STODI AATIKL 37
Bee Wilin fi Obay Jehoava Atariti
“Da humoch moa wi shuda put wiself anda . . . wi Faada?”—HEEB. 12:9.
SANG 9 Jehoava Da Wi King!
WEH WI WAHN DISKOS?a
1. Wai wi shuda obay Jehoava?
WI SHUDA obayb Jehoava bikaaz hihn da wi Kriyayta, soh hihn ga di rait fi tel wi weh fi du. (Rev. 4:11). Bot wahn nada gud reezn wai wi fi obay Jehoava da bikaaz fi hihn way fi rool da di bes. Aal chroo hischri, wahn lata hyoomanz rool oava adaz. Bot wen wi kompyaa di way dehn rool wid di way Jehoava rool, wi si dat Jehoava da di moas waiz, di moas lovin, ahn di moas mersiful Roola.—Ex. 34:6; Roam. 16:27; 1 Jan 4:8.
2. Weh reeznz fi obay Jehoava wi fain eena Heebrooz 12:9-11?
2 Jehoava noh waahn wi obay ahn jos owta rispek, hihn waahn wi obay ahn bikaaz hihn da wi lovin Faada. Eena Paal leta tu di Heebrooz, ih eksplayn dat wi “shuda put wiself anda . . . wi Faada” bikaaz hihn chrayn wi “fi wi oan gud.”—Reed Heebrooz 12:9-11.
3. (a) How wi shoa dat wi obay Jehoava? (b) Weh kweschanz wi wahn ansa eena dis aatikl?
3 Wi obay Jehoava wen wi du wi bes fi lisn tu hihn eena evriting ahn wen wi fait di dizaiya fi disaid fi wiself weh gud ahn weh bad. (Prov. 3:5) Ih eeziya fi mek wi obay Jehoava wen wi laan bowt ih byootiful kwalitiz. Wai ih eeziya? Bikaaz dehnya kwalitiz da di reezn fi evriting weh hihn du. (Ps. 145:9) Di moa wi laan bowt Jehoava, di moa wi wahn lov ahn. Ahn wen wi lov Jehoava, wi noh need wahn lang lis a roolz fi tel wi weh wi fi du ahn weh wi noh fi du. Wi chrai fi laan fi tink ahn feel di way hihn waahn ahn fi avoid weh bad. (Ps. 97:10) Bot sohntaimz, ih noh eezi fi obay Jehoava. Wai dat ku bee wahn chalenj? Weh wahn elda ku laan fahn di egzampl a Nehimaiya? Weh wahn pa ku laan fahn di egzampl a King Dayvid? Ahn weh wahn ma ku laan fahn di egzampl a Mayri, weh da-mi Jeezas ma? Dis aatikl wahn gi wi di ansaz tu dehndeh kweschanz.
WAI IH KU BEE WAHN CHALENJ FI OBAY JEHOAVA
4-5. Akaadn tu Roamanz 7:21-23, wai ih ku bee wahn chalenj fi obay Jehoava?
4 Wan reezn wai wi mait fain it wahn chalenj fi obay Jehoava da bikaaz aala wi inherit sin an imperfekshan. Dat da di reezn wai wi noh aalwayz waahn obay Jehoava. Wen Adam ahn Eev mi disobay Gaad an eet di froot, dehn mi disaid fi dehnself weh gud ahn weh bad. (Gen. 3:22) Tudeh, jos laik Adam ahn Eev, moas peepl di ignoar Gaad ahn dehn di disaid fi dehnself weh rait ahn weh rang.
5 Eevn peepl hoo noa ahn lov Jehoava mait fain it haad fi obay hihn kompleetli. Di apasl Paal mi aalso ekspeeryens dis chalenj. (Reed Roamanz 7:21-23.) Laik Paal, wi waahn du weh Jehoava seh rait fi du. Bot wi need fi aalwayz fait di dizaiya fi du weh rang.
