chroo, ahn hihn mi geh di son weh ih mi-di hoap fa, Aizak. (Roam. 4:​20-22) Gaad ku bee pleez wid wi ahn si wi az wahn raichos persn ahn kaal wi ih fren, jos laik how ih mi si Aybraham az wahn fren. Dat da weh Paal mi-di taak bowt wen ih rait: “Di werdz eena di skripcha weh seh ‘Gaad mi aksep ahn az wahn raichos manʼ da neva jos fi [Aybraham], bot da mi fi wee tu. If wee ga fayt eena Gaad, weh mi rayz op Jeezas wi Laad fahn di ded, den Gaad wahn aksep wee az raichos peepl tu.” (Roam. 4:​23, 24) Jos laik Aybraham, wee need fi ga fayt eena Jehoava, shoa it bai di tingz weh wi du, ahn chros dat Jehoava pramis dehn wahn kohn chroo. w23.12 7 ¶16-17

Wen wee di goh chroo wahn chraiyal weh mek wi feel frayd, wi need fi memba dat Jehoava noatis weh wi di goh chroo ahn hihn noa how wi feel. Fi egzampl, Jehoava neva onli si how di Eejipshan dehn mi-di chreet di Izrelaits bad, bot ih mi noatis “humoch [dehn] mi-di sofa.” (Eks. 3:7) Sohntaim wen wi di goh chroo wahn chraiyal, wi mait wanda how Jehoava di help wi. If yoo eva feel soh, aks Jehoava fi help yu si how ih di help yu. (2 Ki. 6:​15-17) Den yu ku aks yuself kweschanz laik, ‘Ah ku tink bowt wahn taak, wahn koment, wahn poblikayshan, wahn veedyo, er wahn orijinal sang weh inkorij mi? Sohnbadi eva inkorij mi er shayr wahn inkorijin skripcha wid mi?ʼ Sohntaim wi mait ferget humoch wi bradaz ahn sistaz lov wi ahn humoch di spirichwal food weh wi get inkorij wi. Bot dehnya da preshos gif fahn Jehoava, ahn dehn shoa dat hihn reeli kay bowt wi. (Isa. 49:​14-16; 65:13; Maak 10:​29, 30) Soh dehnya da gud reezn wai wi ku chros Jehoava. w24.01 4-5 ¶9-10

Bifoa Jeezas mi gaahn bak da hevn, hihn mi rimain ih disaiplz dat dehn need fi gi wahn witnis bowt ahn “da Jeroosalem, eena aala Judeeya ahn Samayrya, an aal oava di ert.” (Aks 1:8; Look 24:​46-48) Wahn lee wail afta dat, di Jooish leedaz mi ares Peeta ahn Jan ahn kehr dehn da di Jooish Sopreem koat. Dehn mi koman dehn fi stap preech, ahn dehn mi eevn chretn dehn. (Aks 4:​18, 21) Peeta ahn Jan seh: “Wel, if unu bileev dat Gaad tink ih raichos fi lisn tu unu insteda hihn, dat op tu unu. Bot az tu wee, wi kyaahn stap taak bowt di tingz wi mi si ahn hyaa.” (Aks 4:​19, 20) Wen Peeta ahn Jan mi kom owta jayl, dehn mi pray haad tu Jehoava an aks ahn fi help dehn du fi hihn wil. Jehoava mi ansa fi dehn pryaa.—Aks 4: 31. w23.05 5 ¶11-12

Jehoava ahn Jeezas spen bilyanz a yaaz tugeda da hevn. Dehn ga di langis rilayshanship eva. Soh dehn reeli kloas ahn dehn ga schrang lov fi eech ada. Di skripcha teks fi tudeh shoa wi how Jehoava feel bowt Jeezas. Jehoava neva onli seh, “Di wan weh Ah pleez wid.” Insted, hihn mi waahn wi noa humoch ih lov Jeezas, soh ih aalso seh, “Mai Son, di wan weh Ah onli lov.” Jehoava mi prowd a Jeezas, espeshali bikaaz ih mi wilin fi giv op ih laif. (Ifee. 1:7) Ahn Jeezas neva ga no dowt dat ih Pa, Jehoava, mi lov ahn. Hihn mi shoar a da lov! Oava ahn oava, hihn mi seh dat ih Pa lov ahn.—Jan 3:35; 10:17; 17:24. w24.01 28 ¶8

