Yoo Redi fi Wen Gaad ‘Gi Wi di Ertʼ?
AALA wi luk faawod fi di day wen Jeezas pramis wahn kohn chroo: “Di wan dehn weh hombl wahn bee hapi, bikaaz Gaad wahn gi dehn di ert.” (Mach. 5:5) Gaad wahn gi dehn wan weh anointid di ert wen ih put dehn fi rool oava it az king lang wid Jeezas da hevn. (Rev. 5:10; 20:6) Bot moas Kristyanz tudeh luk faawod tu wen Gaad gi dehn di ert fi mek dehn liv fareva pan it. Dehn wahn bee perfek ahn hapi, ahn dehn wahn liv eena pees. Bot dehn wahn ga lata werk fi du fi mek dat pasabl. Fi egzampl, dehn wahn haftu mek di ert wahn paradais. Dehn wahn haftu teech peepl weh kohn bak tu laif ahn mek shoar dat dehn ga aal weh dehn need. Soh tink bowt weh wee ku du now fi shoa dat wi waahn du dehndeh tingz eena di nyoo werl.
YOO REDI FI MEK DI ERT WAHN PARADAIS?
Wen Jehoava mi koman hyoomanz fi “ful op di ert ahn tek kayr a it,” hihn mi-di seh dat di hoal ert mi fi bee wahn paradais. (Gen. 1:28) Di peepl weh wahn liv fareva wahn haftu obay da saym koman. Bot dehn noh wahn ga wahn lee paradais fi staat owt wid bikaaz di gyaadn a Eedn noh egzis nohmoh. Afta Armagedon, wi wahn haftu kleen op aala di ayrya weh damij. Dat wahn bee wahn lata werk!
Dat mait mek yu memba aala di werk weh di Izrelait dehn mi haftu du wen dehn mi lef Babilan ahn gaahn bak hoam. Nobadi mi liv pahn dehn lan fi 70 yaaz. Bot Aizaiya mi prafesai dat wid Jehoava blesin, dehn mi wahn aybl fi mek it byootiful agen. Di prafesi seh: “Ih wahn mek fi shee wildanes bee laik di gyaadn a Eedn an ih dezert bee laik Jehoava gyaadn.” (Isa. 51:3) Jehoava mi help di Izrelait dehn fi mek dehn lan wahn byootiful plays. Saym way soh, wid Jehoava blesin, di peepl weh hihn giv di ert tu wahn ton it intu wahn paradais. Ahn yoo ku shoa fahn now dat yu waahn tek paat eena da werk.
Wan way how yu ku shoa dat da wen yu du aal weh yu kud fi kip yu hows neet ahn kleen. Yu ku du dat eevn if yu nayba dehn noh di du di saym. Yu ku du eevn moa wen yu help kleen ahn mantayn yu Kingdom Haal an Asembli Haal. If yu kud, yu ku valantyaa fi help owt wen eni nachral dizaasta hapm. Wen yu du tingz laik dat, yu di shoa dat yu redi fi help owt enitaim peepl need it. Aks yuself, ‘Ai ku laan eni nyoo skilz weh Ah ku yooz eena Paradais if Jehoava alow mi fi liv pahn di ert fareva?ʼ
YOO REDI FI HELP PEEPL WEH WAHN KOHN BAK TU LAIF?
Rait afta Jeezas rezorek Jairos daata, ih seh fi gi di lee gyal sohnting fi eet. (Maak 5:42, 43) Ih praabli neva aal dat haad fi tek kayr a da lee gyal. Bot tink bowt humoch werk wi wahn haftu du wen Jeezas pramis kohn chroo, weh seh dat “aala di wan dehn weh deh eena di toom dehn wahn hyaa fi hihn vais ahn kom owt.” (Jan 5:28, 29) Di Baibl noh tel wi egzakli how tingz wahn werk owt, bot wi ku praabli imajin dat evribadi weh wahn kohn bak tu laif wahn need help fi geh food, lajin, ahn kloaz. How yoo ku shoa fahn now dat yu redi fi help owt wid aala da werk? Dehnya da sohn tingz weh yu ku du now fi shoa dat yu redi fi help.
Weh yu ku du now fi shoa dat yu redi fi wen Gaad gi wi di ert?
Wen di kangrigayshan anonks dat di serkit oavaseeya wahn vizit, yoo ku aafa fi invait ahn fi eet wid yu. Wen speshal ful-taim servants weh mi-di serv da Betel geh asain tu yu kangrigayshan er wen wahn serkit oavaseeya asainment finish, yu ku help dehn fain wahn plays fi liv. If dehn wahn ga wahn reejinal kanvenshan er speshal kanvenshan eena yu ayrya, maybi yoo ku valantyaa fi help owt bifoa an afta di kanvenshan er fi dehdeh fi welkom vizitaz.
YOO REDI FI TEECH PEEPL WEH KOHN BAK TU LAIF?
Sayka weh wi reed da Aks 24:15, wi ekspek bilyanz a peepl fi kohn bak tu laif. Lata dehn wahn bee peepl weh neva geh wahn chaans fi noa Jehoava. Soh dehn wahn geh da chaans afta dehn geh rezorek.a Gaad faytful servants weh ga lata ekspeeryens wahn dehdeh fi help teech dehn di chroot. (Isa. 11:9) Wahn sista weh naym Charlotte, hoo don preech da Europe, South America, an Africa, di luk faawod tu dat. Shee seh: “Ah luk faawod fi teech peepl weh wahn kohn bak tu laif. Lata taim wen Ah reed bowt sohnbadi weh mi liv eena di paas, Ah wuda seh tu miself: ‘If dis persn mi onli noa Jehoava, ih laif mi wahn bee soh difrent.ʼ Ah kyaahn wayt fi tel dehndeh peepl bowt Jehoava ahn humoch beta dehn laif wahn bee if dehn serv ahn.”
Eevn Jehoava faytful servant dehn weh mi liv bifoa Jeezas mi kohn pahn ert wahn ga wahn lat fi laan. Tink bowt how hapi wi wahn bee fi ga di privilij fi help dehn. Fi egzampl, Danyel mi rait dong lata prafesi weh hihn neva eevn andastan. (Dan. 12:8) Imajin yu geh di privilij fi eksplayn tu ahn how aala dehn mi kohn chroo. Er sopoaz yu geh fi tel Root ahn Nayomi how di Mesaiya mi kohn fahn fi dehn famili lain. Wi wahn bee soh hapi fi werk haad di teech peepl aal oava di ert, widowt non a di prablemz weh wi ga rait now eena disya wikid werl.
Soh how yoo ku shoa fahn now dat yu redi fi help teech peepl wen dehn kohn bak tu laif? Wan way da fi werk haad fi bee wahn beta teecha ahn fi preech regyula. (Mach. 24:14) Eevn if yu kyaahn du az moch az yu mait waahn rait now bikaaz a ayj er eni ada reezn, di werk weh yu du shoa dat yu redi fi teech peepl weh geh rezorek.
Yes, ih gud fi tink bowt dehnya impoatant kweschan: Yoo reeli di luk faawod tu wen Gaad gi wi di ert? Yoo eksaitid fi tek paat eena di werk fi mek di ert wahn paradais? Yoo redi fi teech peepl weh kohn bak tu laif ahn mek shoar dat dehn ga aal weh dehn need? Yoo ku shoa dat yu redi fi di werk wi wahn ga fi du eena di fyoocha wen yu tek eni chaans fi help owt rait now!
a Si di aatikl weh naym “Help Lata Peepl fi Du Weh Rait” eena di Septemba 2022 kapi a Di Wachtowa.