6-7. Wat da wahn sekant reezn wai ih ku bee wahn chalenj fi obay Jehoava? Yooz di egzampl eena di paragraaf.
6 Wahn nada reezn wai ih ku bee wahn chalenj fi obay Jehoava da bikaaz a di kostomz ahn tinkin a di peepl wehpaat wi groa op. Wahn lata peepl wahn tel wi tingz weh goh gens weh Jehoava waahn. Soh wi haftu kip di chrai haad fi noh tink di sayhn way laik dehn peepl. Kansida jos wan egzampl.
7 Yong peepl fays wahn lata presha fi mek lata moni. Wahn sista weh naym Mayric mi haftu deel wid da chalenj. Bifoa ih mi laan bowt Jehoava, shee yoostu goh da wan a di bes yooniversiti eena ih konchri. Mayri famili mi chrai fi foas shee fi geh wahn gud jab soh dat ih ku mek wahn lata moni ahn soh dat adaz wuda rispek ahn. Shee mi waahn dat fi ihself tu. Bot afta shee mi laan bowt Jehoava ahn kohn fi lov hihn, shee mi chaynj ih goalz. Bot stilyet, ih neva eezi fi shee. Shee seh: “Sohntaim Ah si wayz fi mek wahn lata moni, bot Ah noa dat ih wuda stap mi fahn serv Jehoava di way how Ah di serv ahn now. Bikaaz a di way Ai mi groa op, Ah stilyet fain it haad fi seh no. Ah haftu bayg Jehoava fi help mi fait di temtayshan fi aksep werk weh ku stap mi fahn du aal weh Ah kud eena fi hihn servis.”—Mach. 6:24.
8. Weh wi wahn kansida now?
8 Laik weh wi mi laan, ih gud fi mek wi obay Jehoava. Bot wen peepl weh ga atariti, laik wahn elda, wahn pa, ahn wahn ma, obay Jehoava; dehn ku help ada peepl. Mek wi luk pahn sohn egzampl fahn di Baibl weh teech wi how fi yooz atariti eena wahn way weh mek Jehoava hapi.
WEH WAHN ELDA KU LAAN FAHN NEHIMAIYA
Eldaz help wid di werk da di Kingdom Haal, jos laik how Nehimaiya mi persnali werk lang wid ih bradaz fi bil bak di waal a Jeroosalem (Paragraaf 9-11)e
9. Wat da sohn chalenj weh Nehimaiya mi fays?
9 Jehoava gi eldaz di impoatant rispansabiliti fi shepad ih peepl. (1 Peet. 5:2) Eldaz ku laan wahn lat if dehn egzamin how Nehimaiya mi chreet Jehoava peepl. Az govna a Jooda, Nehimaiya mi ga wahn lata atariti. (Neh. 1:11; 2:7, 8; 5:14) Imajin som a di chalenjiz weh Nehimaiya mi fays. Hihn mi laan dat di Jooz mi yooz di templ fi tingz weh neva shoa rispek fi di wership a Jehoava. Aalso, dehn neva mi-di gi kanchribyooshan tu di Leevait dehn laik weh Jehoava Laa mi seh fi du. Dehn neva mi-di obay Jehoava laa bowt di Sabat, ahn som a di man dehn mi geh marid tu uman fahn nayshanz weh neva wership Jehoava. Az di govna, Nehimaiya mi wahn haftu deel wid dis tof sichuwayshan. Weh hihn mi du?—Neh. 13:4-30.
10. How Nehimaiya mi rispan tu du chalenjiz weh ih mi fays?
10 Nehimaiya neva yooz ih atariti fi foas di peepl fi fala fi hihn aidyaaz. Raada, hihn mi poar owt ih haat tu Jehoava eena pryaa an aks ahn fi help, ahn hihn mi teech di peepl Jehoava Laa. (Neh. 1:4-10; 13:1-3) Aalso, Nehimaiya mi werk lang wid di peepl, hihn mi eevn help dehn fi bil bak di waal a Jeroosalem.—Neh. 4:15.
