Yoo Ga Prejudis Eena Yu Haat?
Prejudis da laik wahn dizeez an ih ku hert wi. Ahn moas peepl noh eevn noa dat dehn ga dis siknis—prejudis—eena dehn haat.
Som peepl shoa prejudis tu adaz bikaaz dehn kohn fahn wahn difrent rays, chraib, er bakgrong; bikaaz dehn bilangz tu wahn difrent rilijan; bikaaz dehn da wahn uman (er eevn bikaaz dehn da wahn man); bikaaz a dehn ayj; bikaaz a dehn ejukayshan; bikaaz dehn kripl er sik; er bikaaz a how dehn luk. Bot eevn soh, dehn saym peepl mait feel laik dehn noh ga prejudis eena dehn haat.
Yu tink yoo ga prejudis eena yu haat? Moas a wi noa wen ada peepl di shoa prejudis, bot sohntaim ih haad fi admit wen da wee di shoa prejudis. Bot dis da di chroot: Aala wi ga wahn lee bit a prejudis eena wi haat. David Williams, wahn teecha weh deel wid hyooman bihayvya, seh: “Wen peepl tink bowt wahn sertn rays eena wahn negitiv way ahn den meet sombadi fahn da rays, dehn wahn chreet da persn bad ahn noh eevn noa it.”
Fi egzampl, eena wahn konchri da Europe wehpaat Jovica liv, dehn ga wahn rays a peepl weh adaz luk dong pan. Jovica seh: “Eevn doa Ah neva tink dat enibadi fahn dis rays kuda bee wahn gud persn, Ai stil neva si miself az sombadi weh shoa prejudis. Ah mi jos tink dat weh Ai noa bowt dehn da di chroot.”
Wahn lata govament paas difrent laa fi fait gens raysizm an ada kaina prejudis. Bot wi stil di si prejudis rong wi tudeh. Wai? Bikaaz dehndeh laa onli deel wid how wahn persn bihayv. Dehn kyaahn kanchroal how wahn persn tink ahn feel, bikaaz prejudis staat eena wahn persn main ahn haat. Soh weh yu tink? Yu tink dat wi ku win di fait gens prejudis? Weh ku help wi fi fait gens prejudis?
Di res a aatikl dehn eena dis magazeen wahn diskos faiv skripchaz weh don help wahn lata peepl aredi fi geh rid a prejudis fahn owta dehn main ahn haat.