Geh di Faks

Di Prablem

Yoozhwali peepl weh prejudis feel da way bikaaz a faals infamayshan. Noatis dehnya egzampl:

• Som peepl noh haiya uman fi du sertn jab kaaz dehn tink dat dehn noh smaat inof, ahn dat dehn noh ga di skilz ner di schrent fi du it. Bot dat rang.

• Bowt 700 yaaz agoa da Europe, peepl mi akyooz di Jooz seh dat dehn mi paizn dehn wel ahn spred dizeez, eevn doa da neva chroo. Den layta, bifoa Werl Waar II, di Nazi dehn mi blaym di Jooz fi di moni prablemz da Germany. Bikaaz a dehn tingz, lata peepl mi prejudis tuwaadz di Jooz, ahn wi ku stil si prejudis gens dehn tudeh day.

• Wahn lata peepl bileev dat sombadi weh kripl er hoo kyaahn help dehnself da wahn sad er mizarabl persn. Bot dat rang tu.

Peepl weh bileev dehndeh stoari mait yooz difrent egzampl er evidens fi proov dat weh dehn di seh er feel da chroo. Ahn dehn tink dat enibadi weh noh gree wid dehn noh noa beta.

How di Baibl Ku Help Wi fi Deel Wid Dis Prablem?

“Ih noh gud fi mek wahn persn deh widowt nalij.”—PROVERBS 19:2.

Weh dat meen? Wen wi noh ga aala di faks, wi mek bad disizhanz. An if wi bileev peepl stoari insteda geh di faks, wi wahn joj peepl eena di rang way.

Wai ih Gud fi Mek Wi Noa di Chroot Bowt Ada Peepl?

Wen wi noa di chroot bowt peepl, wi noh wahn bileev di faals tingz weh adaz seh bowt dehn. Ahn wans wi fain owt dat di negitiv tingz weh peepl di seh bowt wahn sertn groop er rays da noh chroo, wi noh wahn bee kwik fi bileev evriting weh wi hyaa bowt ada peepl nohmoh.

Weh Yu Ku Du?

• Memba dat wen yu hyaa negitiv tingz bowt wahn sertn rays a peepl, dat noh meenz dat evribadi fahn da rays da laik dat.

• Memba dat yu noh noa evriting bowt peepl.

• Mek shoar yu ku chros di infamayshan weh yu gat.