Wahn Pramis Weh Jefta Mek

Di Izrelaits mi lef Jehoava agen ahn dehn staat tu wership faals gaadz. Wen di Amonait dehn atak ahn staat tu fait gens di Izrelaits, dehndeh faals gaadz neva du notn fi help dehn. Di Izrelaits mi-di sofa fi lata yaaz. Fainali, dehn tel Jehoava: ‘Wi sin gens yu. Pleez sayv wi fahn wi enimi dehn.ʼ Soh di Izrelaits mi dischrai dehn aidolz ahn dehn mi staat tu wership Jehoava agen. Jehoava neva waahn kantinyu si dehn di sofa.

Soh di Izrelaits mi chooz wahn wariya weh naym Jefta fi tek di leed eena di batl gens di Amonait dehn. Jefta tel Jehoava: ‘If yu help wi win dis batl, Ah pramis dat wen Ah kohn bak hoam, Ah wahn gi yu di fers persn weh kom owt fi meet mi.ʼ Jehoava mi lisn tu Jefta pryaa, an ih mi help ahn win di batl.

Wen Jefta mi kohn bak hoam, di fers persn fi kohn meet ahn da-mi ih daata, weh da-mi ih onli pikni. Shee mi-di daans ahn play di tambareen. Weh Jefta mi wahn du? Hihn mi memba ih pramis ahn seh: ‘Oa mi daata! Yu brok mi haat. Ah mi mek wahn pramis tu Jehoava. If Ah waahn kip mi pramis, Ah mos sen yu fi serv da di tabernakl da Shailo.ʼ Bot ih daata tel ahn: ‘Dad, if yu mek wahn pramis tu Jehoava, yu haftu du weh yu pramis. Aal Ah aks fa da fi mek Ah goh spen too monts wid mi frenz da di mongtin. Den Ah gwehn.ʼ Jefta daata mi faytful an ih mi serv da di tabernakl fi di res a ih laif. Evri yaa, ih fren dehn gaahn vizit ahn da Shailo.