Imajin sombadi weh yu lov seh sohnting bad bowt yu. Eevn doa da noh chroo, ada peepl stil bileev it. Ahn fi mek it wers, dehn spred da lai, ahn moa peepl bileev it. How yu tink dat wuda mek yoo feel? Wel, da lai wuda hert yu, noh chroo? Da egzampl ku help wi andastan how Jehoava mi feel wen dehn mi taak bad bowt hihn. Wan a Jehoava aynjel mi tel Eev wahn lai bowt Hihn, ahn shee mi bileev it. Da lai mi mek fi wee fers payrents ton gens Jehoava. Ahn sayka dat, aal hyoomanz sin ahn ded. (Jen. 3:​1-6; Roam. 5:12) Wi si peepl di ded, wi hyaa bowt waar, ahn lata sofarin deh bikaaz a di lai dehn weh Saytan spred. Yu tink da lai hert Jehoava? Af koars! Bot eevn doa dat don hapm, Jehoava noh mek dat mek hihn feel bad aal di taim. Di Baibl seh dat hihn da “di hapi Gaad.”—1 Tim. 1:11. w24.02 8 ¶1-2

How yoo ku kapi Joazef egzampl fi stay faytful tu Jehoava? Wi need fi pripyaa fahn now, bifoa wi fays wahn temtayshan. Wi ku laan fi seh no rait away tu eni rang dizaiya, ahn noh alow wiself fi tink bowt tingz weh Gaad hayt. (Saa. 97:10; 119:165) Da way deh, wi noh wahn sin wen wi doo geh temtid. Yoo praabli noa dat dis da di chroot ahn dat yu waahn serv Jehoava wid yu hoal haat. Bot maybi sohnting stil di hoal yu bak fahn dedikayt yu laif tu ahn an geh baptaiz. Tink bowt how Dayvid egzampl ku help yu. Jos laik King Dayvid, yoo ku beg Jehoava ahn seh: “Oa Gaad, saach chroo mi ahn noa mi haat. Saach eena mi ahn noa aala mi woriz. Chek ahn si if Ah ga eniting eena mi weh ku hert mi, ahn leed mi tu evalastin laif.” (Saa. 139:​23, 24) Jehoava “bles di wan dehn weh di chrai dehn bes fi du ih wil.” Jehoava noa dat yu di chrai yu bes bikaaz hihn si how haad yu di werk fi dedikayt yu laif tu ahn an geh baptaiz.—Heeb. 11:6. w24.03 6 ¶13-15

Onli di hai prees kuda mi reprizent di peepl fronta Jehoava. Pahn di saym day wen di Izrelaits mi staat yooz di tabernakl, Jehoava mi pik Ayron fi bee di fers hai prees fi di nayshan. Di apasl Paal mi eksplayn dat “bikaaz a det wahn lata difrent prees mi haftu serv, kaaz wen eech wan mi ded wahn neks wan mi haftu tek ih plays.” (Heeb. 7:​23-26) Ahn sins di hai prees dehn neva perfek, dehn mi haftu aafa sakrifais fi dehn oan sin. Dis mek it klyaa fi si dat dehn ga wahn big difrens bitween di grayt Hai Prees, Jeezas Krais, an di hai prees dehn weh mi serv eena Izrel. Jeezas Krais da fi wee Hai Prees ahn hihn da “wahn servant weh serv . . . eena di chroo tent. Ahn dis tent da weh Jehoava ihself mi set op, noh man.” (Heeb. 8:​1, 2) Paal mi eksplayn dat “bikaaz Jeezas kantinyu fi liv fareva, nobadi wahn serv az prees afta hihn.” Ih mi seh dat Jeezas da wahn hai prees weh “hoali, ahn wan weh difrent fahn sinaz.” Paal mi aalso seh dat Jeezas “da noh laik dehn ada hai prees weh mi haftu aafa op sakrifais tu Gaad evri day fi dehn oan sin.” w23.10 26 ¶8-9