11. Akaadn tu 1 Tesaloanyanz 2:7, 8, how di eldaz shuda chreet adaz eena di kangrigayshan?
11 Eldaz mait noh haftu deel wid di saym prablemz laik weh Nehimaiya mi haftu deel wid, bot dehn ku kapi fi hihn egzampl eena wahn lata wayz. Fi egzampl, dehn werk haad fi help dehn bradaz ahn sistaz. Ahn dehn noh feel laik dehn beta dan adaz bikaaz a di atariti weh dehn gat. Insted, dehn chreet di kangrigayshan wid lov. (Reed 1 Tesaloanyanz 2:7, 8.) Di eldaz reeli lov di bradaz ahn sistaz eena di kangrigayshan. Dat da di reezn wai dehn taak tu dehn eena wahn kain way. Andrew, wahn elda wid lata ekspeeryens, seh: “Ai noatis dat wen wahn elda kain ahn frenli, ih toch di haat a di bradaz ahn sistaz. Dehnya kwalitiz moov di kangrigayshan fi waahn werk lang wid di eldaz.” Wahn nada brada weh naym Tony, hoo da wahn elda fi wahn lang taim, seh: “Ai persnali chrai fi yooz di kongsl da Filipiyanz 2:3 ahn noh tink dat Ai beta dan adaz. Dis help mi fi noh ak laik wahn komanda eena wahn aami.”
12. Wai ih impoatant fi mek eldaz bee hombl?
12 Eldaz need fi bee hombl, jos laik how Jehoava hombl. Aldoa Jehoava da di Roola a di yoonivers, hihn “stup dong” fi rayz op “di poa wan fahn di dos.” (Ps. 18:35; 113:6, 7) Di Baibl aalso tel wi dat Jehoava hayt peepl weh prowd.—Prov. 16:5.
13. Wai wahn elda need fi noa how fi ‘hoal ih tongʼ?
13 Wahn elda weh obay Jehoava need fi noa how fi ‘hoal ih tong.ʼ If ih noh noa how fi du dis, ih mait seh tingz weh noh kain if sombadi disrispek ahn. (Jay. 1:26; Gal. 5:14, 15) Andrew, weh wi mi menshan erliya, seh: “Sohntaimz wen Ah feel laik wahn brada er sista noh rispek mi, Ah wuda waahn seh tingz weh noh kain. Bot, Ah meditayt pahn di egzamplz a faytful wanz eena di Baibl, ahn dat help mi fi laan how impoatant ih impoatant fi bee hombl.” Wen wahn elda taak tu di bradaz ahn sistaz er ada eldaz eena di kangrigayshan eena wahn kain ahn lovin way, hihn shoa dat ih di obay Jehoava.—Kol. 4:6.
WEH WAHN PA KU LAAN FAHN KING DAYVID
14. Weh rispansabiliti Jehoava gi tu di pa dehn, ahn weh hihn ekspek fahn dehn?
14 Jehoava asain di pa az di hed a di famili, ahn Gaad waahn ih teech, gaid, ahn karek ih chiljren. (1 Kor. 11:3; Ifee. 6:4) Bot dis noh meen dat wahn pa ku yooz ih atariti eena eni way ih waahn. Jehoava da di Kriyayta a di famili, soh di pa dehn rispansabl tu Hihn fi di way dehn chreet dehn famili. (Ifee. 3:14, 15) Wahn pa shoa dat ih obay Jehoava wen ih yooz ih atariti eena wahn way weh pleez Gaad. Wahn pa ku laan wahn lat if ih stodi di laif a King Dayvid.
