WEE KU GEH RID A HAYCHRID

2 | Noh Tek Rivenj

Di Baibl Seh:

“If sombadi du unu sohnting bad, noh pay bak bad fi bad. . . . Du aal weh unu kud fi liv eena pees wid evribadi. . . . If sombadi du unu sohnting bad, noh chrai mek dehn pay fi weh dehn du unu. . . . Kaaz da jos laik weh rait dong eena di Skripchaz: ‘Jehoava seh, “Venjans bilangz tu mee. Ai wahn pay dehn bak fi di bad tingz weh dehn du.”ʼ”—ROAMANZ 12:17-19.

Weh ih Meen?

Ih naamal fi mek wi geh beks wen sohnbadi du wi sohnting bad, bot Gaad noh waahn mek wi tek rivenj. Insteda dat, hihn inkorij wi fi wayt pan ahn bikaaz hihn wahn soon geh rid a injostis.—Psalm 37:7, 10.

Weh Yu Ku Du?

Wen imperfek hyoomanz tek rivenj, ih kaaz moa haychrid. Soh dat da wai if sohnbadi du yu sohnting weh ofen er hert yu, noh tek rivenj. Chrai kanchroal yu feelinz ahn ga pees. Sohntaim, ih mait beta fi jos ferget bowt weh mi hapm. (Proverbs 19:11) Ada taimz, ih mait bee beta fi ripoat weh mi hapm. Fi egzampl, if yu da wahn viktim a wahn kraim, yu ku chooz fi ripoat it tu di polees.

Rivenj onli kaaz moa haychrid

Wat if dehn noh ga no peesful way fi fiks di prablem? Er wat if yu don du evriting weh yu kud fi fiks di prablem eena wahn peesful way? Noh tek rivenj, dat onli mek di prablem wers. If yu noh tek rivenj, yu wahn di help geh rid a haychrid. Chros eena Jehoava way fi fiks di prablem. “Pen pahn hihn, an hihn wahn help yu.”—Psalm 37:3-5.

Wahn Chroo-Laif Stoari—ADRIÁN

Mi Stap Tek Rivenj

Az wahn teenayja, Adrián mi vailent, an ih mi ga soh moch haychrid dat ih mi redi fi hert enibadi weh mi hert ahn. Hihn seh: “Ai mi aalwayz eena shoot owt, ahn wahn lata taim dehn mi tink Ah ded bikaaz Ah mi kova wid blod pahn di schreet.”

Adrián mi staat tu stodi di Baibl wen ih mi 16 yaaz oal. Hihn seh: “Az Ah mi-di mek proagres eena mi Baibl stodi, Ah mi riyalaiz dat Ah mi need fi chaynj mi persnaliti.” Hihn mi need fi geh rid a di haychrid weh mi deh eena ih haat ahn noh yooz vailens fi solv ih prablemz. Hihn mi reeli benifit fahn weh Roamanz 12:17-19 seh bowt noh tek rivenj. Hihn seh: “Ai mi andastan dat Jehoava da di wan weh wahn geh rid a injostis eena ih oan way an eena ih oan taim. Lee bit bai lee bit, Ah mi-di stap ga wahn vailent bihayvya.”

Wahn eevnin, wahn groop a yong man weh yoostu fait gens Adrián mi atak ahn. Di leeda a di gang mi seh: “Kohn, mek wi fait!” Wen Adrián luk bak pahn weh mi hapm, ih seh: “Ai reeli mi waahn fait bak ahn tek rivenj.” Bot insteda tek rivenj, Adrián mi pray tu Jehoava an ih mi lef fahn deh.

Adrián seh: “Di neks day, Ah mi bok op tu di gang leeda an ih mi deh bai ihself. Ah mi waahn tek rivenj bad, bot agen Ah mi stap an Ah pray tu Jehoava fi help mi kanchroal miself. Ah mi tink di gang leeda mi wahn beks, bot Ah mi sopraiz wen ih kom op tu mi ahn seh: ‘Ah sari fi weh hapm yestudeh. Fi tel yu di chroot, Ai reeli wuda waahn bee laik yoo. Ah waahn stodi di Baibl.ʼ Ah mi soh hapi dat Ah kuda mi kanchroal mi anga! Bikaaz a dat, wi mi staat tu stodi di Baibl tugeda.”