“Di hevn . . . weh mi dehdeh bifoa” di rifaa tu aal di govament dehn weh Saytan ahn di deemon dehn di kanchroal. (Mach. 4:​8, 9; 1 Jan 5:19) Sohntaim eena di Baibl, di werd “ert” ku rifaa tu di peepl weh liv pahn di ert. (Jen. 11:1; Saa. 96:1) Soh “di ert weh mi dehdeh bifoa” di rifaa tu wikid peepl. Jehoava noh wahn jos fiks op di “hevn” ahn di “ert,” bot ih wahn geh rid a dehn fareva. Den afta dat hihn wahn put “wahn nyoo hevn ahn wahn nyoo ert,” weh meen dat wahn nyoo govament wahn rool oava raichos peepl. Jehoava wahn heel di ert ahn hyoomanz soh dat dehn ku bee perfek. Laik weh Aizaiya mi seh, Jehoava wahn mek di hoal ert intu wahn byootiful plays weh simila tu di gyaadn weh mi deh da Eedn. Hihn wahn mek wi nyoo wen ih heel eech wan a wi kompleetli. Peepl weh kripl, blain, er def wahn geh heel, an eevn peepl weh ded wahn kohn bak tu laif.—Isa. 25:8; 35:​1-7. w23.11 4 ¶9-10

Di “grayt chribyulayshan” wahn staat wen nobadi ekspek it. (Mach. 24:21) Bot di grayt chribyulayshan da noh laik wahn dizaasta weh wahn kech wi bai sopraiz bikaaz wi noa ih di kohn. Bowt 2,000 yaaz agoa, Jeezas mi tel ih falowaz fi mek shoar dehn geh redi fi da day. If wee pripyaa heda taim, ih wahn bee eeziya fi mek wi bayr op joorin di grayt chribyulayshan ahn help ada peepl. (Look 21:36) Wi need fi laan fi bayr op fahn now soh dat wi ku obay Jehoava ahn chros dat hihn wahn protek wi wen da taim kohn. Weh wi wahn du if wi bradaz ahn sistaz looz som er aala dehn mateeryal tingz? (Hab. 3:​17, 18) Wi need fi ga kompashan soh dat wi ku help dehn fi geh evriting weh dehn need. Wen Gag a Maygag staat atak Gaad peepl, weh wee wahn du if wi haftu liv tugeda wid wi bradaz ahn sistaz fi wahn wail? (Ezek. 38:​10-12) Wi need fi ga schrang lov fi dehn soh dat wee ku bayr op chroo dehndeh haad taimz. w23.07 2 ¶2-3

Marid koplz ku laan fahn Akwila ahn Prisila egzampl, wahn kopl weh lata Kristyanz bak den mi lov. (Roam. 16:​3, 4) Dehn mi werk, preech, ahn help adaz tugeda. (Aks 18:​2, 3, 24-26) In fak, wen di Baibl taak bowt Akwila ahn Prisila, ih aalwayz menshan dehn tugeda. How wahn kopl ku fala dehn egzampl? Tink bowt aal weh yoo ahn yu marij mayt need fi du. Yu tink yu ku du som a di werk tugeda insteda pahn yu oan? Akwila ahn Prisila mi preech tugeda. Yoo ahn yu marij mayt naamali mek planz fi preech tugeda? Akwila ahn Prisila mi aalso werk tugeda. Yoo ahn yu marij mayt mait noh gat di saym jab, bot yu tink unu ku werk rong di hows tugeda? (Ikl. 4:9) If unu du dat, unu wahn werk az wahn teem wen unu help eech ada di du werk rong di hows, ahn dis wahn gi unu di chaans fi taak tu eech ada. w23.05 22-23 ¶10-12