Di way wahn Kristyan pa pray shuda shoa ih famili dat ih hombl (Paragraaf 15-16)f
15. Wai King Dayvid da wahn gud egzampl fi di pa dehn kansida?
15 Jehoava mi apoint Dayvid noh onli az hed a ih famili bot aalso az hed a di hoal nayshan a Izrel. Sins Dayvid da-mi king, hihn mi ga wahn lata powa. Sohntaimz, doh, hihn mi yooz ih atariti eena di rang way an ih mi mek sohn seeryos mistayk. (2 Sam. 11:14, 15) Bot how hihn mi shoa dat hihn mi obeedyant tu Jehoava? Hihn mi aksep Jehoava disiplin. Hihn mi poar owt ih haat tu Jehoava eena pryaa. Ahn hihn mi chrai ih bes fi obay Jehoava kongsl. (Ps. 51:1-4) Aalso, hihn mi hombl inof fi aksep gud advais fahn man ahn uman. (1 Sam. 19:11, 12; 25:32, 33) Dayvid mi laan fan ih mistayk dehn an ih mi mek ih servis tu Jehoava di moas impoatant ting eena ih laif.
16. Wat da som a di lesn dehn weh wahn pa ku laan fahn Dayvid?
16 Wat da som a di lesn dehn weh wahn pa ku laan fahn King Dayvid? Fos, noh yooz di atariti weh Jehoava gi yu eena wahn rang way. Sekant, admit yu mistayk dehn. Ahn terd, aksep kongsl weh bays pahn di Baibl fahn adaz. If yu du dat, yu famili wahn rispek yu bikaaz yu hombl. Wen yu di pray wid yu famili, poar owt yu haat tu Jehoava, ahn den yu famili wahn hyaa humoch yu pen pahn Jehoava fi help ahn gaidans. Ahn moas impoatant, mek yu servis tu Jehoava bee di moas impoatant ting eena yu laif. (Deut. 6:6-9) Yu gud egzampl da wan a di moas preshos gif yu ku giv tu yu famili.
WEH WAHN MA KU LAAN FAHN MAYRI
17. Weh rispansabiliti Jehoava gi tu di ma dehn?
17 Jehoava aalso gi di ma dehn wahn impoatant rispansabiliti, ahn hihn gi dehn wahn amonk a atariti oava dehn chiljren. (Prov. 6:20) Weh wahn ma du er seh ku afek ih chiljren fi di res a dehn laif. (Prov. 22:6) Noatis weh wahn ma ku laan fahn Mayri, weh da-mi Jeezas ma.
18-19. Weh wahn ma ku laan fahn Mayri egzampl?
18 Mayri mi noa di skripchaz reeli gud. Shee mi ga deep rispek fi Jehoava an ih mi ga wahn kloas frenship wid hihn. Shee mi aalso wilin fi obay Jehoava, eevn doa dis mi meen dat evriting eena ih laif mi wahn chaynj.—Look 1:35-38, 46-55.
If wahn ma taiyad, shee mait need fi put wahn lata efoat fi shoa lov fi ih famili (Paragraaf 19)g
19 Wahn ma ku kapi Mayri egzampl eena wahn lata impoatant wayz. Az wahn ma, how yu ku du dis? Fos, yu need fi stodi di Baibl pahn yu oan ahn pray regyula pahn yu oan soh dat yu ku kip yu frenship wid Jehoava schrang. Sekant, yu need fi bee wilin fi mek chaynjiz eena yu laif fi pleez Jehoava. Fi egzampl, maybi yu mi geh rayz bai payrents weh geh beks fi evri lee ting ahn weh taak rof tu yu. Soh yu mait tink dat ih naamal fi chreet yu chiljren laik dat. Eevn afta yu laan how Jehoava waahn yu chreet yu chiljren, ih mait stilyet bee haad fi mek yu stay kaam ahn bee payshent wid dehn, espeshali wen yu taiyad. (Ifee. 4:31) Wen yu feel da way, ih veri impoatant dat yu aks Jehoava fi help. Wahn ma weh naym Lydia seh: “Sohntaimz, Ai doz haftu pray reeli haad soh dat Ah noh taak rof wen mi son disobay mi. Ah doz eevn stap midl a wahn sentens ahn pray kwaiyet-wan tu Jehoava fi help. Pryaa doo kip mi kaam.”—Ps. 37:5.
