Memba Weh Hapm tu Lat Waif

Lat mi liv wid ih onkl Aybraham da di lan a Kaynan. Aybraham ahn Lat mi ga soh moch animal dat dehn neva ga inof lan fi aala dehn. Dat da wai Aybraham tel Lat: ‘Wi kyaahn stay da di saym plays nohmoh. Pleez chooz wich way yu waahn goh, den Ai gwehn di neks way.ʼ Aybraham mi kain wid ih nefyu, noh chroo?

Lat mi si wahn pees a lan weh mi onli priti, ih mi kloas tu wahn siti weh naym Sadam. Dehn mi ga lata waata ahn green graas deh. Soh dat da wehpaat hihn mi disaid fi kehr ih famili fi liv.

Di peepl fahn Sadam ahn fahn Gomoara mi veri bad. Dehn mi soh bad dat Jehoava disaid fi dischrai dehndeh too siti. Bot Gaad mi waahn sayv Lat an ih famili, soh ih sen too aynjel fi waan dehn. Di aynjel dehn seh: ‘Hori! Get owt fahn dis siti kaaz Jehoava wahn dischrai it!ʼ

Lat neva lef rait away; ih mi tek lang fi lef di siti. Soh di aynjel dehn grab Lat, ih waif, an ih too daata dehn bai dehn han ahn kehr dehn owta di siti. Dehn seh: ‘Ron fi unu laif! Noh luk bak. If unu luk bak, unu wahn ded!ʼ

Wen dehn reech di siti a Zoawar, Jehoava mek faiya ahn solfa rayn dong pahn Sadam ahn Gomoara. Dehndeh too siti mi geh kompleetli dischrai. Wen Lat waif chooz fi noh obay Jehoava ahn luk bak, ih hoal badi mi ton intu saalt! Bot Lat an ih daata dehn mi sayf bikaaz dehn mi chooz fi obay Jehoava. Dehn mosi mi veri sad dat Lat waif neva obay. Bot dehn mi glad dat dehn mi lisn tu weh Jehoava seh.