Dehn ga taimz dat evribadi feel frayd. Fi egzampl, wan taim Dayvid mi-di ron fi ih laif bikaaz King Saal mi waahn kil ahn, soh ih gaahn da wahn Filisteen siti weh naym Gat, wehpaat Aykish da-mi king. Noh lang afta dat, Aykish mi fain owt dat Dayvid da-mi wahn schrang wariya. Peepl mi eevn sing wahn sang bowt Dayvid, weh seh dat ih kil “tenz a towznz” a Filisteen soalja. Soh Dayvid mi “geh frayd bad” fi King Aykish. (1 Sam. 21:​10-12) Hihn mi staat tu wori bowt weh di king wuda du ahn. Bot weh mi help Dayvid fi ga korij eevn doa ih mi feel frayd? Eena Saam 56, wi ku reed bowt how Dayvid mi feel wen ih mi deh da Gat. Dayvid neva hoal bak fahn tel wi how frayd ih mi frayd, bot ih tel wi weh mi help ahn fi stap bee frayd tu. Wen hihn mi frayd, ih mi chros Jehoava. (Saa. 56:​1-3, 11) Ahn dat da-mi wahn waiz disizhan, bikaaz Jehoava mi help ahn kom op wid wahn smaat plan. Hihn mi ak laik ih mi krayzi! Dat da how Dayvid mi en op di eskayp, bikaaz King Aykish neva tink dat hihn da-mi wahn daynjaros man.—1 Sam. 21:13–22:1. w24.01 2 ¶1-3

Da hoo di skripcha teks fi tudeh di taak bowt? Da di anointid wanz weh don geh rezorek ahn deh da hevn. Soh, kloas tu di en a di grayt chribyulayshan, eni anointid weh stil deh pahn ert gwehn da hevn. Wan a dehn fers asainment da hevn wahn bee fi fait eena da waar. Wen dehn goh da hevn, dehn wahn fait lang wid Jeezas ahn di aynjelz eena di fainal waar gens Jehoava enimi dehn. Dat amayzin, noh chroo? Rait ya pahn ert, som a di anointid Kristyanz don oal ahn week, bot wans dehn geh rezorek tu laif da hevn, dehn wahn veri powaful ahn dehn wahn kyaahn ded. Dehn geh di asainment fi fait langsaid dehn King, Jeezas Krais, hoo da wahn maiti Wariya. Afta di waar a Armagedon finish, dehn wahn werk lang wid Jeezas fi help hyoomanz fi bee perfek. Fi shoar, wen dehn deh da hevn, dehn wahn ku du wahn lat moa fi dehn bradaz ahn sistaz dan wen dehn mi liv pahn ert az imperfek hyoomanz! w24.02 6-7 ¶15-16

Som peepl mait hoal bak fahn dedikayt dehn laif tu Jehoava ahn geh baptaiz eevn doa dehn redi fi tek da step. Dehn mait tink tu dehnself, ‘Sopoaz Ai en op di mek wahn mistayk ahn geh disfeloship?ʼ If dat da how yu feel, memba dat Jehoava pramis fi gi yu evriting weh yu need fi “liv di way how peepl weh serv [hihn] fi liv” ahn fi help yu “du di tingz weh bring prayz tu hihn.” (Kol. 1:10) Soh hihn wahn aalwayz gi yu di schrent weh yu need fi du weh rait. Wee ku bee shoar dat hihn wahn du dat, bikaaz hihn proov soh moch taim dat hihn help ih peepl. (1 Kor. 10:13) Dat da wan reezn wai onli wahn lee bit a peepl geh disfeloship. Jehoava aalwayz giv ih peepl evriting weh dehn need fi stay faytful tu ahn. No hyooman pahn dis ert ku seh dat dehn neva geh temtid fi du sohnting rang. (Jay. 1:14) Bot, wen wahn temtayshan kom op yoo ku chooz weh yu waahn du. Eevn doa lata peepl seh dat wi kyaahn kanchroal how wi feel ahn weh wi du, dat da noh chroo, kaaz yoo ku kanchroal how yu liv yu laif. w24.03 5 ¶11-12