20. Weh chalenj sohn ma fays, ahn how dehn ku werk tingz owt?
20 Wahn nada chalenj weh sohn ma mait fays da dat dehn fain it haad fi shoa dehn chiljren humoch dehn lov dehn. (Taitos 2:3, 4) Wan reezn da bikaaz sohn ma neva geh rayz eena wahn famili wehpaat dehn payrents mi ga wahn kloas rilayshanship wid dehn. If da soh yoo mi geh rayz, yu noh haftu mek di saym mistayk yu payrents mi mek. Wahn ma hoo obay Jehoava mait haftu laan how fi shoa lov tu ih chiljren. Ih mait bee haad fi mek ih chaynj di way ih tink, di way ih feel, ahn di way ih ak. Bot ih pasabl fi mek ih chaynj, ahn dat wahn mek shee an ih famili moch moa hapiya.
KANTINYU FI OBAY JEHOAVA
21-22. Akaadn tu Isaiah 65:13, 14, how wi ku benifit wen wi obay Jehoava?
21 King Dayvid mi noa wai ih gud fi obay Jehoava. Hihn mi rait: “Di aadaz fahn Jehoava raichos, ih kaaz di haat fi rijais; di komanment fahn Jehoava kleen, ih mek di aiy dehn brait. Yu servants mi geh waan bai dehn; if yu fala dehn, yu wahn ga wahn big riwaad.” (Ps. 19:8, 11) Tudeh, wi ku si di difrens bitween peepl weh obay Jehoava ahn peepl hoo rijek fi hihn lovin kongsl. Peepl hoo obay Jehoava “showt eena jai bikaaz a di gud kandishan a di haat.”—Reed Isaiah 65:13, 14.d
22 Wen wahn elda, wahn pa, ahn wahn ma obay Jehoava, dehn laif geh beta, dehn famili geh hapiya, ahn di hoal kangrigayshan geh moa yoonaitid. Bot moa impoatant, dehn mek Jehoava haat rijais. (Prov. 27:11) Dat da di graytis jai yu kuda eva gat!
SANG 123 Bee Laayal an Obay Jehoava Roolaship
a Dis aatikl wahn diskos wai wi shuda obay Jehoava. Ih wahn aalso eksplayn how wahn elda, wahn pa, ahn wahn ma shuda yooz di atariti weh Jehoava giv eech wan a dehn. Dehn ku laan wahn lat fahn Nehimaiya di govna, King Dayvid, ahn Mayri, weh da-mi Jeezas ma.
b WEH IH MEEN? Di werdz obay an obeedyans ga wahn negitiv meenin tu peepl weh geh foas fi du sohnting. Pahn di ada han, Gaad peepl chooz fi obay hihn, soh dehn noh vyoo obeedyans eena wahn negitiv way.
c Som a di naym dehn chaynj.
d Isaiah 65:13, 14: “Soh dis da weh di Sovrin Laad Jehoava seh: ‘Luk! Mai servants wahn eet, bot yoo wahn goh hongri. Luk! Mai servants wahn jrink, bot yoo wahn goh tersti. Luk! Mai servants wahn rijais, bot yoo wahn sofa shaym. Luk! Mai servants wahn showt eena jai bikaaz a di gud kandishan a di haat, bot yoo wahn krai owt bikaaz a di payn eena yu haat ahn yu wahn baal bikaaz a wahn dipres spirit.ʼ”
e DI PICHA DEHN: Wahn elda di werk lang wid ih son eena Kingdom Haal mantaynans, jos laik how Nehimaiya mi persnali help fi bil bak di waal a Jeroosalem.
f DI PICHA: Wahn pa di pray tu Jehoava wid ih famili.
g DI PICHA: Wahn lee bwai spen owaz afta owaz di play veedyo gaym an ih noh finish ih werk rong di hows ner ih hoamwerk. Eevn doa ih ma taiyad fahn werk, ih disiplin ih son widowt geh beks er taak tu ahn rof.