Dehn Mek Wahn Pramis tu Jehoava

Bowt too monts afta di Izrelaits lef Eejip, dehn mi reech da Mongt Sainai ahn dehn set op dehn tent. Jehoava mi tel Moaziz fi goh op di mongtin, an ih tel ahn: ‘Ai mi protek di Izrelait dehn. If dehn obay mi ahn kip mi laa dehn, dehn wahn bee mai speshal peepl.ʼ Moaziz gaahn bak dong di mongtin an ih tel di Izrelaits weh Jehoava seh. Weh dehn mi du? Dehn tel Moaziz: ‘Wi wahn du evriting weh Jehoava tel wi fi du.ʼ

Moaziz gaan op di mongtin agen. Rait deh, Jehoava tel ahn: ‘Eena chree dayz, Ah wahn kohn taak tu yu. Mek shoar yu waan di peepl fi noh kom op pahn Mongt Sainai.ʼ Den Moaziz gaahn dong an ih tel di Izrelait dehn fi geh redi fi lisn tu Jehoava.

Chree dayz layta, di Izrelaits mi si laitnin ahn wahn daak klowd pahn di mongtin. Dehn mi aalso hyaa lata tonda ahn wahn lowd naiz fahn wahn haan. Den Jehoava mi kohn dong pahn di mongtin eena faiya. Di Izrelaits mi soh fraitn dat dehn staat tu chrimbl anaal. Di hoal mongtin mi-di shayk an ih mi kova wid smoak. Di song fahn di haan mi geh lowda ahn lowda. Den Jehoava mi seh: ‘Ai da Jehoava. Unu noh fi wership no ada gaad.ʼ

Moaziz gaahn bak op di mongtin, ahn Jehoava mi giv ahn laaz fi di peepl. Dehndeh laa mi tel dehn how dehn shuda wership Jehoava ahn how dehn shuda bihayv. Moaziz mi rait dong di laaz ahn den ih reed it tu di Izrelaits. Ahn dehn mi pramis: ‘Wi wahn du evriting weh Jehoava tel wi fi du.ʼ Yes, dehn mi mek wahn pramis tu Gaad. Bot yu tink dehn mi kip dehn pramis?