1. Wi Ku Blaym Gaad fi Wi Oan Sofarin?

Wai di Ansa Soh Impoatant

Wahn lata peepl rijek Gaad bikaaz dehn blaym hihn fi dehn sofarin.

Tink Bowt Dis

Lata rilijan teech dat da Gaad kaaz wi sofarin, eevn if dehn noh kom owt schrayt ahn seh it. Fi egzampl, som a dehn seh:

• Wen wahn nachral dizaasta hapm, da bikaaz Gaad di ponish peepl.

• Wen pikni ded, da bikaaz Gaad need moa aynjelz da hevn.

• Gaad tek said eena waar, ahn waar kaaz wahn lata sofarin.

Bot yu tink ih pasabl dat weh dehndeh rilijos leeda di teech bowt Gaad rang? Sopoaz Gaad don rijek dehn?

Di Baibl Seh

Gaad noh kaaz wi sofarin.

If da soh, dat wuda goh gens weh di Baibl tel wi bowt Gaad. Fi egzampl:

“[Gaad] aalwayz du weh rait. . . . Ih aalwayz du weh rait an anarabl.”—DEUTERONOMY 32:4.

“Ih noh pasabl fi mek di chroo Gaad du wikidnis, fi mek di Almaiti du weh rang!”—JOB 34:10.

“Di Almaiti aalwayz du weh rait.”—JOB 34:12.

Gaad rijek eni rilijan weh teech lai bowt ahn.

Dis inklood eni rilijan weh teech dat Gaad kaaz sofarin, er weh noh kandem waar ahn vailens.

“Di prafit dehn di prafesai loan lai eena mai naym [Gaad naym]. Ai neva sen dehn an Ah neva koman dehn ner taak tu dehn. Weh dehn di prafesai tu unu da wahn faals vizhan, . . . ahn di chrikinis a dehn oan haat.”—JEREMIAH 14:14.

Jeezas mi kandem rilijan weh noh teech di chroot.

“Da noh evribadi weh stodi di kaal pahn mi ahn seh, ‘Laad, Laad,ʼ wahn geh fi bee paat a di kingdom a hevn, yu noh. Da oanli dehn wan weh du weh mai Faada da hevn waahn dehn du. Wen di Day kohn wen Gaad joj evribadi, wahn lata peepl wahn tel mi seh, ‘Laad, Laad, wee mi-di preech eena yu naym ahn wi eevn jraiv owt deeman ahn du miraklz eena yu naym.ʼ Den Ai wahn tel dehn playn ahn schrayt, ‘Mee noh noa da hoo unu. Get fahn fronta mi, unu wikid peepl unu!ʼ”—MACHYU 7:21-23.