Wai Wi Geh Oal ahn Ded?

Gaad mi tel Adam, “di day yu eet [di froot] yu wahn ded fi shoar.” (Genesis 2:17) If Gaad mi mek Adam fi geh oal ahn ded, den dis koman neva mi wahn mek no sens. Adam mi noa dat if hihn neva eet di froot, hihn neva mi wahn ded.

Adam ahn Eev neva need fi eet fahn da spesifik chree fi kantinyu liv—di gyaadn mi ful op wid lat moa chree weh mi-di bayr froot. (Genesis 2:9) If Adam ahn Eev neva eet fahn di chree, ih wuda mi shoa dat dehn mi obeedyant tu di Wan weh gi dehn laif. Ih wuda mi aalso proov dat dehn aksep dat Gaad ga di rait fi tel dehn weh fi du.

WAI ADAM AHN EEV MI DED

Fi mek wi andastan wai Adam ahn Eev mi ded, wi need fi luk pahn wahn kanvasayshan weh afek aala wi. Saytan di Devl mi yooz wahn snayk fi tel wahn seeryos lai. Di Baibl seh: “Now di snayk mi chrikiya dan aala di ada animal dehn weh Jehoava Gaad mi mek. Soh ih seh tu di uman: ‘Da chroo Gaad seh yu noh fi eet fahn aala di chree eena di gyaadn?ʼ”—Genesis 3:1.

Eev ansa ahn seh: “Wi ku eet di froot dehn fahn di chree dehn eena di gyaadn. Bot Gaad mi seh dis bowt di chree weh deh eena di midl a di gyaadn: ‘Yu noh fi eet di froot, yu noh fi toch it; bikaaz di day yu eet it yu wahn ded.ʼ” Den di snayk tel ahn: “Ah di tel yu, yu noh wahn ded. Bikaaz Gaad noa dat di day yu eet fan it, yu aiy dehn wahn oapm, yu wahn bee laik Gaad, ahn yu wahn noa weh gud ahn bad.” In ada werdz, Saytan mi-di seh dat Jehoava mi-di tel wahn lai ahn dat ih mi-di hoal bak sohnting gud fahn wi fos payrents.—Genesis 3:2-5.

Eev mi bileev weh ih mi hyaa. Shee mi staat tu luk pahn di chree. Di chree mi luk soh nais ahn byootiful; da mi reeli sohnting fi krayv! Soh shee mi pul som a di froot, ahn staat tu eet it. Den di Baibl seh: “Afta dat, wen ih hozban mi deh wid ahn, shee gi ahn sohn ahn hihn staat tu eet it tu.”—Genesis 3:6.

Dat mosi mi reeli mek Gaad haat sad fi si ih chiljren weh ih lov soh moch disobay ahn! Weh Hihn mi du? Jehoava seh tu Adam: “Yu wahn . . . goh bak tu di grong weh yu kohn fram. Bikaaz da fahn dos yu kohn, ahn da dos yu gwehn bak tu.” (Genesis 3:17-19) Bikaaz a dis, “Adam mi liv fi 930 yaaz, ahn den ih mi ded.” (Genesis 5:5) Adam neva kantinyu fi liv da hevn er eni ada plays. Hihn neva egzis bifoa Jehoava mi kriyayt ahn fahn dos. Soh wen ih ded, ih gaahn bak tu di dos weh ih mi kohn fram. Hihn neva egzis nohmoh. Dat sad!

WAI WI NOH PERFEK

Bikaaz Adam ahn Eev mi chooz fi disobay Jehoava, dehn mi looz dehn perfek main ahn badi, ahn di hoap fi liv fareva. Wen Adam ahn Eev sin ahn disobay Jehoava, ih neva afek onli dehn; aala dehn chiljren mi wahn baan imperfek. Roamanz 5:12 seh: “Sin mi fos kom eena di werl wen wan man sin, ahn da man sin bring det; ahn sin spred tu evribadi, ahn aala dehn sin. Sayka dat, evribadi wahn ded.”

Di Baibl diskraib sin ahn det az ‘di klaat weh di kova peepl fahn aal nayshanz.ʼ (Isaiah 25:7) Da klaat di kova hyoomanz laik wahn mis a paizn weh wi kyaahn ron weh fram. Soh wi ku seh dat “evribadi [di] ded sayka . . . di fos man, Adam.” (1 Korintyanz 15:22) Di kweschan weh kom op da laik weh di apasl Paal mi aks: “Hoo wahn free mi fahn weh dis badi waahn Ah du, dis badi weh det di kanchroal?”—Roamanz 7:24.